ingozh №10

Литературалы
сӥзем газет
№41 (25953)
2022-тӥ ар 20-тӥ коньывуон 13
Дырпус
23-тӥ коньывуонэ 90
арес тырмысал Удмуртиысь
калык кылбурчилы,
нылпи писательлы
Герман Ходыревлы.
Герман Алексеевич
вордскиз Алнаш черкогуртын.
Йылпумъяз
Можгаысь педучилищеез
но Ижысь пединститутэз.
Ужаз «Алнаш
колхозник», «Советской
Удмуртия», «Дась лу!»
газетъёсын, «Молот» но
«Кизили» журналъёсын.
Тужгес тодмо книгаосыз
— «Кызьы мон будӥ»,
«Зор, зор, зорые!»,
«Вортты тон, валэ».
Г. Ходыревлэсь нимзэ
нуллэ Ижысь 20 номеро
школаысь шаертодонъя
музей.
Книгаен тодматскон
Лыдӟиськись пиосмурт
Котырес лыдпус
30-тӥ коньывуонэ 75
арес тырмоз Россиысь
но Удмуртиысь культура
удысысь дано ужасьлы,
журналистлы, кылбурчилы
Вениамин Ившинлы.
Вениамин Никонорович
вордскиз Кез ёросысь
Ванялуд гуртын. Удмурт
пединститутэз йылпумъяса,
ужаз «Дась лу!»,
«Советской Удмуртия»
газетъёсын, «Кизили» но
«Кенеш» журналъёсын
кивалтӥз. 18 ар ӵоже
«Удмуртия» издательствоын
валтӥсь редактор
вал. Со Удмурт Республикалэн
Кун премиезлэн
но шаерысьтымы но
Россиысь литературая
пӧртэм премиослэн
лауреатсы луэ.
Берыктон
Можга ёросысь Удмурт Пыӵасысь Валентина но Николай Емельяновъёс.
Туспуктӥз Максим ЕГОРОВ
Москваысь А. Горький
нимо Литературной
институт поттӥз «Современный
удмуртский
рассказ» антология.
Туала удмурт писательёслэсь
произведениоссэс
люказ, ӟуч кылэ
берыктӥз кылосбур тодосъя
кандидат, А. Горький
нимо Литературной
институтысь дышетӥсь
Вера Пантелеева. Солы
юрттӥзы студентъёсыз
— та институтын ик
берыктон ужлы дышетскись
егитъёс — Софья
Князева, Анастасия
Ларионова, Луиза Зарипова
но Владислав
Верещагин.
Антологие пыризы
20 писательёслэн быдэн
2 веросъёссы.
Можга ёросысь Удмурт
Пыӵас гуртын ортчиз
шаерысьтымы тодмо
дышетӥсьлэн, краеведлэн,
ужысь ветеранлэн
Николай Емельяновлэн
«Сюлэм возьма умойзэ»
книгаеныз тодматскон.
Николай Николаевич уно
аръёс ӵоже школаын историлы
но англи кыллы дышетӥз,
завуч но директор вал. Удмурт
газет-журналъёсты мылокыдо
басьтэм-лыдӟем сяна,
со трос гожъяське. Люкаськем
малпанъёссэ, удмурт но
ӟуч изданиосын печатлам
очеркъёссэ но тодэ ваёнъёссэ
туэ нимаз книгаен поттыны
юрттӥз «Удмурт дунне» газет.
70 арес тырмонэзлы аслыз
сыӵе кузьым лэсьтӥз. Та бичетсэ
Н. Емельянов кузпалэзлы
Валентина Андреевналы сӥзиз
ке но, книга быдэс гуртлы но,
Можга ёрослы но синпель выллем
луиз. Уго татын Удмурт
Пыӵас гуртысь но, Можга ёросысь
но потэм тодмо адямиос,
дышетӥсьёс, крезьгурчиос сярысь
очеркъёс вань.
Книгаен тодматскон ӝыт
туж шуныт мылкыдын ортчиз.
Ужрадэз дасясьёс, Можгаысь
ёрос библиотекаын
ужасьёс но Удмурт Пыӵас
культура юртын тыршисьёс,
Н. Емельяновлэсь книгазэ
шара «лыдӟизы» кадь. Авторлэн
улэм-вылэменыз но
тодматӥзы, тунсыко юанъёс
но сётъязы. Гуртысьтызы
«Ӝыт тылъёс» ансамбле
ветлӥсь кенакъёс Н. Емельяновлэн
англи кылысь берыктэм
выжыкылэзъя сценка
пуктӥзы. Ӝытэз шулдыртӥзы
на Можга ёросысь культура
юртысь кырӟасьёс — Надежда
Старкова, Вероника Романова
но Наталия Орлова. Нялтас
вераса, Наталия Орлова — Николай
Емельяновлэн нылыз.
Сцена вылын атай сярысь
кырӟанзэ быдэстыкуз, Николай
Николаевичлэн но, залын
пукисьёслэн но синвузэс кутэмзы
ӧз луы.
Николай Емельянов дышетӥсе
ӧй ке мынысал, луысал,
дыр, кырӟась. Со уго
пичи дырысеныз кырӟанэн
эшъяськемын. Нырысетӥ сценаез
— гуртысьтызы урам. Та
ӝытэ но со эшеныз, мандолинаен
шудӥсь Николай Михайловен,
«Малы сыӵеесь»
кырӟанэз быдэс тӥз. Трос ӟеч
кылъёс верамын вал Н. Емельянов
сярысь. Можга ёрос
библиотекалэн кивалтӥсезлэн
воштӥсез Алёна Муравьёва
пусйиз, макем бадӟым уж
лэсьтӥз автор, малы ке шуоно
та книга быдэс гуртлы кузьым
выллем луэ. Татын котькуд
учыр авторлэн сюлэм пыртӥз
поттэмын. Книгалэн авторез
ӟеч кылъёсын пунэме ӧз кыльы,
туж шунытэн тодаз вайиз
Атаспочинка гуртысь школаын,
собере Пыӵас школаын
дышетскон но ужан аръёссэ,
дышетӥсьёссэ, выпускникъёссэ,
ӵыжы-выжыоссэ, кузпалзэ,
нылпиоссэ. Ачиз сярысь со
шуэ:
— Мон 70 аресъем лыдӟиськись
пиосмурт. Лыдӟиськон
мыным кужым сётэ,
мылкыдме бурдъя, малпаськыны
косэ но улыны юрттэ.
________
Галина СЕМЁНОВА

№41 (25953)
14 2022-тӥ ар 20-тӥ коньывуон
Юбилей
Мылкыдыз зарни
15-тӥ коньывуонэ
юбилейзэ пусйиз Удмуртиысь
дано журналист,
кылбурчи, «Ӟечбур!»
газетлэн редакторез
Антонида ЕРМОЛИНА.
— Антонида Васильевна,
тӥ кылбурчи яке журналист?
— Та чылкак пӧртэм ӧръёс,
но мон соосты люкыны уг
ни быгатӥськы. Пичи дыръям
фельетон жанрен трос
гожъяськылӥ, Алнаш ёросысь
Суворов нимо колхозысьтымы
оже ветлэмъёслэсь, ожлэн
мышказ тыршемъёслэсь интервью
басьтылӥ, очеркъёс
гожъялляй. Ёросысьтымы
кыӵе гуртъёс кудаз колхозэ
пыро, кытын кӧня йӧл кыско,
кызьы ю будэто — ваньмыз
со мыным тунсыко потылӥз.
Журналист улонысь ваньзэ
син йылтэ, адӟемзэ дунъя, шарая,
дуннеысь югдурез валаны,
калыкен огъя кыл шедьтыны
тырше.
Нош кылбурчи дуннеез ас
шӧдонъёсыз пыр паськытгес
но мургес адӟе, мылкыдъёссэ
кылсуредъёс (образъёс) пыр
усьтыны быгатэ, аслыз гинэ
тупась дунне но кылдытэмез
луэ. Соин кылбурчиосты куддыръя
«калык пӧртэм» шуо.
Кыӵе ке но вакытам мон калыклэсь
пӧртэм луэмме валай,
но сыӵе луэме уг поты
вал, кылбур гожъянлэсь но
куштӥськыны выри, гожъямъёсме
кесялляй. Кыӵе шузи
вылӥськем! Инмарлэсь сётэм
кузьымзэ соку дунъяны
быгатӥськымтэ. Соин ик пинал
кылбурчиосты, гожъяськонзэс
медаз аналтэ шуыса,
индылӥсько. Кылбуран мылкыд
улонысь шуг-секытъёсты
вормыны юрттэ.
— Мар тӥ понна «Ӟечбур!»
газет?
— «Ӟечбур!» газетлэн редакцияз
1994-тӥ арын ужаны
лыктӥ. Редактор Владимир
Возняков, гитараен шудыса,
пумитаз. Соин ик мон понна
«Ӟечбур!» — со сюлэм крезьгур.
Котькыӵе дыръёс луо ке но,
уж дурам котьку шумпотыса
лыктӥсько. Школаын дышетскыкум
но, татчы вуылӥсько
вал. Редакциын ужасьёс монэ
ас нылзэс кадь пумиталлязы.
Соин но «Ӟечбур!» кыкетӥ
доре кадь потэ.
2021-тӥ арын удмурт кылын
потӥсь газет-журналъёсты
одӥг липет улэ пыртӥзы,
кылдӥз Йӧскалык прессая
юрт. Соин кивалтэ Зинаида
Рябинина. «Ӟечбур!» газет
понна кыл кутон ужез
мыным оскизы. Ог-огмес
«Ӟечбур!» газетлэн редакторез, кылбурчи
Антонида Ермолина.
валаса, ог-огмылы юрттыса
ужаны тыршиськомы.
— Мар сётэ нылпиос понна
гожъяськон?
