bereket №10

Бакча возисьёслы,
кибашлыослы
сӥзем газет
№43 (25955)
2022-тӥ ар 3-тӥ шуркынмон
13
Калык чакланъёс
Ноябре ик трос лымы
усиз ке, нянь удалтоз.
________
Фестиваль
Гужемез тодэ вайытэ выж лёгет
Толэзьлэн нырысетӥ
ӝыныяз тын-тын
кынтӥз ке, тол кезьыт
луоз.
________
Нырысетӥ нуналъёсаз
ик лымы усиз ке, тулыс
вазь вуоз.
________
Писпуосын куаръёс
трос на ке, тол кема
кыстӥськоз.
________
Куакаос огазе люкаськыса
лобало ке, лымы
усёз.
________
Ӟазегъёс шуре курисько
на ке, кезьыт кема
уз луы на.
________
Сӥзьыл юон
Ар радлыкъя чаклам
нерге утёнэз Сӥзьыл
юон йылпумъя. Сое
ортчыто 21-тӥ шуркынмон
толэзе — Михайлов
нуналэ (Гожня),
7-тӥ толсуре — Катерин
нуналэ (Вуж Салья) яке
20-тӥ толсуре — Микола
нуналэ (Варклед-
Бӧдья).
Ӵукна ик нянь пыжо.
Юг-юг тӧдьы дӥсь
дӥсяса, семьяысь
мӧйыос куалаязы
пото. Нянь юдэсъёсты
тылало, отчы ик
ӧжытак мусур но аракы
кисьтало, ю-нянь мед
удалтоз шуыса. Нылпиос
ӝӧк сьӧрын пуко,
куалаысь вӧсям нянь
пыртэмзэс возьмаса.
Вӧсям нянез нырысь
ик мӧйыос веръяло.
Вӧсяськон нуназе бере
шунды пуксемлэсь
азьло ортчылӥз, сӥлы
каремзэс «шунды мед
адӟоз» шуыса:
Инмар нянь мед сётоз,
Пудо-живот мед удалтоз,
Семья таза мед улоз
Кизем ю-нянез октыны.
Ӝытазе бӧлякъёс
люкиськылӥзы но
ог-огзы доры куное
ӧтчаськылӥзы. Юмшан
кутске вал гурт уллапаласен
(Вуж Салья).
Дасямын В. Владыкинлэн но
С. Виноградовлэн «Удмурт
оскон» книгазыя
Эгра ёросысь Комсомолецысь Нина Алексеева
выж лёгетлы сӥзем фестивальын 1-тӥ инты басьтӥз.
Эгра ёросысь Мазьги
гуртын пӧртэм тунсыко
ужрадъёс радъяськыло,
кылсярысь, выж лёгетлы
сӥзем фестиваль
ортчиз.
Ужрадэз малпаз Ижысь
«Булавка» магазин-мастерскойлэн
кивалтӥсез Светлана
Росс. Мастерскойысьтыз
кибашлыос выль улон кузьмало
вуж дӥсьёслы но арбериослы.
Керттэм, чильпам
пыд лёгетъёссы но трос.
Эгра ёросын но туж
трос кибашлы нылкышноос!
Ваньзы сямен половик
кертто. Фестивале кыӵезэ
но вайиллямтэ: огез калейдоскоп
шудон кадь,
мукетыз — суред выллем.
Синмаськымон ужъёссэс
возьматӥзы Эгра ёросысь
Чутыр черкогуртысь Римма
Олина, Елена Гущина, Надежда
Корепанова, Мария
Ефремова. Мазьгиысь Татьяна
Завалина ваем кузпалызлэн
анаезлэсь бадӟым
ковёръёссэ, нош Ижысь Надежда
Медведева но Татьяна
Никитина — «чичковское
плетение» амалъя дасям пыд
лёгетъёссэс. Фестивале вуиллям
Эгра ёросысь Порвайысь
Зинаида Масленникова
но Ирина Емельянова, Сундурысь
Надежда Поздеева,
Комсомолецысь Нина Алексеева,
Бачкейысь Татьяна но
Маргарита Бекмементьеваос.
— Басьтэм шортъёсын уг
керттӥськиськы, вуж басмаосын
гинэ вырисько, — вера
Татьяна Бекмементьева. —
Соослы кыкетӥ улон сётӥсько,
половик пӧрмытыса. Кыӵе
жаль, али тросэз вуж дӥсьёссэс
жаг пӧлы кушто...
5 кибашлыосты «Булавка»
мастерской кузьымен —
пӧртэм буёло бугоръёсын —
шумпоттӥз. Талэсь но дуногес
мар луоз на керттӥськыны
яратӥсь кышномуртлы!
Фестивалез радъяны юрттӥз
Г. Ароян ужбергатӥсь. Гуртоос
но чырткем кариськизы:
ужрад ортчон интыысь турынэз
утялтӥзы, чебер сяськаос
вайизы, ӟусъёс но кенер
лэсьтӥзы.
Туспуктӥз Валентина ЕМЕЛЬЯНОВА
Интыез нош кыӵе чебер
вал — Мазьги ошмес дурын.
Светлана Росс возьматӥз
обруч вылын выж лёгет дасян
амалэз. Валэктӥз, кызьы
галстукъёслэсь, колготкиослэсь,
футболкаослэсь, джинсъёслэсь
выж лёгет лэсьтыны
луэ.
— Котькыӵе материалэн
ужаны луэ, со медаз гинэ
куштӥськы, — вера Светлана
Анатольевна. — Туннэ
бадӟым малпанэ вань: оло,
котькуд ар та фестивалез
ортчытъяно? Котькуд ёросын
кибашлыос вань ук!
________
Галина ШИРОБОКОВА.
Ижкар

№43 (25955)
14 2022-тӥ ар 3-тӥ шуркынмон
САД-БАКЧА
Теплицаез утялтон
Кин улэ музъемын
кынтылэм бере но?
Эскере асьтэос
Сӥзьыл сюлмаськод —
гужем шумпотод
Пичи Пурга ёросысь Гожня гуртысь Татьяна Ионина
1 убо кешырзэ кизе бер сӥзьыл. Тазьы выременыз
валче солэн ӵужкушманэз 2-3 арнялы вазьгес вуэ, тулыс
киземеныз ӵошатыса.
Теплицаосты толлы чылкыт миськыса кельтоно.
Мынам кемалась дырысен
6 метръем 2 теплицаосы
сыло. Кызьы
соосты утялтоно, умой
валасько ни. Сотэк отын
уно нымы-кибыос,
висёнъёс люкаськозы,
музъемез туж ӝог уродмоз.
Помидорез бичаме бере
удъёссэ соку ик уг утял тӥськы,
солэсь азьло паутинной клещлы,
белокрылкалы но мукет
векчи нымы-кибыослы пумит
суретъёсын пазясько, кылсярысь,
туж кельше «Мухояр»
шашка. Сутка ортчыса, удъёсты
октӥсько но сутӥсько.
Арлы быдэ ик музъемзэ воштыны
турттӥсько — убоосысь
ог 5-20 сантиметр
сюйзэ басьтӥсько но ассэ
теп лицаез вож яке хозяйственной
майталэн умойумой
миськисько, чылкыт
вуэн гыл тӥсько.
Теплица куасьмем бере
выль чылкыт сюй пыртӥсько.
Отчы ватсасько курег кыед но
пул пызь. Минерал суретъёсын
уг выриськы. Но кыедды,
опилды ӧвӧл ке, туж тупалозы
комплексной шуиськись удобрениос,
кылсярысь, «Борофоска»,
соосты сюез небыт карон
понна ватсано луэ. Нош «Фитоспоринэн»
кисьтӥды ке, эшшо
умой.
«Фитоспорин» будосъёсты
пӧртэм висёнъёслэсь уте.
