You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
№ 52 (<strong>25667</strong>)<br />
НУНАЛ БӦРСЬЫ НУНАЛ 2018-тӥ ар 12-тӥ пӧсьтолэзь 5<br />
73-33-42, 33 8-951-195-37-65<br />
195 3765<br />
ИВОР КУДЫ<br />
АЛНАШ<br />
Купанча тугоко<br />
Кучыран гуртысь Трокай Борисовлэн<br />
усадьбаяз, калык культурая<br />
центрын, ортчиз удмурт<br />
кырӟанъя «Купанча тугоко»<br />
5-тӥез фестиваль.<br />
Та дырлы Удмуртиын «Купанча»<br />
ансамбльёс 14 лыдъясько, фестивале пыриськизы<br />
Алнаш, Ува, Красногорск, Кез, Дэбес но<br />
Каракулино ёросъёсысь коллективъёс. «Купанчаослэн»<br />
пумиськонъёссылы кутскон сётӥзы уйпалъёс<br />
- кезъёс но дэбесъёс - 2014-тӥ арын. Отӥяз<br />
фестиваль паськытаз. Алнашын котькудӥз коллектив<br />
маин ке паймытыны выриз, кылсярысь,<br />
Красногорскысь пуньыен шудӥсьёс удмурт гуръёсты<br />
быдэстӥзы, кезъёс «Нылдыр» композициез<br />
возьматӥзы.<br />
БАЛЕЗИНО<br />
Австралиысь куно<br />
Ёрос библиотекаын поэтэн,<br />
писателен Людмила Ларкинаен<br />
пумиськон ортчиз. Эгра ёросын<br />
вордӥськем кышномурт али улэ<br />
Австралиын. Балезиное со вуэмын сузэрез доры.<br />
Л. Ларкина - 15 книгаослэн авторзы, кыдёкысь<br />
кунын «Австралийская лампада» журнал<br />
поттэ. Кемалась ик ӧвӧл югыт дуннее потӥз солэн<br />
берлоез книгаез «Гардемарин с чужой судьбой».<br />
Отын вераське Россиын вордӥськем но Австралиын<br />
улэм оброс суредась Арсений Савицкий<br />
сярысь. Гожтэмын зэмос документъёс вылын.<br />
Пумиськон дыръя чузъяськизы Л. Ларкиналэн<br />
кылбур чуръёсыз, уката сюлэме пырымонэсь<br />
вал вордӥськем шаерез сярысь гожтэмъёсыз.<br />
ГЛАЗОВ<br />
Ӵошатскыны - мунёен<br />
Семьялэн но яратонлэн нуналазы<br />
Глазов ёросысь Дзякино гуртын<br />
ортчиз фестиваль. Татчы люкаськизы<br />
районысь устоосыз семьяос.<br />
Кылсярысь, Качкашурысь Даниловъёс туж<br />
зол экто. Куреггуртысь Чибышевъёс вашкала<br />
бесерман гуръёсты быдэсъяло. Нош вормись<br />
луиз Адамысь Невоструевъёслэн семьязы - таосыз<br />
котькуд ар пырисько «Под крышей дома твоего»<br />
элькун конкурсэ. Соин котькинлэсь зол дасяло<br />
визитказэс но, кырӟан-эктон номерзэс но,<br />
шуэ Глазов ёросысь культурая но туризмъя отделлэн<br />
кивалтӥсез Светлана Коротаева.<br />
Тунсыко вал нылпи коляскаосын ӵошатскон.<br />
Анайёс ньыль питран вылэ нуныоссэс интыязы<br />
ке, нылъёс мунё коляскаосын вожвылъяськонэ<br />
потазы.<br />
ГРАК<br />
Пиос ӧжыт вордско<br />
Быдэс ёросын ӝыны ар ӵоже<br />
30 нуны вордскиз.<br />
Лыдпус ӝожомытэ, уго кылем<br />
арын та вакытэ 43 пиналлы свидетельство<br />
сётэмын вал. Вордскисьёс<br />
пӧлын тросгес нылъёс -<br />
соос 18, нош пиос 12 гинэ. Ёросысь загс отделлэн<br />
кивалтӥсез Лидия Грахова шумпотэ, нылпиос<br />
быдэс семьяын вордско шуыса. Кузпалтэк нуны<br />
вайись анай одӥг гинэ, миым соос 4 кузя вал.<br />
9 семьяын нуны куара нырысетӥзэ чузъяськиз.<br />
Нош 9 пар йылэтӥз Гракысь трос нылпиё<br />
