jamhuri ya muungano wa tanzania - Ministry of Livestock and ...

Aidha, viwango vya ulaji wa mazao ya mifugo kwa sasa ni wastani wa kilo 12
za nyama, lita 44 za maziwa na mayai 75 kwa mtu kwa mwaka. Ulaji huu
bado ni mdogo ikilinganishwa na viwango vya Shirika la Chakula na Kilimo la
Umoja wa Mataifa (FAO) vya kilo 50 za nyama, lita 200 za maziwa na mayai
300 kwa mtu kwa mwaka. Katika mwaka 2010, sekta ya mifugo ilikua kwa
asilimia 3.4 ikilinganishwa na asilimia 2.3 mwaka 2009 na kuchangia asilimia
3.8 katika pato la Taifa ikilinganishwa na asilimia 4.0 mwaka 2009.
9. Mheshimiwa Spika, nchi yetu inayo maeneo mengi ya uvuvi, ikiwa ni
pamoja na kilometa za mraba 64,000 za ukanda wa bahari, kilometa za
mraba 223,000 za Bahari Kuu, maziwa makuu ya Victoria (kilometa za mraba
35,088), Tanganyika (kilometa za mraba 13,489) na Nyasa (kilometa za
mraba 5,700). Pia, yapo maziwa ya kati na madogo 29 na mabwawa
19,039. Kutokana na utafiti uliofanywa na Taasisi ya Utafiti wa Uvuvi nchini
(TAFIRI) mwaka 2009, kiasi cha samaki kilichopo katika maziwa makubwa ni
takriban tani 2,914,296 (Ziwa Victoria tani 2,451,296, Ziwa Tanganyika tani
295,000 na Ziwa Nyasa tani 168,000). Katika mwaka 2010, sekta ya uvuvi
ilikua kwa asilimia 1.5 ikilinganishwa na asilimia 2.7 mwaka 2009 na
kuchangia asilimia 1.4 katika pato la Taifa kama ilivyokuwa mwaka 2009.
Aidha, ulaji wa mazao ya uvuvi kwa mtu kwa mwaka ni kilo 8.0 ikilinganishwa
na kilo 10.7 zinazopendekezwa na FAO.
10. Mheshimiwa Spika, sekta za mifugo na uvuvi kwa kipindi cha mwaka
2010/2011 zimeendelea kukabiliwa na changamoto mbalimbali ikiwa ni
pamoja na:-
(i) Kuainisha, kupima, kumilikisha na kuendeleza maeneo ya ufugaji
endelevu ili kudhibiti kuhamahama, kupunguza migogoro baina ya
wafugaji na watumiaji wengine wa ardhi, kupunguza uharibifu wa
mazingira na kuzuia kuenea kwa magonjwa ya mifugo;
(ii) Kuwa na wataalam wa kutosha kukidhi mahitaji ya sekta za mifugo na
uvuvi;
(iii) Kuongeza uwekezaji katika sekta za mifugo na uvuvi ili kuongeza
uzalishaji, tija na thamani ya mazao ya mifugo na uvuvi;
(iv) Kudhibiti magonjwa mbalimbali ya mifugo, hususan ya milipuko;
(v) Kupatikana kwa mikopo yenye masharti nafuu kwa ufugaji na uvuvi;
(vi) Kupatikana kwa pembejeo na zana za gharama nafuu kwa ajili ya
ufugaji na uvuvi;
(vii) Kupatikana kwa soko la uhakika la mazao ya mifugo na uvuvi;
(viii) Kudhibiti uvuvi na biashara haramu ya samaki na mazao ya uvuvi;
(ix) Kuwa na rasilimali fedha ya kutosha kukidhi mahitaji ya sekta za mifugo
na uvuvi; na
(x) Upatikanaji wa elimu na teknolojia pamoja na matumizi ya teknolojia za
kisasa kwa wafugaji na wavuvi.
4