Угось отын сенной палочкалэн
улэп лулпырыосыз, спораосыз
вань. Соос чидало ӝокытэз
но, кезьытъёсыз но. Озьы кырын
кынтӥз ни ке но, сенной
палочкаос ялан «ужалозы»
на — музъемез висёнъёслэсь
сузялозы. «Фитоспоринлэсь»
сурет дасяны чик секыт ӧвӧл:
200 граммзэ суралтоно 400
грамм вуын, пуктоно салкым
азе. Кулэ луыкуз, 1 бадӟым
пуньы мында суретэз 10 литръем
вуэ ватсано но кисьтано.
«Фитоспоринэз» толлы кыре
кельтыны уг яра, угось -20 градуслэсь
кезьытын улэп бактериос
быро.
Эшшо кынтылэмлэсь азьло
теплицаям сугон мерттыса
кельтӥсько — тулыс со вазь
вожектоз, 1-тӥ майлы сиыны
яралоз ни.
________
Ирина ОГЛЕЗНЕВА,
кема аръёс ӵоже
сад-бакча возись
Туспуктӥз Максим ЕГОРОВ
Кышномурт сюлмаське нунокъёсыз понна — гужем кутсконын
выль кисьмам кешырез пиналъёс золгес кыскало, гуын
толъеменыз ӵошатоно ке.
Ӵужкушманзэ Таня апай кизе октябрь пумын яке ноябрьлэн
нырысетӥ арняяз. Чакла: тол вуытозь, кидысъёс удаса медаз
вуэ. Соин ульчаын шоро-куспо температура 0-ысен +3-ёзь гинэ
мед возиськоз. Соку кешыр потыса уз вуы, удъёс тулыс гинэ
музъемысь мычиськозы.
Тол улэ кизьыны кышномурт ӵемысь быръе «Нантская» сортэз.
Со кезьытэз чидась, гожто экспертъёс. Кылем сӥзьыл Таня
апай «Детская» сортэз но кизьыса эскериз — тулыс со озьы ик
ӵогыр-ӵогыр потӥз.
— Туэ сӥзьыл малпаськыса уг улы, кыӵе кидысэн пачка усьтэмын,
сое ик кизё, нош ик эксперимент каро, — шуэ песянай.
Толлы кизем убозэ кышномурт клёнкаен шобыртыса кельтэ.
Тулыс кешыр удъёс бычыяськем бере сое басьтэ.
Озьы июнь шорын пиналъёс убо вылысь пӧлы зӧкта кешыръёсты
вожмаськыса ишко ни. Эшшо арня ортчыса, бакча
сиён уката зол будэ. Нош ӵужкушманэз кӧттырмоназы сием
пиналъёс со вакытэ узы-борыен убоос котыртӥ зынъясько ни.
Кешырез сямен ик, Таня апай толлы кизьыса кельтэ сугонэз
но. Ӵемысь бакча возисьёс кидысэн сугонэз укно дурын
будэто, собере векчи удъёсты убо вылэ потто. Нош кышномуртлэн
аслаз амалэз. Дасям убояз со кидысэз шер-шер кизе,
гужем сугонзэ шератоно медаз луы шуыса. Ӵемысь кышномурт
быръе «Штутгартер» сортэз. Тулыс векчи удъёс ныр лэзё. Убоез
урыны, кисьтаны но музъемзэ небӟытыны кыле на. Нош гужем
ӵоже сугон лоп-лоп будэ.
Озьыен, тулыс бакча ужъёсты пичияк ке но капчиятон понна
куд-огзэ сӥзьыл ик мытыны луэ.
Сӥзьыл кидысэн мерттэм сугон умой будэ.
________
Елена СКВОРЦОВА
Туспуктӥз Максим ЕГОРОВ
Тодӥськоды-а?
Чеснок яратэ омырез
Будэтэм бакча сиёнэз тол
ӵоже возьыны быгатоно
на. Мар кароно, сугон но
чеснок арам медаз луэ
шуыса.
Чеснок возьыны туж
тупало пу ящик но бумага
коробка. Быръёно салкым
инты — ог +3+5 градус
мед возиськоз. Чеснок ӟеч
утиське пунэтын, но сое батареяослэсь
палэнэ ошоно.
Нош гулбече ошиды ке, уката
усто. Уго татын салкым,
пунэтысь чеснокъёс вискытӥ
омыр ветлэ, но чеснок модосъёс
пумен куасьмо, пунэт
сэрттӥськыны быгатоз. Тазьы
медаз луы шуыса, пуноно
шпагат калэн ӵош.
Бумага коробкае интыяды
ке, «борддораз» одно ик пасьёс
лэсьтоно — чеснок яратэ
омырез. Уката усто — кудыды
вань ке.
Ӵемысь чеснокез возё
пияла банкаосын. Кемагес
мед утиськоз шуыса, пӧлаз
мар гинэ уг тыро. Кин ке
рис кеньыр кисьтэ, мукетыз
котькуд чеснок йырез пызь
пӧлын погылля. Огез дунтэмез
но капчиез амал — пень.
Сое кисьтыны луэ пияла банкае
но, картон коробкае но.
Сугон яратэ кӧс но салкым
интыез. Сӥзьыл сое пуныса
ӧд вуэ ке, тодады вае вашкала
амалэз — капрон чулкае тырыса,
ошелэ.
Курыт сугонлы золгес тупа
салкым инты. 0+2 температура
дыръя со 7-8 толэзь ӵоже
ӟеч кыллёз.
Салатъёслы тупась гольтрес
сортъем сугон +4 градусын
ӟеч возиське, но со 3-4 толэзь
сяна уг чида.
Сугонэз ӟечгес возьыны
юрттоз температураез вошъян.
Кылсярысь, ноябре-декабре
сугонэз +17+23 градус
шунытын возёно, собере выжтоно
0+3 градусэ. Тулыс вуэмъя
сугонлы нош ик шуныт
инты кулэ. Температураез вошъян
сугонлэсь бычыяськемзэ
ӝегатэ. Эшшо эн вунэтэ: сугон
яратэ пеймыт интыез.
Порей сугонэз возьыны
луэ 5-6 толэзь ӵоже. Со умой
возиське холодильникын но,
балконын но, мурӝолын но.
Холодильникын возён понна
пореез сузяно но салкым
интые 2-3 часлы кельтоно.
Клёнка пуйые 5-8 модос сугонэз
пононо, клёнка озьы ик
кезьытын воземын мед луоз.
Пуйыез кӧня ке интыетӥ пасяно,
соку порей шокалоз.
________
Сергей ЗАХАРОВ

КУЗЁ
№43 (25955)
2022-тӥ ар 3-тӥ шуркынмон 15
Адӟем карымон
Тыл кыске, корт куасалля
Тросэз гуртын улӥсь воргоронъёс
котьма ужлы
усточи луо. Кылсярысь,
Дэбес ёросысь Калинин
нимо колхозысь энергетик
Андрей Кутявин
кортэз куасалля.
Зар-Медло гуртын улӥсь
Андрей Кутявинэз пичи дырысеныз
бордазы кыскылӥзы
электроприборъёс. Дорысьтыз
радиоприёмникъёсты, магнитофонъёсты
сэрттыса тупатъялляз,
паять карылӥз. Пияшлэсь
кибашлы луэмзэ эшъёсыз
ӝог синйылтӥзы, тӥяськем
приборъёссэс вайылыны кутскизы.
Озьы со гуртын гажамон
адями луиз.
Андрейлэсь техника котырын
бергамзэ адӟыса, анаез
Сарапулысь радиотехнической
техникуме мыныны
ӵектэм. Техникумын дышетскыны
туж ярам, пияшлэсь
быгатонлыкъёссэ отын но
шӧдӥллям. Практиказэ заводын
ортчем но, ужаны отчы ик
кельтӥллям. Контракт гожтыса,
татын ик службазэ ортчытэм.
Со вакытэ быдэс Россиез
котыръям, ракетной войскоосын
связь тупатъяны юрттэм.
2 ар озьы ужамез бере эшшо
ӝыны арзэ заводын ужам на.
