Genero, nazio eta nazio hezkuntza: ikastoletako ... - Euskara

38 Genero Soziologiaren ildotik
a) Generoari buruzko jorraketa funtzionalista.
Familiari buruzko soziologia funtzionalistan, Parsonsek, familia nuklear
tradizionalaren baitan, honako genero-banaketa hau ezarri zuen: 'rol
adierazkorrak' (emakumezkoei dagozkienak) eta 'rol instrumentalak'
(gizonezkoei dagozkienak). Parsonsek, familiari eta generoari buruz egindako
azterketan, gizarteratze-funtzioa azpimarratzen zuen, ordena sozialaren
funtzionamendu armoniotsurako funtsezkotzat joz. Arazo hori lantzeko era
horrek genero-soziologian eragin handia izan du, oinarrizko kontzeptu batzuen
garapena bultzatuz, (esaterako, sexu rolen hizkera), sinesmenak sortuz,
(generoa familiarekiko beste instituzioekiko baino askoz garrantzitsuago dela),
eta generoari buruzko gaiak ugalketa eta iraupen sozialarekin harremanetan
daudela baieztatuz.
Egungo ikertzaile feministak laster ohartu dira generoa ulertzeko
funtzionalismoak dituen eraginez eta mugez. Lan askok Parsonsen lana
kritikatu zuten(horien artean, 1963an, Betty Friedanen20 , The functionalist
freeze. Honek Parsonsi emakumeen zapalkuntza legitimatzea eta emakumea
familiaren baitan egotera kondenatzea leporatzen dio). Hala ere, soziologia
feminista askok rolen hizkera hartzen du (sexu rolak, 'gizonezkoen rola',
'emakumezkoen rola'), eta sexu-rolen gizarteratze-prozesua azpimarratzen du.
Generoaren azterketarako hurbilketa horren azpian, sustrai funtzionalistak
daude: kontsentsua, egonkortasuna eta jarraipena.
Horretaz gain, 'rol' kontzeptuak, egitura sozialean baino gehiago
gizabanakoengan jartzen du arreta, horrela, emakumezkoen eta gizonezkoen
rolak osagarriak bailiran ikusiz; eta, aldi berean, despolitizatu egiten dira. 'Rol'
kontzeptuak bereizi egiten du esperientzia bere testuinguru historiko eta
politikotik; ukatu egiten ditu botere eta gatazkari buruzko kontuak.
Soziologoek, 'klase rolaz' edo 'arraza rolaz' ez dute hitz egiten. Eta, zer esanik
ez, oso esanguratsua da jarrera hori.
Sinesmen funtzionalista hauek soziologiaren oinarrizko sinesmenak eraldatzeko
egin diren saio feministak eragotzi dituzte.
b) Generoa aldagai gisa.