opsomming van die verslag - Saps

Die Misdaadinligting Analisesentrum het gedurende 2001 ‘n dossier-analise gedoen van
huisrowe in die Oos-Kaap. Ongelukkig is moord- en verkragtingsake nie daarby ingesluit
nie. Die Komitee het 91 plaasaanvalle in die Oos-Kaap, wat meestal uit 2000 en 2001
dateer, ondersoek. Hierdie aanvalle het ooreengestem met die 66 huisrowe, wat ontleed is
deur MIAS. MIAS self het toe ook ‘n vergelykende studie tussen plaasaanvalle en
huisrowe in die Vrystaat, Limpopo, Mpumalanga en Noordwes gedoen.
Om hierdie vergelyking geldig te maak, is slegs plaasaanvalle gebruik, waar die
omstandighede dieselfde was as die huisrowe. Aangesien die ondersoek na huisrowe nie
moord- en verkragtingsake ingesluit het nie, is daardie aspekte ook nie in die ondersoek na
plaasaanvalle teenwoordig nie. Die uitslag van die vergelykende studie is as volg:
• Beide plaasaanvalle en huisrowe het redelik eweredig verspreid dwarsdeur die jaar
voorgekom. Op soortgelyke wyse mag hulle ook enige dag van die week voorkom.
Meer as die helfte van die plaasaanvalle, egter, het gedurende die dag plaasgevind,
teenoor tweederdes van die huisrowe wat gedurende die aand of die nag plaasgevind
het.
• In die meeste van die plaasaanvalle en huisrowe was die eerste kontakpunt tussen
aanvallers en slagoffers binne die huis, alhoewel dit meer dikwels voorgekom het in die
geval van huisrowe.
• In ongeveer 80% van beide plaasaanvalle en huisrowe is die slagoffer verras en
oorweldig deur die aanvaller, hetsy binne of buite die huis. In die ander gevalle is die
slagoffers onder een of ander voorwendsel deur die aanvallers genader.
• In minder as die helfte van die plaasaanvalle en die huisrowe het die oortreders dit
nodig gevind om by die huis in te breek. In die res van die gevalle het die oortreders
onbelemmerde toegang verkry, of is deur die slagoffers, hetsy onder dwang of
vrywilliglik, tot die huis toegelaat. In sommige gevalle is die oortreders verhoed om
die huis binne te gaan.
• In die Oos-Kaap het die plaasaanvallers vuurwapens in ongeveer die helfte van die
gevalle gebruik, maar in die ander provinsies in die ondersoek het die plaasaanvallers
vuurwapens in 95% van die gevalle gebruik. Eienaardig genoeg, is vuurwapens ook in
95% van huisrowe in die Oos-Kaap en ander provinsies gebruik.
• Ongeveer 29,4% van die slagoffers in plaasaanvalle in die Oos-Kaap is beseer, terwyl
19,4% van die slagoffers in die ander provinsies gewond is. Van die huisroofslagoffers
is 16% in die Oos-Kaap gewond, en 11,5% in die ander vier provinsies. Dit wil dus
voorkom asof slagoffers van plaasaanvalle ‘n heelwat groter kans gehad het om beseer
te word, as huisroof-slagoffers.
• Van die slagoffers van plaasaanvalle is 32,2% vasgebind in die Oos-Kaap, en 25,8% in
die ander vier provinsies. Dit was heelwat meer as by huisrowe, waar 3,8% in die Oos-
Kaap en 8,3% in die ander provinsies vasgebind is.
• Daar bestaan ‘n groot verskil tussen items wat in plaasaanvalle en in huisrowe gesteel
is. ‘n Baie groter aantal vuurwapens en voertuie is tydens plaasaanvalle as tydens
huisrowe gesteel. Aan die ander kant is geld meer gereeld tydens huisrowe gesteel.
• In die Oos-Kaap was 70% van die slagoffers van plaasaanvalle blank, en in die ander
vier provinsies 52%. In die huisrowe is slegs 5% van die slagoffers in die Oos-Kaap
blank en slegs 13% in die ander provinsies. Van die 100 slagoffers van plaasaanvalle
in die Oos-Kaap egter, was 42% beseer, teenoor slegs een (2,3%) van die 43 swart of
Kleurling slagoffers. Derhalwe het ‘n blanke slagoffer, ten minste in die Oos-Kaap, ‘n
baie groter kans gehad om beseer te word as ‘n swart of kleurling slagoffer. Ongeveer
een derde van albei groepe is egter vasgebind.
470