— Городын улон сюлэмыя
ӧй вал, котьку гурт улон матын
потылӥз. 2011-тӥ арын
гужемлы шуыса дорам бертӥ
вал, колхозын складэ ужаны
потай, — шуэ Андрей Кутявин.
— Озьы юрттӥськеме быдэс
улонме берыктӥз. Монэ
кошкыны ӧз лэзе ни, мар, пе,
кыдёке ветлод на, гуртэ ик
кыль, ужан инты но шедьтомы,
электрик луод. Кузпалы
но гуртысьтымы вал бере,
мон шумпотыса Зар-Медлое
берытски. Электрикын ар
ужай но, валтӥсь энергетике
пуктӥзы.
Дэбес ёросысь Зар-Медлоысь Андрей Кутявин
(паллянысез) Алексей Сунцовен тыл кыско.
Андрей Кутявинлэн коркаез.
Ужезлэсь люкиськытэк,
Ижысь техникая кун университетын
тодон-валанъёссэ
будэтӥз. Уженыз данъяське,
табере студентъёслы визькенеш
сётэ ни. Та вакытэ
Туспуктӥз Валентина ЕМЕЛЬЯНОВА
бордаз практиказэ ортче Бадӟым
Кизьна гуртысь Алексей
Сунцов.
— Уборка вакытэ мынам
бурд улам 4 мурт лыдъяське,
соос тысь куасьтонын
Андрей Кутявинлэн киужез.
ужазы, одӥг дыре студентъёс
2 кузя вал, таос но мыным
туж юн юртто, — шуэ Андрей
Николаевич. — 2 арзэ
студентъёс дорам ӧз вуылэ,
мӧзмиськем, лэся. Егитъёс
Андрей Кутявинлэн архивысьтыз
Андрей Кутявинлэн архивысьтыз
туж пӧртэмесь, куд-огезлэн
валанзы но ӧвӧл, мар ужано
шуыса, татын соослы роспрос
валэктӥсько, тросгес
асьсэды ужатыны тыршисько.
Та вакытэ бордам ужась
студент туж визьмо, коть
туннэ ик уже кут.
Ужзы лачак: я колхозысь
электродвигательёс сутско,
я лампаосты воштоно. Алигес
соос выль пуктӥськись
колхоз контора азе тыл кыскизы.
Колхозысь энергетик
ваньмон дырзэ пайдаё ортчытэ.
Арняяз 3 пол гуртысьтызы
спортклубе мугорзэ
кыдатыны ветлэ, пыдын но
куасэн бызьылэ. Кемалась ик
ӧвӧл аслыз выль юрт пуктэм.
— Юрт ӝутӥськод ке,
ваньзэ аслыд лэсьтоно луэ, —
шуэ Андрей Кутявин. —
Корт ӟезьыме калыклэсь
пӧртэмгес кареме потӥз.
Малпай вал, ёрос центрысь
кибашлыос доры мыно, соосты
ӧтё но, лэсьтозы шуыса.
Озьы гинэ вылымтэ ай.
Одӥгез доры юалляськыны
мынӥ но, дыры, пе, ӧвӧл,
мукетыз лыктыны дась вал,
ачим ужысь ӧй ваньмы,
куинетӥез укыр дуно куриз.
Озьы ветлон сяменым
йырам малпан чилектӥз,
оло, аслым кортэз куасалляны
кутсконо. Нырысь уже
кырыж-мерыжгес пӧрмиз,
отӥяз киы воляз.
Табере Андрей Кутявин
ваньмон дыр (нош со ӵемгес
толалтэ луэ) шедьтэ ке, ачиз
но кортъёслэсь пӧртэм арбериос
лэсьтэ: сӥль ӵынатон
(мангал), светильникъёс, ӟусъёс.
Быдэстэм киужъёсыз
гуртаз кема уг возисько, аслыз
кельтэмзэ но тодмоосыз
басьтыса, пе, кошко.
________
Валентина ЕМЕЛЬЯНОВА
Лэсьты ачид
Пичи гур
Синмаськымон
Бубызэс данъязы
Таӵе гурлы
21 кирпич кулэ.
«Сад и огород (Cоветы дачникам)» огинлэн «ВКонтакте» бамысьтыз
«Ракета» гурез котькудӥз лэсьтыны быгатоз
5 минут куспын, ки улады ичизэ 21
кирпич (20-ез быдэс, 2-ез — ӝыныё) кулэ.
Пичи гур пуктон понна раствор но кулэ
ӧвӧл, нош сиён отын вакчи дыр куспын пӧзе,
шелепен эстыса гинэ но.
1-тӥ ряд но 2-тӥ ряд. Соос одӥг выллемесь,
кирпичъёслэсь «П» буква пӧрмытоно, сэрегъёсаз
ӝыныё кирпич поныса.
3-тӥ рядысен тыроно ни быдэс кирпичъёсты
гинэ, соослэсь «О» буква пӧрмытоно,
котькуд рядэ 4 кирпич мынэ. Лэсьтыны луоз,
суредъёсты учкыса но.
Гур дась, сое лэсьтыны 5 минут кошкоз.
Пась вадьсаз корт сетка поныны луоз, соку
пичи посудаын сиён пӧраны быгатоды.
Шаркан ёросысь Тюарысь
Трефиловъёслэн корказы.
«Вестник» газетлэн «ВКонтакте» бамысьтыз
Шаркан ёросысь Тюар (Верхние Кивары)
гуртысь Трефиловъёслэн корказы
кыдёкысен адӟиське. Корказы но
укно улысьтызы палисадниксы туж
аспӧртэм лэсьтэмын.
Бадӟым семьяын котьку но валче улӥзы.
Кӧня ке ар талэсь азьло атайзы — Владимир
Тимофеевич Трефилов — улонысь
кошкиз, со трос аръёс ӵоже лесник луыса
ужамын. Бубызылэсь ужамзэ буре вайыса,
пиез Станислав Трефилов но эмеспиез
Николай Мазиков палисадниксэс вож
кызъёсын лэсьтӥзы. Табере Центральной
ульчаысь Трефиловъёслэн корказы вадьсын
вож кызъёс будо, нош соос вискытӥ
шунды пиштэ.

№43 (25955)
16 2022-тӥ ар 3-тӥ шуркынмон КИБАШЛЫОС
Адӟем карымон
Сапег гынды али!
Эгра ёросысь Чутыр
школаысь визьнодась
Любовь Алиева ыж вордэ,
ыж гонлэсь пӧртэм
арбериос гындэ. Азьвыл
нылпиосты физкультуралы
дышетӥз, али —
киужлы.
— Паймоно кадь, — вера
Любовь Аркадьевна, — семьямы
азьвыл сомында ыж
возьылӥз, нош ыж гон кулэ
ӧй вал — ваньзэ куштылӥм.
Мыным со жаль потылӥз,
соин ик ог 15 ар талэсь азьло
гындон борды басьтӥськоно
кариськи. Кутскыны секыт
вал. Угось гуртамы Интернет
но соку ӧй вал. Ярам, куд-ог
арлыдоосмы валэктӥзы ик,
кыӵе инструментъёс, ыж гон
кулэ луозы.
Нырысетӥ гын сапеге
атаслэн ӟускиез кадь ик векчи
но небыт, пе, пӧрмиз. Собере
нылкышно та киужез сярысь
вунэтӥз. Выльысен тодаз вайиз
Эгра ёросысь Пежвай гуртысь
арлыдо кибашлыен тодматскемез
бере гинэ.
— Со вашкала амалэн,
кӧсын, гындэ, — вера
дышетӥсь, — нош мон туала
сямен — вуэн, майталэн.
Озьы ог-огмылэсь ужан
амалъёсмес асэстӥмы. Табере
гын сапег сяна, мукет арбериосты
но гындыны быгатӥсько
— берет, жилет, шарфик, колоша,
половик, коӵышлы
кар... Жаляса верано, та киужен
вырисьёс арысь аре ичи
кылё, угось гуртоос ыж вордэмысь
дугдо.