— Нылпиослы гожъяськон
— со шуд. Соосын
пумиськылӥсько, вераськисько
ке, кӧня ке нунал ас поннам
мынекъяса ветлӥсько. Сыӵе
мусо пото вераськемъёссы.
Тани та нуналъёсы одӥгаз
школае потай. «Ми тӥледыз
кошкыны ум лэзе», — шуо
пиналъёс. «Мынам но вераськеме
потэ на», — ватса
дышетӥсьсы. Доре бертыса,
учкисько: одӥгез пияш электрон
почтаям выжыкылзэ келям,
мукетыз «Ватсапе» гожъям.
Кызьы мылкыд уз ӝутскы?
Табере пӧртэм амалэн
герӟаськыны луэ, соиз шумпотымон.
Но синмысь синме
учкыса вераськонлэсь дуноез
номыр ӧвӧл. Озьы пиналъёс
умойгес усьтӥсько. Нылпилэн
дуннеез — со векчи йӧ пырылэсь
лэсьтэм ненег сульдэр яке
унябей сяська кадь. Ӧжыт гинэ
валатэк шокчид ке, куашкатод.
Нылпиос сярысь гожъяны
ваньмыз уз быгатэ. Улонэз
адӟем адямиос сярысь трос
гожтыны луоз. Нош ма гожтод
али гинэ улыны кутскись мурт
сярысь? Отчы кулэ чылкак мукет
усьтон.
— Туала авторъёс кыӵеесь?
— Жаляса верано, туала
авторъёсмы чеберлыко
литератураез трос уг лыдӟо.
Гожъямъёсазы со шӧдӥське.
Чеберлыко литератураез тодытэк,
гожъяськон ӧрлэсь
мурдалазэ уд вала. Удмурт
кылын гожтыны ке уг быгато,
ӟуч кылын гожтыны куриськом.
Но туала пиналъёс
ӟуч кылэз но ляб тодо. Нош
со дыре ик мукет удысъёсъя
тодон-валанъёссы туж трос.
Улон соослы паськытгес усьтӥськемын.
Пӧртэм улосвыл
ӵошатсконъёсы пыриськыны
луонлыкъёссы вань.
— Выль книгадэс трос
мурт лыдӟиз-а ни?
— «Суредай мон тонэ
уйвӧтам» бичетэ лыдӟисьёссэ
шедьтэ кадь, ӟуч кылэ берыктӥсьёс
но вань. Пумен
выль чуръёсы но кылдо, соосты
ӵыжы-выжыосылы лыдӟись
ко. Кылсярысь, анайлэн
вордскем нуналаз матысь
адямиосылы сӥзем кылбуръёсме
лыдӟи. Пушсы тырымон
луиз.
— Йӧно арлыдлэсь вуэмзэ
шӧдӥськоды-а?
— Йӧно арлыдэз шӧдон
ноку уг лыкты, дыр. Льӧль
инвис доры вуиськод кадь но,
со эшшо но паськыта. Егитъёс
ежесь пото, мӧйыос —
улымонэсь. Ачид сыӵе ик кылиськод
кадь. Мылкыды зарни.
________
Галина СЕМЁНОВА
Туспуктӥз Алеся ГЛАВАТСКИХ
Яратонлэн гумырез
Яратон корка пушкын
Халатэн ветлэ,
Трамвайын но со куддыр
Кынмыса пуке…
Тӥ нош малпады вал, дыр,
Со инмын улэ.
Чебересь романъёсы
Ватскыса кыле.
...Инсьӧръёс, оло, уло
Вӧтъёсаз солэн,
Нош ачиз адямилэн
Вотэсаз улэ.
Андан дурисьлы дан
Пиосмуртэ,
Тыныд йыбырттӥсько мон,
Ӝуась тыллэсь пӧсьсэ кузьмамедлы
Тау карыса.
Нош собере кезьыт вуэн
Шуак
Пылатэмед понна но
Тау тыныд.
Мынам тон дурисе — пиосмуртэ.
Тонтэк мон ноку но ӧй луысал таӵе.
Кышномуртэд.
Тӥяськон
Тӥяськиз корка ӧсэ.
Ӧс сьӧры кельтӥ асме.
Паллян пыд йылам султӥ,
Паллянэ ик вамыштӥ.
Льӧль шунды паллян сизэ
Кырымам сётӥз огзэ,
Тубытӥз инму сьӧры.
Мон учки ачим шоры —
Ма, мукет мон вылӥськем.
Ӵок, ӧсэ ке тӥяськем!
Мон усьтӥ мукет палме,
Табере калык пайме.
Вакытэз дугдытон
Нуналлэсь шокамзэ,
Ӵуж куарлэсь бергамзэ,
Юг лымы пырылэсь
Укыр сэзь эктэмзэ…
Дӥсьтыса мон басьтӥ,
Чуръёсам дугдытӥ.
Соослэсь дыртонзэс
Мон кари палдурес.
Бус сямен
Шайгуос вылэ будэм ни выль турын,
Чик возьдаськытэк эктэ тӧлъя.
Оло нош, вынъёсылэн лулзы
Со турын пӧлын ни лопыръя.
Бус сямен усё турын пӧлы,
Синвуэ лысвуослы пӧрмоз.
Дыректоз лопырскыса лулы.
Пеймытысь югыт соку вордскоз.
Кысон
Тон ачид ик тыл понӥд
Мынам сюлэмам.
Тон ачид сое кысӥд
Эгырӟон пумаз.
Котькыӵе ке но тылскем —
Со куке кысэ.
Ӝу бервыл гинэ маке
Туж кема висе.
________
Антонида ЕРМОЛИНА

№41 (25953)
2022-тӥ ар 20-тӥ коньывуон 15
«ИнГОЖ» конкурс
Умой малпанъёстэк дунне шальтра
Йӧскалык политикая
министерствоын «Ингож
усьтӥське» ужрад ортчиз.
Татчы люкаськизы
«Удмурт дунне» газетэн
но Кун Думаысь депутатэн
Лариса Бурановаен
ялэм «ИнГОЖ» конкурсэ
пыриськемъёс, писательёс,
литературоведъёс,
редакторъёс.
Веросъёс золэсь,
кылбуръёс лябесь
Литературая «ИнГОЖ»
вож вылъяськонэ пыриськизы
16 арескысен 35 аресозь
егитъёс. Ужъёсты учкиз нимысьтыз
жюри. Кун Думаысь
депутатлэн Лариса Бурановалэн
юрттэмезъя коньдон премиен
пусъемын 9 мурт. Тужгес
но шумпоттӥзы верос гожъясьёс.
Туала егитъёс пӧртэм
темаос борды басьтӥсько —
улон-вылонын кылдэм шугсекытъёсты
сэрттон-пертчон,
ож, анай-атай кусыпъёс, туала
вакытлэн черъёсыз, адямилэн
урод сямъёсыз... Таин валче
ик мылкыд куашказ, «Кылбур»
номинацие вуэм ужъёсты
сэрттыса-пертчыса, валаны
луиз: соос ӧжытгес но, прозаен
ӵошатыса, трослы лябесьгес
но шуыса.
30 авторъёс (40 пала ужъёс)
пӧлысь вормисе потӥзы:
«Вакчи верос» номинациын:
1-тӥ инты — Евгения Гусоргина
(Алнаш черкогурт,
23 арес).
2-тӥ инты — Татьяна
Ильина (Пичи Пурга ёросысь
Арлан, 21 арес).
3-тӥ инты — Дарали Лели
(Ижевск, 35 арес).
«Кузь верос» номинациын:
1-тӥ инты — Галина Евсеева
(Пичи Пурга ёросысь
Сосновка, 23 арес) но Лариса
Чернышева (Ува ёросысь
Вамъя, 24 арес).
3-тӥ инты — Виктория
Михайлова (Можга педколледж,
19 арес).
«Кылбур» номинациын:
Ольга Иванова (Алнаш
ёросысь Кузёбай, 32 арес).
«Читай-город» магазинлэн
сертификатэныз пусъемын
Алнаш ёросысь Усо школаысь
Мелитина Охотникова но Татарстанысь
Кукмор ёросысь
«ИнГОЖ» конкурсэ пыриськемъёс.
Лельвижысь Ксения Усманова.
Котырес ӝӧк сьӧрын вераськон
мынӥз удмурт литературалэн
но анай кыллэн
ӵуказе нуналзы сярысь. Та
пумысен сюлэмшугзэ усьтӥз
Лариса Буранова:
— Котькыӵе литератураез
басьты, со выль авторъёстэк,
егит гожъяськисьёстэк, выль
произведениостэк улыны уг
быгаты. Та конкурсэз малпакумы,
мынам тодэме потӥз,
кыӵе туала удмурт литературалэн
ымнырыз, кызьы со ассэ
шӧдэ, кызьы туала удмурт литератураын
улэ анай кылмы.
Мон али ёросъёстӥ калыкен
пумиськылыса вет лӥсько. Туж
ӧжытэз быгатэ чебер, «ческыт»
удмурт кылын вераськыны. Та
конкурс малпаськытэ: макем
пиналъёс ӟеч тодо, дышето удмурт
кылэз школаосын.
«Мискинь»
ӧй кылдысал
Конкурсын вормисьёсты
сӥлы карон ужрадын гожъясьёс
лыдӟизы произведениоссылэсь
оглюкетсэ. «Вакчи
верос» номинациын вормись
— Алнаш ёросысь Евгения
Гусоргина — нырысь ик тау
кылъёссэ вераз конкурсэз
радъясьёслы:
— Тау «Удмурт дунне» газетлэн
редакторезлы Елена
Миннигараевалы бурдъямез
понна, Кун Думалэн депутатэзлы
Лариса Бурановалы
премиос висъямез понна. Та
конкурс ӧй луысал ке, мынам
«Мискинь» веросэ ӧй кылдысал,
дыр, туннэ мон татын
ӧй сылысал. Героиняелэн нимыз
но юнме Надежда гожтэмын
ӧвӧл. Малы ке шуоно
котькудӥзлэн сюлмаз ӟечезлы
осконэз луыны кулэ. Умой
адямиостэк, умой малпанъёстэк
дунне шальтра, та малпанэз
лыдӟисьёс доры вуттыны
тыршиз веросысьтым валтӥсь
герой — Мискинь.
