Shkarko - Gjykata Kushtetuese

II Departamenti i Përkrahjes Profesionale (DPP)
Departamenti i Përkrahjes Profesionale është përgjegjës për ofrimin e shërbimeve
profesionale të përkthimit, redaktimit, lekturës dhe terminologjisë. Në vitin 2011, DPP
organizoi dhe procedoi përkthimin e rreth 23.000 faqeve të shkresave dhe dokumenteve të
ndryshme në shqip, serbisht, anglisht dhe turqisht. DPP po ashtu ofroi rreth 295 orë
përkthime të atypëratyshme në takimet e rregullta, në seancat e Gjykatës, në seancat
administrative, në intervistat e kandidatëve dhe në takimet e tjera.
Në bashkërenditje me DRLSA-në, DPP përgatiti dokumentacionin për mbledhjet e
gjyqtarëve dhe seancat dëgjimore. DPP bëri të mundshëm procedimin e lëndëve në gjuhën
shqipe, serbe dhe angleze. Në të njëjtën kohë, DPP kontribuoi në publikimin e vendimeve në
gjuhën shqipe, serbe, angleze dhe turke.
Me qëllim të ndërtimit të kapaciteteve lokale të përkthimit, DPP zbatoi metodat e përkrahjes
së drejtpërdrejtë dhe të bashkëpunimit të baraspeshuar me gjyqtarë, Njësinë Ligjore dhe
departamentet e tjera; DPP u përpoq ta përmirësonte dhe të ngrinte cilësinë e përkthimit
dhe të shërbimeve të tjera të përkrahjes profesionale me operatorë të jashtëm.
DPP kontribuoi në përmbylljen me sukses të dizajnimit dhe jetësimit të Librit të Identitetit të
Gjykatës Kushtetuese dhe në ridizajnimin e uebfaqes. Në përputhshmëri me Librin e
Identitetit të Gjykatës Kushtetuese, DPP ka përgatitur specifikimet teknike të produkteve për
punën e Gjykatës. DPP ka përgatitur udhëzimet për hartimin profesional të shkresave
zyrtare. DPP ka përgatitur testet profesionale dhe ka ndihmuar në rekrutimin e stafit
profesional të Njësisë së TIK-ut dhe Multimedieve.
DPP ka arritur këto rezultate:
• Standardizimin e shkresave zyrtare dhe të vendimeve;
• Shpërhapjen e ideve rreth hartimit të dokumenteve, me qëllim të zhdukjes së
gabimeve gjuhësore dhe terminologjike-juridike në dobi të sigurimit të
qëndrueshmërisë profesionale;
• Përafrimin e plotë terminologjik të teksteve të hartuara dhe të përkthyera me gjuhën
e ligjit.
Sfidat kryesore me të cilat DPP ballafaqohej ishin:
• Zhvillimi i vazhdueshëm drejt ngritjes dhe përparimit të kapaciteteve profesionale me
këmbim përvojash, që ka për qëllim përmirësimin dhe standardizimin e mëtejmë të
shërbimeve të shpejta, profesionale dhe cilësore;
• Mbështetja e plotë në softuerët automatikë për mospërsëritje të përkthimit;
• Rritja e efektshmërisë dhe vëllimit të punës cilësore; dhe
• Zvogëlimi i harxhimeve për përkthim.
17