Любовь Аркадьевналэн
гидаз бӧксӥсьёсыз тырмыт.
Алигес кӧня ке йырзэ вузаз.
Соос интые ӟеч выжыысьсэ —
мясошёрстнойзэ — вайиз. Та
малпанзэ быдэстыны юрттӥз
соцконтрактъя басьтэм
Эгра ёросысь Чутырысь Любовь Алиевалэн
гындэм арбериосыз туалаесь.
коньдон. Азьланяз кышномурт
Чутырын мастерской
усьтыны чакла.
— Школаын нылпиос понна
«Тёплый войлок» кружок
нуисько, — вера со. — Татын,
ыж гонэн сяна, ужаськомы
бадьпу ньӧрен но. Сое пуныны
ас поннам дыши, бӧрысь
киме Эгра ёросысь киужъёсъя
юртын волятӥ. Азьвыл, ньӧр
утчаса, Ижозь но вуисько вал.
Али азбарам гинэ потӥсько —
котырак бадьпу мерттӥ.
Пунӥськон ласянь Алиевалэн
шуг-секытъёсыз ӧвӧл
ке, гындонын — тырмыт гинэ.
Кылсярысь, Эгра палъёсын
ыж гонэз сэстӥсь ӟеч станокъёс
ӧвӧл. Таин сэрен Любовь
Аркадьевна Глазове ӵем поталля.
Озьы сюрес вылэ
коньдонзэ но, дырзэ но трос
быдтэ. Тужгес но али — нылпиослы
сяна, бадӟымъёслы но
кружок нуыны кутскиз.
— Малпай вал, трос нылпиё
семьяосысь нылкышноос
«Гындали» кружокам лыктозы
шуыса. Гын сапеген коньдон
поттыны луэ ук! Но вуизы
20 котыр арлыдоос гинэ.
Соосын клубын арняяз 1 пол
пумиськылӥськомы. Али «Сутэро»
коллекция дасяськомы.
Ноябре удмурт костюмъёсмес
гуртоосмылы возьматомы.
Туала гын сапегъёсмес но
поттомы — соос борды мон
подошва юнматӥсько. Нунал
куспын 1 пыдэ понон пӧрме.
Но сое соку ик уд кутча — куасьмемзэ
2-3 нунал витёно
луэ на.
Али Любовь Аркадьевна
мастерскоезлы инты утча,
школаын но клубын жагдӥськоно
медаз луы шуыса.
Угось гындӥськон — кырсь уж.
________
Ольга КОРЕПАНОВА
Любовь Алиевалэн архивысьтыз
Аспӧртэм
Инкуазез уте... киуж
Ижысь Надежда Медведева доры пырыса, паймоно:
киужъёсыз котькуд сэрегын. Кышномуртлэн пичи
дырысеныз шутэтскон амалэз одӥг — киужен вырон.
Н. Медведева — вуз карись. Уже мыноно ӧвӧл ке,
веньёсыз-сӥньысъёсыз бордын 3 но, 4 но час вырӟылытэк
пуке: керттӥське, пужъятске, вуриське, чильпаське... Мобилизованнойёслы
кӧня пыдвыл керттӥз ини — лыдъяны
чиньыос уз тырме!
— Мылкыды урод луэ ке, соку ик киуж борды
басьтӥськисько, — вера нылкышно. — Озьы куддыр валаса
но уг вуттӥськы, кызьы буйгасько. Эшъёсы но ачим кадесь
ик: огез вуриське, мукетыз керттӥське... Куное мыныкум,
саламлы чик уг ёрмиськы — киужме кузьмасько.
Та вакытэ Н. Медведева 2 кечез кутыны дышиз — чебер
шудонъёс лэсьтыса, инкуазез уте. Кызьы? Интернетын
киужлы сӥзем бамъёсын бугыръяськыкуз, одӥг кышномурт
вылэ ӝимем, со ик та амалэн тодматэм.
— «Тузӥ утилизация» нимаське со, — шуэ Н. Медведева.
— Кылем-мылем пакетъёсты векчи юдылоно но небыт
шудон пушкы пононо. Эсьмаса, синтепонлы уксё уг кошкы,
инкуазе жуг-жаг уг куштӥськы, нош шудон аспӧртэмлыко
пӧрме.
Н. Медведевалэн 2 пиосыз бадӟымесь ини. Огез, анаез
сямен ик, пужъятскыны яратэ. Зэм, туннэ солэн талы дырыз
уггес кыльы. Но школае ветлыкуз, дышетӥсьсэ пужъятэм арбериосыныз
ӵем гинэ паймытъя вылэм.
Ижысь Надежда Медведева керттӥськыса шутэтске.
________
Ольга НИКИТИНА
Надежда Медведевалэн архивысьтыз
Лэсьты ачид!
Керттэтын — кампет но мульы
Ижысь «Птица счастья» студиын
киужлы дышето.
«Птица счастья» огинлэн «ВКонтакте» бамысьтыз
Туала вакытэ матысь
адямилы ас киыныд
кузьым лэсьтыны
капчи — Интернет,
пӧр тэм студиос ваньзэ
ва лэкто.
Ижысь «Птица счастья»
студия 2009-тӥ арысен ужа.
Кивалтэ соин Юлия Когай.
Нылмурт пичи дырысеныз
суредаськыны яратэ. Семьяяз
ваньзы киужен выро:
песянаез керттӥське, анаез
вуриське... Соин, вылды,
Юлия улонзэ творчествоен
герӟаз — Ижысь искусствоосъя
школаез йылпумъяз.
— Шаерамы киуж лэсьтыса
вузасьёс пӧлын ми
нырысетӥосыз радын вал,
— вера Ю. Когай. — Канфетъёслэсь,
мульыослэсь керттэтъёс
лэсьтыны кутскимы,
Интернет-магазин усьтӥмы.
Ужмы секытэн мынӥз, угось
калык дышемын ӧй вал таӵе
керттэтъёслы. Берлогес югдурмы
воштӥськиз — заказъёс
йылӥзы. Та удысме кутски
ӝыны килограмм канфет но
1 рулон гофра бумага басьтон
бордысен. Анай-атае мытэм
ужелы шумпото, юртто но.
Туннэ Ю. Когайлэн мастерскоез
паськыта. Отын ужасьёс
пӧртэм тунсыко малпанъёсты
улонэ пыӵато. Сяська керттэт
лэсьтэм сяна, кылсярысь,
школаосы потало, мастеркласс
возьматъяло. Та бӧрсьы
котькуд пинал ачиз керттэт
дасяны дыше.
Пусъёно: мастерской
Ижын гинэ уг ужа, ёросъёсы,
гуртъёсы но вуылэ. Тӥляд
но соослэсь адӟем каремды
потӥз ке, вазиське редакцие.
«Птица счастья» огазеяськонэн
кусып тупатыны
юрттомы.
________
Алеся ГЛАВАТСКИХ

ГИДКУАЗЬЫН
№43 (25955)
2022-тӥ ар 3-тӥ шуркынмон 17
Выль выжы
Вал адями борды ӝог дыше
Можга ёросысь Залесный
гуртысь Сергей Игнатьевлэн
сюлэмаз кема
нуллэм льӧль малпанэз
быдэсмиз — вал вордыны
кутскиз.
— Песятае ёросысьтымы
«Держава» колхозын конюх
луыса ужалляз, — шуэ Сергей
Александрович. — Мон
сьӧрысьтыз ӧй кыльылы. Вал
сюдыны, кыедзэс тазатыны
юрттылӥ. Атаедлэсь дышетскы,
солэн ужез тыныд котьку
кулэ луоз, шуылӥз песятай.
Папа автобуслэн водителез
вал. Но монэ бордазы кыскизы
валъёс.
