Aiako Harria Parke Naturaleko (Gipuzkoa) interes bereziko landare ...

ESKERRONAK
Gure eskerrik beroenak Ibai Olariaga, Inazio Garin, Maite Gartzia, Karlos Aseginolaza eta Iñaki
Aizpururi lan honen atal desberdinetan beraien ezinbesteko laguntza eskaintzeagatik.
LABURPENA
Lan honetan, Gipuzkoako Aiako Harria Parke Naturalean dauden interes bereziko zortzi
landare-espezieren korologia eta ekologia aztertu dugu: horietatik hiru harkaitz silizeoen
arrailduretan bizi dira (Petrocoptis pyrenaica, Asplenium septentrionale eta Huperzia selago);
gainerako lauak errekasto, iturburu eta ur-jausien inguruan (Soldanella villosa, Saxifraga clusii,
Hymenophyllum tunbrigense eta Trichomanes speciosum) eta azkenik Daphne cneorum larreotadi
irekietan.
Emaitzek (bai berrikuspen bibliografikoetatik, eta bai mendiko lanetik lorturikoek) adierazi
dutenez, harkaitz silizeotako hiru espezieen egungo kontserbazio-egoera parkean ona da eta ez
da arrisku-faktore aipagarririk identifikatu. Hortaz, egoerak ona izaten jarraitu dezan, bost urtetik
behineko monitorizazioa eta aleen bilketa debekatzea gomendatu dugu, populazioen egoeraren
jarraipen sistematikoa burutzeko. Zoritxarrez, ezin esan dezakegu gauza bera gainerako
espezieei dagokienez, izan ere Oiartzungo errekastoetan bizi diren S. villosa eta S. clusii egoera
zaurgarrian daude, H. tunbrigense egoera larrian eta T. speciosum egoera oso larrian. Espezie
guzti hauetarako mehatxu-faktore garrantzitsuena baso-ustiaketa eta berorrek dakartzan ondorio
guztiak dira, eta beraz, espezie horiek daudeneko errekasto-eremuen erabateko babesa
gomendatu dugu, bai eta hiru urtetik behineko monitorizazio eta populazioen berrikuspena eta
aleen bilketa debekatzea. T. speciosum iratzearen kasuan gainera, miaketa fin eta zehatzaren
premia azpimarrartu dugu populazio bakarra aurkitu baita. Azkenik, Irungo larre-otadi irekietan
bizi den D. cneorum espeziearen egoera zaurgarria da: sistema extentsiboan larratzen duen
abeltzaintzak onurak ekartzen badizkio ere, bi arrisku-faktore garrantzitsu identifikatu ditugu:
larreen hobekuntza-jarduerak eta loreen bilketa (giza predazioa), eta hortaz hauek dira gure
gomendioak: espeziea bizi deneko eremuetan panel informatiboak jartzea, aleen eta bereziki
loreen bilketa debekatzea (edo ahal den neurrian kontrolatzea) eta larreen hobekuntza-jarduerak
galeraztea. Halaber, kudeaketa-eremuak definitu dira bakoitzerako gomendio zehatzak emanez.
Amaitzeko, hezeguneetan topaturiko dibertsitate-maila altua azpimarratu nahi dugu, eta hortaz
beren kontserbazioa bermatzea eskatu dugu, tokian tokiko baldintzak kontutan hartuz.
Gako-hitzak: floraren espezie mehatxatuak, hezeguneak, okupazio-azalera, populazio-tamaina,
habitata, arrisku-faktoreak, kontserbazioa, kudeaketa, Aiako Harria, babesgunea.
4