Somali - IRIN

Hodan
Cutubka 4aad: Riyadii Waxbarashada
Keligay baan ahaa waalashay, hadda lafteeda arrintu ma fududa, waxaa laga yaabaa in aan anigu eedda
leeyahay ama waa dhibaato labada dhinacba ka jirta (gudaha Sweden). Hal sano ayaan wax bartay, kadib
adeerkey baa Stockholm yimid, markaas ayaan aaday dugsi kale. Run ahaantii waa adag tahay, marka aad
istiraahdo hadda ayaa wax walba fiican yihiin in aad guurto oo misna aad meel kale oo cusub bilowdid.
Meesha waan ku cusbaa oo waxay ahayd fasalka toddobaad ee dugsiga sare, shaqadeyda dugsigu waa ay
fiicneyd waayo xoog ayaan waxbarashadeyda saaray, nafteydana waxaan u diiday in ay dib u gocato wixii
soo maray.
Waase adkeyd in aan guriga wax ku barto, gabar yar oo walaashey ah darteed. Waxay ahayd wax kaa xanaajinaya,
kaalin masuuliyadeed ayaan reerka ku lahaa, waxaan ahaa hooyada labaad ee reerka, aad baan uga
warqabay arrimaha guriga. Cuntada anaa karin jiray, masuuliyado kale oo reerka ahna waa lahaa.
Waan garanayaa in ay arrintu ku adkayd adeerkey, xoogaa baan kala durugnay markii aan Stockholm nimid.
Haween kale halka ma joogin, haween kale oo halka joogaa ma uu aqoon, dugsiga waxaa naloogu soo sheegay
waxaad la hadli kartaan, baraha iyo kaaliyaha caafimaadka, kumase aan faraxsaneyn arrintaas.
Saddex sano ka dib waxaan ku soo wareegay dugsi noo dhow, markaas 16jir baan ahaa, waxaan yeeshay laba
saaxiib oo fiican, saaxiibaaddaa waxaad ka sheekeysan kartaan arrimaha haweenka, arrimaha dhallinyarada,
sida kale wax gacan ah ma aan helin. Dabadeed jaamacad baan galay, si aan u qaato shahaaddada koowaad,
waa ka guuray aqalkii adeerkay, arrintaas kuma aan farxin, waxa uu igu yiri; ma aha arrintaas mid ku habboon
Soomaalia in ay ku kacdo.
Anigu ma jecli in qofna la igu maseeyo, shuruucdeyda ii gaarka ah ayaanna ku noolahay, waa is af-dhaafnay,
markii dambese waa ii garaabay. Waxaase jiray mid kale oon qaraabo nahay oo hadallo aad u kul-kulu
i yiri, sida; in uusan ila xiriiri doonin iyo in la iga saarayba ka mid ahaanshaha reerka.
Waa ay adag tahay nolosha, marka wax waliba lagaa rabo dhaqaale ahaan. Toddobaadka dhamaadkiisa waxaan
xanaaneeyaa dad waayeel ah, waxaan halkaas iga soo gashay xoogaa lacag, jaamacaddana amaah baan
ka qaadan jiray, reerkeygu aniga waxba ima siiyo, kamana filayn, waayo dhaqaale ahaan waa dad sabool ah,
faa’idada joogitaanka halkan aan ku qabo waxa weeye waxbarashada.
Halkan adigaa sameysanaya sharcigii ku hagi lahaa si aad ku noolaato naftaada adigaa ka masuul ah. Marka
aad reerkiina la joogto, qofkaad doonto eedda saar, halkase naftaada oo qur ah uun baad eedda saari, taasina
anigu waa ii fiican tahay. Waxaan ka fekeraa sidii aan dib Somaliya ugu noqon lahaa, ma doonayo in aan
halkan Sweden ilmo ku yeesho, ilmahayga waxaa u fiican meesha aan joogo in ay ila joogaan. Halkan wax
badan baan joogay sida aan isleeyahay, dadkaanna waligeey kamid noqon mayo. Taas waad arkeysaa, waadna
dareemeysaa maalin walba. Maalin walba waxbaa dhacaya ku xusuusinaya dalkaan in aadan laheyn,
waxaa laguu arkaa wax dadka kale ka duwan.
Waxyaabo badan oo aan sax ahayn ayaa lagaa sheegayaa. Waan ogahay in ay igu adkaan doonto in aan
Somaliya ku noolaado, waase la qabsan doonaa. Run ahaantii waxaan rabaa, ilmahayga dhulkeyga in ay ku
noolaadaan, arrintaas aad baan ugu dheggan-ahay, waalidku waa in ay hubaan waxa ay sameynayaan, waxa
aan hadda ogahay darteed, ilmo aan dhalay dibadda uma dirayo. Waxay ila tahay, carruurta iyo waalidka oo
la kala fogeeyo in ay aad u dhib badan tahay.
Dhallinyaro badan oo Somali ah oo halkan aan ku aragnay, waxay yimaaddeen iyaga oo aan waalidkood la
socon. Waa run oo aniga fursad baan helay, waxbarashadu waxay ii ahayd maalgashi weyn, waayo waxaan
doonayaa inaan dalkayga wax ugu qabto. Marka aan helo fursad aan dadkeyga wax ugu qaban karo, taas
ayaa faa’ido aniga ii ah.
IRIN 65