Аслам вӧл-вӧл азбаре, гидэ
луоз шуыса малпалляй. Хозяйствоме
бадӟыматон понна
вахтаен ужаны толэзьёсын
ветлылӥ. Уксё поттӥсько —
ваньзэ одӥгтэм пуктӥськыны
кутӥсько. Гид лэсьтэме, бакча
берысьтымы аналтэм участокез
басьтэме бере вал утчаны
кутски. Кыӵезэ ваёно шуыса,
ӝыны ар бырйиськи кадь.
Башкириысь валъёс умоесь,
шуизы. Но отын поттэм выжыысь
валъёс пони кадь лапегесь,
вылазы пукси ке, пыдъёсы
музъемозь йӧтозы. Мар
мон сыӵе пичи животъёсын
каром?
3 ар талэсь азьвыл Татарстан
кемысь першерон выжыысь
2 коблаосты вайи. Йыг-йыг
бадӟым мугоро, сэзь, кужмо,
чебер луэмзылы синмаськи.
Огез секытэн, шуизы. Чуньызэ
кема возьмай. Верам дырзы
но ортчиз — уг вордӥськы. Алдазы
ведь таос, малпасько. Огпол
гидэ потӥсько но, чуньыям.
Шумпотонэлэн пумыз ӧй
вал. Аслам пиналы вордскиз
кадь.
Першерон выжыысь валъёс
секыт ужез но капчиен
вормо, пӧйшураны но ярало.
Кышкасьтэмесь, соосты ожъёс
дыръя но кыткылӥзы. Зэм,
22-25 ар сяна уг уло. Но кобла
18 чуньы вайыны быгатэ. 3
аръем валъёсты бызьылытыны
луэ ни. Нуналаз 56 иськемез
ортчыны быгато. Секыт
возэн но капчиен вортто. Тазалыксы
юн. Кезьытэз, пӧсез
капчиен чидало. Визьмоесь,
кылзӥськисесь. Та сямзы
понна Сергей Игнатьев коблаоссэ
басьтӥз. Угось ачиз
со пӧйшурась. Валэз вылэ
пуксе но сике шонтэ. Животъёсты
ужан вылысь ӧй
басьты, яратон вылысь, шуэ.
Нуналаз олокӧня пол но доразы
пота, веша. Бордазы
сюлэмы буйга, шуэ.
Можга ёросысь Залесныйысь Сергей Игнатьев
першерон выжыысь вал вордэ.
Туэ, Калыкез улон-вылонын
утён политикая но ужъя
министерствоен соцконтракт
гожтыса, эшшо 2 чуньы басьтӥз
на, соослы Батыр но Барон ним
сётӥз.
— Умой вал дуно сылэ. 60
сюрс манетысен 150 сюрсозь
но вуэ, — вера воргорон. — Ӟеч
выжыысьёсыз воксё но машина
мында сыло. Но амал утчаськод
ке, Инмар ачиз сюрес
возьматэ. Соцконтрактэн мыным
200 сюрс манет сётӥзы.
Соин комбикорм, куро басьтӥ
на. Министерствоысь специалистъёслы
тау, соос документъёс
лэсьтыны, малпанме быдэстыны
юрттӥзы.
Сергей Игнатьевлэн валъёсызлы
синмаськисьёс трос.
Можга город вӧзын гуртсы
ялан паськыта, ялан выль
урамъёс кылдо. Нылпиос лачак.
Загон котыраз но ялан
вуо, валъёсты сюдэммы, ворттылэммы
потэ, шуо. Соин ик
Сергей Игнатьев азьланяз ӧдъя
та удысын азинскыны: валэн
фотосессиос, ворттылонъёс
радъяны. Ёросын тазьы вырисьёс
ӧвӧл на.
— Вал вордон дуно усе, соин
ик соосты басьтӥсьёс гуртъёсын
ӧвӧл, — шуэ Сергей Александрович.
— 1 животлы толзэ
потон понна 30 бадӟым рулон
куро кулэ. Скал кадь ик, трос
сиське, но солэсь йӧлзэ уд кыскы,
уксё уд потты. Адямиослэн
гань-гань улэмзы потэ, турын
дасянэз, кыед сузянэз тодытэк.
Нош муртлэсь будэтэм пудозэ
адӟыны-вешаны мылкыдзы
бадӟым. Школаосын дышетскисьёс
но экскурсиосы вуылозы
шуыса, оскисько.
Пиосмурт верамъя, валэз
бордад дышетыны секыт. Басьтон
азяд сюлэмыд ӧз вырӟы
ке, озьыен, кылды уз тупа,
мукетсэ утчано, пе. Гидэ пыртыса
гинэ уг тырмы — пичи
пиналэн сямен, уен-нуналэн
котыраз бергано. Мурт карыса
валъёс нырысь ӵыжасько но,
куртчылӥсько но, вылазы но
пуксьыны уг сёто.
— Арня ӵоже валэз бордад
дышетыны луэ, — пусъе Сергей
Александрович. — Дыртыны,
шораз кесяськыны, жугыны
уг яра — бордаз уз лэзьы.
Яратэмез но капчи мылкыдэз
котькин шӧдэ. Доразы лыктэмелы
быдэ вешасько, сакырен,
улмоен куноятӥсько.
Ческытсэ, пичи мурт кампетэз
кадь, ярато. Чебер, таза
мед будозы шуыса, валъёсылы
ӵукна но ӝыт быдэн 500
грамм пызь сётӥсько. Азьысьтызы
турын уг бырылы. Чылкыт
ву но тусязы котьку мед
луоз, шуо, но лишнойзэ люктад
ке, мугорысьтызы кальциез
гылтӥськоз. Соин ик
ӵукна но ӝыт 1 ведра вуэн
тырмыт.
Сергей Александровичлэн
нылпиосыз но валъёс
котырысь уг кошкыло. Кузпалыз
но юрттӥське. Гидэ
мултэс пырано медаз луы
шуыса, воргорон кырысен
сюдон амал малпаз. Гидэз
12х11 метр быдӟа. Выдыны
но интызы мед луоз шуыса,
висъетъёссэ вӧл-вӧл лэсьтӥз.
Эшшо тросгес вал вордоно ке,
гидэз паськытатытэк уз луы.
Ёркытын висьыны кутскозы,
шуэ. Тулысысен сӥзьылозь
югыт куазен котыртэмын
возе. Валъёслы угось ворттылыны
кулэ, со бордын ик
тазалыксы но. Кузёоссэс адӟо
ке, гырдалляса ик матэ лыкто,
вешаськыны курисько. Огпол
огез котыртэмысь пегӟем, пужымъёс
пӧлы йыромем. Сергей
Игнатьев шултыса ӧтиз
но, кузёезлэсь куаразэ тодмаса,
валэз соку ик бертӥз.
— Пуны кадь бордэ
дышо, — шуэ С. Игнатьев. —
Ачид но соостэк улыны уд
быгатӥськы ни. Мылкыд секыт
ке, доразы потӥськод но
бурмиськод. Юнме уг шуо:
вал адямиез йӧнатэ.
Сергей Игнатьевлэн архивысьтыз
Юан-веран
Эскериськон
вакыт
Сюро таза пудолы
сӥзьыл кыӵе висёнъёслэсь
вакцина пуктылоно?
Ольга В.
Пичи Пурга ёрос
Валэкто Удмуртиысь
Пу до эмъянъя
валтӥсь управлениысь
специалистъёс
Гужем ӵоже возь вылын
пудо олокыӵе
но висён шедьтыны
быгатэ. Соин ик гидэ
пыртэм животъёсты
сӥзьыл сак эскероно.
Кылсярысь, сибирской
язва, бруцеллёз, урмон
(бешенство), туберкулёз,
лейкоз, лептоспироз
но мукет чер медаз
вӧлмы. Угось уноез висёнъёс
адямилы но паласькыны
быгато. Пудо
эмъясез ӧтёно, анализ
мед лэсьтоз шуыса. Со
сярысь пудо эмъясь акт
гожтоз, та документ
азьланяз кулэ луоз,
пудоез но йӧлзэ вузаку
яке вандыса сдатьтыны
малпаку.
