Fantasías eróticas para paspallás

Meteu a miñoca entre os beizos e pechou a boca. Entón comezou a facer movementos
vagarosos coa lingua, semellaba que mamaba pero sen succionar. Con eses movementos firmes e
febles ao tempo Lota foi conseguindo que o meu corpo espertase pouco a pouco. Miña cariña de
rosa chuchaba que daba gloria mirala, miña cariña de queixo de bola semellaba mais doce que o
mel, mais suave que as flores. Lota facía que o meu brotiño se fora convertendo en mangueira ao
mesmo ritmo que medraba a miña autoestima. Con eses bicos feituquiños curábame de todas as
penas. O sangue comezou a fluír e logo dun anaco eu xa era quen de amosarlle a Lota o
tremendamente namorado que estaba dela e despois... ai que rir toleirón!
Lota e mais eu pasamos os primeiros anos da nosa unión viaxando por África e por Asia,
aprendendo linguas e culturas exóticas como era o gusto da miña muller. Pero eu agochaba unha
ilusión desde facía tempo: volver a viaxar dos Apeninos a os Andes, parando exactamente nos
lugares que estivera sendo neno. Foi unha experiencia incriblemente emotiva para min facer esta
viaxe acompañado polo meu gran amor : Lota.
Cando chegamos a Bos Aires, quixen ir a ver o barrio no que vivira coa miña nai. Atopei
todo bastante cambiado (pasaran dez anos desde a última vez que estivera), pero cal foi a miña
sorpresa ao ver a carnicería do Bolo exactamente igual que a deixara. Achegueime e mostrouse moi
contento de verme. Saudoume cun sorriso franco amosando os incisivos bicudos e embrazoume. O
cheiro a carne botoume para atrás.
- Pasa rapaz!!
- Ola Bolo, como lle vai?
O certo é que non tiña moitas ganas de parolar co fulano aquel que tanto noxo me dera
sendo mozo e agora recordaba con nitidez.
- De puta nai rapaz. Vaime de puta nai. Pasa! pasa que che conto.
Boteille unha ollada a Lota como pedíndolle que me salvara de meterme alí co carniceiro
(xa lle falara del), pero Lota sorriu e fixo xesto de esperarme fóra.