HISTOIRE JOURNALIERE D'HONORAT DE VALBELLE (1498-1539 ...

l’agueron, un home de Marssilha appellat Matthiéu Andriéu lo pres per los pès davant tot lo pobol,
disent à auto vois,: — Vès aysi lou tradidor que tant avàs cercat!
Et aduncos lodich pobol que aqui ero assemblat comenceron de cridar, disent: — Morro-lo traydor!
"
Et ausent lodich Carle Gassin aquel crit, si mes à jenoux subre la porto de ladicto gleyso que es la
torre basso, et aqui cridavo: — Misericordia, messieurs!
Et aquo dict lo dissenderon tot en gipon anbé dos siris allumas, et como va venir Janon Ricaut que
per adunc ero, capitani et li mes las armos del Rey desubre, et lo comenseron de menar deforo de
ladicto gleyso, et encontinent que fon en la plasso de ladicto gleyso, lo comenseron de batre anbé
bastons, cotelx, et à forso l’emeneron, fasent un brut si très grant que non es home que lo poguesso
pensar si non l'avié vist. Et per venir à la fin de so qu'es comensat, devès saber que quant aquellos
que lo menavon foron al premier canton, exatament devant la mayson de ung canonge appellat
monsr Tassin, lo fon si grande multitudo de pobol aldict canton que per res non pogueron passar; et
vesent que non podien passar, lo tiraxon à la monthado, et quant et fon en lo canton Sobeyran qui
tyra à la font de Rodel, aqui ly foron donas plusors cops mortals, car el tombet plusors vegados en
lasquallos li foron donas losdichs cops mortals, et nonhobstant tos los cops, lo meneron à la valado,
semi mortuus; et quant foron davant la mayson Domergue Seguier, non podié plus; et vesent aquo
lo meron entre ladicto maysan que per aquel tempus eron enemis mortals lodict Domergue Seguier
et lodict Carle Gassin. Et d'aqui lo traymuderon et lo meron en la mayson del rey d'armos et al bas
de ladicto mayson, subre une taullo rendet l’esperit à Diéu. Plassa li, depuis que lo corps a patit tant
de martiri, que l'arma sié en la glorio del Paradix, amen! Et mort que fon, lo porteron en sa mayson,
et l'endeman fon sebelit honestament entre la gleyso de las Aquollas. Et plassa à Diéu que per
aquesta dissention, lodict Carle Gassin sia lo redié mort!
EIPLICIT PASSIO CAROLLI CASSINI
L'an 1494, lo rey Carles, filh de Loys de valois, rey de Franso,” passet los mons d'Italie, per anar
conquestar lo rialme de Naples, laquallo causo el acomplit à son voler, car et passet en Italie sensa
contradict et fes pax anbé papa Alexandre VIe et aguet sa benediction, et puis fon coronat rey de
Naples, et Ferrando et lo guercho, filh de Ferrando que si disié estre rey deldich rialme de Naples,
fugit en Sicilla sensa far neguna contradiction et lodict rey Cartes restet pacifich deldict rialme de
Naples. Et d'aqui à petit de jors deliberet de s'en retornar en son rialme de Franso et laiset son
luoctenent monsr de Montpansier, que ero de sanch rial.
Et en s'en retornant, lo duc de Millan, Venesians, rey d'Espanhe, lo Papa feron una assemblado de
ben LX mille combatens per prendre lodict rey Cartes, loqual non avié sa compagnie plus haut de X
mille cornbatens; mis lo fau dire lo dict del sage que dis: non in multitudine militum sed in virtute
paucorum jacet victoria; et ossi ben à l'esemple de Judas Macabeus, lodict rey Cartes de Valois anbé
sa companye si portet valhament que en un luoc appellat Fornovo rencontreron losdis Italians et si
noblamnt si porteron losdis Francés que romperon losdis Italians, et una grando partido en tueron et
los autres si meron en fuito en talo fayson que l'honor de la jornado demouret al noble rey Cartes de
Franso et à sa companie. Et d'aqui anet delieurar lo duc d'Orleans, loqual ero assiegat dintre
Novayre. Et aquo fach, s'en retornet en son rialme de Franso à grando joye et honor.
L’an 1496 et à 5 de julh, arribet en las illos de Marssilha l'armado del rey d'Espanho, Venecians,
Genoveces et fin autres, en que avié 4 caracos et barchos et galleros et plusors autres navilles; et
essent ellos aqui, ung capitani de Marssilha appellat Domengue, loqual avié uno barque, venit en
pillage et encapitet entre lurs mans, loqual non poguet scapar et si fes grando deffenso; enfin fon
pres et pendut, et tot Marssilha lo balhet à sa molhe appellado Gradiero, laquallo lo fes ensebelir.
Diéu li perdon!