Пудоез одно ик араз 2
пол эскерыны кулэ. Та
бордысь потэ котырысь
бускельёслэн,
быдэс гуртлэн но
огсыр улонэз. Со сяна,
сӥзьыл одно ик лептоспирозлэсь,
сибирской
язвалэсь но урмонлэсь
вакцина пуктоно. Та
сярысь озьы ик акт
гожто, нимысьтыз
журналэ пусъё. Зэм,
чакласьконо: скал
кунян ваёно ӧвӧл-а?
Пиятозяз 2 толэзьлэсь
ӧжыт кылемын ке,
прививкаослэсь но
анализ басьтонлэсь
возиськоно.
Нялтас вераса, котькуд
прививкалэн аслаз
вакытыз. Кылсярысь,
55 нуналъем кунянлы
нырысьсэ пукто пастереллёзлэсь
прививка.
Сое выльысь лэсьто,
ар ортчыса. Кунянлы
77 нунал тырме ке,
лишайлэсь прививка
пукто, эшшо огпол та
черлэсь ик прививка
лэсьто, 90 нунал ортчыса.
Сибирь язвалэсь
прививка пукто 100
нуналъем пудолы.
Паласькись висёнъёслы
эскеремын ӧвӧл
ке, прививкаос пуктылэмын
ӧвӧл ке, пудоез
гидысь поттаны
алэмын.
Бамез дасяз Елена САРАМАТОВА

№43 (25955)
18 2022-тӥ ар 3-тӥ шуркынмон
ТАЗАЛЫК
Шонер сиськон
Сылалэз вунэтоно, сугонэз яратоно
Мар кароно, вирзӥбет медаз тэтча шуыса?
Маин кӧтэз тыроно,
вирзӥбет шудылэ,
сюлэм ӵогъялля ке? Та
сярысь вера Тазалыкез
утёнъя министерствоысь
валтӥсь диетолог,
Тазалыкез утёнъя но
профилактикая элькун
центрысь эмъясь Ирина
Белокрылова.
— Инсульт, инфаркт пыр
потэмъёслы, артериальной
гипертониен курадӟисьёс лы
йыразы кельтоно 10 куронэз.
Нырысетӥез: лыдъяно
калорийёсты — нунал куспын
кӧня соосты быдтӥськод, сомында
ик сииськод. Тросэзлы
та курон секыт потэ, угось
кӧтмес тып-тып тырыны но
диван вылын погылляськыны
туж яратӥськомы.
Кыкетӥез: котькуд нунал
ӝӧк вылэ пӧртэм сиёнюон
поттоно. Со белокъёсын,
жиръёсын, углеводъёсын,
витаминъёсын но микроэлементъёсын
узыр мед луоз.
Соос трос сӥльын, чорыгын
но бакча емышъёсын.
Куинетӥез: чаклано режимез.
4-5 поллэсь шергес
сиськыны уг яра. Тыршоно
котькуд нунал кӧтэз огвакытэ
тырыны. Ӝыт сиськоно
изьыны выдэмлэсь 2-3 часлы
азьлапал. Озьы ӝуш рос-прос
ужаса вуттоз на.
Ньылетӥез: ичигес сиёно
сылал. Нуналаз — 5 грамм. Сотэк
сылал мугоре люкаськыны
кутске. Быгытъёс борды
кырмисько натрий но хлор.
Адями тӧрна, вирзӥбетэз
Нуналлы быдэ ӝӧк вылын пӧртэм сиён-юон мед луоз.
шудыны ӧдъя. Бӧрысь вир
урод ветлыны шӧта. Тае нырысь
ик шӧдэ йырвиым, собере
— пекляос.
Сылал урод соин но: мугорысь
вань магниез, кальциез
но калиез быдтэ. Соин ик
пӧраськыку, сылалтэмлэсь
азьвыл шыд лымез нырысь
трос пол оскалтылоно. Воксё
усто луоз, сылалэз приправаосын,
турынъёсын воштыса.
Сиёнлы ческыт шӧм пыӵато
лимон ву, имбирь, сугон,
чеснок, лавр куар, петрушка,
кинза, анис, пӧсьтурын, тмин
но мукет.
Витетӥез: куштӥськоно
кӧё-вӧё сиёнъёслэсь —
маргаринлэсь, майонезлэсь,
колбасалэсь... Малы? Отын
укыр трос калориез но урод
холестеринэз. Уй-нунал куспын
соосты мугор поттыса
уг вутты, озьы адями кӧяны
кутске. Мултэс килограммъёс
киосы-пыдъёсы уг люкасько,
пуштӥрлык котыре нянясько.
Сюлэм дыг-мог ужаны кутске.
Питыр-котыр адямиос
борды инфаркт, инсульт 2-6
поллы ӵемгес кырмиськылэ.
Усто луоз, кылсярысь, колбасаез
кӧй чорыген воштыса.
Таяз холестеринэз умой
— тазалыкез юнматоз, нош
ӵыкмем вирсэрез чылкытатоз.
Куатетӥез: капчи углеводъёсын
кӧтэз тыроно
ӧвӧл. Берло дыре Россиын
та ужпум тужгес
Туспуктӥз Ольга КОРЕПАНОВА
сюлэмшугъяськытӥсез луэ.
Дышимы ини: ӝук интые пыжиськем
куртчиськомы, ай
сое сакырен-чаен юиськомы.
Озьы мугорын инсулин зол
ӝутӥське, вир напче. Ваньмыз
та сюлэмлэсь но сэръёслэсь
ужамзэс шугомытэ.
Капчи углеводъёсты секытъёсыныз
воштоно. Секыт
(мугорын кема сылмись)
углеводъёс трос ӝукъёсын,
емышъёсын. Сакыр интые
сиёно чечы, изюм, курага,
инжир, чернослив.
Сизьыметӥез: нуналлы
быдэ ӝӧк вылын мед луозы
С витаминэн, магниен
узыр сиёнъёс. Соос сэръёсты
умой сузяло, сакырлы будыны
уг сёто. Нош вир ӟеч ке,
мугорлэн пӧртэм висёнъёсын
нюръяськон кужымез
но юн. С витамин, магний
трос сьӧдсутэрын, облепихаын,
легезьпуын, улмоын,
петрушкаын, укропын, лимонын.
С борды Е витаминэз
но ватсано на. Таиз уно
мульыосын, етӥн но кунжут
тысьёсын, курегпузын,
шпинатын, брокколиын.
С витамин лулпырыосты
(клетка) сӧриськемлэсь уте,
вирысь тромбъёсты сузя,
выль капилляръёслы кылдыны
юрттэ.
Тямысэтӥез: яратоно
ацетилсалициловой кислотаен
узыр сиёнъёсты — сугонэз,
чеснокез, имбирез,
горд пӧсьтурынэз, зарезь
кубистаез. Та кислота нап
вирез кизермытэ, сэръёсты
ӵыкмонлэсь уте.
Укмысэтӥез: эшъяськоно
белокен. Берло аръёсы эскеронъёс
возьмато: Россиысь
калык туж ӧжыт ӟеч белок
сие. Котькуд нунал ӝӧк вылын
луыны кулэ, кылсярысь,
тылобурдо сӥль, сыр, кузятэм
(творог), чорыг, кукей.
Арняяз 2-3 пол ке но сиёно
турын белок — кӧжы, чечевица
яке фасоль.
Дасэтӥез: вунэтоно ӧвӧл
емышъёс сярысь. Кубистаын,
гордкушманын, помидорын,
огречын, кабачкиын
микроэлементъёсыз лыдъянтэм.
Таос вӧзы ватсад ке
улмоез, грушаез, апельсинэз,
шпинатэз — висёнъёслы уд
сётӥськы ни.
Юан-веран
Колбаса сиёно
толэзьлы огпол
Анае туж шӧг пӧраське.
