opsomming van die verslag - Saps

Rassekwessies
Net oor die 60% van die slagoffers van plaasaanvalle gedurende 2001 was wit, maar dit
skyn of die proporsie van swart slagoffers aan die toeneem is. Dit blyk egter dat daar ‘n
aansienlike hoër risiko is dat ‘n wit slagoffer gedood of beseer kan word as ‘n swart
slagoffer. Behalwe vir enkele individuele gevalle kon die Komitee nie ‘n onderliggende
rassemotief vir hierdie verskynsel kry nie, en daar mag ‘n verskeidenheid van faktore wees
wat dit veroorsaak.
Die strafregstelsel
Die ondersoek van plaasaanvalle geniet hoë prioriteit, en die koers van skuldigbevinding
vir plaasaanvalle is hoër as vir ander soortgelyke misdade Dit skyn of dit verband hou met
die feit dat die ondersoeke deur spesialis-eenhede hanteer word. Daar is egter in die
algemeen groot ontevredenheid onder boere oor die dienslewering deur plaaslike
polisiestasies. Daar is 'n gebrek aan middele in terme van personeel en voertuie in
landelike gebiede.
Die Komitee steun die vervanging van die Kommandostelsel met Area
Misdaadbekampingseenhede en Sektorpolisiëring, solank dit reg hanteer word. Die
Komitee beveel aan dat die beskikbare bronne optimaal benut word, en dat die speurderkapasiteit
in die landelike gebiede verhoog word.
Dit is belangrik dat al die plaaslike inwoners betrek word by strukture soos die
Gemeenskap Polisiëringsforums en die Landelike Veiligheidsplan.
Sekuriteit op plase en kleinhoewes
Daar is ‘n verskeidenheid redes waarom misdadigers plase en kleinhoewes teiken. Baie
boere het nie eens basiese sekuriteitsmaatreëls in plek nie, soos diefwering en waghonde,
wat relatief goedkoop is en wat aanvallers mag afskrik. Daar is ook in die algemeen ‘n
gebrek aan waaksaamheid. Die Komitee se navorsing het ook aangetoon dat dit voordelig
sou wees vir potensiële slagoffers om opleiding te ontvang in hoe om te reageer tydens ‘n
plaasaanval.
Dit is noodsaaklik dat sekuriteitsfirmas wat in die boeregemeenskap werk, geregistreer
moet wees by die regulerende gesag, en dat hulle gedrag tot voordeel van die hele
gemeenskap sal wees. Plaasaanvalle mag die verhoudinge tussen boere en werkers versuur,
en maniere moet gevind word om vertroue te herstel en om verhoudinge in landelike
gebiede te versterk.
Die impak van trauma
Trauma het ernstige gevolge vir die slagoffers van plaasaanvalle, maar dit geniet glad nie
genoeg aandag nie. Die Komitee bevel aan dat die nodige infrastruktuur in landelike
gebiede geskep word om trauma te hanteer.
478