ingozh №9

Литературалы
сӥзем газет
№36 (25948)
2022-тӥ ар 15-тӥ куарусён 13
Ӟечкыласьком
10-тӥ куарусёнэ
65 арес тырмиз
Удмуртиысь дано
журналистлы, Россиысь
Писательёслэн
огазеяськонзылэн
ёзчизылы, кылбурчилы,
прозаиклы Рашит
Хайдаровлы (Рашит
Хайдар).
Со вордӥськиз Башкириысь
Янаул ёросысь
Шудек гуртын.
Ужаз «Советской
Удмуртия» — «Удмурт
дунне» газетын, 13 ар
ӵоже «Шӧкыч» бамез
нуиз. «Вордскем кыл»
журналын редакторлэн
воштӥсез вал.
«Салам», «Вукарнан»,
«Портрет с натуры»,
«Ачим», «Нош ик
Ачим» книгаос гожтӥз.
Инкуазь но адями
Усё беризь куаръёс
16-тӥ куарусёнэ 70
арессэ пусъёз Россиысь
Писательёслэн,
Россиысь Журналистъёслэн
огазеяськонъёссылэн
ёзчизы,
Россиысь культура
удысысь дано ужась,
прозаик Пётр Куликов.
Со вордӥськиз
Кияса ёросысь
Нӧднюкпочинка
гуртын. «Советской
Удмуртия» газетын
ужаз, собере «Кенеш»
журналэ выжиз, солэн
редакторез вал. Поттӥз
«Буран бере», «Зарни
чорыг» книгаоссэ.
Ужрад
13-тӥ куарусёнэ
Йӧскалык библиотекаын
ортчиз Ижысь егит
гожъяськисен Арина
Макароваен пумиськон.
10-тӥ классын
дышетскись нылаш
литературая калыккуспо
конкурсъёслэн
лауреатсы ини, туэ
«Удмуртиысь егит
писательёс» элькун
вожвылъяськонын но
вормиз. Вакчи веросъёс
гожъяны кутскиз 9
аресысеныз, библиотекаын
ортчем ӝытын
куд-огъёссэ шара
лыдӟиз.
22-тӥ куарусёнэ
Йӧскалык библиотекаын
Александр Корамысловлэн
туэ потэм
книгаеныз тодматскон
ортчоз. «Монолог в
тряпочку» (12+) бичетэ
пыризы 20 ар ӵоже
гожтэм кылбуръёсыз.
Фёдор СУВОРОВ
Ӵужектӥзы беризь куаръёс,
Возьдаськыса сӥзьыл чеберайлэсь.
Ӟеч лу, шуо, вылды, соос,
Люкиськыса ог-огзылэсь.
Каллен усё беризь куаръёс,
Выль тулысэз, дыр, вӧтаса.
Оло, бӧрдо лушкем соос,
Кин ке сярысь малпаськыса.
Куке но нош вуоз тулыс,
Пурӟоз беризь вож куаръёсын.
Юг-юг ваё пурыосыз
Быгыльскозы кидысъёсын.
Мушъёс выльысь юылозы
Куаръёс вылысь коньыт мӧльзэ.
Беризь улын пумиськозы —
Кин ке утчаз ыштэм шудзэ.
Ӵужектӥзы беризь куаръёс,
Мӧзмыт кылё арамаос.
Тодэ лыкто шудо аръёс,
Усё, усё беризь куаръёс...
Туспуктӥз Максим ЕГОРОВ

№36 (25948)
14 2022-тӥ ар 15-тӥ куарусён
«Читай, Ижевск!» фестиваль
Лыдӟиське, эшъёс!
Ульчаостӥ ортчизы выжыкылъёсысь геройёс.
«Читай, Ижевск!» огинлэн «ВКонтакте» бамысьтыз
Йылпумъяськиз 10-тӥез
«Читай, Ижевск!» фестиваль.
Книгалы но лыдӟиськонлы
сӥзем фестиваль туж паськыт
но яркыт ортчиз. Кезьыт но
тӧло куазь шоры учкытэк,
Ижысь Шор площадьын шутэтскон
нуналъёсы калык
пазьгем кӧжы мында вал. Кин
ке выль книгаос басьтыны
лыктӥз, кин ке — тодмо писательёсын
пумиськыны. Трос
вал семьяосын поръясьёс, татын
пӧртэм аресъем нылпиослы
уно тунсыко площадкаос
ужазы.
Озьы 10-тӥяз фестивале
15 сюрслэсь ятыр адями пыриськиз,
3 нунал ӵоже 100-
лэсь уно ужрадъёс ортчизы.
Иже вуизы Россиысь 37 издательствоосысь
адямиос но
27 ӧтем куноос — писательёс,
кылбурчиос, критикъёс. Кылсярысь,
«Чеберлыко кыллэн
усточиосыз» сценаын Ижысь
лыдӟисьёсын пумиськылӥзы
Дмитрий Емец, Алексей Варламов,
Андрей Усачёв, Тамара
Михеева, Анна Матвеева, Татьяна
Толстая но Екатерина
Рождественская.
«Улӟем выжыкылъёс»
площадкаын покчи усточиос
Тамара Михеевалэн
книгаосысьтыз геройёсты
лэсьтылӥзы, Андрей Усачёвлэсь
кылбуръёссэ шара
лыдӟизы, «Йӧно вал» спекталь
учкизы, «Лул-сюлэмлы
витаминъёс» проектэн тодматскизы
но «Выжыкыл
променад» фестивале пыриськизы,
отын тодмо книгаосысь
геройёс улӟизы.
Мӧзмыны дырзы ӧй вал
киужен вырисьёслэн но. Та
фестивальын турлы мастерклассъёс
ужазы, кылсярысь,
ыргонлэсь кильтыръяськон
арбериос, сӥньысъёслэсь суйпоскесъёс,
эпоксидной сирлэсь
пель угыос лэсьтонъя.
Кибашлыос пулэсь шкатулкаосты
буяны, пу вылэ суред
пуктыны валэктӥзы,
возьматӥзы.
Но котьма ке но, та фестивальлэн
тӧр шораз книга вал.
«Читай, Ижевск!» ужрад нош
ик возьматӥз: Удмуртиын
улӥсьёс ярато лыдӟиськыны
но тодо выль потӥсь книгаосты.
Ваньмыз кутске кухняын
Фестивале вуылӥз писатель,
француз но англи
кылъёсысь берыктӥсь,
туспуктылӥсь Екатерина
Рождественская.
Кинлы ке со тодмо «7 дней»
журналлэн азьвыл редакторез
сямен, кинлы ке — Роберт
Рождественский кылбурчилэн
нылыз шуыса. Тросэз
учкизы, дыр, солэсь фотопроектъёссэ.
Кылсярысь,
«Частная коллекция» проектаз
со быдэс дуннелы тодмо
артистъёсты, политикъёсты,
спортсменъёсты, журналистъёсты,
тодмо художникъёслэн
картинаосазы сямен,
дӥсяса-буяса туспуктылӥз,
Отчы 6 сюрслэсь уно кизилиос
пыриськизы. Екатерина
Рождественская верамъя,
озьы со быдэсак тодӥз ӟуч
кинофондэз, искусствоез,
тросэныз кизилиосын эшъяськиз,
кылсярысь, Совето
Союзысь калык артисткаен
Людмила Гурченкоен. Мар
бордысен кутскиз солэн фотопроектэз?
— Милям вуж коркамы
быдэсак ӝуаз. Мон куректӥ,
узыр библиотекамы пеньлы
пӧрмиз шуыса, — тодаз вае
Екатерина Рождественская. —
Но сюлэм шӧдэм кадь, солэсь
азьвыл мон атае лэсь рукописьёссэ
но куд-ог изданиосты
выль коркаямы нуыса вуттӥ
вал. Мылкыдме ӝутон вылысь
эшъёсы асьсэлэсь книгаоссэс
мыным вайылӥзы, пӧлазы
вал искусстволы сӥзем альбомъёс
но.
Ми анаеным со журналъёсты,
книгаосты учкылыса
пукылӥм. Мон шуисько:
Туспуктылӥсьлы, писательлы Екатерина Рождественскаялы
вашкала пу коркаосмы кельшизы.
адӟы, кыӵе та кенак кельше
Пугачёвалы, нош Рембрант
— Рязановлы… Озьы мон
малпай фотопроект борды
басьтӥськыны. Мон туж
яратӥсько кутскыны со борды,
мае уг быгатӥськы. Туспуктылыны
но чик уг быгатӥськы
вал. Люкай быдэс команда:
фотографъёсты, гримёръёсты.
Собере малпай, мон но
фотоаппаратлэн кнопкаяз
зӥбылыны пӧрмыто ук. Озьы
туспуктылӥсь луи. Та проектэ
20 арлэсь кема кыстӥськиз,
мыным бадӟым шумпотон
вайиз.
Но 2018-тӥ ар бере мон
доры куриськылыны кутскизы
нылъёс-пиос, кудъёссэ
мон уг тодмаськы. Мынам
ноку но телевизоре ӧй вал.
«Читай, Ижевск!» огинлэн «ВКонтакте» бамысьтыз
Но, кылсярысь, Л. Гурченкоез,
Э. Рязановез тодман понна
телевизор кулэ ӧвӧл. Мон соосты
адӟыли театрысь, лыдӟи
соос сярысь гожъямъёсты.