Туннэ нуналлы тупась вероссэ,
куке Украинаын быро
асьме музъеммес утись пиос,
лыдӟиз Татьяна Ильина.
«Ӵемгес тон учыкылы инбаме»
нимо ужаз со гожтэ
лётчиклэн подвигез сярысь.
Т. Ильиналэсь та секыт тема
борды басьтӥськемзэ пусйиз
но кӧня ке дэмланъёс сётӥз
«Удмуртия» издательствоысь
валтӥсь редактор, пӧртэм
ожъёсын бырем удмурт пиос
сярысь гожъясь писатель Георгий
Грязев:
— Та одӥгез сыӵе секыт
тема, кудзэ гырыны кулэ, со
сярысь гожъяны луэ, астэ героед
интые пуктыса. Таӵе темаез
басьтӥськод ке, гожты
озьы, геройлэн семьяез, анаез
сыӵе пи будэтэменызы мед
данъяськозы.
Галина Евсеевалэсь «Возьыт»
кузь веросэзлэсь оглюкетсэ
кылзэмез бере литературовед
Виктор Шибанов ас
малпанъёссэ шараяз:
— Россиын берло дыре
бадӟым жанръёс калленкаллен
быро, нош Удмуртиын
роман гожъясьёс будо, берло
кылдэм романъёс М. Векшиналэн,
Р. Игнатьевалэн, П. Захаровлэн,
Дарали Лелилэн,
У. Бадретдиновлэн, Л. Малыхлэн
ки улысьтызы потэмын.
Галина Евсеевалы но мон дэмласал
та кузь мадёссэ романозь
вуттыны, малы ке шуоно
солэн Валерия героиняез —
романысь герой.
Егитъёслэн ужъёссылы
аспӧртэм анализ лэсьтӥз
Ӥӧскалык прессалэн юртэзлэн
кивалтӥсез Зинаида
Рябинина. Со пусйиз секыт,
сюлмаськытӥсь темаос борды
басьтӥськыны дӥсьтэмзэс.
Кылсярысь, Лариса Чернышева
«Мон роялен шудылӥ» веросаз
гожтэ пиналзэ куштӥсь
анай сярысь. Та верослэсь
оглюкетсэ кылзыса, писатель
но кылбурчи Галина Романова
шуиз: татын улонысь тужгес
курытэз, секытэз но чеберез
ваче пумит пуктэмын.
Та произведениын точка уг
сылы на, уго улонын но умоез
но уродэз ялан ваче нюръясько.
«Кылбур» номинациын
тросгес вал рифмаен гожтэм
чуръёс, соосты быдэсак кылбур
но шуыны уг луы. Но Ольга
Иванова «Зангари» поэмаеныз
паймытӥз. Нырысь ик,
егитъёс поэмаос али туж ик
уг гожъяло. Собере, та авторлэн
туж чебер но узыр удмурт
кылыз. Но конкурслэн жюриез
дэмлаз О. Ивановалы темаез
Туспуктӥз Максим ЕГОРОВ
бордын золгес ужаны. Удмурт
кылбурчи но драматург
Пётр Захаров ӵектӥз произведенилэн
валтӥсь малпанэз
котырын берганы, чеберлыке
кошкытэк, но тросгес тунсыко
сюжетъёс кылдытыны.
Дарали Лели «Вагон-ресторан»
вероссэ артист сямен
лыдӟиз, таӵе ик, дыр, луыны
кулэ произведениеныд тодматон.
Дарали зэмзэ но та вероссэ
вагон-ресторанын гожтэм.
Ужрадэз йылпумъяса, «Удмурт
дунне» газетлэн валтӥсь
редакторез Елена Миннигараева
пусйиз:
— Туала егитъёс вотэсъёсын
гожъясько, мылкыдзэс
верало, нош рос-прос литература
борды кутскыны ӵемысь
уг дӥсьто. Но туж троссэ лэсьтыны
луэ ини егит дыръя ик.
Историез учконо ке, тодмо
писатель Геннадий Красильников
аслэсьтыз «Вуж юрт»
повестьсэ гожтӥз студент
дыръяз. Нош драматурглэсь
Игнатий Гавриловлэсь пьесазэ
19 аресказ ни пуктӥзы
Удмурт театрын. Ашальчи
Окилэн книгаез потӥз 25 арес
дыръяз, отчы пырем кылбуръёс
озьы ик классика луизы,
соос туннэ но сюлэмез
вырӟыто. Туж оскиськом, та
конкурс бере тӥ удмурт литература
шоры мукетгес синмын
учкыны кутскоды. Возьмаськом
выль ужъёстэс!
________
Галина СЕМЁНОВА
«Кылбур» номинациын вормись Ольга Иванова:
________
— Та конкурс улсын ортчем котырес ӝӧк сьӧрын шуд усиз
пумиськыны тунсыко егит гожъясьёсын, визьмо но бурдъяны
быгатӥсь редакторъёсын, журналистъёсын, литературоведъёсын,
писательёсын. Котькуд верам кылзы, сӥзёнзы, визьнодамзы
сюлэм пыртӥм потӥз, гожъяськон мылкыды эшшо но
бурдъяськиз.
Удмурт кун университетысь дышетӥсь, педагогика наукаосъя
кандидат Светлана Арекеева:
________
— Мон туж шумпотӥсько, вань вормисьёс Удмурт филологияя,
финно-угроведениея но журналистикая институтмес йылпумъямын
шуыса. Кылсярысь, туж тунсыко потыса кылзӥ Галина
Евсе евалэсь вероссэ. Мон Галиналы но мукет егит гожъясьёслы
сӥзисько литератураын асьсэлэсь куаразэс, темаоссэс шедьтыны.

№41 (25953)
16 2022-тӥ ар 20-тӥ коньывуон
Кылбурет
Палэзь воштӥз дӥськутсэ
Пичи Пурга ёросысь Вуж Мӧньялась Зинаида Моисеевалэн чуръёсыз
Мусо шаере
Шаере тон, мусо шаере!
Ӵыдонтэм вордскем интые.
Нокинлы но ӧй кельты тонэ,
Кошкеме но ӧз пот палэнэ.
Ма, ӵыдод шат вордскем палъёслэсь?
Сюлэме биниськем гуртэдлэсь.
Мурт азьын чик ӧз пот улэме,
Анайме огназэ кельтэме.
Сяськаё, узыё, борыё
Туж мусо та удмурт шаере.
Губи кадь ик ӝутско выль юртъёс —
Горд, лыз, ӵуж липето коркаос.
Гурт шорын ик сылэ коркае,
Гурт пумысь гурт пумозь — бӧляке.
Бен соин ик мусо потӥськод,
Туж яркыт но чебер адскиськод.
Эх, узыр та вордскем шаере —
Кибашлы но тыршись калыке.
Котьмаин ушъямон, данъямон,
Муртъёслы но адӟем карымон!
Италмас
Возь вылысь италмас сяськаез
Мерттоно, пе, ӧвӧл бакчаяд.
Ӵуж сяська — со ӧвӧл, пе, шудлы,
Лемлетэз, пе, луэ шудбурлы.
Ӵужзэ но утчай мерттыса,
Лемлетсэ но утчай мерттыса.
Ваньзэ ик вуттӥ шӧмъяса,
Улон ваньзэ сётэ мертаса.
Италмас сяськаез бичалляй,
Яратон эшелы кузьмалляй.
Шумпотса сяськаме басьтылӥз,
Пальпотӥсь синъёсын учкылӥз.
Соку ас поннам мон малпай,
Кылолэн кылыз со, валай:
Чик ӧвӧл янгыш сяськаос —
Шудбурмес дуриськом асьмеос.
Тулыс сярысь
Инкуазед каллен вырӟе,
Вань улос но кадь улӟе.
Мылкыдмы капчи луэ,
Яратон сюлмын улэ.
Шырчик но ӝоген вуоз,
Выльзэ тулысэз ваёз.
Льӧмпуамы нош пуксёз,
Шулдыр гурзэ со кисьтоз.
Укноям ик учкыса,
Мае ке кадь валаса,
Шултыса шырчик вазиз,
Кыдёкысь салам вайиз.
Анае
Э, анае, мынам, анае,
Секыт вакытэ вордскид дуннее.
Кураськыса кӧттэ тырылӥд.
Пот нянь сиыса тон будӥд.
Дыр ортчемъя быдэ но вуид,
Тонэ юасез но луиз.
Ӧд быгаты шуддэ кырмыны,
Ӧд вала астэ жаляны.
Берло котьма шу ни астэ,
Уг лу ортчемзэ берыктыны.
Али вамышъясал соин артэ,
Уг, уг лу гырпумез куртчыны.
Калык син азьын тон ветлӥд,
Бӧляклэн шор сюлмаз тон улӥд.
Котьмаиз ке но вал улонад,
Ӝук пушкысь нӧкы вӧй кадь шунад.
Эн бӧрды, атай
Малы бӧрдӥськод, атае?
Ӵемысь адӟисько синвудэ.
Лябӟиз сюлэмыд — макем жаль,
Кызьы буйгатом мылкыддэ?
Атай ке бӧрдэ — туж секыт,
Синвуэз лулме бугыртэ.
Учкемез но сыӵе ӝожмыт,
Мӧзмемын — со монэ ӟыгыртэ.
Атае, эн бӧрды ноку,
Ми вӧзад луомы котьку.
Ортчоз но вуноз уродэз,
Ум ыштэ ӟечлы осконэз.
