Strolic Furlan 2013 - Circolo AStrofili Talmassons

A son disponibii altris telescopis di doprâ difûr
dal osservatori in câs di seradis organizadis par
ocasions di eclìs di Lune, passaç di Cometis o altris
spetacui dal Cîl che a clamin dongje tante int. Inte
sale di control tacade de cupule a son i calcoladôrs
che a vegnin doprâts ancje par mostrâur ai
visitadôrs lis posizions e i moviments dai Planets,
des Cometis e di dut ce che no si pues viodi
diretementri cul telescopi.
Difûr si use cjalâ il Cîl cence strumentazion, a
voli crot come che si dîs, par rimirâ la forme des
Costelazions, i Planets, cualchi Comete, lis Meteoris
e ancje cualchi satelit artificiâl come la I.S.S., la
Stazion Spaziâl Internazionâl, che e fâs un zîr ator
de Tiere ogni novante minûts e mieç e e pues puartâ
fin a sîs astronautis che a fasin esperiments
sientifics; si sint un grant ingropament a pensâ che
li parsore a son sîs personis che a lavorin pe sience
e duncje par noaltris, e che si dan il cambi dome
dopo sîs mês di permanence intal spazi.
I passionâts di meteorologjie a puedin vê a
man une stazion che e misure, e regjistre
temperaduris, umiditât e ducj i parametris dal timp
atmosferic, tant che un al pues provâ a fâsi lis
previsions dal timp a cjase cence vê bisugne di
Bernacca.
Ancje un profan di astronomie che nol sepi
cemût passâ il timp al pues cjatâ interès e
divertiment a fâ une scjampade tal osservatori
imparant robis, se i ven a plasê, che dome cjalant
cui voi no si rivaran mai a viodi.
128
Osservatori “B. Zugna” di Prosec – Triest