Россилэн данъяськонэз —
адямиос. Азьло кизилиос яркытгес
пиштӥзы но асьсэды
огшорыгес возизы.
Али, шуом, мыным журнал
заказ сётэ, кинэ мон туспуктыны
кулэ. Нош студие пыре
быдэс команда, мон уг тодмаськы,
кинэн мыным ужано.
Огполаз грим лэсьтытӥськем
воксё мукет адямилы, со ӧтем
артистлэн юрттӥсез гинэ вылэм.
Вылаз ик, туала нылъёспиос,
кизили шуыны соосты
ымы уг усьтӥськы, уллёысь
потэмъёс кадь — тросэзлэн
ӧвӧл образованизы, уноез уг
быгато асьсэды калык пӧлын
адями сямен возьыны. Нош
кӧня соослэн кизилияськонзы,
асьсэды олокин кожанзы…
Мыным тунсыко вал тае
палэнысен учкыса пукыны,
мае синйылтӥсько, кагазэ
гожъяны. Озьы туспуктылон
бордысь мон выжи мукет
проектэ — гожъяськонэ.
Екатерина Рождественскаялэн
вань вераськонэз атаез,
анаез, семьяез котыртӥ бергаз.
Ксения нимо сузэрез сярысь
но вераз:
— Со трослы мынэсьтым
визьмогес, со интроверт.
Соин ик мон ялан калык
пӧлын, нош сое телевизорысь
уд адӟы. Но ми кыкнамы
но ужаськомы азьланезлы,
гожъяськиськом, атаймылэсь
нимзэ медаз вунэтэ шуыса
но. Туэ Роберт Рождественскийлы
90 арес тырмысал.
Ми котькуд ар вуылӥськом
атаелэн вордӥськем палъёсаз
— Алтае, Косиха черкогуртэ,
отын эшъёсыным-артистъёсын
бадӟым концерт
возьматӥськомы.
Екатерина Рождественскаяен
пумиськонысь мон 2
малпанэн бертӥ: одно ик тау
кароно «Читай, Ижевск!» фестивалез
радъясьёслы, таӵе
тунсыко, тодмо но кизили висёнэн
черламтэ куноез Удмуртие
ӧтемзы понна но тросгес
тодоно, утёно семьяедлэсь,
выжыедлэсь историзэ. Е. Рождественскаялэн
нырысетӥ
книгаез «Жили-были, ели-пили»
нимаське. Сое лыдӟыку,
малпан кылдэ, тон та книгалэн
автореныз Роберт Рождественский
дорын пукиськод,
одӥг ӝӧк сьӧрын чай юиськод
но семьязы сярысь учыръёсты
кылзӥськод.
— Улон — кухня, ваньмыз
кутске татын: тӥяськем холодильник,
картэн керетон, тэркы
пильылон, уртчем шыд,
ужан нунал бере кык яратоно
адямиослэн пумиськонзы,
ӵошен чай юон, чупаськон,
ческыт пыжиськем зын, нылпиос,
куноос, выль рецептъёс,
тодэ ваёнъёс, — шуэ писатель.
Е. Рождественскаялы кельшиллям
удмурт сиёнъёс.
— Мон Ижын вуттӥ удмурт
перепеч сиыны, рецептсэ но
кури, доре бертӥ ке, пӧраса
утчало. Туж ческыт пельнянь
сии, ыльнянез но сыӵе ик,
кыӵе мон лэсьтӥсько. Тодӥ,
мае шуо Кулаковалэн куасъёсыз,
шумпотӥ, вашкала пу
коркаосты адӟыса. Тау юанъёстылы,
мон яратӥсько ваче
вераськонъёсты, — шуиз Екатерина
Рождественская.
Бамез дасяз Галина СЕМЁНОВА

№36 (25948)
2022-тӥ ар 15-тӥ куарусён 15
Москваысь куноен кенешон
Чайысь сакыр,
яке Уӵы ӟольгыриез ултӥя-а?
Писатель Татьяна
Толстая асьмелы тодмо
«Кысь», «День», «Ночь»,
«Двое» книгаосызъя,
телевидениын «Школа
злословия» передачаезъя
но «Белый шум»
проектэзъя.
Татьяна Толстаяез тросэз
кожало, Лев Толстой
классик лэн ӵыжы-выжыез
шуыса. Янгышало. Со куинь
полэс Сталинской премилэн
лауреатэзлэн, ӟуч писательлэн
Алексей Толстойлэн
внучкаез луэ. Нош дизайнер
Артемий Лебедев — Татьяна
Никитичналэн пиез.
Т. Толстая «Читай, Ижевск!»
фестивальын лыд ӟиз аслэсьтыз
текстъёссэ, вераськиз ӟуч
интеллигенция, литература,
культура, история но трос
мукетыз сярысь. Солэн кудог
малпанъёсыныз тӥледыз
но тодматӥськомы.
Произведениоссэ
дышетон сярысь
— Мон та сярысь лучше
медам тоды вал. Школаын
тынэсьтыд гожъямдэ пуэз
сямен пильыло, собере эскеро.
Ӵок ини, монэ гинэ медам
ёртэ.
Куалекъясь луисько, кудог
критикъёслэсь творчествое
пумысен гожъямъёссэс
адӟисько ке. Кытын ке,
кин ке маке визьмозэ веразгожтӥз,
луоз, но мыным
потэ, куддыръя соослэн фантазизы
вылтӥз уртче. Кылсярысь,
мыным возьматӥзы
«На золотом крыльце сидели»
нимаськись нырысетӥ
веросэлы гожтэм статьяез.
Та верос пичи дыры, тодэ ваёнъёсы
сярысь. Со кутске «В
начале был сад» кылъёсын.
Татын ваньмыз валамон ук.
Но критик, нимзэ ум вералэ,
гожтэ: «Сад — со Маркиз де
Сад сярысь, дыр» (Маркиз де
Сад — француз писатель но
йыртэмась — авт.). Собере
кутске кошмар, мукет кылын
та статьяез уд вера…
Туала авторъёс
сярысь
— Туала авторъёсты мон
уг лыдӟиськы, пал синмыным
гинэ учкыса потӥсько.
Со мыным кулэ ӧвӧл. Туж
куро ке лыдӟыны, соку гинэ.
Мурт текстъёсты лыдӟон люкетэ
писательлы малпаськыны,
соос пачкато йырез.
Классика уг люкеты, классика
— сяськаясь сад выллем,
мон сое туж яратӥсько
Татьяна Толстая Иосиф Бродский писателен, 1988-тӥ ар.
— А. Чехов, Л. Толстой,
И. Гончаров. Туала писательёс
пӧлын усто гожъяськисьёс
вань, кылсярысь,
лычсузисько Елена Посвятовскаялэн
творчествоезлэсь.
Солэн вань туж мур,
тунсыко гожтэм веросъёсыз,
вылӥ сортъем прозаез, кылсярысь,
дэмласько лыдӟыны
«Важенка. Портрет самозванки»
романзэ. Озьы ик мыным
туж кельшиз Юрий Каракурлэн
«Фарфор» книгаез.
Али ужамез сярысь
— Вис кари, ар ӵоже номыр
но ӧй гожты, малы ке
шуоно дасясько книга — ӟуч
писатель, редактор, матысь
эше Александр Тимофеевский
сярысь (А. Тимофеевский
— Крокодил Гена сярысь
кырӟанлэн авторез,
туэ толалтэ улонысь кошкиз
— авт.). Отчы пырозы соин
культура сярысь 6 интервьюэ
но эшшо 35 адямиослэн
со сярысь тунсыко тодэ
ваёнъёссы. Матысь дыре
книга потыны кулэ ни.
«Кысь» романлэн
постапокалипсис
жанрез сярысь
— Та жанр монэ ачиз бырйиз.
Малы ке шуоно дауръёслэн
воштӥськон вакытсы
вуиз, кунын секыт
дыръёс кылдӥзы, вужез
культура куаш каз, Чернобыльын
станция пуштӥз…
«Кысь» романэз 14 ар пала
гожъяй. Та ӟуч калык сярысь
произведение. Мон отын
чайын сакыр сямен сылми.
Малы сокема гожъяй? Малы
ке шуоно мон уг тодӥськы
вал, кызьы гожтоно романэз,
отчыозь веросъёс кылдытъяй.
Литературалэсь та
жанрзэ валан-шӧдон вуиз
гожъяськон сяменым. Собере
мон 10 ар пала улӥ Америкаын.
Со огдыре люкетӥз
но, юрттӥз но романме гожтыны.
Америкаысь кошки,
малы ке шуоно берло дыре
отын улыны чидантэм йӧтӥз
ни вал. Нош отын но, татын
но чидантэм ке, со чидантэмез
чиданы капчигес дорын,
Россиын.
Америкаын улэмез
сярысь
— Мон отын университетын
ужай. Ӧскымон потӥз
феминизмзы, негръёс азьын
асьсэды янгышен шӧдэмзы.
Отын литератураез чеберезъя,
ӟечлыкезъя уг дышето
ни. Классика силёлы пӧрмиз.