Кылэме ни потэ куарадэ
Кылэме ни потэ куарадэ,
Адӟеме ни потэ тусбуйдэ.
Кызьы, пие, уд мӧзмиськы,
Будэм юртад уд бертӥськы?
Одӥг пол ке но берт вал, пие,
Пуксьыса кенешом та вие.
Малы-о йӧӟектӥз сюлэмыд?
Малы-о сӥялскиз мылкыдыд?
Инкуазед но шулдыр мынекъя,
Льӧмпуэд но тани бычыя.
Улмопу сяськаед усьтӥськоз,
Вож турын но ӝоген ӝутӥськоз.
Тани май толэзед но вуоз,
Уӵыед но ӝоген, дыр, чирдоз.
Азбар тыр со кисьтоз крезьгурзэ,
Анаед, дыр, ӵушоз синвузэ.
Вордӥськем нуналы но вуэ,
Ой, кыӵе возьмасько мон тонэ.
Сюлэммы гинэ ӵош мед луоз,
Сюлмамы яратон мед улоз.
Возьмасько мон тонэ, возьмасько...
Капкаме усьтыса, витисько.
Но уд вуиськы тон, нуные,
Уд, уд бертӥськы тон, мусое.
Мӧзмыт сӥзьыл
Мӧль басьтэм льӧль сяськаез,
Пужмертэм вань улосэз.
Бездӥз садлэн чеберез,
Ортчиз солэн шулдырез.
Вуиз мӧзмыт сӥзьыл куазь:
Улляз сяська гужемез.
Куаро, зоро шобретэз
Ӵоктаз быдэс музъемез.
Палэзь воштӥз дӥськутсэ:
Кисьматэ пурыоссэ.
Кызьпу куштэ зарнизэ,
Толлы озьы дасяське.
Туспуктӥз Максим ЕГОРОВ

№41 (25953)
2022-тӥ ар 20-тӥ коньывуон 17
Кылбурет
Арама мӧзме туннэ
Вениамин Ившинлэн толэзьёслы сӥзем кылбуръёсыз
Толшор
Тон эн шу, толшор —
Кын толэзь векан.
Тол куазьмы со —
Шор,
Кезьытлы — ыркан.
Шунытсэ, ӟечсэ
Витеммы выллем,
Жин! Выль ар ӧссэ
Усьтӥз ни милем.
Лымыен, куасэн
Лӧпкытэ толшор.
Со шулдыр тусэн
Ширъянлы со
Шор.
Тулыспал
Тулыспал — со
Тол толэзь
Уй тӧлэн шудэ ай резь.
«Жи!» пазя лымыосты,
Нюш соге сюресъёсты.
Нош уг ышты эсэпсэ,
Кузятэ нуналъёссэ.
Куддыръя липет пумысь
Йӧ боды нуйтэ кужмысь.
Учкылэ ни тол шунды
Тулысмы пала, гыды.
Южтолэзь
Южтолэзь —
Южам лымы,
Чик уг выё пыдъёсмы.
Ӝытазе со куажырскиз,
Нош ӵукна со
Кежыртӥз.
Нуназе бен гуртамы
Юж уг вазь ни шорамы.
Ӵок, ум куатаське ми, ум,
Нясь учке ук липет пум:
Юж вылын, пе, шапыр-шап
Тулыс куазь эктоз огшап.
Оштолэзь
Лымы люкез абдрамон
Оштолэзьмы ӵыжатэм.
Бадӟым ошлы юымон
Ульча пуме ву поттэм.
Читыр-чутыр ӧръёсын
Шумпотонзэ крезь мактал
Жингыресмем гуръёсын
Ӝоген вӧлдоз дор пасьтал ** .
Ачид лыктӥд, лымы тол,
Ачид ик берт уйпалад.
Лудысь-вырысь вож йылол
Пачкамын на юж улад.
Оштолэзьлэсь кынарзэ
Тулыс шунды ӟырдатэ.
Оштолэзьлэсь гуждорзэ
Лымы вуэн пылатэ.
Куартолэзь
Мӧзмыны чик уг лэзь
Асьмеды куартолэзь.
Ву пукем гопалмы —
Турын-куар буртчинмы.
Ӵуж но льӧль сяськаос —
Выжыкыл бирдыос.
Куартолэзь, куартолэзь
Вож дэрем вуре сэзь.
Мунёмес кадь мусо
Тулысэз дӥся со.
Инвожо
Ӟеч-а, бур-а, инвожо,
Гочатӥсь ожо-вожо.
Тон — арлэн пушъён шорыз,
Гужеме пырон дырыз.
Гольык пыд бызьылӥськом,
Юр но яр лӧптылӥськом.
Ӝытлапал ке ӝомектэ,
Ӵукнапал мыня-пиштэ.
Ӟиллё ныр кадь уй вакчи,
Юг нунал вуэ шӧртчи.
Сяськаос... Ческыт омыр...
Инвожо толэзь майбыр.
Пӧсьтолэзь
Пӧсь ке пӧсь...
Вырйыл гужам,
Йӧгуын нош йӧ ӵыжам.
Шур пыдсы мон васькысал,
Юз вуын мон веськасал.
Пӧсьтолэзь бен паль учке,
Киытӥм сэрыт кыске.
Ӧр дуре — чорыганы,
Бамалэ — борыяны.
Шундызэ со буйгатэ,
Губи зор жильдӥськытэ.
Кымесме мон ӵушалтӥ,
Пӧсямме ик вунэтӥ.
Пӧсьтолэзь, гужем толэзь,
Акыльтод-а пӧсезлэсь?!
Гудырикошкон
Гудыръясь пилемъёсты
Уг ни люка ин пурты.
Кошкытэ ваньзэс ик сэзь
Гудырикошкон толэзь.
Уть ай, дыртытэ ассэ,
Со учке шунды чассэ.
Кошкытэ со гужеммес...
Мед — ум вае ми ӝожмес.
Лудъёсын но сикъёсын
Мальдытэ емышъёсын.
Со ваньзэ ик кисьматэ,
Сӥзьыллы сюрес усьтэ.
Куарусён
Куарусён вуэ гинэ,
Кутске сӥзьыл дыр.
Арама мӧзме туннэ,
Уг кырӟа шулдыр.
Уйшор тӧл писпуосысь
Ишке куаръёсты.
Тём-пурысь пилемъёсысь
Куртке зоръёсты.
Нош вань на куарусёнлэн
Берпум улӟетэз —
Горд но, ӵуж но, льӧль тылэн
Пӧртмам дӥськутэз.
Азьланьтэ покчигужем
Ортчем гужеммес.
Огдырлы кузьма милем
Ворпо мылкыдмес.
Суредаз ЧУДЬЯ ЖЕНИ
Коньывуон
Коньыослэн кузы вуэм,
Буртчин гонзы юнмам.
Кин ке но толэзьмес юн кем ***
Коньывуон нимам.
Шорыз ни та сӥзьыл куазьлэн,
Коньывуон — ыш-ыш!
Пештырскемын веньёсыз кызлэн,
Зоръёс усё кырыж.
Дырын-дырын лымы пурӟе,
Ву кезьыта золгес.
Нюрысь лудӵӧж уллё лобӟе
Шуныт пала ӝоггес.
Коньы, лызмыт-пурысь шуба,
Уг малпа кошкыны,
Кызъёс йылэ шумприч туба
Ӵыжин куадалляны.
Шуркынмон
Толсур азьын шуркынмонэ
Лек тӧл кынтэ шурмес.
Пеймыт вуберганэз гинэ
Йӧӟектытэ бергес.
Шуркынмонэ чорыг ваське
Вулэн мургес азяз,
Ӝомалтӥськем сӥзьыл кошке
Оген сюрес кузяз.
Бен чаль кошкоз-а —
Сӥзьылэз
Гонӟыр сутэ тол куазь:
Лымыосын со му вылэз
Югма, соге кир-пазь.
Лыктӥсь толэз ӟечкыласа,
Шуркынмонэ шушы,
Улмо кадь горд, ӟечыраса
Шула садын:
— Шу-у!.. Шы-ы!..
Толсур
Толсурен юлтошъяськон —
Шумпотон, шулдыръяськон.
Гуртамы сюрес вылэ
Юг-юг ын со вальылэ.
Зэм-а ын? Яке лымы?
Пытьыос ульчаямы.
Олокин куасэн ветлэм,
Юрт азьын трактор сылэм...
Сапеген отӥ-татӥ
Кутэмнянь пужы кельтэм.
Пытьыос но пытьыос.
Пужыос но пужыос.
Выль толэз ваем толсур,
Выжыкыл маде сэр-тур * .
________________
сэр-тур * — кызьы шедем.
пасьтал ** — пасьтала.
юн кем *** — туж шонер, туж интыяз.

№41 (25953)
18 2022-тӥ ар 20-тӥ коньывуон
Огина
Верос
ЛЮБОВЬ ГАНЬКОВА
Удмуртиысь Писательёслэн
огазеяськонзылэн ёзчиез
Уг удалты куд-ог нылкышноослы
картэн улыны, тон
коть кымыстэ пильыса Инмарлы
вӧсяськы, шундылэсьтолэзьлэсь
ӟеч кузпал куры…
уг, уг пӧрмы, кылдымтэ! Инмар
картэн улыны распоряжение
гожтымтэ.
Озьы луиз Оринаен но, обросэзъя
— рамкаез, анаезъя —
нылыз. Оксинья Оринаез,
дас вить арес тырмытэк,
пиям. Кинлэсь шедьтӥз нылпи?
Шито-крыто. Котьмае
адӟись-тодӥсь гурт калык но
кин вылэ сьӧлыканы ӧз тоды.
Оксиньялэн анаез нылызлэсь
зӧкамзэ адӟиз но гуртысь
гогы тупатъясь Чучыбей доры
нуиз.
