HISTOIRE JOURNALIERE D'HONORAT DE VALBELLE (1498-1539 ...

Et primo, l'an 1423 et lo jort 24 de novembre, que fon jort dissate, la vigilla de Sancta Catharina,
fon destrucha la cieutat de Marseilha, et aquo per lo rey Alphonso, rey d’Aragon; et per aquel
tenpus conte de Provenso et segnor de Marssilha ero lo rey Loys III, fraire del rey Raynier, de la
casso d'Ango; et en aquello destruction fon raubat lo cap de Sanct Loys et portat en Valenci la
Grant.
L'an 1454, fon presso la noble cieutat de Constantinoble, et aquo per lo grant Turc, anbé lo
tradiment que fes à la noble cieutat ung genovés, al qual lo Turc avia promes de lo far rey de la
dicta cieutat, et per li attendre à sa promesso, lo fes rey tres jors, et lo cart jort li fes talhar la testo; et
ansi volentiés enpren à traydos.
L'an 1464, et à 14 d'avoust, venguet la crosado en Marssilha, en esperanso de passar la mr contra los
Infidels; et eron de nombre environ 25 mille, capitani general de ladicto amado un bastart del duc
Philippes de Borgonho appellat Anthoni; mais como fon la volontat de Diéu, mortalitat li
subrevenguet si crudello que la pluspart morit de la pesto, et l'autro s’en retournet en lur païs, sensa
far autro causo.
L'an 1470, à 4 de julh, fon destrucho la cieutat de Negrapont, et aquo per lo grant Turc, loqual y
menet quatre cens mille combatens, et la cieutat presso et la guerro finido, foron trobas mors des
Turcs 42 mille et de Chrestians 30 mille.
L'an 1477, morit lo duc de Borgonho appelat Charles davant Nansi en Loreno, et aquo en aspro
batalho.
L’an 1480, mori lo bon rey Reynier, conte de Provenso, et mori en la cieutat d’Aix, et son corps fon
portat en Ango sevelir, ainsin que el ho avia laysat.
L'an 1481, et lo 25 de novembre, mori lo rey Charles, conte de Provenso, après plusors guerros que
avia agut contra lo duc de Lorrena et sertans segnors barons de Provenso, como lo baron de Saut et
plusors altres, losquals non li volian far omage como era causo degudo à el, tant como heritier
universal de son oncle, lo rey Reynier, car el ero filh de Charle, conte de Mayne, frayre del dich
Raynier, et los dichs barons tenian la partido del duc de Lorreno, loqual ero filh de la filho del dich
Raynier; mais anbé l'ajudo que li fes lo rey Loys XI, rey de Franso, el venset sos enemis et restet
pacific del dich contat de Provenso et generalament en tos los drechs que podia aver lo devant dich
son oncle Raynier en tos los autres païs et terras que avia; mais la mort que à tos es comuna et
negun non expargno, como fon lo plaser del Creator, el mori lo jort subredich, et en el finit la
generation de la casso d'Ango que tant nobla ero et si per long tenps avia triumphat sang masculino.
L'an 1482, venguet monsr Palamides Forbin, senhor de Soliés, de par lo rey Loys XI, rey de Franso
per pendre (sic) la possession per lo Rey del contat de Provenso, al qual fon facho, toto obedienso et
grando honor, et demoret governador general del contat; et son gendre, appelat monsr de Faucon
fon senechal del dich païs et son filh, appelat Loys Forbin, fon juge mage.
L'an 1484, et 10 10 e jort de may, fon destrucho la jutaria d'Arle, et aquo per los forestiés como
Figons, Dauphinens, Auvernhas et autres que eron vengus en ladicto cieutat per far las meissons, et
rauberon tota la despulha de ladicha jutaria.
L’an 1492 et lo 20 e de octobre, si mudet lo conselh de Marssilha de 48, loquail avia durat environ
de 17 ans et avia extat hordenat per Juhan Coyso, per adunquos senechal de Provenso, et fon mudat
lodich conselh per monsr Aymar de Pittavia, senechal de Provenso, et fon ordenat que fosson 72 de
conselh.