Колбасаез, соусъёсты сяна,
сылалтӥськемъёсты но сиыны
уг лэзьы. Но сылаллэн, мон
тодэмъя, умой палъёсыз но
вань ук?
Ольга Никифорова.
Ижкар
Шонер. Сылал мугорлы
кулэ. Отын 40 процент хлорез
но 60 процент натриез вань.
Соос урод бактериосты быдто,
ӝушысь соксэ ӟечомыто,
кислотно-щелочной балансэз
тупато, лулпырыосысь (клетка)
вулы шаплы сылмыны уг
сёто, быгытъёсты юнмато.
Сылал уг тырмы ке, вирзӥбет
усе, йыр пороме, ӧскем потыны
кутске. Сылалын, натриез
но хлорез сяна, вань на мукет
ӟеч микроэлементъёсыз:
цинк, селен, калий, медь, железо,
фосфор, магний.
Но ӵем дыръя адями
эсэпсэ уг вала. Росстат
ивортэмъя, Россиын тросэз
улӥсьёс 5 интые 10-11
грамм сылал сиё. Лыдпус
туж бадӟым. Ӵапак та муген
арлы быдэ 2 но ӝыны миллион
адями улонэныз люкиське.
Куддыр адями валатэк
кыле, трос сылал сие шуыса.
Малы? Шуом, шыдаз, сылал
сяна, шӧмез воштӥсь кубикъёс,
соусъёс понэ. Озьы
сиён ческыт, но кузьыт
пӧрме. Сылал трос чипсыын,
майонезын, томатной
пастаын, колбасаын, гамбургерын...
Соин ик таосын
кӧтэз тыроно праздник нуналъёсы
гинэ — толэзяз огпол.
Усто, сылал йодэн суралтэмын
ке. Нунал куспын
адямилы шорлыдын 100-
150 микрограмм йод кулэ —
5 грамм сылалын ӵапак сомында.
Но таӵе сылал 6 толэзь
ортчыса, уродме. Соин
ик магазинын сак учконо, ку
со поттэмын вал.
Кубиста воштэ
лимонэз
Шуо, сылалтэм кубиста
туж пайдаё. Но сое сиисько
ке, кӧты тордэ. Тросгес сиыны
шедьтӥсько меда?
Юлия Широбокова.
Эгра ёрос
Роскачествоысь специалистъёс
валэктэмъя, 100 грамм
сылалтэм кубистаын пробиотикъёсыз
сомында, кӧня кулэ
адямилы нуналлы быдэ. Туж
трос бактериосыз, кудъёсыз
сюлэз умой ужато. Кубисталэн
клетчаткаез холестеринэз уськытэ,
вирсэръёсты юнматэ.
Сылалтэм кубистаын
мында С витамин нокытын
ӧвӧл ни, лимонын гинэ но
со ичигес. Озьыен, нуналлы
быдэ сое сиыса, луэ кынман
висёнъёслэсь утиськыны,
иммунитетэз ӝутыны, авитаминозэз
алыны.
А но Е витаминъёсыз юртто
кемагес егит возиськыны,
соос йырсиез но гижыез
юнмато. Макмырам муртлы
сылалтэм куарлэн вуэз иназ
луоз — отысь янтарной кислота
этаноллэсь кылем-мылемъёссэ
мугорысь поттэ.
Но сылалтэм кубистаез
трос сиыны уг яра. Ӝуштысюлды,
пекляды висьылэ,
вирзӥбетты ӝутъяське, аллергиды
вань ке — нуналаз
100-200 грамм гинэ. Угось та
сиён, ӝушысь соклэсь кислотностьсэ
ӝутыса, гурӟылытэ,
кӧтэз тордытэ, сылалэз трос
бере, давлениез ӝутэ, пекляосы
шукке.
Бамез дасяз Ольга КОРЕПАНОВА

ШУТЭТСКОН СЭРЕГ
№43 (25955)
2022-тӥ ар 3-тӥ шуркынмон 19
Кырӟаса лэзём али
Кучапи
Крезьгурез Геннадий ПАВЛОВЛЭН
Кылъёсыз Владимир МИХАЙЛОВЛЭН
Шедьтӥд монэ шур дурысь
Куак улысь,
Мон соин ик тон дорысь
Со дырысь
Нокытчы уг кошкиськы,
Огнадэ уг куштӥськы.
Припев:
Кучапи мон, кучапи —
Ав! Ав! Ав!
Монэ утемед понна —
Тау! Тау! Тау!
Гужем ӵошен шудомы
Шур дурын.
Туж ческыт ук ӝыт омыр
Возь вылын.
Гуждорын погылляськом,
Дун вуын шупылляськом.
Припев:
Кучапи мон, кучапи —
Ав! Ав! Ав!
Эш кариськемед понна —
Тау! Тау! Тау!
Школае ке мынӥд —
Мон кылё.
Тон монэ ке юн думид —
Сёт лёлё.
Юртъерез умой утё,
Школаысь тонэ витё.
Припев:
Кучапи мон, кучапи —
Ав! Ав! Ав!
Монэ утемед понна —
Тау! Тау! Тау!
Тюрагай
Крезьгурез Василий СТАРШИХЛЭН
Кылъёсыз Иосиф ИВАНОВЛЭН
Пумтэм-йылтэм луд вылын
Веттаське ю-нянь лудын.
Шундыя воринъяське,
Зарниям кадь адӟиське.
Ко-ко-ри-ко!
Вазь ӵукна со тулкыме
Тюрагай чуак зыме.
Юэ азвесь лысвуэз,
Куараез луэ жингрес.
Крезьгурез но кылъёсыз Вячеслав КИРИЛЛОВЛЭН
Ӵукна вазь султэ,
Монэ сайкатэ,
Бурдъёссэ шукке,
Йырзэ сэзъялтэ.
Припев:
Эшъёс! Кин со
Сокем зол кырӟа,
Часлы быдэ
Асьмелы чоръя?
Ко-ко, ко-ко, ко-ко, ко-ко,
Ко-ко-ри-ко!
Азбартӥ ветлэ,
Монэ сайкатэ,
Ваньзэ умойзэ
Лэсьтыны косэ.
Кырӟанъёс басьтэмын «Кенеш» журналлэн
2008-тӥ арын потэм 5-тӥ-6-тӥ номеръёсысьтыз.
Туспуктӥз Максим ЕГОРОВ

№43 (25955)
20 2022-тӥ ар 3-тӥ шуркынмон
ГУР АЗЬЫН
Кылдэ ньылод
Пыжиське, анайзэ малпаса
Ижысь Людмила Корепанова перепеч вӧя.
Людмила Корепановалэн архивысьтыз
Ижысь «Чильтэр» ансамбльын
кырӟась
Людмила Корепановалы
алигес 75 арес тырмиз.
20 арлэсь кема механикая
заводын гравёр луыса
ужамын, пӧраськыны
яратэ.
Людмила Витальевналэн
яратоно сиёнъёсыз — шунянь
но мусэн сылалтэм кубистаен
салат. Коллективзылэн
бадӟым ужрадэз луэ яке доразы
куноос лыкто ке, нырысь
ик та сиёнъёсты дасяны
кутске, эграослэн яратоно сиёнъёссы
шуыса. Пичи дыръязы
мумизы Анисия Петровна
арнялы быдэ семьязэ ческыт
пӧраськемен шумпоттылэм.
Людмила Корепанова туннэ
но тодаз вае чорыген нянь сиемзэс.
Пиоссы шурысь чорыг
ваё гинэ, пе, мумизы солэсь
пирог лэсьтэ вылэм ни.
Пичи дырзэ кышномурт
ялан тодаз вайылэ. Табере
ачиз но кемалась песянай ни,
арнялы быдэ нылпиоссэ ческыт
пӧраськемен куноятылэ,
анаезлэсь пыжиськон амалъёссэ
тодаз вайылэ.
