tèks la - Potomitan

220
Planin familyal
Metòd “kontwòl Glè Sèvikal” la
Ak metòd sa a, nou dwe egzamine glè ki soti andedan vajen
nou. Pandan peryòd ovilasyon an, kò nou pwodui glè ki byen
mouye, pou jèm gason an ka antre san pwoblèm nan matris
nou. Konsa si, chak jou, nou egzamine glè ki soti nan vajen
nou, n ap konnen ki lè nou ka ansent. Konsa, n ap konnen pou
n pa fè lanmou lè sa a.
Kijan nou ka rekonèt lè nou ka ansent:
1. Pase dwèt nou oubyen yon moso papye
oubyen yon twal nan vajen nou.
2. Si n jwenn glè, pran enpe ak 2 dwèt nou.
Kijan nou wè l? Li mouye epi l glise? Li
sèch epi l kole?
Si glè a klè, mouye epi glise,
nou ka ansent
Si glè a tou blan, sèch epi kole nou pa
nan peryòd kote nou ka ansent
Kijan pou n suiv metòd “kontwòl glè sèvikal” la:
• Fòk nou pa fè lanmou lè kote nou wè oubyen nou santi n mouye. Oubyen
tou, si n santi nou pa ka kenbe, se pou n sèvi ak kapòt oubyen ak dyafram
san espèmisid (se sèl metòd ki pa chanje eta glè sèvikal la).
• Tann 4 jou apre dènye lè n te remake glè a te klè epi glise, anvan n fè
lanmou.
• Pa al fè lanmou lè n gen règ nou. Nou pa p ka konnen si pa gen yon ti chans
tou piti pou n ansent.
• Pa lave andedan vajen nou ti krik ti krak.
• Si n gen pwoblèm pou n rekonèt peryòd kote nou ka ansent nan, oubyen si
n trape yon enfeksyon nan vajen, se pou n chwazi yon lòt metòd planin.