A nanassa - Pane del cielo

Eduardo Scarpetta - ‘A Nanassa -
guajo.
ERRICO: Ma che guajo, scusate...
CESARE: Guè, che guajo? Ma te cride che sia na cosa de niente a scappà cu na
femmena mmaretata?
ERRICO: Mmaretata?
CESARE: Mmaretata, sì!... Capisce che lo marito te po’ fà na querela, e te l’ha da fà,
sarò io che ce l’impongo, ha da fà l’ommo si no che figura fa!
ERRICO: Ma vuje lo ssapite certo ch’è mmaretata?
CESARE: Certissimo! Si non era certo non te lo dicevo, e non me pigliavo tanta
collera... è mmaretata!
ERRICO: (Possibile! E m’avarria potuto ngannà de chesta manera!).
CESARE: E lo marito sai chi è?
ERRICO: Chi è?
CESARE: Ma però, rifliette chello che faje sà, pecché tu mò nce staje da sotto, chillo
te pò fà j ngalera! È mio nipote Felice.
ERRICO: Lo nepote vuosto?
CESARE: Già... lo quale ne so’ certo, mò sarrà juto a la quistura, pe se mettere in
regola, ma io cercherò di calmarlo.
ERRICO: (Perciò l’ata notte stevene dinto a la tratturia tutte e duje). Ah! Nfama
scellerata, m’ha fatto chesto pe se vendicà, pe me fà truvà dinto a nu mbruoglio.
CESARE: Ma se capisce, mio caro Errico, la femmena è terribile.
ERRICO: E da quanto tiempo s’ha spusato... lo nepote vuoste?
CESARE: So’ otto mise.
ERRICO: Da otto mise? Appena nce lassajeme.
CESARE: Tu mò, si vuò fà na cosa veramente da ommo, e te vuò levà la preta da
dinto a la scarpa, va la piglia e portela ccà. Si non nce vò venì, portala afforza,
quanno l’haje portata ccà, la consigne a lo marito e le dice: Restate qua, questo è il
vostro posto! Faje na bella figura, e sparagne nu guajo!
ERRICO: Sì dicite buono, vaco e torno subeto, non ve movite da ccà. (P.a.).
CESARE: Se capisce.
ERRICO (torna): Avite da dicere che io ajere mannaie a sfidà pure lo marito, lo
truvaje troppo buono, si era n’ato, m’avarrie pigliate a cauce!... Mò vengo, mò
vengo. (Via a destra.)
CESARE: Ma che cos’è la donna!... Guè, a proposito de donne, io vorria sapé pecché
chella vecchia aissera me consignaje chillo sorte de schiaffe, se pigliaje collera che
io chammaje sgualdrina la mogliera de Felice... e che le mportava a essa? Ma però
io sfucale co lo marito, le dette chillo panesiglio, me credevo che stammatina me
jeva trovanno per avere soddisfazione, e invece non s’è visto, ha da essere nu
carugnone qualunque. (A Ciccillo che esce.) Io aspetto dinto a stu salotto, quanno
se retira Felice me chiamme.
CICCILLO: Va bene. (Cesare via seconda a destra.) Favorite... favorite... (A
Gennarino) (Quant’è bello chisto!).
SCENA SECONDA
Gennarino e detto, poi Ciccillo e Clementina.
GENNARINO (elegantemente vestito in caricatura con buchè e bastone, esce):
43