Strolic Furlan 2013 - Circolo AStrofili Talmassons

par fâju mangjâ, par netâju e par puartâju a filâ prin di chei
di chês altris fameis dongje e cualchi volte o rivavin a fâje
e o vevin tante braure.
I cavalîrs no disturbavin plui di tant. A mangjavin cul
cjâf alt e fer, daspò vê durmît a cambiavin la piel e le
lassavin colâ par tiere a sdavàs, come che o fasevi jo cui
miei vistîts cuant che o levi a durmî. Si diseve che a
durmivin “de prime”, “de seconde”, “de tierce”, poiâts sui
gradiçs che, man a man che i cavalîrs a cressevin, si
scugnive incjastrâju un parsore chel altri fin a formâ un jet
a cjistiel di plui plans. Chescj viers dumiesteâts a podevin
ancje inmalâsi di dôs malatiis: “lâ in bigat” e “chê dal stuc”.
Mê none e veve simpri une grande pôre che lis sôs
besteutis i cumbinassin alc di stuart. Cu la prime, a
deventavin moi, scuasi trasparents e a mandavin fûr une
puce che ti ingomeave. Se al capitave chest brut fastili, i
puars nemaluts a vignivin butâts tal ledanâr. Cu la seconde
malatie, invezit, a deventavin blancs e dûrs e par eliminâju
si devin di mangjâ a lis gjalinis: in ogni mût dut al jere
pierdût. A Diu plasint, e cuant che i cavalîrs a vevin
completât il lôr cicli, si diseve che “a levin a filâ”. Si poiaviju
su des bachetis ben sutis, metudis come une tende
canadese e lôr, lant sù e cjatant il puest just, a scomençavin
a butâ fûr la bave par fâ lis bielissimis galetis zalis che nô,
daspò vêlis tiradis jù e netadis, lis puartavin inte filande di
Cividât par vendilis. Cussì e finive, par chel an, la stagjon
dai cavalîrs cu la sô industrie. Par sierâ dal dut chest lavôr,
ducj si cjatavin al “Gelobar” par lecâ un biel e bon gjelato,
e la none e restave a cjase a spietâ di contâ chei cuatri
carantans che a cjapavin cui cavalîrs e che a coventavin par
staronzâ lis jentradis di cjase nestre.
62
I cavalîrs