DIE UITWERKING VAN SKOOLKULTUUR EN -KLIMAAT OP ...

2.5 ORGANISATORIESE KLIMAAT
2.5.1 Inleiding
32
Hoofstuk 2: Skoolkultuur en -klimaat: ’n teoretiese begronding
Die organisatoriese omgewing bepaal die gedrag van mense in ʼn organisasie
(Zagar, 2009:1). Volgens die skrywer is dit belangrik om menslike hulpbronne in ʼn
organisasie effektief te bestuur en om die omgewing te ken en te verstaan.
Vijayakumar (2007:249) voeg by dat aangesien organisatoriese kultuur en -klimaat
gebruik word om die organisatoriese omgewing te beskryf, dit ook as belangrike
psigologiese konstruksies beskou kan word in die funksionering en ontwikkeling van
organisasies.
Die belangrikheid in die bestudering van kultuur en klimaat word gebaseer op die
klassieke model van Levin (1936), waar gedrag as die gevolg van interaksie tussen
individue en hulle omgewing bespreek word. Daar word byvoorbeeld in die model
gevind dat ʼn individu op ʼn spesifieke situasie reageer, gebaseer op sy/haar
persepsie van so ʼn situasie. Dit beteken dat ʼn werksituasie of ʼn organisatoriese
omgewing spesifieke situasies skep wat die omgewing kan beperk, asook die gedrag
van lede in die organisasie kan beïnvloed (Patapas & Dirzyte, 2003:37).
2.5.2 Definisies van organisatoriese klimaat
Die huidige konsep van organisatoriese klimaat is eers omvattend in die 1970‟s
ondersoek, alhoewel die idee van organisatoriese klimaat al in die 1930‟s bekend
gestel is as die sosiale klimaat in die werksplek. Aanvanklik is organisatoriese
klimaat gedefinieer in terme van formele organisatoriese beleidstukke,
werknemersbehoeftes, waardes en persoonlikhede (Patapas & Dirzyte, 2003:37).
Daar is ook geargumenteer dat organisatoriese klimaat primêr bepaal word deur die
sienings van die leiers in ʼn organisasie en die verhoudings tussen bestuurders en
ondergeskiktes. Van die vroeëre definisies het ook bepaal dat organisatoriese
klimaat gesien kan word as ʼn normatiewe struktuur van houdings en
gedragstandaarde. Dit sou ook as basis dien vir die interpretering van situasies
asook om leiding en rigting aan aktiwiteite te gee (Kundu, 2007:100).
Die assessering van werknemers se persepsies van die organisasie het egter
toenemend die belangstelling van navorsers oor organisatoriese klimaat geprikkel.
Organisatoriese klimaat word deur navorsers as ʼn multidimensionele samestelling