scenarioJunie

2
••• REDAKTEURSBRIEF
As jy die koers kwytraak
Ek het ’n uitsonderlike verdwaal vernuf.
Ek sal lag-lag op ’n reguit pad deur die Karoo
ver dwaal en as ’n deurmekaar dorp soos Kimberley
my eers insluk, sal julle my oor ’n maand kry waar ek
maar ’n werkie by die Spur gaan bedel het omdat ek
nie weer die pad uit kon kry nie.
Tydens ’n besoek aan die Noord-Kaap is ek ook
nie hierdie “spesiale gawe” van my gespaar nie.
’n Nchaba, vir dié wat nie weet nie, is ’n tipe wilde
“aartappel” wat in sekere dele van die Kalahari groei
en so onder die grond wegkruip soos ’n skoolkind vir
’n tandartsafspraak. Dit proe soos ’n sampioen en
is blykbaar baie lekker, maar na ’n dag van Nchabas
soek, kon ek net nooit weer vat kry aan die lekkerny
nie.
Ek is losgelaat met ’n Checkers sakkie en my
oog is ingestel om enige krakie op die grond te
ondersoek vir ’n moontlike Nchaba wat dalk daar
kan uitloer. Toe ek weer opkyk is ek verlore! Met
ander woorde, ek het nie meer geweet waar ek is
nie en ná twee ure se sirkellopery het ek maar my
leë sakkie in ’n boom opgehang en op ’n klip gaan
sit en myself voorberei op ’n lang nag in die veld
saam met jakkalse en veediewe. Ek weet nie waar
die son moet sit of in watter rigting om te loop nie,
ek is ’n stadsmeisie, magtig!
SENWES SCENARIO
>
Net daar tref ’n nuwe moed my: Ek gaan reguit loop
en ek sal iewers by ’n draad uitkom wat my weer
na ’n pad sal lei en hopelik is dit nie Botswana
se grensdraad nie. Ná nog twee ure is ek toe
uiteindelik waar ek moes wees, al was dit met leë
hande.
Vanjaar se min reën sal baie van ons lesers laat
voel of hulle hierdie winter met leë hande ingaan.
Die weiding is min en menige veeprodusent is
moontlik bekommerd en weet nie in watter rigting
om te loop nie. Lees gerus die hoofstorie op bladsy
4 vir ’n proaktiewe droogtestrategie en hoe om
weiding te bestuur.
Ons fokus op dierevoeding vir hierdie uitgawe
en bladsy 28 en 29 handel oor produkte wat jou
hierdie winter handig te pas kan kom. Lees ook op
bladsy 20 oor die Sports Prestige-aand wat ten bate
van plaasveiligheid gehou is.
As jy verlore of verdwaal voel, besluit op ’n rigting
en slaan koers in, jy sal wel iewers uitkom – en as
alles ten goede meewerk, soos dit moet, mag jy op
die regte plek eindig.
Elmarie
• Alle regte van die inhoud van Senwes Scenario word voorbehou ingevolge die bepalings van Artikel 12 (7) van die Wet op Outeursreg.
• Die eienaar en uitgewer aanvaar nie aanspreeklikheid vir enige uitlatings in advertensies, promosie-artikels of deur medewerkers nie.
Elmarie Schoeman
www.senwes.co.za • Junie 2012