— Нуны вырӟемын ини,
улэп лулэз уг быдты, сьӧлыкез
бадӟым. Но мар но со турынкуаръёс
сёто, оло, ачиз усёз? —
лулскиз Чучыбей.
Арня ӵоже парланэм суретэз
гульк-гульк юылӥз Оксинья,
но сурет иназ ӧз мыны.
Уӵы чирдон толэзе Оксиньялэн
Орина нылыз вордӥськиз.
Начар, куатрым порма
чиньы-пӧлыосын, бызырмем
куо, горд ымныро, синлыстэм
синъёсын, писэйпи кадь позыръяськись...
Оксинья, нунызэ
адӟыса, алектӥз: «Ой,
неужто со мынам нуные?
Ой, кыӵе шушмекей, шӧтэм,
юрӟым, жоб!» Чучыбейлэсь
суретсэ юыса, эбек тусъем
ныл вордӥз, дыр. Нунылэн
бӧрдэм куараез но я курег
куткамлы, я писэйпи черекъямлы,
я ыжпи бӧксэмлы укшаз.
Нунылы Орина ним
сётӥз ӵужаез. Гуртысьтызы
тужгес чебер ныллэсь нимзэ.
Со кадь ик, пе, мак сяська
выллем, муспотон мед луоз.
«Шайтан воштэм нуны та,
мынам ӧвӧл та», — шуэ вал
Оксинья нылзэ. Соин, лэся,
Ориназэ ӧз яраты, утялтэмез
ӧз поты, мед кулоз шуыса,
йӧназ ӧз но нонты. Мискинь
нуныез ӵужаез кеч йӧлын
будэтӥз. Номыр шоры учкытэк,
анаезлэсь нырк каремзэ
чидаса, Орина будӥз, тыкыльтыкыль
чеберскиз. Кеч йӧл
юыны дышемез бере анаезлэсь
ноноксэ кулэ ӧз кары ни.
Кикиосыныз ӟег нянь туриж
борды кырмиськыса, пушкессэ
сюпсиз, кӧмзэ йырйиз.
Орина вераськыны но, ветлыны
но арес но ӝыныен кутскиз.
«Анай» шуэм интые, нырысь
аслэсьтыз нимзэ вераны
дышиз — «Огина». Бускельёссы
вешаса ялан ёртылӥзы:
«Кызьы нимыд, нылоке?»
Оксиньялы гуртын мӧзмыт
луиз. Одӥг ӝыт анайзэ
паймытӥз:
— Анай, мон уйпала куриськи,
ӵуказе севере куинь
арлы ужаны кошкисько. Мон
татын аслым карт уг шедьты,
нылпиед вань шуозы, нокин
уз басьты. Уксё люкаса, квартира
басьтӥ ке, тӥледыз но
нуо. Орина нонэмысь дугдэмын,
будоз, тыныд, эсьма, эш
луоз.
Оксиньялэн нырысь-валысь
гожтэтъёсыз вуылӥзы
ик, собере — шергес но шергес.
Бератаз гуртысь лэзем
гожтэтъёс выльысь берытскизы
— конверт вылын «Адресат
выбыл» гожтэмен. Азьло-берло
утчась ӧй вал ни. Куинь ар
ортчыса но, Оксинья гуртэ ӧз
берты.
* * *
Орина нокызьы «р», «ш»
букваосты вераны ӧз дышы.
Кызьы арес но ӝыны дыръяз
ассэ «Огина» шуиз, табере
ӵужаез гинэ ӧвӧл, вань гурт
калык «Огина» шуыса солы
вазьылӥз. Огина пичи мурт
визьем кылиз. Ӧй, ӧй вал Огина
чылкак визьтэм, но сокем
визьмо но уд шуы.
Куд-ог куараосты шенгыль-пенгыль
верамез понна
адямиез «шузи» шуод шат?
Эшъёсыз сое, «укмыстон укмыс»,
«вакчи ашык», «коллё
йыр» шуыса, исаллязы. Огез
но та кушем нимъёс Огина
борды ӧз лякиське. Малы ке
шуод Огина йырзэ кур карыны
ӧз валалля, вожзэ ӧз поттылы.
Валамон, школаын Огина
«витьёслы» ӧз дышетскы,
«кыкъёсыз» но ӧй вал,
котыр «куинь». Ӵужаез но,
ачиз Орина но «куиньлы»
шумпотылӥзы.
— Инмарлэн но кылыз куинь,
нылы, — шуылӥз ӵужаез.
«Отче наш» вӧськылэз,
уноян таблицаез сямен,
дышетӥз Огина. Кызьы но
озьы, могаса-сураськыса ӵужаезлы
вералляз ик, но «Верую»
молитваез дышетыны
ӧз быгаты.
Ӵок ойдо, дышетскыны
ляб вал ке Огина, эсьма пичиысен
ик ужлы чырткем будӥз.
Сямыз востэм, лякыт, котькинэ
жалясь, юрттыны дась,
ымысьтыз куртчем няньзэ
куризы ке, сётоз. Нокин ӧз
иса, ӧз серекъя Огинаез, жаляны
кутскизы.
Сыӵе небыт сямызлы луыса
ик, лэся, Огина пиосын вазь
калгыны кутскиз. Оло, пиос
винамат? Кин нырысьсэ вешаз,
нуныяз, Огина ачиз тодэ
вал, дыр, яке воксё вунэтӥз-а?
Вуэм улмоез сиыны котькин
дась.
— Нянь сиытэк уд ужа, агакы
юытэк уд экты, ягатытэк
уд улы, — шуэ вал еж Огина.
Валамон, со кылъёсыз вераны
солэн визьмыз ӧз тырмысал.
Таӵе визькылъёсын вераськыны
яратэ вал бригадир Эртэмей.
Чын-а, буш-а, калык
Эртэмей вылэ сьӧлыказ. Огина
ачиз кинлы но солы лушкем
ушъяськем:
— Эгтэмей дадай мыным
саль кысэт но чыгты весь
кузьмаз. Ми соин ягатонэн
судӥськомы, со монэ калач
нянен сюдэ.
Огиналы воксё дас куиньдас
ньыль арес сяна ӧй вал
ай. Куд-огез шуылӥзы: «Кыӵе
анаез, сыӵе ик нылыз, улмопулэн
улмоез выжыяз усе».
Бератаз, «сюрес усьтӥськем»
бере, шаплы егит пиос
няняськизы. Отӥяз Огиналэсь
юась-верась ӧй вал кадь ни…
Пароход кошке, пытьыез уг
кыльы.
Мӧйы кышноослэн визьнодамзылы
пумит Огина чик
вожзэ, йыркурзэ поттытэк,
возьдаськытэк шуылӥз:
— Бон, куго, ёгто ук,
ягатӥськом суо. Эсьма, уксё я
кампет но сёто. Ӧд ке сётскы,
жугом суо, кугдато.
Огина уг но вала, дыр, ай,
яратонэн шудыса, нылпи
вордӥське шуыса.
— Мугорыд вань, нылпи
сюроз, визьмыд юмал,
юмоке кылёд, — валэктылӥз
калык.
— Мон нылпиосыз ягатӥсь
ко, — серекъялляз Огина.
Ӵужаез кулэм бере Огина
доры патере ыж кулэсь шуба
вурись Шакир нимо бигер
улыны пыриз. Ма, зэмзэ верано
ке, сое Огина доры Эртэмей
бригадир интыяз. Угось Орина
юртъерзэ, пудо нергезэ утялтыны
одӥгназ ӧз быгатылы.
Вуриськись быдэс гуртлы
калык куремъя медъямын
вал. Одӥг гуртысь заказ быре
ке, со мукет гуртэ кошке вал.
Патер дунэз гурт калык огазеяськыса
тырылӥз.
Вуриськись Шакир ӟеч сюлэмо
адями вал. Со юрттӥськиз
Огиналы: коргидысьтыз
ул коръёссэ вошъяз, выль гур
пуктӥз, капка, корказь, корка
ӧс ӟырыосты, пуннетъёсты юнматъяз,
вошъяз. Йӧнтэм пиос
пыраса, ӧсъёс шальтрамын вал
ни. Огина пиосын костаськемысь
дугдӥз. Со си ён пӧзьтыны,
вуриськыны, кышъяськыны,
керттӥськыны дышиз.
Но, анаез сямен ик, дас
вить арес тырмиз гинэ, Огина
нуны вайиз, пи вордӥз.
Гурт калык Агей нимо пилэсь
атайзэ кин шуыны ӧз тоды.
Кинлэсь нылпи вайиз, Огина
ачиз но тодӥз меда?
«Эгтэмей дадай калач нянь
но дэгем тыг гогд сатинет басма
кузьмаз беге, пиез понна,
дыг», — малпаз Огина, горд
йырсиё пиез шоры учкыса.
Мукет араз Огина ныл
вайиз, тазэ гурт калык Шакир
вылэ малпаз. Кышноос Шакирлэсь
юаллязы:
Туспуктӥз Максим ЕГОРОВ
— Шакир абый, Огина тыныд
ныл-а, кышно-а?
Со, ӟуч но удмурт кылъёсты
сураса-пожаса, котыръяса
валэктылӥз:
— Перись мурт кишнозэ
нянин сюдэ, егет — мыжыкен.
Урус шуэ, ни бида, что редка
борода, каби ус был кольцом,
да тыкало торчком.
Огиналэсь нылпиоссэ
сельсовет «Шакирович» но
«Шакировна» гожтӥз. Тае тодыса,
бигер Шакир оло йырыз
курен, оло кыл кутонлэсь
курдаса, гуртысь чиптэмчаптэм
пегӟиз. Нош Огина
борды Шакирлэн нимыз
лякиськыса кылиз: «Шакир
Огина», «Шакир нылпиос».
Огинаез пиос яратӥзы ке но,
кышнолы курась ӧйлась.
Агеезлэн йырсиез Эртэмейлэн
кадь горд, кудыриё.
