DIE UITWERKING VAN SKOOLKULTUUR EN -KLIMAAT OP ...

2.4.6 Die verband tussen skoolkultuur en -geweld
30
Hoofstuk 2: Skoolkultuur en -klimaat: ’n teoretiese begronding
Sullivan en Keeney (2008:6), Tableman (2004:2) en Cavanagh en Delhar (2001:8) is
dit eens dat skole nie leerders se reg tot onderwys of die daarstelling van effektiewe
dissipline en veiligheidsbeleidstukke kan verseker tensy daar ʼn gesonde en
gerespekteerde skoolkultuur teenwoordig is nie. Gesien teen die agtergrond van die
definisies van skoolkultuur (cf. 2.4.2) kan ʼn positiewe skoolkultuur ʼn omgewing skep
waar mense sosiaal, emosioneel en fisies veilig voel. Dit kan tot gevolg hê dat
onderwysers, leerders en ouers saamwerk om ʼn gemeenskaplike visie vir die skool
daar te stel. Die Verenigde Nasies se Committee on the Rights of the Child (2008:9)
erken ook dat skole ʼn kultuur waar menseregte soos begrip, vrede,
verdraagsaamheid en gelykheid ingebou is, moet bevorder.
Waar skole ʼn positiewe kultuur skep, dra dit by tot die verbetering van leerprosesse,
wat tot gevolg sal hê dat leerders ʼn gevoel van verbintenis met die skool ervaar en
dat dit op sy beurt weer sal bydra tot die vermindering van dissiplinêre probleme
(Sullivan & Keeney, 2008:6; Brady, 2008:2; Brown, 2004:4). Zepeda (2004:24) is ook
van mening dat ʼn positiewe skoolkultuur ʼn veiligheidsnet teen skoolgeweld kan
voorsien, maar dat ʼn negatiewe skoolkultuur ʼn donker wolk oor die aktiwiteite van
onderwysers en leerders kan vorm.
In navorsing oor misdaad in skole in die VSA is bevind dat skole wat ʼn positiewe
kultuur deur karakterbou en sosiale vaardighede bou, ʼn beter kans het om
skoolgeweld te beveg (Black, 2008:1). Daar is ook bevind dat spesifieke
sekerheidsmaatreëls en ingrypingsprogramme alleen geen impak op die voorkoming
van skoolgeweld het nie, maar waar programme in plek gestel is om die kultuur van
die skool te verbeter, daar minder geweldsmisdade voorgekom het. Bogenoemde
navorser het tot die gevolgtrekking gekom dat kultuurprogramme wat op die
verbetering van wedersydse respek, onderlinge verhoudings, empatie met ander en
gesonde skoolomgewings konsentreer, ʼn groter kans staan om geweldsmisdade by
skole teen te staan. Ook Sullivan en Keeney (2008:6) noem dat navorsing onder
onderwysers in skole in New York oor skoolveiligheid getoon het dat die
meerderheid van onderwysers van mening was dat die afwesigheid van ʼn
omvattende kultuur en positiewe verhoudings die grootste bedreiging vir veiligheid in
skole inhou. So, byvoorbeeld, is daar deur onderwysers gerapporteer dat in skole