У. Шекспир, Л. Толстой соос
понна — тӧдьы лек пиосмуртъёс,
ултӥясьёс. Произведенилэсь
пуштроссэ, чебер
кылзэ но валтӥсь малпанзэ
отын утчась ӧй вал ни.
Уӵылэсь чебер кырӟамзэ кылыса,
тон уд малпаськы ук:
со аслаз чирдэменыз ултӥя
ӟольгыриез яке коӵоез...
Но пересь американецъёс
пӧлын эшъёсы вань. Уго егит
калык отын эшъяське мукет
сямен. Соин ик ӟуч пушкесо
адямилы отын секыт. Асьмеос
гинэ соослы ум паймиське,
соос но асьмелэсь
пӧртэмлыкмес синйылто.
Кылсярысь, мон татын сое уг
валаськы вал, но ӵапак Америкаысь
адямиос шуо: Россиын
улӥсьёс гинэ, мае ке
музысь ӝутыкузы, ӝушто…
Матькетон сярысь
— Матькетыны мон быгатӥсько,
котькуд ӟуч адями
сямен. Но матерокъёс, кызьы
мон соосты нимасько,
луыны кулэ интыяз но эсэпсэ
валаса верамын. Мынам
книгаосам ивор вӧлмытон
пус 18+ гожтэмын. Малы ке
шуоно отын 3-4 матерок пумиське,
но соос отчы одно
кулэ вал. Мон ӧй шуысал, 17
аресъем нылъёс-пиос, произведениысь
та кылъёсты
лыдӟыса, гордэктозы, малы
ке шуоно нылпиос али сыӵе
кӧшкемыт матькето! Соос
пуштрос понна тышкаськон
кылъёсты уг верало, юнме
супыльто. Ӵапак шузи-мази
вакытазы ик тросэз матькето,
18 арес бере тросэз соосты
шер но кулэ интыяз
гинэ сачкытъяло на.
Туала искусство
сярысь
— Мон дуннеысь пӧртэм
туала музейёсын вал.
Котькыӵе мудрон яке выль
кылъёсын выль искусство
кылдытыны мед вырозы,
ваньмыз со — кыед! Туала
искусство шуон улэ — «искусство
кулӥз» ӧтёнэн. Тон пушкын
чеберлыкез адӟон-валан
кулӥз ке, шып ул, нош музейёсы
вань жагез эн нуллы.
«Татьяна Толстая» огинлэн «ВКонтакте» бамысьтыз
Голландиысь огаз сыӵе выставкаын
пинал пияш, экскурсовод,
шуэ: тани та туж
синмаськымон суред, мыным
туж яра. Суредын ӝужыт
колонна, отысь пӧртэм буёло
бодыос пото. Кыӵе ке йыртэмась
пинал кисточкаен
сыч-сач маяллям, кожалод.
Искусстволэсь кылзэ тросэз
валамысь дугдӥзы К. Малевичлэн
«квадратэз» бере. Но
син азяды пуктэ ай В. Кандинскийлэсь
полотнооссэ.
Отын одӥг гожез но юнме
ӧвӧл. Со буёлъёслэсь но формаослэсь
полэстӥськись
крезьгур. Тон учкиськод но
кылӥськод, кызьы та суред
кырӟа. Мукетызлэн — сыӵе
ик буёлъёс кадь, но огшоры
халям-балям, уг кылӥськы
крезьгурез.
Нылпиосыз сярысь
— Мынам 2 пиосы, соос
туж пӧртэмесь. Кызьы мон
соосты визьнодай? Нокызьы
но. Мон уг быгатӥськы вал
нылпиосты шонер будэтыны.
Шуом, суредазы соос кыӵе
ке каляка-маляка. Мон котькудзылы
шуисько: туж умой,
молодец, но татӥзэ тазьыгес
кароно вылэм. Огез пие, сое
ӧз ушъялэ шуыса, воксё ӧз ни
суредаськы. Мукетыз, умойгес
мед луоз шуыса, эшшо
7 сыӵе ик суред лэсьтӥз. Со
учыр бере валай: ушъяны,
пӧяны нылпиосты уг яра. Мар
мон умойзэ соослы лэсьтӥ —
ӧй люкеты вырыны соин, мар
соослы тунсыко. Мон соосты
нокыӵе кружокъёсы ӧй нуллы,
кружокъёс люкето гинэ,
малпай. Но бадӟымез но,
пичиез но, Инмарлы тау, ас
сюрессэс, удыссэс шедьтӥзы.
Артемий — дизайнер, аслаз
студиез вань. Алексей — программист.
Песянай луон
сярысь
— Артемийлэн 10 пиналыз.
Шӧдӥсько-а мон асме 10
полэс песянаен? Мынэсьтым
песянай сыӵе ик, кыӵе кыедлэсь
— пуля. Тон ӟеч песянай
ке, тынад мукет функциосыд
ышыны кутско. Малы ке шуоно
нуныкайёс тонэ быдэсак
кытко, чырты сьӧрад пуксё.
Нош мынам туж трос мукет
ужъёсы вань. Мон пыдысь
усись тапочки ӧвӧл на. Соин
ик пиналъёсылы шуисько:
пияды бере, утялтэ-будэтэ
асьтэос.
________
Галина СЕМЁНОВА

№36 (25948)
16 2022-тӥ ар 15-тӥ куарусён
Кылбурет
Таяз уе мон нош лобай
Лариса Мардановалэн синвуэз поттӥсь чуръёсыз
Мон ӧй тоды
Мон ӧй гожты одӥг но кылбур —
Валантэм шузилы ӝож кылгур.
Вакытам чик ӧй люка ваньбур —
Шуоды — солэн ваньмыз палдур.
Улонэ пыр ортчиз сьӧд даур:
Пелям ноку ӧз шуды ингур,
Синмылы но ӧз сётскы индур,
Мон ӧй тоды, кыӵе со шудбур.
Погмаськем кагазэн шалтыртэ ни куарсур.
Ӵужайлэн мурӝолаз кисьмалоз выль мусур.
Весь ӵемгес но ӵемгес нюроме ук синдур –
Кыдёкысь бус пӧлы кадь сылме вож ярдур.
Дунне — ӧлексы
Мон тодам вайисько ӵуказе нуналме.
Та виозь мон ӧй вала али кытынме.
Мыным ин усьтӥське тём-пеймыт уйёсы,
Вужерлэн дуннеяз нош нуо пыдъёсы.
Кулыкум адӟисько секытэн вордскемме.
Кисыри кекатэ вож нуны мугорме.
Мон ӧвӧл — со дунне быдэсыз ӧлексы —
Шӧектэм лулъёслэн вуэмын вакытсы.
Шуоды: та ныллэн йырвимыз нуналмысь кизерме.
Куддыръя йырйисько, дыр, ачим но асме.
Нош мукет шаерлэн чебересь ӧсъёсыз,
Чик ӧвӧл исамын сяськаё лудъёсыз…
Тонэн ӵош
Уй-нунал возьмасько — ку сюрод вотэсам?
Мон ваньзэ ик сое адӟыли вӧтъёсам:
Кызьы сьӧсь шиеным сюпсисько нап вирдэ,
Кызьы выль кужымен мугоры нош тордэ.
Одӥгнад дуннеысь тон уд адӟы троссэ,
Мае мон усьтыны быгато нырысьсэ
Тон понна. Мон пушкын сылмыса, тодӥсько,
Вордӥськод выльысен, паймонэн тырлыко.
Уйин гинэ ӧс усьтӥське
Таяз уе мон нош лобай
Лемлет дӥськутъёсын.
Мон — лул. Мон — бубыли.
Та бурдъёсы — льöль чильпыри,
Чильтэрамын дауръёсын.
Уйин гинэ öс усьтӥське
Пыр адӟиськись дун дуннее.
Татын монэ витё,
Тонэ уйлы быдэ öтё:
Ӝутском на выллане!
Таяз уе мон нош лобай
Тон котыртӥ…
Нош тон…
Кöлӥд.
Туж жаль потӥд
Мон нырысьсэ соку ӧй кынмы –
Тон куалекъяд.
Эбылям горд киостэ но
Бордам каръяд.
Вераны нош номыре тыныд ӧй дӥсьты –
Туж жаль потӥд.
Тӧдьы бубылиен поръяй
Тон котыртӥд.
Кышноедлэн шуныт пушказ нош йыромо
Зэмлык синъёс.
Монэ но кыльыло ини
Мукет киос.
Йырысь малпан — бутьмар
Лулы мынам — горд шар.
Вуж сӥньысэн туж ляб
Бордам со думемын.
Йырысь малпан — бутьмар.
Визь-пырыез — манет,
Шер-тур бырттылэмын.
Мугор — арыкман куар.
Сяськаосыз — ӝабыр —
Улны дасяськемын.
Улон нош — оломар.
Пумыз-йылыз ваче
Ӟуго ӟугмаськемын.
Музъем черс сыноме
Ныж пуртме нырысьсэ мон шери –
Одӥг пол ке но мед чилектоз
Кортэныз. Лопырскоз сьӧд ужаз уй пери –
Сӥялскем мылкыдме бугыртоз.
Коралоз уйвӧттэс чилясь корт –
Нош ик вир кисьтӥськоз дурыныз
Дэрие. Со вие куашкалоз излэсь борд –
Сюрс аръёс со люкиз асьмемыз.