— Туала нылпиос вашкала
сиёнлы шум уг пото, ымдуръёссэс
кырыжъяло, созэ но
тазэ ум сииське шуыса, — вера
Людмила Корепанова. — Нош
мон аслэсьтым карисько —
яратоно сиёнме лэсьтӥсько.
Ӵем пыжисько перепеч, тазэ
ваньмыз ярато. Одно ик тӧдьы
но сьӧд пызен колӟаськисько.
Перепеч кыӵъёсты огкутскемен
трос дасясько, кынтыны
но мед кылёз. Малпамтэ шорысь
куноос лыктыку, ӝогак
гинэ перепеч дасяны луэ.
Перепеч ӵемгес лэсьтэ губиен
яке сӥлен, нош аслыз
туж яра вирен пыжемез. Дась
кыӵъёсы вир (орсмемзэ уг
куты) тыре, кӧйӵыжы но пырсатэм
сугон (сое таба вылын
ӧжытак гинэ небӟытэ) будэтэ
но пӧсь гуре пыжыны пуктэ.
Гур азьын пыжемзэ номырин
уд вошты, шуэ.
Сӥзьыл вакытэ Людмила
Витальевна ӵемгес пӧраське
горд палэзен яке шуэн. Солэсь
шаньги-пирогъёс пыже.
Кылсярысь, шаньгилы 1 литр
пала палэзь, пе, кулэ. Сое 2 пол
пӧзьтэ. 1-тӥ полаз быректытэ
но вузэ кисьтэ, со интые выль
ву ватсаса, 2-тӥ ползэ эшшо
15 минут пӧзьтэ на. Бӧрысь
посудаысь мултэс вузэ кисьтэ,
палэзез туе, отчы будэтэ
1-2 пуньы крахмал яке пызь,
2-4 пуньы сакыр, собере
эшшо 5 минут пӧзьтэ на. Пыжиськон
корт вылэ шаньгилы
дасям ыльняньзэ пуньыен
гоп каре но огдырлы пӧсь
гуре пуктылэ. Палэзен дасям
кисаль, пе, пӧсь пыжос вылэ
ӝоггес кырмиське.
— Ӵемгес пыжисько шунянь,
пушкессэ азьлапал ик
дасясько, мед сӥялоз шуыса,
— шуэ Людмила Корепанова.
— 1 литр шуэз 15 минут
пала пӧзьтӥсько но вузэ
кисьтӥсько, отчы ватсасько
ӵужъем (сухой квас, одно ик
пеймытсэ кулэ) но 3 пуньы
сакыр. Пӧсь дыръяз ӟеч-ӟеч
сурано но сӥятоно. Шуняньме
бадӟым лэсьтӥсько. Вӧяса
дасям пыжиськон кортэ 1-2
сантиметр зӧкта ыльнянь
вӧлдӥсько, вылаз — дасям
пушкесме, собере ыльнянен
шобыртӥсько. Дуръёссэ золзол
чепылляно. Шуэз медаз
вия шуыса, чепыллям интызэ
шуккем курегпузэн зырасько
но гуре пыжыны пуктӥсько.
Одӥгез уродгес: шуэз дасяку,
корка аспӧртэм зын вӧлске.
Соин ик шунянь пыжыны
яратӥсько дорын огнам
дыръя. «Чильтэръёсын» кытчы
ке куное мынӥськомы ке,
эшъёсы «коронной» сиёнме
дасяны куро.
Интернет дэмла
Палэзян вакыт
Нырысьсэ кынтэм бере
бичало шу но палэзь.
Та емышъёс витаминъёсын
узыресь. Соосын
пӧраськыкуды, тодады
возе: та емышъёсты
чакласькыса сиёно,
нош нылпи вайыны
дасяськем нылкышноослы
но вирзӥбетэн
курадӟисьёслы шуэз
воксё но сиыны уг яра.
Горд палэзьлэсь
кампет
Кулэ: 2 стакан горд палэзь,
ӝыны стаканлэсь тросгес сакыр,
1 курегпуз, 1 пуньы лимон
сок, 1 пачка сакыр пудра.
Кутӥське курегпузлэсь
тӧдьыез гинэ. Сое тусьтые
кисьтоно, сакыр, лимон сок
ватсаса, ӟеч-ӟеч шукконо.
Миськыса дасям палэзез
кӧсатоно, одӥген-оген кутыса,
нырысь дась суретэ
веттылоно, собере вылаз сакыр
пудра пазьгоно но вӧш
вылэ куасьтыны пуктоно.
Кынтылэм бере палэзь ческыт луэ.
Пыжытэк но ческыт кампет
пӧрме.
Пюре
Кулэ: 1 килограмм палэзь,
2 литр ву, 1 пуньы (гурезен)
сылал.
Сылал вуын палэзез
небӟытозяз пӧзьтоно. Собере,
вузэ кисьтыса, кезьыт
вуэн миськоно. Сӥс пыр лэзьыса,
небӟем палэзез пичи
банкаосы тыроно но 15-20
минут ӵоже пастеризовать
кароно.
Мармелад
Кулэ: 1 килограмм палэзь,
500 грамм стакан сакыр,
1 стакан ву, ваниль сакыр.
Миськыса дасям палэзез
быректэм вуэ пононо но 15
минут пӧзьтоно. Вузэ кисьтоно
яке компот интые юыны луоз.
Нош палэзез туёно но, зӧк пыдэсо
посудае кисьтыса, сакыр
ватсано. Суретэз пичи тыл вылын,
ялан сураса, напчытозяз
ӝыны час пала пӧзьтоно. Корт
вылэ пыжиськонлы чаклам
бумага валёно, вӧяно но пӧсь
Туспуктӥз Максим ЕГОРОВ
повидлоез вылаз вӧлдоно. Пыжоно
50-60 градус шунытын 1
час пала. Гурысь поттэм бере
сӥятоно, собере гинэ кубикъёслы
вандылоно. Ческыт карон
вылысь ваниль сакырен пызьнано.
Шулэсь желе
Кулэ: 1 килограмм шу, 1 килограмм
сакыр, ӝыны литр ву.
Шулэсь курыт шӧмзэ быдтон
понна пӧзись вуын 5
минут возёно. Отӥяз шуэз
сӥс пыр поттоно но мульызэ
куштоно. Пюрее сакыр ватсано,
пичи тыл вылын, ялан сураса,
45 минут пӧзьтоно. Дась
желеез стерилизовать карыса
дасям банкаосы тыроно но
кезьыт интые пуктоно. Яке,
пичи формаосы тырыса, кынтоно.
Сакырен
Кулэ: 1 килограмм шу, 700-
800 грамм сакыр.
Шуэз сакырын погылляно.
Стерилизовать карыса дасям
банка пыдсы сакыр пононо
но сакырен шуэн тырмытоно.
Посудаез пытсано, кезьыт интые
пуктоно. Банкаысь шу туссэ
уг вошты, соин тортэз чеберъяны,
морс яке чай юыны
луэ.
Чечыен
Кулэ: шу но чечы кутӥсько
одӥг мында.
Шуэз пӧсь вуын миськоно,
кӧсатоно но туёно яке блендерен
небӟытоно. Вылаз чечы
ватсаса, ваньзэ ӟеч-ӟеч сурано
но пастеризовать карыса дасям
посудае пононо. Чечыды
кынмемын ни ке, сое 40 градусозь
шунтоно. Кезьыт интыын
1 арня возем сурет сиыны
дась.
Яке капчигес амал: миськыса
но кӧсатыса дасям палэзез
банкае пононо но вылаз
чечы кисьтоно.
Тодады возе, чечыен шу,
кынман висёнъёслэсь утем
сяна, сюлэм висьыку но анемия
дыръя юрттэ.
Бамез дасяз Валентина ЕМЕЛЬЯНОВА
«Берекетэ» юанъёсын, дэмланъёсын вазиськоно
73-33-42 телефон номеръя.
Материалъёстэс ыстэлэ, «Берекетэ» шуыса,
электрон почтае udmdunne@yandex.ru.