Strolic Furlan 2013 - Circolo AStrofili Talmassons

Stele, stelute
di Doris Minisini
“Dai mame , mi tornistu a contâ di cuant che o jeri
une stelute?” “Ma no sêstu inmò stufe di sintî e tornâ a
sintî cheste storiute?” o rispuint… Ma jê mi cjale cun
chei siei voi cussì grancj e cussì neris che mi rivin drets
fin tal cûr e mi fasin sintî un pôc in colpe par no vêle
contentade di corse e vê za tacât a contâi chê storiute
che i plâs cussì tant, ancje se, aromai, cun dutis lis voltis
che me à fate contâ, e varès di vêle imparade a
memorie. “Ven ca, piçulate, o scherçavi par fâti mateâ
un fregul….” E le cjapi pe man e le puarti di fûr a cjalâ
un moment il cîl che si slargje parsore di nô par che i
resti tai voi il disen di chei miârs e miârs di stelis che a
vivin là sù, po o jentrìn e si sentìn sul divan, une tacade
di chê altre, cu lis gjambis tiradis in grum, dopo vê
bandonadis lis çavatis sul paviment. E, strenzintle al cûr
cuntun braç, o tachi a contâ.
Fintremai cualchi an indaûr no savevi che lis stelis
che a lusin tal cîl a spietin dome cualchidun che si lassi
incjantâ e che lis fasi inamorâ. Mi è tocjade ancje a mi
cheste “robe”, no le conti par sintût a dî. Al steve par
tacâ l’invier ta chel an; lis seris a jerin za vonde fredis,
ma il cîl al jere dut un sflandôr, stelis grandis e piçulis
semenadis cence miserie tun prât neri tant che la pês.
Dopo vê cenât e sistemade la cusine o jessivi sul puiûl
e mi metevi a cjalâ chel spetacul, chê maravee cence
confins intant che o jeri dute imbacucade tal gno
157
Stele, stelute