Genero, nazio eta nazio hezkuntza: ikastoletako ... - Euskara

Feminismoak Soziologiari egindako ekarpenak 21
1.2.- 1960ko hamarkadatik aurrera ikertzaile feministek eginiko kritikak,
berrikuntzak eta ekarpenak.
Hamarkada honetan hasi eta egun arte, literatura feminista oso ugaria izan da;
era berean, azterketa gaiak biderkatu egin dira: emakumearen egoera, instituzio
ekonomikoetan, familiarretan, legaletan, politikoetan, akademikoetan eta
erlijiosoetan; sexualitatea; amatasuna; etxeko-lana; alarguntsa; dibortzioa;
emakumeen bizitza-zikloko urratsak; emakumeen aurkako bortizkeria;
emakumeen bizitzei buruzko ikerketa historiko eta konparatiboak ..., eta abar.
Horretaz gain, literatura feministak epistemologia eta metodologiako gaiak
jorratzen ditu, gehien bat, biak soziologi korronte nagusiari egindako kritika
barne hartuz eta ikuspegi filosofiko eta metodologiko alternatiboak planteatuz.
Oraingo honetan, batez ere, izkribu horien guztien artean, soziologi korronte
nagusian zenbait akats identifikatu dituzten idazkiez arduratuko gara. Kasu
batzuetan, ikertzaile feministek arlo teoriko esanguratsuak azalarazi dituzte, eta
lehenago soziologian ikustezinak ziren gaiak harrotu. Horietako bat da,
adibidez, generoaren mailaketa-sistema mantentzen eta birsortzen duen
mekanismo sozialen sare konplexua. Orain, ordea, gauza onartua da mekanismo
horiek aurki ditzakegula, bai sexuen arteko elkarrekintza sozialen arauetan, bai
kontrol instituzionaletan eta baita azkenekoz, bortizkerian bertan ere.
Era berean, urriak ziren gizarte-klaseen edo beste ezberdintasunen edo nazioen
arteko ikerketa konparatiboak, hauek ere genero-mailaketan oinarrituriko
ezberdintasunen berri eman baitezekate.
Soziologi korronte nagusiari zegozkion beste akats batzuk ez zetozen gai zehatz
batzuk ez ezagutzeagatik, kritikarik egin gabe beste batzuk onartzeagatik baizik.
Emakumezko eta gizonezko nortasunen estereotipo tradizionalak
zalantzagabeko legez ikusiak izan ziren denbora luzez. Horrela, giza portaeran
zeuden sexu ezberdintasunak estereotipo horiekin bat zetozenez, soziologoen
jakinmina ez zen iratzartzen.
Ikerketa feminista batzuek, ordea, azalpenak bilatzeko asmotan, gizarteegituraren
ezberdintasunetara zuzentzen zituzten beren ahalegin teorikoak,
emaitza hobeak lortuz.