Музъем черс сыноме выль виртэк.
Нош курбон сётӥсько мон тӥлед.
Кутэлэ!
Инбамысь со усиз ук, дунтэк —
Шуккоды ни вылаз кырсь сумед.
Эктоды ньыльдон уй кисьтоназ.
Выль курбон куроды на эшшо
Мынэсьтым.
Мон — Анай. Мынам ваньмыз — тросаз…
Нош пуртме шерисько.
Тумошо.
Нош кык пол ӝыныен — со ӧвӧл быдэсэн,
Та ческыт дуннеез веръяськом палэсэн.
Тонэн ӵош валало улонлэсь коньытсэ —
Тон вамыш но уд лэсьты монтэк тулысэ.
Мон шедьто-а асме?
Гожъякум улӟисько. Мон мур шокчисько.
Укноме усьтӥсько. Вылӥе лобӟисько.
Та вие улӥсько!
Гожъякум улӥсько. Гылӟисько, пограсько —
Дэрие усисько. Ньыльпыдес ветлӥсько.
Синвутэк бӧрдӥсько.
Маи ке-а пӧрме? Нош толӟе гужеме.
Кылы выльысь пуме. Оло, ваньмыз юнме?
Мон шедьто-а асме?
Тӥ эн оске мыным. Со ваньмыз — алдан.
Огшоры кыл куадан. Уйшоре тэк ӟырдан.
Поттӥсько аслым дан.
Туспуктӥз Максим ЕГОРОВ

№36 (25948)
2022-тӥ ар 15-тӥ куарусён 17
Кылбурет
Сяськаясь ныл дыр выллем
Светлана Поторочиналэн пӧртэм буёло чуръёсыз
Герд
Чебер кыллы пӧрмыны
Огазе герӟасько куараос.
Капчи ик ӧвӧл, дыр, радзэс шедьтыны
Оло, соин сокем трос лек кылъёс.
Тыршыса паськытгес луыны
Огысьтыз огаз усё шуръёс.
Тӧдьы Кам кадь вӧлмыт бызьыны
Вожмаськыса дырто соос.
Ог-огенымы огкылысь луыны
Уно полэс кулэ гердъёс.
Тугаськем бугорез сэрттыны
Асьмеос ке ӧм, кин юрттоз?
Узырлык
Зор бере потэм вукарнанлы
Ӵемысь кельше улонмы.
Нош кудӥз меда буёл кулэгес:
Тӧдь инмын шундымы — горд эгес.
Сюдӥсь-вордӥсьмы — сьӧд музъем.
Озьы ке но вожзэ ватсано на вылэм:
Вож тэль, вож бусы, вож возь выл...
Ӵуж италмастэк но ӧвӧл шулдыр.
Вунэтод шат паськыт но пичи шуръёсмес?
Чагыр-лыз лентаен пужъято шаермес.
Ӧвӧл мултэсэз дуннеын —
Кулэен ваньмыз кылдытэмын.
Нош огез ке бездӥз буёлэз,
Улонмы луоз ӟарытгес.
Тон — усьтон
Малы
Яратӥсько улыны
Тон вӧзын, тон пушкын,
Тон вылын, тон улын —
Тонэн котькытын?
Малы
Утчасько тонэ
Калыкысь, уйвӧтысь,
Омырысь, инбамысь —
Инмысь толэзьысь?
Валтэ
Толэзь зарезь вуосты.
Чик тодмотэм муртъёсты
Огазе вуттэ, чукинтэ,
Пушказы выйытэ…
Лӧпкытэ
Монэ тынад кужмыд,
Визьмыд, кылыд.
Гочатӥсь вылтырыд
Дартме сайкатэ…
Мынам
Лулсэр кыле, буйганэ,
Лул пырые, перие,
Сильтӧлэ, сюлэм кӧкые —
Утись Кылчинэ.
Пушкад
Шоканэ, осконэ,
Малпанэ, адӟонэ —
Шудэдлэн усьтонэз
Мон тынад…
Нылкышнолэн адӟонэз
Ыштӥськом. Шедьтӥськом.
Кузьмаськом. Ватӥськом.
Мӧзмиськом. Бӧрдӥськом.
Келяськом. Возьмаськом.
Зулиськом. Пӧяськом.
Пияськом. Вииськом.
Бурдъяськом. Оскиськом.
Жаляськом. Чидаськом.
Яратӥськом. Керетӥськом.
Кепыраськом. Йӧнъяськиськом.
Ортчыт валантэм куддыръя луиськом.
Адӟонмес каргаськом.
Сяммес тэргаськом.
Кинлэн ке улоназ шуд пыры
пазьгиськом.
Ныл юон
Ури-бери ортче та гужем,
Сяськаясь ныл дыр выллем.
Син куспын туссэ воштэ —
Тодма на кышномуртэ!
Пирдан сандыксэ усьтыса,
Зарниям дэремзэ поттылэм.
Ортчем даурзэ малпаса,
Мӧзмыт гуръёссэ мытылэм.
Лыктэ, дыртэ, куноос,
Сюлмысь вераськом асьмеос.
Ӝӧк выл тыр сиён-юон —
Туннэ Инкуазьлэн ныл юон.
Воштӥськон
Йылпумъяське ке одӥгез —
Озьы вордӥське, пе, вылез.
Уд возьы кияд шундыез —
Толэзьлэн но вуоз черодэз.
Тазьы, дыр, улоно
Ӝуано ке — ӝуано гомаса,
Яркыт тылгизьы пазяса.
Малы улод ӵындыса,
Юнме сэрегпум луыса.
Туспуктӥз Максим ЕГОРОВ
Дунъет
Ӧтьымтэ куно мактал,
Дорамы сӥзьыл вуэм.
Мед вылэм со ӝегасал —
Туж уг пот на мӧйымем.
Капчи ик вылымтэ
Аслыд дунъет сётон.
Улонэ ай улымтэ —
Ӧвӧл на укмыстон!
Коӵышпи сямен, вылды,
Утчаса шуныт инты,
Лэсьтэмын кӧня янгыш!
Малпаса: шонер вамыш.
Мед гылтоз зорен
Лёгам сюресъёсме.
Уд берыкты берен
Ортчем нуналъёсме.
Кытын ке Пукрол гур кылӥське,
Нӧд дэри лымыен согиське…
Оскон сюлэмам вордӥське —
Иське, улонэ азьланьске!
Ачим сярысь
Ас вылтырыя дӥськут мон мертасько,
Тусылы кельшисьсэ басма бырйисько.
Кузь ке луэ — вандӥсько.
Вакчиез борды итӥсько.
Шедьтӥсько но ыштӥсько
Аслэсьтым сюрес нюжаме.
Ваньзэ выльысь мытӥсько,
Вунэтыса янгышъёсме.
Мадьысал, дыр, тӥлед,
Юасез ке шедьсал:
Кыӵе куддыр луэ торкет,
Оло, соку капчиясал.
Киме-пыдме уг лэзь.
Вуро ай кильтро дӥсь.
Сюлмысь потэм кылъёсме но гожто —
Та дуннее ас тусме мон кельто.

№36 (25948)
18 2022-тӥ ар 15-тӥ куарусён
Веросъёс
Шушу
РАШИТ ХАЙДАР
Россиысь Писательёслэн
огазеяськонзылэн ёзчиез
Кылдэмез озьы ни та улонын:
одӥг уг удалты ке, ӟечсэ
эн витьы. Адӟонэд ачиз пыд
улысь потэ уго. Юнме шат
визьмо вашкалаосмы шуиллям:
кытчы усёнме ке тодысал,
куро коть вӧлдыса дасясал.
Мынам юлтошелы но
усён интыяз миндэр вались
луымтэ...
Ог витьтон тол но гужем
талэсь азьло Шальтрамгуртысь
кебитчи Митроклэн
кышноез сизьыметӥ нылпизэ
— шумес пыдэссэ — вордӥз.
Ма, ныл вайысал ке, шумес
куръян ӧй луысал, поди. Митрокед
уйзэ но чырым ӧй
карысал, кебитысьтыз пӧсь
гурез вӧзын музэн тыршысал.
Ма, быдэс шальтрамгуртъёсыд
сереме уськытӥзы
ни: кышноедлы пи лэсьтыны
йӧныд ӧвӧл бере, кебитад коть
дур ни пи нуныдэ. Ӧжытак
паймымонгес уго: кышноез
бӧрсысь бӧрсе куать нылъёс
кузьмаз. Митрокед котькудӥз
бере ӝоже гинэ усьылӥз: пи
гердэз ик ӧвӧл, лэся, та албасты
кузь йырсилэн.
