DIE UITWERKING VAN SKOOLKULTUUR EN -KLIMAAT OP ...

2.4.4 Belangrikheid van skoolkultuur
28
Hoofstuk 2: Skoolkultuur en -klimaat: ’n teoretiese begronding
Elbot en Fulton (2008:2) is van mening dat skoolkultuur, of dit lewendig of sterwend
is, alles waarmee die skool geassosieer word, kan affekteer. Peterson en Deal
(2002:10), Barth (2002:7) asook Van der Merwe et al. (2003:15) sien kultuur as ʼn
netwerk van rituele, norme en waardes wat elke aspek van die skoollewe infiltreer.
Ook Matos, Lens en Vansteenkiste (2009:163) argumenteer dat skoolkultuur ʼn
impak op die algehele skoolomgewing kan hê. Die skrywers sien die impak van
kultuur veral op die akademiese en persoonlike ontwikkeling van leerders. Kultuur
kan ook eenheid en betekenis in die skoolomgewing skep wat betrokkenheid
inspireer en produktiwiteit kan verhoog. Weller en Weller (2002:139) verduidelik
bogenoemde stellings as volg: “to a large extent ... culture contributes to the school‟s
effectiveness or infectiveness.”
Kultuur, volgens die skrywers, stel dus vir die onderwysers en leerders die
standaarde en riglyne vir daaglikse aktiwiteite. Hoy en Miskel (2005:129) en Miles
(2003:348) is verder van mening dat skoolkultuur die skool as ʼn eenheid bymekaar
hou en dat dit aan die skool ʼn eiesoortige identiteit verskaf.
Uit die voorafgaande sienings oor die belangrikheid van skoolkultuur kom dit voor
dat al die skrywers dit eens is dat skoolkultuur belangrik is en dat dit elke aspek van
die skoollewe kan beïnvloed. Skoolkultuur kan dus eenheid en betekenis skep asook
betrokkenheid en produktiwiteit bevorder. Waar daar ʼn positiewe kultuur geskep is
en daar eenstemmigheid is om dié positiewe kultuur te handhaaf, kan daar dan tot
die gevolgtrekking gekom word dat sulke skole voorspoedig en vooruitstrewend sal
wees. Vir die doel van die studie is dit ook belangrik dat daar gekyk word na die
effek wat kultuur op die skoollewe het.
2.4.5 Die effek van kultuur op die skoollewe
Hinde (2004:3) vergelyk skoolkultuur met die lug wat ʼn mens inasem. Niemand sal
dit raaksien voordat dit nie bedorwe of vuil is nie. Volgens die skrywer kan kultuur ʼn
positiewe of ʼn negatiewe invloed hê op die funksionering van ʼn skool. Hansen en
Childs (1998:15) is van mening dat mense graag in ʼn omgewing wil werk waar die
toestande aantreklik en uitnodigend is. Die omgewing moet ʼn klimaat van
ondersteuning en aansporing hê waar die vlakke van fisiese gemak soos verhitting,