семьяослэсь лыдзэс - татын 3-тӥ пиналзы<br />
кылдӥз. Эшшо 4 семьяын 4-тӥ нуны вордскиз,<br />
нош огез куз 5-тӥ нылпиен узырмиз.<br />
ДЭБЕС<br />
Турын кылиз зор улэ<br />
Ёросысь гурт хозяйствоосын<br />
пудо сиён дасян азьланьтӥське.<br />
Арнялэн кутсконаз 19 процентэз<br />
возьёс турнамын вал.<br />
Ужъёс ӝегаса мыно. Ёрос администрациысь<br />
гурт хозяйствоя<br />
управленилэн кивалтӥсез Алексей Никитин<br />
верамъя, та арняе жаль-жаль зоре, техника<br />
ӵемгес сылэ, возь вылэ потыны уг быгаты.<br />
Гурт предприятиос пӧлын тужгес усто ужа<br />
«Луч» СПК, татын ог 52 процент ужъёссы быдэстэмын<br />
ни. «Лесагурт» хозяйстволэн 35 процентлы<br />
планэз лэсьтэмын. Нош Калинин нимо<br />
СПК-лэн 33 процентэз лудъёсыз утялтэмын<br />
ни. Пусйыны кулэ, та хозяйстволэн тужгес<br />
бадӟымесь возьёсыз - 4 сюрс 209 гектар. Быдэс<br />
ёросын турын киземын 22 сюрс 708 гектар<br />
вылэ.<br />
Озьы кӧс турын чакламлэсь 10 процент гинэ<br />
дасямын ай, сенаж - 23 процент. Силос тырмытэмын<br />
35 процентлы.<br />
ИЖЕВСК<br />
Кышкыт курег сӥль<br />
Шоркар лавкаосысь шараямын<br />
тылобурдо пыэдэн 17 тонна<br />
курег сӥль. Городлэн прессслужбаез<br />
ивортӥз: ваньмыз со<br />
вуз карон ӝажыос вылысь утялтэмын.<br />
Тылобурдо пыэд берло дыре Россиын 28 пол<br />
шараяськылӥз ни - Курск, Липецк, Орёл, Самара,<br />
Пенза улосъёсысь птицефабрикаосын. Ӵапак<br />
отысь ик дорамы вуэмын ярантэм сӥль но.<br />
Городысь муниципальной милиция полицейскойёсын<br />
ӵош али нимысьтыз ортчо на вуз<br />
карон интыосты, эскеронъёс пыр потымтэ сӥль<br />
ӝажыос вылэ медаз вуы шуыса.<br />
КЕЗ<br />
Яратоно анай кыл<br />
Туэ 3-тӥ ползэ ёросын ортчиз<br />
«Яратоно удмурт кыл» фестиваль.<br />
Элькунысьтымы пӧртэм<br />
ёросъёсысь 47 мурт отчы<br />
люкаськылӥз, со пӧлысь 20-ез - нылпиос. Ваньзы<br />
дышетӥзы удмурт кылэз, нимаз группаосын<br />
- пичи нылпиос, школьникъёс, удмурт кылэз<br />
ляб тодӥсьёс, анай кылын умой вераськисьёс.<br />
Курсъёсы озьы ик пыриськизы тодосчиос.<br />
Фестивальлэн программаез туж тунсыко<br />
вал, шуизы отчы пыриськемъёс. Удмурт кыл<br />
сярысь сяна, тодӥзы фин-угор эсперанто, чуваш,<br />
Кам сьӧрысь удмуртъёслэн диалектъёссы<br />
сярысь. Эшшо вуылӥзы Шарканысь «Быг-быг»<br />
но Кулигаысь старообрядецъёслэн культуразылы<br />
сӥзем «Истоки. Какие Мы» фестивальёсы.<br />
МОЖГА<br />
Кивалтӥсь быръемын<br />
Городлы выль йыр быръемын<br />
- Михаил Трофимов, та дырозь<br />
кивалтӥз Камбаркаысь химия ож<br />
тӥрлыкез быдтонъя предприятиен.<br />
М. Трофимовлэн кандидатураез пала дурбасьтэмзэ<br />
вераз город Думаысь 24 депутат<br />
пӧлысь 23-ез. Быръёнъёсы пыриськиз на Эгра<br />
муниципал кылдытэтлэн йырыз Олег Зонов,<br />
но со одӥг куара но ӧз люка.<br />
Городлы йыр быръён та рад 2-тӥзэ ортчиз<br />
ни. Нырысетӥ полаз депутатъёслэн мылкыдъёссы<br />
люкиськизы. Ваньмыз-ӧвӧлэз та интые 9<br />