Но тани аръёсын-аръёсын
витем пи сярысь кылыса, нырысь-валысь
Митрокед кылзэ-ымзэ
ыштӥз. Нош собере
мазэ-созэ валаз но… Пи нунызэс
пересь аби гогыяку ик,
малпанъёсыныз пилем сьӧры
ӝутӥськиз:
— Таре вань кинэ дуриськыны
дышетыны. Сэре
шальтрамгуртъёсыд Митрок
выжыослы вожъяськозы. Юртъерез
сэзъялом-выльдом,
корт юбоосын капка лэсьтом,
эшшо…
— Я, киям качы дыръя олома
но эн сальтырты, — гогыясь
аби уретӥз атаймуртэ,
— син уськытод… Мын ай,
кылыныд вуӵыртытозь, учогын
ву коть шунты…
Нош Митроклэн малпанъёсыз
таки музъем вылэ васькыны
уг валало:
— Дыр-вапум нош, шултэм
музэн чаль мед ортчоз шуыса,
пимес Шурик нималом…
Ӧз, пичи дуриськись
нуйтӥськыны кема ӧз
курадӟы. Кыл шедьтытозяз
ик, мугорыныз куд-ог апайёссэ
сутӥз но, ортчиз но. Эркиямзэс
шӧдыны-валаны но
шӧтаз, лэся. Нош кылыз сэрам
бере вог сямзэ возьматылыны
ӧдъяз. Чилясь нырулзэ
сультыртыса саес пумыныз
ӵушалтоз но аслэсьтыз кароз:
«Кӧжыпог уг си мон,
нӧкы вӧйын шаньгиен чечы
омыръясал…»
Ӧйтӧд, мумиз-бубиз будӥсь
ослопсылэн кузяз кӧня
меда ветлысалзы, но… Одӥг
учыр ваньзэ йырин-чукин
берыктӥз.
Школа ӧслэсь кудпала
усьтӥськемзэ нодсасьтэм
«шумес пыдэс» коньдонлэсь
дунзэ валам. Огпол
ӵукна вазьгес султэм. «Песи,
мыным чай лэсьты но мыжыкед
быдӟа сакыр комок
дася!», — сэндра возъетэз
палэнтыса, черектэм пиёк.
Соку ик песиезлэсь кышнопалан
сылӥсь комодзылэн
ӝӧккышет улаз маке понэмзэ
учыртэм. Син йылтэменыз
гинэ буйгатскымтэ. Корказы
нокин ӧвӧл дыръя со,
ӝӧккышет улэ кизэ лэзьыса,
маялляськиз но… вож-горд
кагазъёс поттӥз. Таин песи
лавкае ветлэ шуыса, соку ик
ятвылтӥз. Кызьы сотэк, песиез
сьӧры котьку калъяськылэ
ук. Нош песяез, «пензи
поннам нунокелы сю грамм
кампеттэ мертта ай» шуыса,
лавкачизылы мыче та
кагазъёсты. Нош Шуриклэн
ымыз кырыжа: «Халва, халва
басьты, песи». «Халвалы уксё
уг тырмы, пиёке», — котьку
аслэсьтыз карылэ песиез.
«Уске, самой та уксёен
лавкаысь котьмар басьтыны
луоз, — коньдонзэ дэрем гырказ
лач-лач интыяз пиёк. —
Таре халваен гинэ кӧтме тыро
на…»
Лавкаязы шок-пуль вуиз
Шурик.
— Мыным, мыным, тӥнь
со… бадӟым ведраен халва,
— кылрадзэ мырдэм шедьтӥз
со.
— О-о, туж дуно сылэ со,
Шурик, — мыняз лавкачи
апай. — Песиедлэн кык толэзь
пенсиез но сомында уг
люкаськы…
— Мынам тырмыны кулэ,
— Шурик, дэрем улаз кизэ
лэзьыса, кӧт вадьсаз кема
ӵаштыртыса, быдэс кырым
уксёзэ поттӥз. — Тани.
Ноголёк киысь сомында
коньдонэз адӟыса, лавкае
кемдэм Шурикъёслы кеӵевыл
улӥсь Насьтапай вуз карисьлы
вазиськиз:
— Зэмзэ но, со бадӟым
консерва банкаен халваед
кӧнялы-о кыске, Катьырок?
— Кызь вить манет.
— Я, Шурик, нош тынад
татын кӧня уксёед? — Насьтапай
пияш киысь коньдонэз
басьтӥз но, оген-оген маялляса,
прилавок вылэ лач тыриз:
— Уть ай, Катьырок, ӵапак
кызь вить манет…
— Кызьы-о мон, Насьта
апай, коньдон дунэз
тодӥсьтэмлы сомында халва
вузалом. Куддыр быдэс гуртмы
толэзь куспын басьяса
уг быдты, — собере пиёклы
вазиськиз. — Малы-о песяед
ачиз ӧз лыкты, Шурик?
Пияш, мар вераны валатэк,
кылзэ ньылӥз.
— Песиез пыдыз вылэ
ӝожтӥське вал, туннэ ошмес
доры васькамзэ но ӧй адӟы,
— Насьтапай вазиз ни.
— Бен, висе-э, — сое мед
жалялозы но чальгес халва
мед сётозы малпаса, Шурик
нырзэ ик кысказ.
Туспуктӥз Максим ЕГОРОВ
— Песиез ик ыстӥз-ло.
Адӟиськод ук, мултэссэ одӥг
коньы но келямтэ, — Насьтапай
пиёклэсь бабля йырсизэ
маялтӥз:
— Митроклэн та кивоштӥсез
син азьын будэ ни
ведь. Тани лавкае но лыктыны
огназ йӧнзэ шедьтэм ни.
Туннэ-ӵуказе атаезлэн кебитаз
кӧрык кыскамзэ адӟыса
но, уд паймы ни. От, улонэд
шу, шур кадь кошке ук… —
Собере вуз карисьсылы вазиськиз:
— Я, сёт ни халвадэ,
Катьырок, ӧз ке вормы, мон
но нуыны юрттӥсько.
— Нош сомында халваен
ма карыны медӥськоды? —
лавкачизы Шуриклы таки уг
оскы, лэся.
— Халва сюан лэсьтом,
шуизы, — мар верамзэ ик ӧз
вала Шурик.
Лавкачи пумитаз серектӥз
гинэ на, Насьтапай но магазинэ
ик коскаса кылиз,
лэся. Нош Шурик, быдэс ведра
быдӟа консерва банкаез
ӟыгыртӥз но пыдтышъёссэ
чилятӥз. «О, та халва ческыт
гинэ ӧвӧл, туж секыт но вылэм»,
— жадем бераз, гуждор
вылтӥ питыръяса бертонъяз,
Шуриклэн йыраз шуккиз.
Ярам, доразы нокин ӧз
вадсаськы: песиез но апайёсыз
бакчаысьтызы уриськыса
пыриллямтэ на. Халва банказэ
Шурик сюл-кал тубтӥз кӧлан
интыяз — сэндрае. Чагпуртэн
кокаса-йыгаса усьтыны кема
могтӥськиз. Тани лэсьтэм
пасетӥз халвазэ огпол конгыртыса
вуттӥз — корка пыризы
песиез но апайёсыз. Шурик
банказэ чальгес борддор
палагес донгиз но шобыретэн
лач кариз. Аслаз шоканэз ик
пытсаськиз. Песиез ӧч карем
кадь пурты котыразы кема
бергаз. Маке утчаськиз-тышкаськиз,
учогазы тыл понӥз,
картоп палаз, эшшо маке
гызмыльтӥз на. Нош Шурик
со дыр ӵоже кечат гожмо
шобрет шоры, синъёсыз
вирӟектымон, учкыса-шымырскыса
пукиз. «Эк, та песи,
нэнэ кадь сэрыт вырысал ке,
халваме ӝынызэ коть сиысал
ни», — шыр-р кошкись дыльдызэ
ньылэ Шурик. Ӧз чида
гочатӥсь шобыр шоры долкаса
улыны, йырзэ донгиз но банка
пала сузьтӥськиз. Ӵап соку
ӧссы ӟукыртӥз.
— Кытын ай халва сюан
лэсьтӥсьмы?! — ӧс пыдулэз
выжыса вуттӥз-а ӧз-а, бубизлэн
куараез гудыртӥз.
— Кыӵе-мар сюан? — песиез,
пельыз секыт кожаса,
лэся, кышнопалысьтыз
потӥз.
— Халва, халва! — бубизы
чечым сиён басьтэм кожаса,
дымбыр-йыг! тэтчало нылъёсыз.
— Ма… Насьток сереме
уськытӥз, халва сюанады
малы уд ӧтчаськиське шуыса.
Шурикты дас кило халва
басьтӥз, пе. Кытысь сомында
коньдон?.. Кытын ай со
ачиз? — сэндра катанчиез
палэнтыса, шобырез кыскиз
но… ведра быдӟа корт банка
кымесаз шарк! вуиз. Собере
дымбыр-йыг! карыса усиз но
выж кузяна, котыр халва пазяса,
колтыртӥз.
Бубизлэн бурсэмез-вузэмез,
апайёсызлэн черектэм-жиетэмзы,
песиезлэн
чабкиськемез-чигиськемез
олома куспын Шуриклэсь
шымырскем сюлэмзэ пыдтышказ
вуттӥзы. Курдаменыз
мышлань чигнанъяз,
сэндралэн урдэс висэтӥз пырак
пуртые усиз.
Ярам, вуэз быректыса вуттымтэ
вылэм. Но… адӟонлэсь
ӧз пегӟе. Митроклэн будӥсь
кивоштӥсез могась кылиз.