Люля нылызлэн куэз мыт,
синъёсыз паськытэсь, кӧмеч
кадь котресэсь, йырсиез пурты
шум кадь сьӧд.
— Кесем-басьтэм Шакирлэн
ымныр патретэз, — шуизы
кыл нуллыны яратӥсь
кышноос.
Люлялы куинь арес тырмиз
но, Огина нош ик нуны
шедьтӥз. Та пиезлэсь атай
луонзэ гурт калык тодыны ӧз
но туртты ни. Котькудӥзлэн
аслаз улонэз, аслаз шугсекытъёсыз.
Муртлэн йыраз
визь уд тыры.
Пышкылӥсьёс пумитэ
Огина вожзэ поттытэк, сюлмаськытэк,
азьлань улонзэ
малпатэк, вералляз:
— Мон нылпиосты ягатӥсько.
Соосыз Инмаг сётэ.
Нылпиоссэ Огина ноку ӧз
тышкаськылы, ӧз чабкылы,

№41 (25953)
2022-тӥ ар 20-тӥ коньывуон 19
шоразы жоб куараен ӧз кесяськылы.
— Мон соосыз жуги ке,
соос но нылпиоссэс жугыса
будэтозы. Мынам угод сямы
кыге потӥз ке, соослы паласькоз.
Аслэсьтым вожпоттэмме,
улыны быгатымтэме
соос вылэ кустом сат?! Соос
винамат ӧвӧл ук, дунне вылэ
вогдӥськизы суыса. Мон соосыз
вогдӥ, ачим ик сюдо.
Кион тожо, кионпиосызлы
сиён утчакуз, ас улонзэ уг
жаля. Сиён седьтэ ке, пиосыз
анайзылэсь ымныгзэс
сумпотыса нюло. Пегесьмеме
беге нылпиосы мынэсьтым
но ымныгме мед нюлозы.
* * *
Юон-сиён дыръя: коть
кисьтон, коть нуны сюан,
коть кулэм мурт ватон, салдат
келян-пумитан, виртырем
сиён, куать кузя юондыр
ортчытон — одӥгзэ но ӧз
кельты Огина. Нылпиосыз,
кудӥз пыд йылаз султэмын,
асьсэос анайзы сьӧры вамышто.
Нонӥсез кутэтын —
ки йылаз. Озьы огшаплы ке
но Шакир нылпиос кӧтсэс
кышъяллязы.
— Пась ымъёс, пыдэстэм
штаниос, ӝӧк выл тазатӥсьёс,
бигер мылесъёс — йыркурзэс
ӧз ватылэ куд-ог кышноос.
Нылпиосыз кӧтсэс тыро но
доразы берто. Агеен Люля пичизэ
тыбыразы ныпъяло.
Шӧмаськем Огина дораз
бертыны уг ик малпа. Со, Эртэмейлэсь
кузьмам горд сатинет
дэремзэ дӥсяса, шаль
кышетсэ думыса, куссэ кык
чиньы пасьта сьӧд кускерттонэн
думыса, пыдаз Шакирлэсь
вурем кӧтермаё катазэ
кутчаса, арган азьын тыпыртапыр
эктылӥз.
— Чебег-а мон? — юалляз
со юмшачиослэсь.
Зэм но, Огина векчи куско,
кузь куко, бус-бус тыр гадё,
шоро-куспо сӥльвиро, ӵыжыт
бамо, вешано, ӟыгыръяно
кадь вал.
— Чебер, чебер тон, Орина,
чебертэк-а тонэ пиос ярато,
— юромо исамес карыса,
лӧпкытъяллязы Огинаез карто
кышноос.
— Ой, Огина, молодец
тон, юондырез шулдыртыны
быгатӥськод. Ӧд ке юы, ӧд ке
сиы, ӧд ке кырӟа, ӧд ке экты,
малы куное лыктод оветь,
Огина?
Табань пыжыса ӧд ке сиы,
Малы пыжод табанез?
Куно ӧтьыса, ӧд ке секта,
Малы ӧтёд куноез?
Огиналэн усьтэм ымаз
нош ик аракы кымалто:
— Капчиятӥськы, Огина,
лулдэ кыре лэзь, тынад
сюлмад мар но ӧвӧл, дыр.
Калыкын ӝожтӥськыса уд
ветлӥськы, мыскыл карисьёс
шоры уд каршиськы, — пӧсь
табаысь вӧё мыльым кадь,
ӵыжгетэ кузё кышно.
Огина, арган гурез сураса,
чангес куараеныз ӟуч сямен
кырӟа, такмаклэсь пуштроссэ
рос-прос валатэк:
— Я не ляку пот масину
Пот больсое колесо.
Лутсэ ляку пот сопёга
Там теплё и когосо.
Калык гу-ур серектэ, Огина
шумпотэ, тожо серекъя.
Куноос ньыж-няж кырӟан
нуйто. Юонлэн шулдырез басыла.
Капчиям Огинаез воргорон
кыре ӧте. Куинь-ньыль
кузя егит пиос, сое возьмаса,
бакчаысь сад улын сыло ни.
Огина уг пумитъяськы, со
тодэ ук, сое ярато.
Сыӵе дыръя кышноослэн
меӵкытъямзы, куаретэмзы
пумитэ Огина, мур-мур лулӟыса,
синмазы вералляз:
— Эн тыскаськы монэ, Пагаска
апай. Мынам но кагтэн
иземе потэ ук!
Мар шуоз на Параска та пумитэ?
Музъем вылэ сялӟыса,
зуркак вералоз:
— Нылпи шедьтод веть.
Картэд ӧвӧл, кызьы сюдынывордыны
малпаськод?
— Эн сюлмаськы, Пагаска
апай, будозы! Ог-огзэс утёзы.
Мон соосты ягатӥсько, соос
мынам туглы сяська кадесь.
Аръёс ортчемъя Огиналэн
сизьым кузя нылпиосыз люкаськизы.
Агей но Люля быдэ вуизы,
анайзылэсь калык азьын
кепыр вайылӥзы ке но, мумизылы
номыр сярысь пумит
вераны ӧз дӥсьтылэ.
Ярато вал анайзэс Шакир
нылпиос. Огина нылпиоссэ
мусояса, вешаса будэтӥз.
Мар веранэз: нылпиосызлы
ческыт сиён ӧжыт йӧтылӥз.
Гужем возь выл емышеныз
сюдӥз, шур — чорыген,
нюлэс — эмезен, бакча —
картошкаен, му — нянен. Толалтэ
сиизы пыжем картошка,
капканэ сюрем лудкечез.
Кураськыса ӧз ветлэ, гурт
калык юрттӥз кылем-мылем,
кышъям-поръям дӥськутэн,
парсь йыр-пыдэн,
кунам вӧйын, пичи кылем
пыдкутчанэн.
Шакир Огиналэн курегъёсыз,
ыжъёсыз, кечез вал.
Нылпиосыз кечсэ асьсэос
кыскылӥзы, одӥгез тӧдьы
кысъем пиез кечез ноныны
дышиз, кеч но сое лэзе вал.
Огина скал фермаын
ужаз. Нылпиосыз сьӧраз
ветлӥзы, юрттӥськем амал
кӧтсэс тыризы. Огина но дораз
буш ӧз берталля, нуналлы
одӥг пол одно, кӧтвылаз,
кусказ грелка думыса, йӧлвыл
нулдӥз.
Огина нылпиосызлы мар
но со вурылӥз. Вужмем, кесяськем
дӥсьсы вылэ кышъет
вурӟылӥз. Валаны уг луы вал
ни, кыӵе басмалэсь вуремын
дӥсь, чалбар, дэрем.
— Кысъяса сунытгес луэ, —
шуэ вал анайзы.
Огина тямысэтӥ нылпиеныз
секыто луэм бере пиез
Агей зӥбыт юаз:
— Анай, нош ик нылпи
вайыны турттӥськод-а? Таиз
пичи ук ай, ялан, ноноктэ курыса,
сьӧрад бызьылэ. Адямиос
серекъялозы. Кытысь но
ку пиосмурт шедьтэ та Огина,
шуо. Люля но жадиз ини, нылпи
утьыса, солы дышетскыны
кулэ…
— Пие, ягато монэ, ачим
но ягатӥсько. Инмаг но ягатэ.
Кинэ ягато, со пегесьмытозяз
егит улэ. Огпол гынэ пиосмуртэн
ваче вуисько, нылпи сюге.
Пиосмугт — со бадьпу модос
кадь, муэ быскалске ке, соку
ик выжызэ лэзе. Ужатэк уг
улӥськы ук, пие. Быгатэмъям
сюдӥсько мон тӥледыз, мусоосы,
сютэм уг возиськы. Люлялы
малы дысетскем кулэ?
Со бызёз, нылпиез луоз, кысномут
уксё лыдӟын быгатӥз
ке, дышетскыны тыгмоз.
Агей анаез пумитэ номыр
ӧз вера ни… Пиеныз вераськемез
бере Огина ачиз но
малпаськонэ усиз. Одӥг ӝыт
Чучыбей песяйлэсь визь-нод
юаны ветлӥз:
— Тон нырысез ӧвӧл, тон
берпумез уд луы, Огина. Сомында
нылпиез сюдынывордыны
огнад йырад секыт
луоз, уд вормы. Пичи дыръязы
соослы номыр кулэ ӧвӧл ай.
