Syferkommunikasie ESC320 / EDC310

Syferkommunikasie ESC320 / EDC310
ORGANISATORIESE KOMPONENT
1 ALGEMENE GRONDSTELLING EN ONDERWYSBENADERING
Die algemene doelwit met hierdie module is om begrip eerder as memorisering te beklemtoon om
sodoende kreatiewe denke, lees en die onwikkeling van innoveervaardighede onder studente te
stimuleer op die gebied van modulasietegnieke en –stelsels, in die teenwoordigheid van ruis. ‘n
Probleemgedrewe benadering sal gevolg word. Studentgesentreerde leer- en onderrigmetodes sal
tydens lesings, tutoriaalklasse en praktiese sessies toegepas word. Dit word gedoen om bogenoemde
vaardighede optimaal te ontwikkel en ook om die ontwikkeling van kommunikasievaardighede,
interpersoonlike vaardighede en groepdinamiek te stimuleer.
Ingevolge die onderwysbeleid van die Universiteit word daar aanvaar "'n student moet akademieswetenskaplike
vorming ondergaan ten einde later in professionele konteks in staat te wees om as 'n
selfstandige wetenskaplike te funksioneer en tot die kreatiewe ontwikkeling van die gekose beroep by te
dra . . . dit verwys inderdaad na 'n doelgerigte en proaktiewe onderwysbenadering wat gepaard gaan met
'n klemverskuiwing vanaf die tradisionele dosentgesentreerde onderrigbenadering na 'n meer dinamiese
studentgesentreerde leerbenadering." ('n Nuwe benadering, Tukkie-onderrig, Vol. 1(2), 1986). Met
hierdie doelwitte voor oë is 'n leerplan ontwikkel soos wat dit in hierdie studiegids verwoord is.
Daar word van u verwag om tydens lesings en tutoriaalklasse aan besprekings deel te neem. Aangesien
u medestudente afhanklik is van die insette wat u lewer, is u deelname uiters belangrik. U is immers ook
van hulle bydraes afhanklik.
Die getal kontaksessies vir hierdie module is beperk. Daar word dus van die leerder verwag om ywerig
gereelde tyd aan lees- en leerwerk, meditering (‘dink met begrip’) en afhandeling van tutoriaal- en ander
oefeninge te wy.
Die doeltreffende gebruik en toepassing van modulasietegnieke speel 'n kardinale rol in ons lewens in
hierdie inligtingseeu. Dit maak 'n noodsaaklike deel uit van spesifiek radiokommunikasiestelsels wat
sedert die verskyning van onder andere satelliet- en veral sellulêre kommunikasiestelsels die mark
stormenderhand verower het. Daar word dus van elektroniese en rekenaaringenieurs verwag om 'n
waardering en diepgaande begrip van stochastiese seinverwerkings-beginsels, soos toegepas op
modulasiekonsepte en die toepassing daarvan op kommunikasiestelsels, te hê. Met die bestudering van
hierdie module word vaardighede ontwikkel wat die leerder in staat sal stel om die grondbeginsels van
stogastiese prosesse in temporale en spektraalprosessering, met die klem op ruismodelle and die effek
hiervan op kommunikasiestelsel-werkverrigting, beter te verstaan. Dit behels voorkennis van tydfrekwensie-verwantskappe,
transformteorie (met die klem op Fourier), die grondbeginsels van
fundamentele waarskynlikheidsteorie en willekeurige prosesse, sowel as 'n studie van beide analoog- en
syfermodulasietegnieke en die toepassing en benutting daarvan in 'n magdom kommunikasietoepassings.
Deterministiese seinanalise van kommunikasiestelsels word uitgebrei, om ook willekeurige (stochastiese)
prosesse in te sluit. Deur gepaste definisies vir Sein-tot-Ruis-verhouding (SNR) te formuleer, word
effektiewe maatstawwe daargestel waarmee die werkverrigting van verskillende kommunikasiestelsels
direk met mekaar vergelyk kan word. Die beginsel van stochastiese modulasie, waarop sprei-spektrum
stelsels en verskeie van die nuutste sellulêre radiostandaarde (byvoorbeeld, IS95B en 3GPP) berus, word
bekendgestel.
Die werk wat in die modules Lineêre Stelsels ELI220, Syferstelsels ERS220 en Modulasiestelsels
EMS310 gedek word, is noodsaaklike voorbereidingboublokke vir hierdie module. Enige bywerkings of
veranderinge aan hierdie studiegids sal by die Departementele webwerfadres vir hierdie module verskyn.
ESC320_GIDS2_2011 Departement Elektriese, Elektroniese en Rekenaaringenieurswese, UP LPL/2011
1