Aiako Harria Parke Naturaleko (Gipuzkoa) interes bereziko landare ...

• Kokapenen mapa digitalak: 2001.eko ortofotoak 1:10.000 eskalan erabiliz, populazio bakoitzaren
kokapena zehaztu eta ondoren digitalizatu egin da (ArcView 3.1). Halaber, datu-base dinamiko
bat eraiki dugu Access-en datu geoerreferentziatuen kudeaketa eraginkorrerako.
2.5.2. Okupazio-azalera eta zentsua
Landare honen aleak ez dira errazak definitzen, ez baita argi ikusten banakoa non hasi eta non
bukatzen den. Horregatik unitate gisa, banakoen sail edota orban diskretuak hartu dira kontutan eta hauek
erabili dira zentsua egiteko orduan. Zenbaketa egin ondoren 1:5000 eskalako mapan kokatu dira.
D. cneorum muluaren banakoek sail edo orban diskretuak (ingelesezko "patch") eratzen dituzte
hazten diren lekuan eta horiek zenbatu ziren zentsuan. Iritsi ezinak ziren tokietako sailen kontaketa
prismatikoen laguntzaz egin zen. Okupazio-azalera kalkulatzeko 50 m-tako zinta metrikoa erabili da.
2.5.3. Habitat karakterizazioa
Alde batetik, populazio edo gune bakoitzaren habitata zehazki karakterizatu da ondoko
ezaugarrietan oinarrituz: altitudea, malda, orientazioa, substratu geologikoa, lurzoru-mota, landaredi-mota,
ingurunearen dinamika edota perturbazio-mota, eta landare laguntzaileak. Zenbait datu mendian bertan
jaso dira, beste batzuk aldiz mapa tematiko digitaletatik lortu dira; Arcview 3.1 aplikazio informatikoa
erabiliz, populazioen kokapen-mapa digitala eraiki da eta mapa tematiko digital desberdinekin gurutzatuz
(geologikoa, lurzoruena, landarediarena, etab.) habitataren inguruko informazio zehatza lortu dugu.
Bestetik, espezie honek otearekin duen erlazioa aztertzeko, otearen estaldura kalkulatu zen
puntuen metodoa erabiliz. Horretarako azaroan 6 eremu lagindu ziren: D. cneorum agertzen zen hirutan
(Arbiun, Erlaitz eta Pagogañako soroa) eta agertzen ez zen beste hirutan (Deskansa, Erlaitz eta
Pagogañako soroa). Bakoitzean, 20m-ko 10 trantsektu egin ziren euren artean 4 m-ko distantzia zutela
eta trantsektu bakoitzean 10 cm-naka begiratu zen landaredia. Lau taldetan banatu ziren: Daphne
cneorum, otea, txilarra eta larrea.
2.5.4. Ugal arrakasta
D. cneorum-en ugal arrakastaren jarraipena egiteko maiatzan, 10 sorta aukeratu ziren: 5 Erlaitzen
eta beste 5 Pagogañako-soroan. Sorta bakoitzean, adartxo guztiak kontatu eta haietako 10 markatu
ziren. Markaketa egiteko plastikozko tira batzuk dimoaz etiketatu ziren eta pitarekin lotu adartxora.
Adartxo bakoitzeko lore-kopurua zenbatu zen eta asteroko jarraipena egin zen fruitua garatu arte
(ekainaren bigarren asterarte).
2.5.5. Arrisku-faktoreen identifikazioa
Populazio bakoitzaren kasuan, gaur egun dauden nahiz potentzialki gerta daitezkeen arriskufaktore
garrantzitsuenak identifikatu dira horretarako bereziki diseinatu diren fitxak erabiliz.
18