* * *
Ӧз, Шурик бубизлы кивоштӥсь
ӧз луы — дурись ӧз
кариськы… Огпалмон калозь
ӧз вуы ик ке но, сопала-тапала
шонтӥськонъёсыз адскытэк
ӧз кыле. Бен, аръёс
ортчыса, вераськыкуз сокем
ӧз могалля. Шат куд-ог кылъёс
вылэ гинэ сьӧлтаськылӥз.
Нимзэ веракуз но, куспетӥ
урылӥз. «Кызьы нимыд,
пие?» — юасьёслы валэктонэз
чигылӥз: «Шу-шу…Шу».
Отӥзэ кылзӥсь ӧз луылы, но
ним лякизы — Шурик интые,
Шушу нимазы.

№36 (25948)
2022-тӥ ар 15-тӥ куарусён 19
Алданчи
Бускель Микиен ми эгызоос
выллем будӥм. Венен сӥньыс
музэн, ялан артэ: мон кытчы —
со отчы, со кытчы ке — мон со
сьӧры.
Со аре куазед укыр мыдланьяськиз.
Толбыт сямен
пужнӥськыса-пелляськыса
улӥз. Дауръем пересьёслэн но
кылэмзы-адӟемзы вылымтэ,
лэся, сыӵе буранъёсты. Куазьлэн
жобаськемезлы быдэ
ӵужаймы, чай юонзэ вискатыса
ик, гӧртэм укно синмез
пелляса-шунтыса пукылӥз но,
пыдлось лулӟыса, султылӥз:
«Э-э, та Инмар-атаймылэн
кӧлан тушакез ик ӟезиськем,
лэся… Быдэс гуртэз согоз ни
ук… Кытысь гинэ сомында
лымызэ куртке меда?..»
Паймыны мугез но вал
уго. Гуртмы воксё лымы букос
пӧлы ышиз. Милям укнотӥмы
Микиослэн бадӟым юртсы
гинэ но уг адскы ни. Урамын
лымы пельтэм корка липетэн
ӵошказ. Ми пала вань лымы
люкаськиз, дыр. Проулка артэ
бере, отӥ ик пелляз но тымиз.
Кытын кенер, кытын капка —
тодӥсь-адӟись ӧвӧл.
Со понна ми, шӧгыльна
пиналъёс, лумбытэн урамысь
но бакчаысь ӧм пыраллялэ.
Сучырмытозь пӧсяллямы.
Лымы пушкын копаськиськом
— блиндаж нимаськом, читырчутыр
сюрес гудӥськом — окоп
пӧрмытӥськом. Гожмам лымы
бусы зэмос ож лудлы укшаны
ӧдъя. Выллапалэн уллапалъёс
ваче лэзьясько — лымы
комокъёс шулало, пуштыло.
Акшан усьытозь, гурт валлин
шуккиське-чузъяське юр-яр
кареммы.
Жуммыса-лутьмыса доре
пыриськом но ӵукнаозь сэндрае
каръяськиськом. Куддыр
йӧкурам дӥськут гур вылын но
куасьмыса уг вутты, ӵуказеяз,
мускыт фуфайка пушкы выльысь
бирдыяськыса, лумбытлы
кыре ышиськом.
Микиен пумиським гинэ,
гурезь йылэ дорамы вуиз
гурт пумын улӥсь Кузь Олексей.
Юнме шорысь «Кузь» ум
шуиське: милесьтым быдэс
йырлы ӝужыт со, арлыдын
но бадӟымгес. Эшъёсыз кыккуинь
класслы вазьгес дышетско.
Соин ик Олексей ми
кадьёс пӧлын йӧнъяськыны
яратэ. Али но тани киосаз —
чибориё бодыос, пыдъёсаз —
горд чилясь но ӝужыт ныро
куасъёс. Ушъяськыса вуттӥз
ни: толон ӝыт городысь агаез
ваем. Милям куас вылэ султылэммы
ӧвӧл на — вожъяськыса
учкиськом, оло, эскерыны сётоз,
малпаськом.
— Чигтоды, кот нырулъёс, —
йырзэ эшшо вылэгес урдӥз но
артэ сылӥсь Микиез донгыса
кельтӥз: — Асьтэлэн пу тусьёсыныды
нискылалэ.
Бодыосыныз донгаськыса,
уллане гылӟиз но олома
куспын син азьысь ышиз.
Лымы гинэ пурӟыса кылиз.
Ми Микиен со сьӧры бызим.
Ӧвӧл Кузь Олексей, олокытчы
тюам. Викышъямезъя гинэ
валатским: лымы коркамы
пушкы усем. Потэмез уг луы
ни. Ми но поттыны йӧнзэ ӧм
шедьтэ. Лымы блиндажмылэсь
пыран-потан пасьсэ но
ӵоксам. Ярам, Мики бубизлы
ивортӥз.
Бадӟым пу лопатаен гудыса
поттӥзы. Вӧсь луэм ке но, Кузь
Олексей чик жаль ӧз поты милемлы.
Выль куасъёсыз понна
гинэ синвуос пызьыразы: огпол
нискылатэк но чигизы…
«Тол вылтӥ югыт нунал
ог чаша чай юытозь сяна уг
кыстӥськы», — ӵемысь шуылӥз
ӵужай. Соин, лэся, нуналъёслэсь
ортчемзэс шӧдылыны
ӧйлась. Вӧй буранъёс басылскем-чалмем
бере шунды
ӵемгес но ӵемгес пальышаны
ӧдъяз. Лымы южектӥз,
липет пумъёсы йӧ ӟугыриосы
ошиськыса, бӧрдыны шӧтаз.
Тани кенер кузяна лать тырем
кор пумъёс но лымы улысь
мычиськиллям. Кузь Олексей,
кӧс интызэ шедьтыса, со вылэ
пуксем ни. Мики но вуэм. Мыным
шултӥз: корт лопаткадэ
кутыса, пот ай, пе.
Вамыштӥ ураме.
— Вот мар, экеос, — Кузь
Олексей, кор вылысьтыз султыса,
вискамы вуиз но киоссэ
пуны ку изьыосмы вылэ понӥз.
— Отӥ выллапалъёс ву ӧръяны
канаваос гудыны ӧдъязы ке,
асьмеды, уллапалъёсты, тудву
нуыса кошкоз. — Собере азьпаламы
командир кадь чот-чот
вамыштӥз но, милям капка
азямыгес дугдыса, киыныз
возьматӥз: — Татӥ, мур канава
гудӟелэ. Соку одӥг шапык ву но
гидкуазяды уз пыры.
Микиен уртче пияла выллем
юж лымыез, оло нош,
музъем дорозь ик копамы.
Йырмы но уг адӟиськы ни,
дыр. Тани пыд уламы кытысь
ке ву ӧръяськыны шӧтаз ни.
Тае адӟыса, Кузь Олексей выльысь
косъяськись луиз:
— Табере нош, — кытысь
ке быдэс кырым векчи ньӧр
вуттэм ни, — со ву медаз поты
лымы вылэ но азбар пала
медаз ӧръяськы шуыса, та гумес
выльысь ӵоксаломы.
Кузь Олексейлэн нодъямезъя-валэктэмезъя
Микиен
ми чырмыт тыршимы. Канавамы
вамен векчи ньӧръёсты,
бодыосты тыримы. Соосты
вылтӥзы лымыен шобыртӥмы.
Кузь Олексей бырдам лымы
вылэз аслаз сапег пытьыосыныз
пужыятӥз на. Мын но тод
на табере, кытын вал со мур
канавамы.
Капкамы ӟукырак вазиз но,
ураме ӵужай потӥз. Кияз горшок.
Ӵӧжи пӧзьтӥ, пе, Микилэсь
песяйзэ ӧжытак коть куноято
ай, шуэ. Вамыш лэсьтӥз,
кык…
— Ой! — ӵужай гаӵолскиз
но син азьысь ышиз. Со интыын
пал пыд гинэ урдскыса улэ
на. Мазэ-созэ валатскытозямы,
Микиен ми азе питыраз тырттэм
горшок. Учкиськом: Кузь
Олексей ӵужаелы юрттэ ни. Ми
пала возьматэ:
— Осьыпеныд Мики алданчи
гу гудӥзы.
— Ӧм… ми ву ӧръяны канава
гинэ копам, — нюромыса
синмы бусаськиз.
Ӵужай пумитам ӧз куареты,
шунды сиос улын котмем
йӧ выллем кезьыт синъёсыныз
гинэ учкиз…
Кортӵог
— Олошайлы пудоез вазь
ик потто, — сюлолэн шлачкетэмезлэсь
шарак сайказ Истукан
Петрок. Собере ымпумъёсыз
ӟезиськымон вушйиз но,
ынэз палэнтыса, чулан укное
синъёссэ золтӥз: — Йӧнала
умтӥськыны но уг луы…
Истукан Петроклэн юртэз
гурт пумын сылэ. Пудо возьманы
черодзы вуэмъёс сюробыжоосты
та паласен поттаны
кутско. Инбамез сюлолэн пилемез
но, пастухлэн ньылоныз
кесиськымон черектэмез
но Петроклы нушыен васькытэм
кадь пото ни. Арлыдызлэн
зӥбемез шӧдӥське. Ӵукна
ӟардытозь, уммез уг лыкты.
Уйжомем уйсы выллем, ын
улаз синъёссэ бекыръяса ортчытэ.
Олома но пужнӥське
пурысьтам йыраз.
