Tydskrif April 2010.p65 - CJBF

• Eerstens is met hierdie opmerking die gesag van God se Woord afgebreek,
want die indruk is geskep dat jy daaroor kan redeneer en oordeel, en
selfs 'n ander betekenisinhoud daaraan kan gee. Jy hoef dit nie te verstaan
soos wat jy dit van God ontvang het nie.
• Tweedens is God se karakter aangetas. God het nie die waarheid gepraat
nie, en Hy dra nie werklik die mens se belange op die hart nie, want Hy wil
iets wat vir die mens goed en aangenaam is, van hom af weghou.
• Derdens is die indruk geskep dat die mens sal kan wegkom met sy sonde,
dat hy die oordeel van God sal vryspring, en nie sal sterf soos God gesê het
nie.
• En vierdens is die verwagting geskep dat die mens soos God sal wees
deurdat hy alles sal kan ken. 'n Wonderlike nuwe wêreld sal vir hom oopgaan.
Dit alles het Eva daartoe gebring om opnuut na die verbode vrugte te kyk.
Dit was goed om te eet en mooi om na te kyk en begeerlik omdat dit kennis
kon gee (3:6). Satan versoek 'n mens nie met minderwaardige, onaantreklike
“vrugte” nie, maar met iets wat mooi en begeerlik is, met iets wat 'n
mens graag sal wil hê. En as daar dan nie volgens die oordeel van die mens
'n logiese en aanvaarbare rede is vir die goddelike verbod nie, en as 'n mens
bowendien oënskynlik baie daardeur kan wen, is dit maklik om jouself te
oortuig dat daar niks fout mee is nie.
- fokus: versoekings -
Adam het blykbaar nie veel teëstand
gebied nie. As jou maat ingegee het,
en op die oog af nie ernstige nagevolge
daarvan oorgehou het nie, is
die kanse goed dat jy dit ook gaan
doen.
Satan het nie nodig gehad om
enigiets verder te doen nie. Adam
het geval en saam met hom die hele
mensdom, soveel so dat almal van
daardie dag af moet bely: “Die goeie
wat ek wil doen, doen ek nie, maar
die slegte wat ek nie wil doen, dit
doen ek.”
Daarom die noodkreet: “Ek, ellendige
mens! Wie sal my van hierdie
doodsbestaan verlos?” En die
antwoord: “Aan God die dank! Hy
doen dit deur Jesus Christus, ons
Here” (Rom 7:19, 24, 25). DK
Jy moet besef dat Satan jou baie goed ken. Trouens, naas God ken hy jou waarskynlik die
heel beste, selfs beter as wat jy jouself ken. Hy ken al jou gebreke. Hy ken jou geheime
begeertes. Hy ken die swakste plek in jou mondering, en weet presies waar jy kwesbaar
is. En soos 'n goeie strateeg is sy aanvalle juis op daardie punt toegespits.
• Die Kerkblad April 2010 • 21