Folkeskolen i Grønland 2010/2011 - Inerisaavik

- atuartitsinerup ilisimasassanut samminissaa annertusarneqassaaq, tassa atuartitsineq
atuartitsissutinut agguataarnerullugu aammalu nammineq piumassutsimik atuarneq
sammivinnut agguataarlugu
- atuarfimmi sulinissamut piumassuseqarnerup annertusarneqarnissaa periarfissiuunneqassaaq.
Tamatuma kingorna atuarfik ukiuni qulingiluani pinngitsoorani atuarfiusussatut aaqqissuunneqarpoq,
tassa piareersarfiusumik atuarfik ukiumik ataatsimik sivisussuseqartoq tunngaviusumillu
atuarfik ukiunik arfineq-pingasunik sivisussuseqartoq. Nammineq piumassutsimik
atuarnerup ingerlateqqinnissaanut ukiuni marlunni nangitsiffittut atuarfik immikkoortunut
marlunnut aaqqissuunneqarpoq, ukiumi ataatsimi atuarfittut pikkorissarfimmik tullilerneqarsinnaasoq.
Tunngaviusumik atuarfimmi, nangitsiffiusumik atuarfimmi aamma pikkorissarfiusumik atuarfimmi
atuartitsineq pingaarnertut atuartitsissutini tamani atuartitsissutinut agguataagaalluni
aaqqissuunneqarpoq.
Piareersarfiusumik atuarfik tunngaviusumillu atuarfik (1. klassimiit - 9. klassimut) atuarfittut
ataasiusutut atuaqatigiit ingiaqatigiiffigisaattut ingerlanneqarput, aammalu atuarnerup ingerlanerani
atuartitsinerup inunnut ataasiakkaanut sammitinneqarnerunissaa anguniarneqartussaalluni.
Piareersarfiusumik atuarfik ineriartornermut siuarsaataasunik suliaqarfiusussaavoq. Tunngaviusumik
atuarfimmi atuartut klassini tamani kalaallisut, kisitsinermi/matematikkimi, kristumiussusilerinermi
/upperisalerinermi timersornermilu atuartinneqartarput. 4. klassimiit
danskit oqaasii, oqaluttuarisaaneq, uumassusilerineq nunalerinerlu atuartitsissutigineqartarput.
Danskisulli atuartitsineq 2. aamma 3. klassini ingerlanneqarsinnaavoq, taannalu annertusiartuinnartumik
atorneqalersimalluni. Aamma ilusilersuinermi aammalu erinarsornermi/nipilersornermi
atuartitsineq 2. klassiniit - 11. klassinut ingerlanneqarpoq, taavalu sananermi
assassornermilu 5. klassiniit - 9. klassinut, tuluttoornermi 7. klassi aallarnerfigalugu,
aammalu iganermi aamma fysik/kemiimi 8. klassiniit.
Ingerlaqqiffiusumik atuarfimmi ukiuni marlunni ingerlanneqartartussatut pilersaarusiorneqartartumi
atuartut sammivinnut assigiinngitsunik imaqartunut marlunnut agguarneqartarput, tassa
nalinginnaasumut aamma annertusisamut. Nalinginnaasup sammivigai najukkami inuussutissarsiutitigut
ilinniakkat, annertusisap sammivigalugit ilinniarnertuunngorniarluni atuarneq
imaluunniit inuussutissarsiutitigut ilinniakkat annertunerusumik misilitsissimanissamik piumasaqaateqarfiusut.
Sammivimmik toqqaaneq angajoqqaat atuartoq isumasioreerlugu aammalu
atuarfiup allaganngorlugu oqaaseqaataa tunngavigalugu aalajangertarpaat.
Nalinginnaasumi atuartitsinermi atuartunut tamanut atuuttumik atuartitsissutigineqartarput:
kalaallisut, danskisut, kisitsineq/matematik, kristumiussusilerineq /upperisalerineq kiisalu nalitsinni
pisut, tassani ilaallutik sulinermik ilisimasaqalernissaq siunertaralugu ilinniartitaanermik
inuussutissarsiutinillu sammisaqarneq. Tuluttoornermi aamma fysik/kemiimi
atuartinneqarnissaq neqeroorutigineqartussaavoq.
Annertusisami atuartitsinermi atuartunut tamanut atuuttumik atuartitsissutigineqartarput: kalaallisut,
danskisut, tuluttut, kisitsineq/matematik, kristumiussusilerineq/upperisalerineq, fysik/kemii,
oqaluttuarisaaneq, uumassusilerineq aamma nunalerineq. Atuartitsinermi aamma
ilaasussaapput nalitsinni pisut, tassani ilaallutik sulinermik ilisimasaqalernissaq siunertaralugu
ilinniartitaanermik inuussutissarsiutinillu sammisaqarneq.
Ingerlaqqiffiusumik atuarfimmi sammivimmi sumiinneq apeqqutaatinnagu atuartunut tamanut
atuuttumik atuartitsissutitut neqeroorutigineqartussaapput timersorneq, sananeq/saviminile-
17