Shkarko - Gjykata Kushtetuese

Fjala hyrëse nga Kryetari i Gjykatës Kushtetuese
Prof. dr. Enver Hasani
Kam nderin ta paraqes raportin vjetor të Gjykatës Kushtetuese të Republikës së Kosovës
edhe për vitin 2011. Ky raport është vazhdimësi e raporteve të mëparshme për vitet 2009 dhe
2010. Përsëri kam kënaqësinë ta njoftoj publikun që Gjykata Kushtetuese ka pasur edhe një
vit tjetër të suksesshëm dhe ia ka arritur ta ndërtojë dhe fitojë besimin e publikut. Ky sukses
është përsëri rezultat i punës së devotshme të kolegëve të mi gjyqtarë, Sekretares së
Përgjithshme dhe zyrtarëve të tjerë të Gjykatës. Dëshiroj t’i falënderoj të gjithë për
mbështetjen dhe përpjekjet e tyre të vazhdueshme që shpunë në suksesin e vazhdueshëm të
Gjykatës.
Gjatë vitit 2011, gjyqtarët e Gjykatës Kushtetuese vazhduan me vizita zyrtare në Gjykata të
vendeve të tjera për ta zgjeruar përvojën e Gjykatës dhe për të vendosur kontakte me
gjyqtarët dhe zyrtarët e atyre Gjykatave. Kjo, pa dyshim, do të shpjerë në zgjerimin e
mundësisë së Gjykatës për t’u marrë me sfida më të mëdha me të cilat do të përballet në të
ardhmen. Vendet që i vizituam në vitin 2011 janë: Shqipëria, Austria, Bullgaria, Estonia,
Holanda – Haga, Irlanda dhe Suedia.
Gjykata Kushtetuese nxori një sërë vendimesh të rëndësishme gjatë këtij viti. Shqyrtoi
kërkesën e parë të parashtruar nga Zyra e Avokatit të Popullit të Kosovës dhe, për herë të
parë, Gjykata vendosi që pjesë të ligjeve të caktuara, të miratuara nga Kuvendi i Kosovës, nuk
ishin në përputhje me Kushtetutën. Kjo u bë në përputhje me mandatin e Gjykatës
Kushtetuese, sipas nenit 112, si autoriteti përfundimtar për interpretimin e Kushtetutës së
Kosovës dhe përputhshmërisë së ligjeve me Kushtetutën.
Numri dhe shumëllojshmëria e kërkesave të tjera të shqyrtuara nga Gjykata Kushtetuese dhe
puna e departamenteve të Gjykatës përshkruhen në pjesën përkatëse të raportit.
Ceremonia solemne e Vitit të dytë Gjyqësor u mbajt më 20 tetor 2011. Këtë vit, në këtë
ceremoni morën pjesë kryetarët apo zëvendëskryetarët e gjykatave kushtetuese të Shqipërisë,
Kroacisë, Sllovenisë, Maqedonisë, Turqisë dhe Portugalisë.
Fjalimin kryesor në këtë ceremoni e mbajtën Kryetarja e Gjykatës Kushtetuese të Republikës
së Kroacisë, prof. dr. Jasna Omejec, dhe Zëvendëskryetari i Gjykatës Kushtetuese të
Republikës së Sllovenisë, mr. Miroslav Mozetič.
Puna e Gjykatës nuk do të mund të kryhej me një efikasitet të tillë pa ndihmën dhe
mbështetjen e një numri të madh të organeve. Për ndihmën e çmueshme që i kanë dhënë
Gjykatës dëshiroj posaçërisht t’i falënderoj: Institutin për Menaxhim Lindje-Perëndim
(EWMI), Departamentin e Mbretërisë së Bashkuar për Zhvillim Ndërkombëtar (DFID),
Agjencinë e SHBA-së për Zhvillim Ndërkombëtar (USAID), Zyrën Civile Ndërkombëtare
(ICO), Projektin për Reforma Ligjore të Agjencisë Gjermane për Bashkëpunim
Ndërkombëtar (GIZ), Qeverinë e Republikës Federale të Gjermanisë dhe Fondacionin
Gjerman për Bashkëpunim Ndërkombëtar Ligjor (Fondacionin IRZ).
Gjykata Kushtetuese angazhohet t’u ofrojë Republikës së Kosovës dhe qytetarëve të saj një
forum të besueshëm dhe të menaxhuar me profesionalizëm për zgjidhjen e kërkesave që i
janë parashtruar në mënyrë të ligjshme.
Prof. dr. Enver Hasani
Kryetar i Gjykatës Kushtetuese të Kosovës
3