Куака пиос сямен, ымазы тыремез
возьмаса пуко. Будэмзыя
чебер дӥсяськемзы потоз,
пиед казакпи радэ пыре ни,
кышно басьтэмез потоз. Яна
поттыны уд быгаты. Аслад арлыдыд
пинял ӧвӧл ини, нылпиосыдлэсь
коть кепыр вай
ӧжытак… Мон тынэсьтыд номыр
уг басьты. Улэм-вылэмдэ
тодӥсько, не мунчоды, не
коркады. Ярано, Шакир абыед
гур пуктыса кельтӥз. Бадӟым
гур пушкады кӧласькоды но,
мунчое но пыриськоды, нянь
но пыжиськоды. Оломар сота
луид, шугмид-марад ке,
монэ винамат эн кары, нимме
эн шарая. Нуныед вить толэзь
ини, больницае уз басьтэ,
азьлогес сюлмаськоно вал…
— Сусыбей песяй, тани та
обгосэ, чик валатэк кыли, нуные
нонэ вал ук ай, кӧс вылэ
сюриз. Собеге мукет кысноос
бульккатыса ӧскиськом суо,
мыным сай но ӧвӧл. Ваньзэ
сиисько-юисько, нокыӵе зын
ныгам уг пыгы.
— Я, бон, мотри, мон сярысь
кылпум эн поттылы.
Лыктэмдэ нокин ӧз адӟы-а?
— Кигос кагисько, Сусыбей
песяй.
Чучыбей шӧрлыкысьтыз
полуштоп бутылка поттӥз но
сьӧд дарыен суретэз Огиналы
сётӥз.
— Тани басьты тае, юид
ке, нуныед усёз. Та эскерем,
утчам арбери, юрттыны кулэ.
Юыны туж кӧш ке потӥз, нырвыл
аракыеныд сура. Синдэ
кынь но гулькак юы.
* * *
Юэмезлэсь азьло Огина
ӧс кусыпе пысытэм вень
понӥз, гижыоссэ вандылыса
сюе согиз. Огина «Отче наш»
вӧськылэз могӟытэк вераны
ӧз быгаты. Люля солы кагазэ
но гожъяса сётӥз вал ини ке
но.
Гогымумылэсь суретсэ
аракыен сураса юиз Огина.
Номыр сыӵе-таӵе кӧшсэ
ӧз шӧды, ӧз вала. Ӵукнапал
куинь часын нуныез
вордӥськиз. Пиез улэп вал
ай, куаразэ поттылӥз ик
ке но, кулӥз. Визьмочиос
шуо: «Ӵукнапал вордӥсько
кылчин нылпиос, куло
сьӧлыкоос, чик ӝуштытэк,
пиньзэс куртчыса, мӧзмыт
ӵук чалмытэз сайкатонтэм
вылысь».
Огина нимтэм нунызэ,
ӟустарие бинялтыса, бакча берысьтызы
льӧмпу улэ ватӥз.
Востэммиз Огина, малпаськись
тусо луиз, йырзэ
мыкыртӥз.
— Ничё-о-о, зима — не
лето, пгойдет и это, — ас понназ
вераськиз Огина, кус бордаз
кутӥськыса.
Арня куспын Огина шушектӥз,
куасалтӥськиз, шонертӥськемез
ӧйлась ни.
Сиськемез ӧз луы ни, шыд
лым но йӧл вылын возиськиз.
Синъёсыз жуммизы, бамыз
кӧдэктӥз, синмысьтыз синкыли
вияз. Мултэс ӧз ни вераськы,
кырӟан-веран кылъёсыз
но йырысьтыз тӧлӟизы.
— Анай, Инмарлэсь прощение
куры. Инмарлы оскон
ныпъет жыльы ӧвӧл, чырты
бердэ уд сюрмыты, — тэльмыриз
Люля нылыз.
Нуналмысь нуналэ Огина
шупаз, сӥяз, ньылоныз тылын
ӵуштаськиз. Вӧсезлы чидатэк,
корка тырос черекъяз:
— О-о-о, м-м-м, ы-ы-ы!
Угось черекъям куара вӧсь
луэмез басылатэ, огдырлы ке
но сюлэме усем вӧсез капчиятэ.
Нылпиосыз, вӧзаз котырак
султыса, юрттыны валатэк,
анайзылэсь йырзэ маяллязы,
бордӥзы. Огина музэн ик,
кӧкыын нонӥсь нуны кесяськиз.
Анаезлэн йӧлыз ӧй вал
ини, Люля сое кеч йӧлын буйгатъяз.
Мертчан кадь тӧдьы йырсиё
пиез, вӧзаз пуксьыса, юаз:
— Анай, акы тыйос юид-а,
кудӟид но погйад-а, йыйыд
абу-а?
— Ой, ой, нуныосы, анайды
кулоз, кинлы кылёды тӥ, кин
вогдоз? О-о-о, Госпоти, сокани!
Винамат мон, — бӧрдӥзвӧсяськиз
Огина.
Агей, ужысь бертыса, анаез
вӧзы пуксиз. Со ваньзэ валаз,
ассэ янгышен лыдъяз.
— Югтты, пие, висьтэм
анаедлы, кулӥсько, кулӥсько
мон. Сигота, сигота кылиськоды.
Эн кусты сузэг-вынъёстэ.
Пие, калык азьын,
йыгысьтыд изьыдэ басьтыса,
мултэс эн йыбыгъя, киостэ
посыса, эн сылы, пыд вылад
лёгиськыны эн лэзьы…
Ноку эн шуы: мон ваньзэ
быгатӥсько, вань ужез лэсьтыны
Инмаг гынэ быгатэ.
Огина жадиз, куараез быриз,
черекъямез ӧйлась ни,
мырдэм кылымон, пиезлы
пушказ шыпыртӥз:
— Атаед Эгтэмей, Сакиг
абый. Сигота, сигота, винамат
мон… Анайме утчалэ.
Агей но Люля, анайзылы
кызьы юрттыны валатэк, ёросысь
першалэз вайизы. Огина
уколэз ӧз шӧды ни, эмъюмез
но ӧз юы — пиньёссэ куртчиз,
ымзэ бералтыны ӧйлась ни.
— Поздно… отгулялась
овца, не помнящая отца, —
шуиз ӟуч эмчи.
Агеен Люля кулыны
курадӟись анайзэс шаль кышетэн
шобыртӥзы. Агей ӧз
чида ни, кыре потӥз. Люлялэн
курыт синву шапыкъёсыз
дырекъязы кокырес синлысъёсаз.
Эмчи нылпиосты бускельёссы
доры поттыны турттэ
вал, но ӧз быгаты. Огиналэн
сизьым кузя кылем сиротаосыз,
секыт кайгуэз шӧдыса,
анайзы котырын гурен
бӧрдӥзы.
* * *
Сельсовет Шакир Огиналэсь
пиналъёссэ, арлыдзэс
чакласа, пӧртэм нылпи юртъёсы
келяз.
Шакиров Агей Шакирович,
ремесленной училищеез
быдтыса, армие ветлӥз. Гуртэ
ӧз ни берытскы, адӟиськыны
гинэ бертаз. Ланьырам коркаяз
пырыса, гурзэ маялляз,
анаезлэн шайвылаз
тубаз, йыбырттӥз. Со Урал
палась одӥгаз городын андан
ӵыжатон заводын ужа. Быдэс
шаерлы тодмо, дано сталевар.
Солэсь нимтулзэ газетысь
лыдӟыса, Курбанова Июлия
Шакировна агайзэ тодмаз,
шедьтӥз, пумиськизы. Июлия
Шакировна но азьветлӥсь.
Со куиськон фабрикаын ужа.
Кузпалэныз ӵош будэто куинь
нылпиоссэс. Улонын номыр
юнме уг луы.
Агеен Люлялы сузэр-вынъёссэс,
ӵужайзэс шедьтыны
ӧз кылды на. Но соос али но
оско, ог-огзэс одно шедьтозы
шуыса…

№41 (25953)
20 2022-тӥ ар 20-тӥ коньывуон
М. Цветаевалэн вордскемез дырысен — 130 ар
Кӧкы но корос вискын
Кылбурчи, кылысь кылэ
берыктӥсь Марина Цветаева
20-тӥ даурлэн литератураяз
яркыт пытьы кельтӥз.
«Берпум минутозям
яратӥ»
Марина Цветаева вордӥсь киз
8-тӥ коньывуонэ Москваын узыр
но визьмо семьяын. Бубиз — Иван
Цветаев — тодмо искусствовед,
кылчи но профессор вал. Анаез —
Мария Мейн — дано пианистка.
Мариналэн 2 ареслы пичи Анастасия
сузэрез вал на. Анастасия
Цветаева — тунсыко писатель,
быдэс улонзэ ортчытӥз апаезлэн
вужераз. Солэн но гумырез
секыт вал, 3 пол пытсэт сьӧры
сюрылӥз, лагерьёсын, ссылкаосын
курадӟиз…
Марина Цветаева кылбур
гожъяны кутскиз 6 аресказ
француз кылын. 18 аресаз солэн
нырысетӥ бичетэз потӥз,
«Вечерний альбом» сборниказ
пыриз школаын дышетскыкуз
гожтэм 111 кылбурез. Соберегес
ик печатласькизы «Волшебный
фонарь» но «Из двух книг» сборникъёсыз.
18 арес дыръяз ик со пумита
вуоно кузпалзэ Сергей Эфронэз,
ӝыны ар ортчыса, егитъёс кузпалъясько.
Граждан ож кутскем
бере Марина аслыз инты уг шедьты.
Ваньмыз, мар вал та дырозь
мусо, валамон но сюлэмлы дуно,
пилиське но люкиське кыклы:
гордлы но тӧдьылы. Картэз —
тӧдьы офицер — кошконо луэ
кунгож сьӧры. Марина 2 нылъёсыныз
кыле Россие. Ёрмонлы но
сютэм улонлы чидатэк, кылбурчи
нылъёссэ приютэ сётэ. Отын пичиез
дыдыез, 3 аресъем Ирина
висьыса но сютэм улыса кулэ.
Бадӟымзэ, Ариаднаез, (Аля шуо
вал семьяязы) анаез приютысь
басьтэ.
