HISTOIRE JOURNALIERE D'HONORAT DE VALBELLE (1498-1539 ...

pluspart fon morto en XV jors, et fon si enpetuosso ladicto pesto que femas, vielz et joves, homes
de catre vins et nonanto, ans y morien. Diéu per sa missericordie lur vuelhe pardonar lurs tors et
deffalences!
L'an 1508 fon iterat mortalitat en Marssilha.
L'an que desus, lo rey Loys de Franso 12e pres à sa man Avignon et toto la contat de Venissia et si
pres à sa man la temporalitat de la badio de Sanct Victor de Marssilha, et si commenset uno grando
gerro (sic) entre lo papa Julio, l'Emperador et plusors autres aderens de una part contro lo rey Loys
de Franso et lo rey d'Espanho de l'altro part. Diéu per sa missericordia i mande bono pas! Et d'aqui à
petit de tenpus, lo Rey retornet Avignon et lo contat al papo et la temporalitat à l'abat de Sanct
Victor.
L'an que desus, mori lo sr Ludovic dit lo Moro, que avès ausit davant, loqual ero prissonnier en
Franso et en lo castel de Loches.
L'an 1508 de la nativitat et del mes de febrier, et ung dimenche, mori monsr Palamide Forbin, sr de
Soliès, en Aixs et fon sebelit al convent de la Observanso de la dicto cieutat. Diéu per sa
misericordia li perdone sos pecas! El fon home de grant sens et auctoritat, como de estre governador
de Provenso et autres preminensos grandos.
L'an que desus et lo jort 21 de septenbre, que fon lo jort de Sanct Mathiéu, monsr Anthoni, evesque
de Marssilha, pres sa possetion en Marssilha en la grando glyso dicho la Major, et puis anet lojar en
sa mysson de l'Evescat. Et à sa vengudo, li fon facho grando honor. Et devès saber que lo dimanche
après et fes l'ofissi à la Major, et après l'offisi, fes ung bel sermon et lo diluns anet vissitar la
gleysso de las Acollos, et la visito facho sermonet; de que fon fort lausat de tot lo pobol. Los
comensamens son extas bons, Diéu per sa graci vuelhe que la fin sia parelho!
L'an que desus et lo jort 26 de septenbre, aribet aysi Mgr lo cardinal de Narbono, nebot de Mgr lo
legat de Franso, accompanhat de Monsr d'Arles, de monsr de Vense, del visconte de Ralhano, del
governador d’Yero, et aysi demoret dos jors, et puis si enbarquet sus las galeros de Prejan et anet à
Romo.
L'an que desus et à 5 de novembre, venguet aysi monsr Peire Filhol, archevesque d’Aixs,
luochtenent de governador, loqual tenguet l'audienso en la Lojo et aqui aguet belcop de
supplications, et lo dimecres après s’en partit.
L'an 1509, fon facho l'alianso entre lo papo Julli segond et lo rey Loye 12e rey de Franso,
l’Enperador d'Alamanho, rey de Ongrio et d'Espanha, rey d'Englaterro et duch de Savoia, et
generalment tos los prinses des Crestians, et aquo contra los Venissians, per rasson et causo de las
terros et senhorias que ocupavan losdis Venissians as princes desus nomas et mais à plusors autres,
de que mi tayssi per non estre prolis.
L'an que desus, vengueron los mestres de l’artitharia del rey de Franso en Marssilha, aqui tant ettos
que ung appellat mestre Patrie, local peravant avia fach la grosso pesso de bronso per la cieutat et
plusors autros pessos de grando vallor quomo si podon vesser; tos ensenble ferron d’artilharia per lo
Rey de bronso en grando cantitat.
L'an que desus et à 18 de aprilh, aribet aysi lo duc de Albanyo accompanhat de plusors sors et gens
de guerro.