годишен извештај 2012 - Царинска управа на Република ...

РЕГУЛАТОРНА РАМКА
Во текот на 2012 година се донесени измени и дополнувања на повеќе закони и подзаконски акти поврзани
со царинските постапки, царинската тарифа, акцизите, заштитата на правата од интелектуална сопственост
и ратификување или примена на меѓународни договори, насочени кон поедноставување на царинските
постапки, намалување на трошоците на економските оператори и зголемување на конкуретноста на
домашната економија.
ЦАРИНСКА РЕГУЛАТИВА
Во јануари 2012 година се донесени измени и дополнувања на Царинскиот закон („Сл. весник на РМ“ бр.11/12)
со кои е воведена можност за ослободување од плаќање на увозни давачки за спортска опрема и
реквизити кои спортските федерации ги добиваат како подарок од странски донатори и увезена
спортска опрема и реквизити купени со парични средства добиени како подарок. Истовремено,
одложена е примената на дел од одредбите од Царинскиот закон за влезна и излезна збирна декларација чија
имплементација е директно поврзана со ставањето во функција на новиот систем за електронска обработка на
царински декларации и акцизни документи (СОЦДАД), како и на одредбите кои се однесуваат на формите на
гаранциите, начинот на нивната употреба и начинот и постапката на одложување на плаќањето на царинскиот
долг. Во контекст на последново, донесени се измени и дополнувања и на Уредбата за спроведување на
Царинскиот закон („Сл.весник на РМ“ бр. 14/12). Од истите причини, во декември 2012 година се донесени
нови измени и дополнувања на Царинскиот закон („Сл. весник на РМ“ бр.171/12), со кои примената на
одредбите од Царинскиот закон кои се однесуваат на употребата на влезна и излезна збирна декларација е
одложена за 01.01.2014 година.
Во март 2012 година Владата на Република Македонија донесе измени и дополнувања на Уредбата за
поблиски критериуми и начинот на спроведување на ослободување од плаќање на увозни давачки,
како и вредноста, количината и видот или намената на стоката која може да се ослободи од плаќање
на увозни давачки („Сл. весник на РМ“ бр.38/12), со кои се пропишуваат условите и постапката за ослободување
од плаќање на увозни давачки на спортска опрема и реквизити кои спортските федерации ги добиваат
како подарок од странски донатори и увезена спортска опрема и реквизити купени со парични средства
добиени како подарок, Во декември 2012 година се донесени нови измени и дополнувања на истата Уредба („Сл.
весник на РМ“ бр.170/12), со кои се уредува ослободувањето од плаќање на увозни давачки на пратки со
мала вредност испорачани од странство за примачи во земјата.
Во 2012 година министерот за финансии донесе измени и дополнувања на Правилникот за начинот на
пополнување на царинската декларација и кодексот на шифри кои се употребуваат („Сл.весник на РМ“
бр.61/12 и бр.155/12) со кои се воведени шифри за примена на измените на Царинскиот закон и на новите одредби
кои се однесуваат на ослободување од плаќање на увозни давачки при пополнувањето на царинските декларации.
Во април 2012 година, Владата на Република Македонија донесе Одлука за распоредување на стоките на форми
на извоз и увоз („Сл.весник на РМ“ бр.53/12), со која по тарифни ознаки се дефинирани формите на слободен извоз,
слободен увоз и увоз и извоз врз основа на дозвола, одобрение, согласност, решение, односно потврда за стоки кои
се извезуваат, односно увезуваат.
ЦАРИНСКА ТАРИФА
Како дел од антикризните мерки и стимулирање на економските активности, Владата на Република Македонија
продолжи со намалување на царинските стапки на увезените суровини и репроматеријали.
Во јануари 2012 година се донесени измени и дополнувања на Законот за царинската тарифа („Сл.весник на РМ“
бр.11/12) со кои се намалени или укинати 88 царински стапки за повеќе видови на стоки, како што се:
- Царинските стапки за саден и семенски материјал за земјоделието, кои изнесуваа 2% се укинати;
- Царинските давачки на репроматеријали за прехрамбената индустрија и за преработка на сокови (пире и
концентрати од овошје), се намалени на 5% или се укинати;
- Царинската стапка за увоз на бел и на други видови шеќери е намалена од 30% на 5%;
4