DIE UITWERKING VAN SKOOLKULTUUR EN -KLIMAAT OP ...

2.4.2 Definisies van skoolkultuur
24
Hoofstuk 2: Skoolkultuur en -klimaat: ’n teoretiese begronding
Barth (2002:7) definieer skoolkultuur as ʼn komplekse patroon van norme, houdings,
oortuigings, gedrag, waardes, seremonies, tradisies en mites wat diep in elke aspek
van die skool gesetel is. Dit is ʼn historiese nalatenskap van mag wat uitgeoefen word
oor mense se denke en hulle gedrag. Hinde (2004:2) sien skoolkultuur as norme,
oortuigings, tradisies en gebruike wat oor ʼn tydperk in ʼn skool ontwikkel is. Dit is,
volgens laasgenoemde skrywer, ʼn stel vanselfsprekende verwagtinge en
veronderstellinge wat die aktiwiteite van die skoolpersoneel en leerders direk
beïnvloed. Deal en Peterson (1999:8) omskryf skoolkultuur as:
... a complex web of traditions and rituals that have built up over time as
teachers, parents and administration work together and deal with crisis and
accomplishments...culture patterns are highly enduring, have a powerful
impact on performance, and shape the ways people think, act and feel.
Uit bogenoemde definisies kan afgelei word dat skoolkultuur nie staties is nie. Dit
word voortdurend hervorm en ontwikkel soos die tradisies en rituele van ʼn
skoolgemeenskap op mekaar inwerk. Skoolkultuur word dus gevorm deur die
interaksie tussen die lede van die gemeenskap terwyl die aksies van die
skoolgemeenskap weer gelei word deur die kultuur. Dit is dus ʼn selfherhalende
siklus. Om op te som kan skoolkultuur beskou word as ʼn algemene term vir die
onderliggende veronderstellinge, waardes en norme in ʼn skool, asook die mites,
helde, simbole, praktyke en rituele waarin die latente kultuur homself manifesteer.
Skoolkultuur kan dus gesien word as ʼn weerspieëling van gedeelde idees,
veronderstellinge en oortuigings wat elke skool sy eie identiteit en standaard van
gedragsuitkomste gee.
2.4.3 Elemente van skoolkultuur
Elke skool het ʼn kultuur wat bepaal hoe mense op mekaar reageer, wat hulle gaan
doen of nie doen nie en wat hulle as reg of verkeerd beskou (Robbins & Alvy,
2009:23). Kultuur, volgens hierdie skrywers, weerspieël die aspekte waarvoor die
skoolgemeenskap omgee, hoe hulle feesvier en waaroor hulle praat. Dit kom voor in
hulle daaglikse roetines. Die skoolkultuur beïnvloed ook hulle produktiwiteit,
professionele ontwikkeling, leierskapspraktyke en tradisies (Robbins & Alvy,