40 от 13 октября 2022 (25952)

№40 (25952)
18 2022-тӥ ар 13-тӥ коньывуон
Удмурт культурая центръёсын
Кылэз вӧлмытон —
нуналмысь уж
Пичи Пурга ёросысь
Эдэйгуртын усьтӥськиз
удмурт культурая центр.
Со понна кыл кутэ
гурт библиотекалэн
кивалтӥсез Алевтина
Корнилова.
Пичи Пурга ёросысь эдэйгуртъёсты котькытын тодмало арганчиоссыя.
Тыло буша
Ёросысь Брангурт, Баграш-Бигра,
Улын Юри,
Вуж Мӧнья, Гожня гуртъёсын
азьвыл дырысен удмурт
культурая центръёссы
ужало ни. Эдэйгуртын сыӵе
ик центр кылдытон сярысь
ӵектонэн потӥз «Удмурт Кенеш»
огазеяськонлэн ёросысь
ёзэныз кивалтӥсь Надежда
Степанова. Гуртын
угось трос удмурт ужрадъёс
ортчыло, артысь тылоос
но отчы вуыло. Дэмланэз
гуртоос умоен пумитазы.
Центрез усьтон ужрад ортчиз
Тылоын Самсонов писательёслэн
усадьбаязы удмурт
бард кырӟанлы сӥзем
5-тӥез «ТылоБурдо» фестиваль
улсын. Надежда Степанова
пусъемъя, музей-юрт
удмуртъёслэн огез люкаськон
интызы луоз.
Фестиваль дыръя кенешизы
гуртъёсын кылдэм ужпумъёсъя
но. Татчы люкаськизы
ёросысь удмурт культурая
центръёсысь кивалтӥсьёс, активистъёс.
Кылсярысь, Тыло
гурт бырон пала шонске. Татысь
клуб азьвылгес куашказ
ни. 1990-тӥ аръёсы школа-сад
усьтӥзы вал, но нылпиоссы
быремен, сое ворсазы. Али ке
но буш сылэ. Фермаоссэс кемалась
кесязы ни. Фельдшеракушер
пункт но Самсонов
писательёслэн музейзы гинэ
ужало на. Гуртын ог 100 пала
улӥсез кылемын на. Соин ик
тылоос оско: Эдэйгуртын удмурт
культурая центр кылдэмен
валче Тылоын но выль ужрадъёс
ортчылозы, калыклэн
мылкыдыз ӝутӥськоз. Татысь
Самсоновъёслэн музейюртазы
но выль проектъёс
чак лало ни.
Эдэйгурт ӟучоме
— Эдэйгуртын, Тылоын
удмуртлыкез ӝутон понна
клубын, школаын, садын, библиотекаын
ужасьёсын дэмен
выриськомы, — шуэ Алевтина
Корнилова. — Со милям нуналысь
ужмы. Удмурт культурая
центр нимаськыса, эшшо
тросгес лэсьтыны быгатомы
шуыса, оскиськомы. Тэк пукыны
уг яра. Эдэйгуртысь
егитъёс ӝог ӟучомо. Садэ
лыктӥсь нылпиос удмурт сямен
вераськыны уг быгато ни.
Школаысь удмурт кылъя, шаертодонъя
дышетӥсьёслы луыса
гинэ нылпиос, 3-тӥ-5-тӥ
классъёсы вуытозязы, удмурт
сямен вераськыны кутско.
Дорам библиотекае ужрадъёсы
вуо ке, куддыр юромо
юасько: пӧлады удмуртъёс
вань-а? Нокин кизэ уг ӝуты.
«Тон удмурт ук!» шуыса, кудогезлы
вазисько. Синме учкыса
ик, асьсэды ӟуч шуо.
Пичи Пурга ёросысь Эдэйгуртысь удмурт культурая
центрен кивалтӥсь Алевтина Корнилова:
________
— Нырысь малпаськомы вал: малы нимысьтыз удмурт
культурая центр кылдытод? Ми сотэк но школаен,
садэн, библиотекаен, клубен гуртамы удмуртлыкез
ӝутон бордын ужаськомы. Но удмурт кылэз, культураез,
йылолъёсты азинтӥсь гуртлэсь нимзэ сётӥзы но, со
выль сямен малпаськыны косӥз: нош мар эшшо калык
понна лэсьтыны быгатӥськоды на? Тросгес проектъёсты
быдэстэм потыны кутскиз.
Мон ачим Грак ёросысь Лолошур-Возжи
гуртысь татчы
выжыяськемын. Нырысь аръёсаз
паймисько вал: кызьы со
быдӟа гуртын вань ужрадъёс
удмурт кылын ортчыло шуыса.
Милям школаямы переменаос
дыръя гинэ но удмурт кылын
вераськыны ӧз лэзьылэ. Соин
но эдэйгуртъёслы туж синмаськи.
Но анай-атайёс татын
пумен вуӵыртыны ӧдъязы. Садын
ужасьёсты куаретылӥзы:
малы, пе, пиналъёсмес ӟуч
кыллы уд дышетӥське, школае
мыныса, мае соос валалозы
на? Озьы удмурт мумы-бубыос
нылпиоссэс ӟуч каризы.