Синъёсыз кынисько гинэ,
шуак сайкано луэ. Тани али
но пастухась вуэм ни. Коргидысьтыз
ыжзэ улляно луоз.
Огназ йыраз мар кулэ на?
Одӥг ыжлы кельтӥськиз. Оло,
созэ но ӧй вордысал, гидкуазь
туссэ ыштоз — шим-шим
кылёз. Али гинэ вал кадь но,
кышноезлы но йыр-пыд сётон
вуэ ни. Гуртын пудотэк
чик уг луы уго. Ыжезлэн выжыез
ӟеч: одӥген пи ваемзэ
тодэ уськытыны ик уг луы.
Огнад йырад шуыса, киез
шер-вай лэзьяса улыны уг
луы, уго котькуд нунал ангесэз
маин ке но эктытоно. Кӧс нянь
вылын кыдёке уд вуы. Моӵсы
вань дыръя Гульсяськаеныз
скал-кунянтэк ӧз улэ, мар на
ӵӧж-ӟазег, чипы-курег сярысь
веранэз. Гурт калыкед пудотэк-бурдотэк
мар-о кароз?
Ыжзэ пиосыныз ульчае
уллян куспаз Истукан Петроклэн
малпанъёсыз быгыли
музэн лӧдӥськизы.
У-у, улон валлэсь биньгозызэ
сырк возьыны
быгатылӥз Истукан Петрок.
Колхоз ужын сокем ик куссэ
ӧз тӥялля, но огъя ужлэсь ӧз
палэнскылы. Кыллы кӧё-вӧё
луэмысьтыз, гидысь кыед
поттаса но ӧз курадӟылы,
гырыса-кизьыса но ӧз тузонӟылы.
Ветлӥз кунулаз папкаен.
Сокем ик бадӟым
кивалтӥсь ӧй вал ке но, колхозысьтызы
вань кеносъёслэнамбаръёслэн
усьтонъёссы
Петрок киын вал. Ужед сокем
секыт ӧвӧл шуыса, заправкаез
но быдэсак солы оскизы.
Эстӥськонлы кулэяськисьёс
уйшор уйин но Петрок доры
йыбыртъяны вуылӥзы. Гуртазы
чипы-курегезлэн сямен
машинаоссы-мотоциклетъёссы
вань ук. Ноку но пунэме
ӧз кыльылы Петрок. Юрт
кутӥськод бере, олома но кулэ
луэ. Соинтэк-а, гурт шорысьтызы
интыез ёркыт потэмен,
гурт пумазы лэсьтӥськиз. Ас
дораз но тӥрен йыг-дым кокаськыса
ӧз улы — палэнысьёсты
медъяз. Ваньзэ ӵыж-выль
пуктӥзы. Ул но ул гинэ вал.
Эх, олома шорысь улон
висказы сильтӧл бугырскиз
ук. Таркаськиз колхоз. Таре
ужасез ик ӧвӧл ни, шуо кадь.
Кин кытчы быгатэм-шедьтэм
уж утчаны кошкылӥзы. Ярам,
Петроклы костаськоно ӧз луы
ни — ӵап пенсие потонэз тупаз.
Кошкон азяз но уйёссэ ӧз
кӧла Петрок. Быгатэмъяз-вормемъяз
ваньзэ дораз валтӥз.
Гараж ӧссэ усьтыса, синъёсыныз
машинатэм липет
ултӥ ортчиз. Коньдонэз вань
дыръя черодэз ӧз вуы машина
басьтыны. Собере люкам
коньдонэз писпуысь сӥзьыл
усем куаръёс интые кылиз.
Лэсьтэм гаражез тыриськыны
яраз коть. Ваньмыз та кортъёс,
езъёс, шурупъёс, болтъёс кенос-складысь
кисыын я сапег
кунчиын бертылэмын. Нош
кортӵог кадьёсты ведраен-ведраен
вайылӥз вал но таки уг
шедьты ни. Берлозэ Гульсяськаезлы
корос лэсьтӥсьёслы
поттӥз вал. Ведраезлэн
ӝыныозяз вал на, лэся. Одӥг
коросэ сомында кортӵог уд
йыга. «Кытын ке эшшо запасэз
луыны кулэ, — пыдзэ кыска
Петрок. — Кытчы меда лач
кари?»
Маза уг сёт ни Петроклы
кортӵог утчан. Толон тани
кортӵог кулэ луиз. Бакча берысьтыз
кенер пуӵез олокин
чигтэм. Со пасетӥ пудоос бакчаяз
норозы ни. Караулчи сямен
лумбыт уд пукы. Утчаськонъяз
куштӥськем йӧгузэ
усьтӥз.
— О-о! — синъёсыз питырскизы,
— татын быдэс склад
вылэм ук…
Васькиз но аслаз синъёсызлы
ӧз оскы: кортӵогез гинэ
куинь-ньыль яшшик. Ку меда
ворттӥз таосты?
Кӧня малпаськиз-малпаськиз
— пужмертэм йырыз таки
тодаз уськытыны ӧз быгаты:
ку соос татчы вуизы? Эх, кукесоку
выль но вӧё кортӵогъёс,
аръёсын мускытын-вуын кылльыса,
комъяськыса ик сыномиллям.
Горд сюен наштам
мактал. Оген-кыкен басьтыны
но уг луы ни. Яшшикъёсаз
копаськыса, ог кырым мында
люказ ик.
— Одӥг пуӵез ке но шуккыны
йӧнзэ шедьто, оло? — бакча
пумаз кыштыртӥз пересь.
— Пулэз но небӟемынгес кадь,
— вамен усем пуӵез ӝутӥз Петрок.
Петрок, гырпумыныз пуӵсэ
пыкъяса, киысьтыз кортӵогаз
таш! сётӥз — соиз чумер выллем
куасалскиз. Шонертыны
кокыштӥз но — чигиз. Мукетсэ
басьтӥз. Таиз но ӧз пыры.
— Э, Петрок, — аслыз шара
вазиськиз пересь, — гыбдам
пулэ но уг пыр ни бере,
кортӵог уд шуы ни тае…
Ваем кортӵогъёсыз номырлы
ярантэм луиллям.
Огез гинэ кык вись кузьда
кортӵогез пуӵ пыртӥ потӥз ик.
Оло, керттылыны ез шедьто
малпаса, кенер кузяна кошкиз
Петрок.
Я, огысьтыз пуӵ борды
юнме керттылэм езэз шедьтӥз
ик. Сое пертчылыса, шукконо
пасез доры вамыштӥз. Нош
кытын ай со пуӵез? Урдыса
кельтӥз вал ук. А, люгы куаръёс
пушкы усем. Вамыш
лэсьтӥз, кык… Пыдаз пырс пыриз
но колоша пыртӥз потӥз
кортӵог. Пыд вылыз пӧсьвуаськыса
музэн кошкиз —
шуныт вир пыдкук пушсэ ик
коттэ ни. Вырӟыны дӥсьтытэк,
интыяз пумиз Петрок. Пиньёсыныз
гинэ гизьыртӥз:
— Сынэм кортӵог дун но
ӧвӧл ни улонэд, Петрок!

№36 (25948)
20 2022-тӥ ар 15-тӥ куарусён
Книга ӝажы
Туннэ — ӵуказелэн кутсконэз
Таӵе нимын алигес выль
книгазэ поттӥз Россиысь
Писательёслэн огазеяськонзылэн
ёзчиез, «Кизили»
журналлэн азьвыл
редакторез Ульфат
Бадретдинов.
Мар сярысь та роман?
Улон сярысь, удмуртъёс сярысь,
калык сярысь… Кылем
дауре улэм адямиослэн но туала
вакытэ улӥсьёслэн шудзы
но кайгузы, яратонзы но люкиськонзы,
шумпотонзы но
вожъяськонзы возьматэмын
пӧртэм учыръёс но удмурт сям-йылолъёс пыр. Книгаын 2 валтӥсь
геройёс: огез — удмурт калыклы тодмо писатель, дышетӥсь, революционер,
«Интернационалэз» удмурт кылэ берыктӥсь Максим
Прокопьев, мукетыз — кылбурчи но дышетӥсь Светлана Куноева.
Кызьы герӟасько но маин ог-огзылы кельшо та геройёс, тодыны
луэ, романэз пумозяз лыдӟыса гинэ.
Та книгаез мон детективез сямен лыдӟи, куд-ог интыосыз
фэнтезилы матын потӥзы. Удмурт историысь тодмо нимтулъёс
но адямиос лыдӟисез эшшо но зыгато. Романлэсь ог 40 бамзэ
лыдӟеме бере малпай: та адямиос сярысь умойгес луысал,
дыр, кык нимаз книга гожтыны, малы ке шуоно одӥг сюжетысь
мукетаз потыны, одӥг даурысь мукетаз выжыны шуак уггес
луы. Но произведенилэн шораз соосты висъясь борддор пумен
сылме. Писательлэн вольыт кылыз, романысь тунсыко образъёс
но турлы сӥньысъёсын выллем керттэм сюжет лыдӟисез
пумозяз бордазы возё. Тросэзлэн юанэз кылдоз, дыр, кин со
Светлана Куноева? Уго книгаез лыдӟыку, малпан кылдэ: мон та
нылкышноез тодӥсько кадь…
— Света Куноевалэн прототипез вань, но мон сое али уг вера,
— шуэ Ульфат Бадретдинов. — Романме лыдӟисьёс трос ӧй вал
на. Но книгае кельшем ни писательёслы Сергей Матвеевлы, Владимир
Михайловлы, Люза Бадретдиновалы. Романме быдэс ар
гожтӥ. Кема дасяськи, материал люкай. Башкириысь Алтау гуртысьтымы
М. Прокопьевлэсь дышетскисьсэ но шедьтӥ на. Архивын
но кӧня ке бугыръяськи. Татарстанысь Нырья черкогуртэ но
трос пол вуылӥ. Отысь куд-ог адямиослэсь юалляськи. Кык сюжет
юри лэсьтэмын. Соос пумаз герӟасько.