мурт куриське вал, 2-тӥ туре потӥз 2-ез.<br />
ПИЧИ ПУРГА<br />
Нырысь ик кулэ сюрес<br />
«Калык фронт» огазеяськонлэн<br />
ёзчиосыз пумиськылӥзы<br />
Бигерпочинкаысь трос нылпиё<br />
семьяосын.<br />
5 ар талэсь азьло гуртысь<br />
трос нылпиё 48 семьяослы<br />
музъемъёс висъямын вал. Но та дыр куспын<br />
выль интые улыны огзы но ӧз выже. Угось туннэ<br />
но отын ӧвӧл сюресъёс, ву, газ. Кыскемын<br />
тыл гинэ.<br />
Гуртоослы нырысь ик сюрес кулэ, пе,<br />
лэсьтӥськон материалъёсты гинэ но нуллыны<br />
шугъяськоно угось. Пумиськонэ пыриськизы<br />
ёросысь кивалтӥсьёс но. Озьы ёрослэн йырыз<br />
Сергей Юрин оскытӥз: 1-тӥ августозь сюрес<br />
кузя грейдерен ортчозы но зор вуэз ӧръяны<br />
канаваос лэсьтозы.<br />
УВА<br />
Вырйылэз адӟыны дырты<br />
3-тӥ арзэ ёросысь культура<br />
удысын ужасьёс тыршо туризмез<br />
азинтыны. Туризмъя отделлэн<br />
кивалтӥсез Антонида Пермякова<br />
верамъя, районын али 7 маршрут кылдытэмын.<br />
Тужгес трос куноосты пумита Булайысь удмурт<br />
культурая центр. Солэн нимыз но туж<br />
кырӟась - «Дауръёсты улӟытӥсь корка». Алигес<br />
отын куноязы Москваысь но Нидерландыысь<br />
воргоронъёс. Татын ортчытэм мастер-классъёс<br />
но, пӧрам табань но сокем кельшизы - эшъёссэс<br />
кунояны келялом шуыса оскытӥзы.<br />
Быдэс ар ӵоже ёросысь маршрутъёсын тодматско<br />
школаын дышетскись пиналъёс. Соос<br />
понна тунсыко луэ Чекан черкогуртысь дунчылкыт<br />
Троицалэн ошмесэз. Татын ик Ува ёрослэн<br />
тужгес вылӥ интыез - Эрестемской вырйыл.<br />
ЭГРА<br />
Чумойёс<br />
шулдыръяськизы<br />
Чумойын пусйизы черкогуртсылэсь<br />
340 ар тырмонзэ.<br />
Туннэ гуртын ог 150 улӥсез<br />
кылемын, кылем арын воксё<br />
2 пинал гинэ вордскиз, шуизы<br />
Мужбер муниципал кылдытэтын. Но гурт быронлы<br />
уг сётӥськы. Юбилейзэс но туж мыло-кыдо<br />
пусйизы, трос куноос ӧтчазы. Эсьма, Москваысь<br />
гинэ ӧвӧл, Австралиысь но адямиос вуылӥзы.<br />
Тодэ вайизы ортчемзэ: 1897-тӥ арын переписья<br />
гуртын 40 корка вылэм - кытын, кызьы<br />
соос сылӥзы, нимысьтыз макет лэсьтэмын вал.<br />
Лумбыт чузъяськизы кырӟан-эктон гуръёс, пуртыын<br />
пӧзиз чорыг лым, гурын пыжиз табань.<br />
ЯР<br />
Кибашлыослэн азбарзы<br />
Ёрос центрын улӥсьёс туж<br />
ярато тымет дуразы шутэтскыны.<br />
Татын ортчыло тросэз ёрос ужрадъёс.<br />
Кылем арын гинэ отын кылдӥзы беседкаос,<br />
ӝӧк-пуконъёс. Нош табере асьсэлэсь азбарзэс<br />
отчы усьтоно кариськизы киужъёсъя<br />
ёрос центрын ужасьёс но. Та вакытэ липетсэ<br />
лэсьтӥськом ни, шуиз центрен кивалтӥсь<br />
Ольга Перминова. Котькыӵе куазен отын вуз<br />
каронъёс-ярмаркаос, мастер-классъёс ортчытъяны<br />
мед луоз, пе. Нош киужъёсын тунсыкъяськисьёс<br />
ёросын берло дыре тросгес но<br />
тросгес луо. Мастер-классъёсазы нылпиос<br />
но, мӧйыос но мыло-кыдо пырисько - дышетско<br />
пужыятӥськыны, керттӥськыны, туйлэсь,<br />
бадьпу ньӧрлэсь арбериос лэсьтыны но мукет.