1922-тӥ арын М. Цветаеваез
лэзё картэз доры Чехие кошкыны,
кузпалъёс уло Прага вӧзысь
пичи гуртын. Эшъёсызлы Цветаева
гожъяз: «Улӥсько юртъер котырысь
ужъёсын (мисьтаськисько,
утялскисько, базарысь дунтэм
сиён-юон утчасько), мае огдыре
яратӥсько но адӟонтэм карисько,
таӵе улон кӧкы но корос вискын
выллем»…
М. Цветаева трос пол
синмаськылӥз. Но зэмос яратонэз
улоназ одӥг гинэ вал — Сергей
Эфрон. Соос ог-огзылы гожтэтын
но «тӥ» шуыса вазиськылӥзы.
1925-тӥ арын М. Цветаева эшшо
одӥг пол анай луэ, Григорий пизэ
вордэ. Семьяязы пияшез мусояса
«Мур» шуо вал. Семья улыны
Марина Цветаева
(1892-1941).
выже Париже. Татын 1928-тӥ
арын потэ М. Цветаевалэн улэп
дыръяз берпуметӥ книгаез —
«После России». Сергей Эфрон
большевикъёс пала кариське
но Россие бертыны куриське.
М. Цветаева вала: соосты Россиын
али номыр умоез уг витьы.
Но 1937-тӥ арын Москвае кошке
Ариадна нылзы. Со ужаны интыяське
француз кылын потӥсь
журналэ, кылысь кылэ берыктӥсь
луэ. Атаезлы гожтэт гожтэ, сое
Москваын туж умой пумитазы,
ваньмыз умой луоз шуыса.
Со аре ик сӥзьылаз Москвае
берытске Сергей Эфрон но. Со
НКВД-лэн ужасез луэ, Болшево
дачаын улэ. 1939-тӥ арын бертэ
Марина Цветаева но. Улонзы
тупаз, табере семья шудо
гинэ на улоз, малпазы. Но 2 толэзь
ортчыса, пытсало Ариаднаез,
эшшо толэзь ортчыса —
С. Эфронэз.
Марина Цветаева понна кутско
секыт аръёс. Солы нылыныз
но картэныз адӟиськыны уг сёто.
1941-тӥ арын 17-тӥ куарусёнэ
кылбурчи пиеныз вуэ Елабугае,
нош 31-тӥ числое ассэ ачиз быдтэ.
Кулон азяз кылбурчи 3 записка
гожтэ. Пиезлы кельтэмаз Марина
Цветаева гожтэм: «Мурлыга! Простить
кар монэ, но мынам улэме
ӧз луы ни. Атайдэ но Аляез адӟид
ке, вера: мон соосты берпум минутозям
яратӥ». Но пиез апаезлы
но бубизлы номыр вераны ӧз
быгаты, малы ке шуоно Быдӟым
ож кутскиз но, со куриськиз
фронтэ. 1944-тӥ арын ожын быриз.
Сергей Эфрон ыбемын вал
1941-тӥ арын. Ариадна 14 арлэсь
кема лагерьёсын но ссылкаосын
курадӟиз, ӟеч нимзэ берыктӥзы
1955-тӥ арын. М. Цветаевалэн
нылыз улонысь кошкиз 1975-
тӥ арын. Марина Цветаевалэн
семьяысьтыз Ариадна нылызлэн
гинэ шайгу интыез тодмо.
Кылбуръёсаз —
пӧсекъян
Удмуртиысь культура удысысь
дано ужась, писатель, «Кенеш»
журналысь редактор Лидия Нянькина
огвакытэ М. Цветаеваен
«висиз», шуыны луоз. Мария Белкина
писательлэсь М. Цветаевалы
сӥзем «Скрещение судеб» книгазэ
но пыр-поч лыдӟиз.
— Кышномуртъёс пӧлын генийёс
трос ӧвӧл, но М. Цветаеваез
чик тунаськытэк соос пӧлы пыртыны
луэ, — шуэ Л. Нянькина. —
Бен, со туж калыклэсь пӧртэм вал:
творчество удысын но, яратонын
но, нылпи вордонын но, эшъяськонын
но... Тани йырам лыктӥз
«Расстояния: вёрсты, мили...»
кылбурез. Малы ке та чуръёс
ӵемысь вуо, автобусын, трамвайын,
поездын мыныкум: солэн
«рас-ставили», «рас-садили»,
«расклеили», «распаяли» но кылбурын
мукет кутэм глаголъёсыз
корт поглянъёслэн туккетэмзылы
укшало. Сое М. Цветаева эмиграциысен,
Борис Пастернаклы
сӥзьыса, гожтэ. Та кылбурын люкиськон
тема нырысетӥ интыын
сылэ. Сое лыдӟыку, лулсэръёс ик
тысыр-тасыр каро кадь: кылбур
чуръёсын сомында курадӟонэз,
керӟегъяськонэз, пӧсекъяськонэз.
Нош кыӵе егит ныллы яке
кышномуртлы уз кельшы меда
кылбурчилэн «Мой милый, что
тебе я сделала» кылбурез. Кылбур
сӥземын Осип Мандельштам
кылбурчиен романзылы.
М. Цветаева улэ Москваын,
О. Мандельштам — Петербургын.
Котькыӵе учырын лирической
героиня, йырзэ ыштыса
сямен, яратэ, курадӟе, но, солэн
романъёсыз ӵемысь яке чик пумиськытэк
уретӥсько, яке сое
ассэ мукетыныз вошто. Татысь ик
М. Цветаевалэн кылбуретаз сомында
чигиськонэз, драмаез.
Озьы ик сюлэмылы матын «Молитва»,
«Мы с тобою лишь два
отголоска...», «Уж сколько их
упало в эту бездну...», «Мой письменный
верный стол...», «Стихи
о Москве» кылбуръёсыз.
Паймисько солэн ужаны быгатэмезлы,
кужымезлы, вазь султылэмезлы
но котькуд ӵук кезьыт
вуэн пыласькемезлы. Паймисько
Граждан ож вакытэ 2 нылъёссэ
приютэ сётэмезлы. Паймисько
эмиграциысь Россие огыр-бугыр
вакытэ бертэмезлы. Паймисько
кылбуръёссэ берпуметӥзэ сямен
гожъямезлы. Тани тазэ гожтоз но
собере улонысь кошкоз кадь.
Юалляськон
Яратонтэк улон —
улон ӧвӧл
1. Марина Цветаевалэн кыӵе кылбурез тӥледлы
кельше?
2. Кылбурчилэн улоназ яке творчествояз мар
сюлэмдэс тужгес но бугыртӥз?
«Мынам Удмуртие» ТРК-ысь
корреспондент, Удмуртиысь
дано журналист, крезьгурчи
Светлана Белых:
— Нырысь ик тодам лыктэ
«Идёшь, на меня похожий» кылбурез.
Марина Цветаевалэн чуръёсыз
мон понна усьтӥськизы быдэ вуэме
бере ни — студент дыръям, улонын асме утчан
вакытам. М. Цветаева малы ке улон шоры кулон
пыр учке. Озьы ке но улон сярысь гожтэ:
...Сорви себе стебель дикий
и ягоду ему вслед, —
Кладбищенской земляники
Крупнее и слаще нет...
Паймытэ Инмарен сётэм быгатонэз, кудӥз ассэ
сое вӧсь но каре. Со вӧсь пыр ик со улэ.
Россиысь Писательёслэн огазеяськонзылэн
ёзчиез, Удмуртиысь
культура удысысь дано
ужась, кылбурчи Татьяна Чернова:
— Студент дыръям аслым
кельшем кылбуръёссэ нимысьтыз
тетраде гожъяй. Отын вань М. Цветаевалэн
«Вчера ещё в глаза глядел...» кылбурез но.
Со туж сюлмам лякиськиз:
Я глупая, а ты умён,
Живой, а я остолбенелая.
О, вопль женщин всех времён:
«Мой милый, что тебе я сделала?!»
Кылбурчи дырез азьпалтыса гожъя, адӟонзэ
шӧдэ, оло, кылдытэ но. Паймытэ туж паськыт но
мур, улонлэн пыдэсозяз ик учконэз, философиез,
гожтон манерыз, горд сӥньысэн кадь нуэ ас малпанзэ
быдэс творчествоетӥз. Со понна «яратонтэк
улон — улон ӧвӧл».
М. Цветаева вань улытозяз аслаз узыр пуш
дуннезлэн ӧраз выемын вал. Кылбуран мылкыдзэ
омыръяз сюлэмызлэн мурдалаысьтыз, отын бызись
визылъёсысь. Озьыен, быдэс поэзиез — пыдэстэм
зарезь.
Йӧскалык библиотекаысь
«Книжная палата» ёзэн
кивалтӥсь Светлана Ворда кова:
— Мыным сюлэмъям «Мне
нравится, что Вы больны не мной»
кылбурез, бӧрысь со туж чебер романслы
пӧрме. Нокызьы но пусйытэк
кельтэме уг луы «Я тебя отвоюю
у всех земель, у всех небес» кылбурзэ но:
Я тебя отвоюю у всех земель, у всех небес,
Оттого что лес — моя колыбель, и могила — лес,
Оттого что я на земле стою — лишь одной ногой,
Оттого что я о тебе спою — как никто другой.
Паймытэ творчествоезлэн мурдалаез, ӟечлыкез
но биографиысьтыз трос секыт учыръёсыз. Мынэсьтым
сюлэмме бугыртӥз нылпиосыныз учыр.
Картэзлэн ӵыжы-выжыосыз нылъёсты приютысь
басьтыны туртто вал, нош М. Цветаева ӧз лэзьы.
________________________________
Бамез дасяз Галина СЕМЁНОВА
«Ингоже» юанъёсын, дэмланъёсын вазиськоно
73-33-42 телефон номеръя.
Веросъёстэс-кылбуръёстэс ыстэлэ, «Ингоже» шуыса,
электрон почтае udmdunne@yandex.ru.