Bibelgaven 2/2023

BIBELGAVEN I GULFEN
TEKST OG FOTO: BIBELSELSKAPET I GULFEN.OMSETT: BJØRN HÅKON HOVDE
Styrking av migrantkyrkjene
i Kuwait
Bibelselskapet i Gulfen arbeider intensivt for
å støtte dei mange kyrkjene i Kuwait.
Mellom anna skjer det ved å tilby opplæring
og utvikle ressursar som hjelper dei med å
nå fram til framandarbeidarane som stadig
strøymer til landet.
Over 70 prosent av Kuwaits 4,3 millionar innbyggjarar er
utanlandske arbeidarar. Den offisielle religionen i Kuwait er
islam, men migrantane kjem frå meir enn 100 ulike land og
har tallause kulturelle, sosiale og religiøse bakgrunnar.
Alvorlege psykiske helseproblem er svært utbreidde blant
arbeidarane i Kuwait. Dei tøffe leve- og arbeidsvilkåra, ofte
med utnytting og manglande lønnsutbetaling, gjer sjølvmord
mellom arbeidarane altfor vanleg.
Migrantmiljøa er prega av stor utskifting, og medlemsmassen
til kyrkjelydane endrar seg stadig ettersom innvandrarar
vender tilbake til opphavslandet og nye
arbeidarar kjem til. Mange av dei kyrkjelege leiarane
manglar formell teologisk utdanning. Derfor satsar
Bibelselskapet på utdanningsmateriale, ressursar og
opplæring av pastorar.
Opplæringsseminar
Bibelselskapet i Gulfen arrangerer også opplæringsseminar
og workshops i kyrkjene. For kristne i Kuwait er dette
einaste tilgjengelege vidareutdanning i bibelkunnskap.
I 2023 vil Bibelselskapet gjennomføre tre slike seminar.
Som del av arbeidet blir det også distribuert 1000 biblar på
amharisk, tagalog, telugu og singalesisk.
Så langt i år har det blitt halde to seminar: Det første for
«Den Levande Guds kyrkje i Kuwait» (Telugu) og «Guds
forsamling» (Singalesisk og Tamil) med cirka 150 til stades.
Det andre blei halde for den internasjonale kyrkjelyden
«Den nye pakt», med om lag 250 frammøtte.
Jesu spørsmål
Fokus for seminara i 2023 er dei bibelske døma på Jesu'
spørsmål, som både stadfesta og utfordra etablerte åndelege
sanningar i samtida. Kvart av dei tre seminara tek opp
nokre få av dei 307 spørsmåla som Jesus stilte under
tenesta si.
Etter det første seminaret snakka pastor Reddy om kva
seminaret hadde betydd for han:
22 Bibelgaven I nummer 2 I 2023
«Dette kurset har stadfesta trua vår på Jesus Kristus som
den inkarnerte Gud. Kyrkjelyden min har alltid behov for slik
bibelsk lære. Vi kjenner oss oppmuntra fordi samlinga har
styrkt oss både åndeleg og trusmessig,» sa han.
Sarah, ein annan av seminardeltakarane, delte ope kva ho
sjølv hadde erfart gjennom undervisninga:
«Takk Gud for at han har opna auga mine på dette kurset.
Især blei eg råka av Jesu' spørsmål ‘Kven seier folk at eg
er?’ Dette bør vere eit stort og presserande spørsmål også
for kristne i vår tid. Eg kan ikkje anna enn å takke
Bibelselskapet for at viktige bibelske tema blei presenterte
på ein interessevekkjande og enkel måte.»
«De dekker alle behova våre»
Pastor Elia var også særs takksam for Bibelselskapets
arbeid:
«De er til stor hjelp for fattige kyrkjer som vår. Migrantane
har få ressursar, men eit stort behov for bibelkunnskap og
undervisning. Bibelselskapet gjer dette på ein utmerkt
måte. Dagens samling var veldig oppmuntrande, og vil
hjelpe folket vårt til å forstå at dei er viktige gjennom å
gjere og ta del i Guds verk.»
«De hjelper oss ikkje berre med undervisning, men også
med biblar og anna undervisningsmateriale til arbeidet vi
driv i grensestroka. Bøndene der har ikkje høve til å kome
til kyrkja, og då må kyrkja kome til dei. Må Gud velsigne
Bibelselskapet!»
Forbønnsemne:
• Be for dei som deltok på seminara, slik at dei kan vekse i
forholdet til sin Frelsar, Jesus Kristus, og bli gitt mot til å
dele trua si med andre.
• Be for migrantkyrkjene i regionen.
• Be for Bibelselskapet i Gulfen, slik at det kan halde fram
med å støtte kyrkjene, og dekke behova deira for
undervisning, opplæring og biblar.