________
Галина СЕМЁНОВА
Кылпумысь
Кин пушкын улэ кион?
Писатель Алексей Варламов
— «Затонувший
ковчег», «11 сентября»,
«Рождение», «Дом в
деревне» но мукет книгаослэн
авторзы. Туала
критикъёс пусъё: та
прозаик туж умой тодэ
но вала, мар сярысь
гожъя.
Алексей Варламовлэн
творчествоеныз мон 10 ар
пала тодмо ни. Туж кельшо
солэн веросъёсыз, уката но
паймытэ, кызьы автор произведениоссэ
йылпумъяны
быгатэ.
«Читай, Ижевск!» фестивале
вуылыкуз, мон юай солэсь,
кыӵе книгазэ лыдӟыны
дэмласал. Алексей Варламов
шуиз: лыдӟе «Душа моя Павел»
романэз, со умой книга.
Совето вакытысь, 1980-тӥ
аръёсысь, салам выллем. Таиныз
ӵошатыса, «Мысленный
волк» роман тросэзлы
секыт потэ.
Фестивальысь адӟытонын
«Душа моя Павел» книга вузаса
быдтэмын ни вылэм,
одӥг гинэ на кылем «Мысленный
волк» роман но,
монэ возьмам, лэся. Басьтӥ.
А. Варламовлэсь кылъёссэ
тодам вайыса, азьлапал
ик секыт романэз лыдӟыны
дасяськи. Но произведенилэн
ӝыныозяз вуыса, валай:
лыдӟыны секыт ӧвӧл — тунсыко,
вӧсь, кышкыт. Малы ке
шуоно туж умой шӧдӥськод
геройёслэсь кышканзэс:
Россиез витё туж секыт
вир кисьтон вакытъёс —
1917-тӥ ар, Февраль революция,
эксэй, Распутин…
Та романаз А. Варламов
возьматэ ӟуч калыклэн историысьтыз
шурдыт дырез —
1914-тӥ-1918-тӥ аръёсты. Геройёсыз
трос но пӧртэмесь,
татысь тодманы луэ Михаил
Пришвин, Александр Грин
писательёсты, Григорий Распутин
старецез, Василий
Розанов философез… Уно
учыръёс, турлы малпанъёс,
умой но урод адямиос, чылкытлык
но сьӧлык, Инмарлы
оскон но сектаос — ваньзы
ог-огенызы герӟасько но бинисько
одӥг бугоре, ваньмыз
со — ӟуч калык.
Книгалэн туж чебер кылыз.
Сое лыдӟыкуд, огдырлы
вунэтӥськод, романэз туала
писатель, А. Горький нимо
Литературной институтлэн
ректорез гожтӥз шуыса. Гожтон
манерез тупа ӟуч классикъёслэн
ки бервылзылы,
кылсярысь, мыным со тодэ
вайытӥз И. Бунинэз.
Романлэн вылтусыз но
тунсыко, нимыз но бордаз
кыске. Кыӵе кион сярысь
вераськон мынэ? Та юанлы
лыдӟись ачиз валэктон утчалоз
но шедьтоз, дыр. Котькуд
адямилэн пушказ ӟечез но,
уродэз но улэ. Но кырсь малпанъёслы,
вожпотонлы, йыркурлы,
вожомонлы эрик сётӥд
ке, соос тонэ вормозы, кион
сямен кесялозы. Та книгаын
но кион вань, со одӥг адями
пушкын гинэ ӧвӧл — быдэс
калыклэн лекезлэсь кылдэм
сьӧсь. Бадӟым но сютэм, со
дась ни кесяны Россиез…
А. Варламов та книгаяз геройёслы
но вакытлы дунъет
уг сёты, со кылъёс, образъёс
но учыръёс пыр возьматэ,
кызьы тӥясько ӟеч кусыпъёс,
куашка семья, воштӥське
яратон, вузаське эшъяськон.
Куд-ог адямиос тодмантэм
воштӥсько урод яке ӟеч
пала. Кылсярысь, романлэн
кутсконаз Питерысь Василий
Комиссаровез асьмеос
адӟиськом гужемлы гуртэ
бертэм механикез сямен,
нош отӥяз со луэ офицер
но, пленной но, тюрьмаен
кивалтӥсьлэн воштӥсез но.
«Малпанъёсты котькуд ӵукна
но ӝыт миськоно, пиньёсты
сямен ик. Висъяны быгатоно,
кудъёссэ асьмелы Инмар
сётэ, нош кудъёссэ шайтан
ыстэ», — шуэ А. Варламовлэн
героез Василий Комиссаров.
________
Галина САВИНА
Лыдӟись вера малпанзэ
«Игнаш сайкемын» — удмурт энциклопедия
Римма Игнатьевалэсь та
романзэ туж мыло-кыдо
лыдӟи. Книгалы черод
мырдэм вуиз. Гуртысьтымы
лыдӟиськонниын
со одӥг гинэ. Нош
тросэзлэн та книгаез
лыдӟемзы потэ.
Вакчиятыса печатламзэ
мон «Кенеш» журналысь адӟи
вал ини, но озьы лыдӟыны
секыт. Толэзь ортче но — романысь
куд-ог учыръёс вуно.
Нош татын огломак лыдӟи
но — воксё синмаськи! Туж
шумпотӥ, асьме писательёсмы
пӧлын таӵе усто, визьмо,
чидась, шуг-секытъёсты вормись,
котьмае пыр-поч тодыны
но валэктыны тыршись,
узыр кылтӥрлыко нылкышно
гожъяськись вань шуыса. Мон
понна али самой ӝужыт гурезь
— Римма Игнатьева.
590 бамъем роман туж
ӟеч пӧрмем. Мадён кутске
19-тӥ даурлэн 2-тӥ ӝыныяз но
йылпумъяське 20-тӥ даурлэн
30-тӥ аръёсаз. Лыдӟисьлэн
син азяз яркыт пуксе та вакытэ
удмурт гуртлэн вордскемез,
будэмез, воштӥськемез,
удмурт калыкмылэн Россиын
ортчись воштӥськонъёсы
пыриськемез. Та книгаез
лыдӟыса гинэ но, пиналъёс
быгатозы зэмос историен
тодматскыны. Та туж ӟеч
исторической роман.
Со сяна, та книга котькуд
шаерчилы — зэмос шыкыс.
Калыкмылэсь кыӵе гинэ сямйылолъёссэ
тодэмед потэ
— ваньмыз тупен-тупен мадемын.
Вӧсяськон нергеос-а,
сюан-а, мукет бадӟым
шулдыръяськон-а — ваньзэ
татысь шедьтод. Нош кыӵе
узыр кылыз! Уйпалан улӥсь
удмуртъёслэн диалектсы кутэмын,
но котькуд тодмотэм
кыллы валэктон сётэмын.
Писатель — зэмос кылчи!
Нош ма быдӟа визьнодан
кужымез! Эх, лыдӟысалзы ке
тае пиналъёс, макем трос тодон-валан,
ӟеч сямъёс басьтысалзы!
Эшшо Римма Игнатьева —
зэмос психолог. Геройёссэ сокем
валаса усьтэ, соослэн пуш
дуннеязы пыриськод кадь.
Инкуазь сярысь суредъёсыз
сыӵе яркыт буёлъёсын суредамын
— зарни кылбур кадесь.
Ваньзэ син азе пуктыны луэ.
Римма Серафимовнаез
туж гажасько, висемез вылэ
чӧлтӥськытэк, сомында
исторической материал
люканы-радъяны быгатӥз
шуыса. Валтӥсь героезлэн
— Игнашлэн — выжыез туж
узыр, ньыль-а, вить-а поколениез
возьматэмын. Автор
3-4 гуртъ ёсысь адямиослэсь
улон сюресъёссэс суреда.
Зол!
Огъя вераса, мон та книгаез
одно дэмласал ӟуч кылэ
берыктыны. Умой луысал,
соя сериал кылдытысалзы
ке. «Угрюм-река» яке «Вечный
зов» фильмъёслэсь ляб
ӧй луысал. Мон ваньдылы
ӵектӥсько та романэн тодматскыны
— уд жалялэ.
________
Римма РЫЛОВА.
Можга ёросысь
Александрово гурт
«Ингоже» юанъёсын, дэмланъёсын вазиськоно
73-33-42 телефон номеръя.
Веросъёстэс-кылбуръёстэс ыстэлэ, «Ингоже» шуыса,
электрон почтае udmdunne@yandex.ru.