Телевизор, телефон, компьютер
улонэз сӧризы на. Анайатайёслы
асьсэлы капчигес ук:
нылпизы бӧрдыны кутске но,
кияз ӟуч мультфильмен я шудонэн
телефон сёто. Удмуртсэ
озьы ыштыны туж капчи вылэм.
Куддыр малпаськомы:
анай-атайёслэсь, нылпиослэсь
сюлэмзэс вырӟытыны быгатомы
меда? Собере асьмемыз ик
буйгатӥськомы: быгатом.
Библиотека
огазея
Эдэйгурт школаын
туэ 109 пинал
дышетске, 50
пинал садэ ветлэ.
Урамын нылпиос
ӝогак ӟуче выжо.
Ӟучъяськон виразы
пыдло пыӵамын
ни, шӧдске. Удмурт
кылъя урокъёс ӧй
луысалзы ке, оло, кылэз валасьёс
но пӧлазы кемалась
бырысалзы ни. Ярам коть,
анай-атайёс, мӧйыос пӧлын
удмурт кыл чузъяське на.
Йылолъёсмес, кылмес утён
вылысь школаын, садын,
клубын, библиотекаын ялан
кыӵе ке удмурт ужрадъёс ортчытъяло,
калыкез люкалляло.
Солдат келян, ӝук вӧсян,
гыронбыдтон но мукет йылолъёсты
радъялляло. Алевтина
Корнилова культурая
юртысь специалистъёсын
ӵош литературно-театральной
постановкаос дасялля.
Библиотекаысьтыз но калык
уг бырылы. Ачиз ик писательёсын
пумиськонъёс, дано
адямиосын пукон ӝытъёс,
гуртоосын кенешонъёс радъялля.
Выль книгаосын тодматъя,
лыдӟиськон ӝытъёс
ортчытъялля. Удмурт изданиослы
пыр гожтӥське. Книгаос
басьтыны берло дыре секыт
бере, библиотеказэ узырмытыны
пӧртэм амалъёс утча.
— Нунал пайдаё мед ортчоз
шуыса, тыршоно, — пусъе
Алевтина Леонидовна. —
«Сельчанка» клубмы вань.
Ачим дышетскемея агроном
луисько бере, мӧйыослы
валэктӥсько, кудӥз кидыс
умойгес, мае кызьы мерттоно.
Висказ киужен выриськомы.
Адямиослы вераськон уг
тырмы. Нош кенешон сямен
ужпумъёсты но эскерыны,
калыклэн сюлэмаз но пырыны
луэ.
«Удмурт Кенешлэн» Пичи Пурга ёросысь ёзэзлэн «ВКонтакте» бамысьтыз
Буре ваён
Гуртсэ ӝутӥз
11-тӥ коньывуонэ
Пичи Пурга ёросысь
Улын Юри
гуртысь школаын
Людмила Фёдорова
шаерчилы,
Россиысь огъя
тодон-валан удысын
дано ужасьлы
буре ваён пул
усьтӥськиз.
Пичи Пургалэн дано
нылыз, Семён Самсонов
премилэн лауреатэз
Людмила Фёдорова
быдэс даурзэ сӥзиз
Юри школалы. 46 ар
ӵоже татын дышетӥз,
15 арзэ директорлэн
воштӥсез вал. Коллективен
валче ужаны быгатэмзэ,
школа понна
трос лэсьтэмзэ адӟыса,
сое отӥяз директоре
юнматӥзы. Со кивалтэм
улсын школаын кылдӥз
механизаторъёслы
дышетон класс. Удмурт
йылолъёслы, культуралы,
калыклы сӥзем
музей усьтӥськиз. Отчы
экспонатъёсты директор
ачиз ик люказ,
нылпиослэсь но утчаськыны
мылкыдзэс
ӝутӥз. Пӧртэм проектъёс,
шаертодонъя
исследовательской
ужъёс быдэстэмын вал.
Людмила Ильинична
нимысьтыз саклык
висъялляз гуртсылы,
пиналъёсын ӵош гурт
ульчаоссылэсь историзэс
эскериз. Удмурт
кылэз дышетонлы но
бадӟым саклык висъялляз.
Со гуртлэн зэмос
патриотэз вал. Юри
понна, отын улӥсьёс
понна трос лэсьтӥз.
Котьку оскымон, йӧнйӧн
вал.
Туэ 1-тӥ феврале Людмила
Фёдорова улонысь
кошкиз. Солэсь нимзэ
пыраклы кельтон
вылысь школа борды
буре ваён пул юнматэмын
вал. Та ӵектонэн
потӥз «Удмурт Кенеш»
огазеяськон. Ужрадэ
лачак калык люкаськиз,
дано дышетӥсь
сярысь тодэ ваёнъёссэс
веразы. Кузпалыз
Михаил Никандрович
синвуаськиз. Таӵе сӥлы
каремлэсь номыр дуноез
ӧвӧл, шуэ. Татын
дышетскись нылпиос
но азьвыл директорзэс
тодазы возёзы, со кадь
синмаськымон луыны
тыршозы.
Бамез дасяз Елена САРАМАТОВА