Volledige Jaarverslag (Afrikaans) - Shoprite Holdings Ltd

Bedryfsoorsig Meubels
AUBREY KARP
HOOFBESTUURDER:
OK MEUBELS
Verkope R2,573 miljard (2008: R2,258 miljard)
Handelswins R157,5 miljoen (2008: R155,2 miljoen)
Aantal winkels: House & Home 46 (2008: 39)
Aantal winkels: OK Furniture 204 (2008: 183)
Aantal winkels: OK Power Express 14 (2008: 14)
Aantal personeel 4 301 (2008: 3 668)
’n Toename in huishoudelike uitgawes in
die oorsigtyd het druk op besteebare inkomste
geplaas en dit het skuldvlakke veral onder
hoërinkomste-verbruikers laat styg. Vir die
meubelafdeling was die 12 maande tot einde
Junie dus ’n uitdagende tyd. In die
verswakkende handelsomgewing het
afslagwinkels die pryse van toebehore en
tuisvermaakprodukte selfs verder verlaag om
omset deur hoër eenheidsverkope te bou.
Om steeds mededingend te wees, moes die
meubelafdeling dieselfde doen. ’n Voordeel
was die swaai na duurder televisiestelle met
LCD- en plasmaskerms wat omset aangehelp
het en ook in ’n mate die druk verlig het om hoë
volumes per produk te moet verkoop.
Teen dié agtergrond het die meubelafdeling,
in ’n omgewing gekenmerk deur lae
inflasie, goed gevaar deur sy verkope vir die
24 SHOPRITE HOLDINGS BEPERK JAARVERSLAG 2009
jaar met 13,9% te verhoog. OK Furniture en
OK Power Express het steeds teen dieselfde
vlakke as voor die instelling van die Nasionale
Kredietwet (NKW) in Junie 2007 handel bly
dryf. Verkope in House & Home is egter steeds
onder druk. Sy prestasie is erg geraak deur
valutaskommelinge en die uitwerking daarvan
op die pryse van ingevoerde produkte. In die
jaar is ’n netto 28 winkels geopen. Hiervan was
sewe House & Home- en die res OK Furniturewinkels.
Die totale getal afsetpunte staan nou
op 264, waarvan 27 in die BLSN (Botswana,
Lesotho, Namibië, Swaziland) lande asook
Mosambiek in bedryf is. Meer winkels as
aanvanklik beplan is in die jaar geopen weens
geskikte persele wat beskikbaar geraak het.
Die vraag na krediet by winkels het
toe geneem, meestal van tradisionele House
& Home-klante wat hul kredietkaartperke
oorskry het, en nou gebruik moet maak van die
krediet wat kleinhandelaars bied. Dit geld nie
vir tipiese OK Furniture-klante wat nog steeds
baie min aan krediet blootgestel word nie. Die
vlakke van slegte skuld het in ooreenstemming
met klante se geldnood en dié van die finansieringsbedryf
gestyg, maar kwartaallikse
oudits deur onafhanklike ouditeure bevestig
dat die voorsiening vir slegte skuld meer as
voldoende is om enige gebeurlikheid die hoof te
bied.
Handel in die tweede helfte van die jaar was
strammer as in die eerste, soos gewoonlik in die
meubelbedryf die geval is. Die afdeling het
nogtans in die tweede helfte van die oorsigtyd
groei van 14,6% getoon wat gunstig met die res
van die bedryf vergelyk. In dié tyd het die
uitwerking van die afname in kleinhandelverkope
op vervaardigers ’n punt bereik waar
personeel uit diens gestel moes word of minder
ure moes werk, terwyl sommige fabrieke gesluit
het. Teen dié agtergrond en in ’n omgewing van
stygende inflasie, het die bestuur voorraadvlakke
verhoog om te verseker dat produkte
teen mededingende pryse beskikbaar bly.
Ondanks ’n swak geldeenheid vir die grootste
deel van die oorsigtyd, het die volgehoue
verbetering in die verkope van ingevoerde
goedere gehelp om winsgewendheid te verbeter,
danksy die hoër winsgrense wat hulle bied.
Dit is vir die afdeling ’n belangrike doelwit om dié
reekse steeds verder uit te brei. Dié strategie het
egter ook hoër voorraadvlakke tot gevolg,
aangesien buffervoorraad opgebou moes
word weens lang lewertye uit die buiteland.
Die langtermyndoelwit is om die getal
winkels met verloop van tyd te verdubbel,
aangesien die Groep glo dat die verskillende
kettings, veral OK Furniture, oor aansienlike
groeipotensiaal beskik. Aangesien die huidige
infrastruktuur aansienlik meer winkels kan
akkommodeer, sal die afdeling ondanks die
huidige afswaai voortgaan om nuwe winkels
teen ’n tempo van minstens 15 per jaar te open
om die volle voordeel uit ’n meer verteenwoordigende
netwerk te haal wanneer die ekonomie
herstel. Nuwe winkels word egter net geopen
as volhoubaarheidstudies hul lewensvatbaarheid
bevestig.