Read - Al-Faqeer

YALIYOMO:
No.
Uk.
1. Yaliyomo………………………………………….……..iii.
2. Dibaji……………………………………………………iv.
3. Utangulizi…………………………….………..……...….vii.
4. Nafsi………………………………………..………….…1.
5. Roho/Nafsi…………………………………….…….……9.
6. Tiba ya Nafsi Khabbith…………………………………..13.
7. Akili……………………………………..……….…...…...19.
8. Moyo………………………....……………..………...…...25.
9. Jedwary la Nafsi…………………………………………...28.
10. Jinsi ya kuachana na Mwili……………………...………...29.
iii.

DIBAJI:
Bismillahir Rahmanir Raheem.
Baada ya kumshukuru Mwenyezi Mungu Mola wa ulimwengu,
Mfalme wa siku ya malipo yeye peke yake ndiye anayesitahiki kuabudiwa
na hakuzaa wala hakuzaliwa.
Anasema Mwenyezi Mungu katika Kurani Takatifu Surat
Yusuf Aya ya 53:
“….Nami sitakasi Nafsi yangu, kwa hakika kila
Nafsi ni yenye kuamrisha sana maovu isipokuwa
ile ambayo Mola wangu ameirehemu”.
Maneno haya ya katika Kurani Takatifu aliyoyaelezea kumueleza
Mtume Muhammad (SAW) yanamhusu Mtume Yusuf Bin Yakuwb (AS)
alipokua anajitetea kuwa hakumtaka mke wa Mfalme wa Misri.
Anamhakikishia kuwa “Nafsi ni yenye kutuamrisha sana maovu”
isipokuwa iliyorehemewa na yeye Mola. Na hii iliyorehemewa na Mola
ndiyo Nafsi ambayo yenye muelekeo mzuri yenye kumtii Mwenyezi
Mungu na kumuabudu na ndiyo inayoitwa “Al Mutmainna” aliyoitaja
Mwenyezi Mungu katika Kurani Takatifu Surat Alfajr:
Ewe Nafsi iliyotulia rejeya kwa Mola wako
hali ya kuwa utaridhika (kwa utakayoyapata)
na Mwenyezi Mungu aridhike na wewe, basi
iv.

Kupigana Jihadi na Nafsi ni jukumu kubwa linalotukabili katika
maisha yetu ya hapa Duniani. Mfano alivotupigia Sheikh Ahmad katika
kitabu hiki Uk. 11 wa Sheikh Abdul – Kaader Jeylani (Q.A.S.A)
kuwa alichukua miaka kumi na tano maporini akifanza majaribio
kuishinda Nafsi yake. Na akaishinda na kuitawala barabara. Na kuitawala
huko ni kufikia kilele cha ucha Mungu na akawa mmoja wa Mawalii wa
Mwenyezi Mungu. Na kabla yake alikuwepo Walii nchini Alyaman jina
lake Abuwmuslim Al khawalaniy aliyempinga Al aswad Al ansiy
aliyekuwa akijidai Unabii na Utume wakati wa Mtume Muhammad
(SAW) alikamatwa na wafuasi wa Al ansiy na wakamtiya katika shimo la
moto ili aunguwe. Moto haukumuunguza wala haukumchubuwa kama
ilivyotokea kwa Mtume Ibrahim (AS), hii ni karama alizozionyesha walii
huyu Abuwmuslim kwa kuishinda Nafsi yake. Kwa hivyo basi na
tujitahidi kuzipiga Jihadi Nafsi zetu kwa sababu ndizo
zitakazotusababishiya kuingizwa ima Peponi au Motoni. Amesema
Mwenyenzi Mungu katika Kurani Takatifu
Surat Al – Imraan, 185 :-
“Kila Nafsi itaonja mauti na bila shaka mtapewa ujira
wenu kamili siku ya kiyama, na aliyewekwa mbali na moto
na akaingizwa peponi, basi amefuzu, na maisha ya Dunia
hii ni starehe idanganyayo”.
Mwenyenzi Mungu amjaze kheri Sheikh Ahmad kwa juhudi zake
za kuandika kitabu hiki kwa kuwanufaisha na kuwazindusha ndugu zake
Waislamu.
WAMA TAWFIYQIY ILLA BI LLAAH.
AHMAD HAYDAR MWINYIMVUA,
DAR ES SALAAM.
vi.

Bismillahir Rahmanir Raheem.
UTANGULIZI:
Al-hamdulillah na si vingine bali ni ukweli usiokanushika kua
Mnyezi Mungu ndiye pekee mstahiki wa kila Swifa njema na Rehma zake
Mola pamoja na amani zimwendee mjumbe wake wa mwisho Bw. Mtume
Muhammad (SAW ) Mwalimu mkuu mno, aliyefundisha Umma huu wa
mwisho Ilimu zote tunazozijua kuanzia siku zile za jahilia mpaka leo hii
ambapo huyu humfundisha huyu na kuendelea mpaka siku ya mwisho
ambayo kiitikadi tunaimani kua ipo na itawadia tu bila khilafi wala
khiyari.
Suala lililochukua uzito katika kitabu hiki Akili ni moja
miongoni mwa Mas-la mazito na lilo muhimu sana. Na mwenye akili
hushughulishwa mno na yote yenye kutaalaki na Akili maana kama
iwavyo vyovyote vile.
Wana wa Elimu ya Viumbe vyenye Uhai (Biologists) wa kileo
wanakubali kutoijua khassa Akili ni nini. Hatua moja kubwa walopiga
katika suala zima la akili ni kua kwake Ubongo wa mbele ya kichwa
(Cerebrium) ni kitovu cha akili. Hii imepatikana kutokana na majaribio
ya muda mrefu.
Wana sayansi hao wameelezea ndani ya vitabu kadhaa-wakadhaa
mfano wa “The Exploring Biology” ambapo ndani yake wameelezea
kua hatua moja kubwa walioifanza kutokana na majaribio kadhaa ni
katika kugundua ya kua akili Mahir (ile ilo kusanya mambo matano –
macho, pua, sikio, ulimi, na mikono) na hiyo ni akili (isio julikana kua
kitu gani) ni vilowekwa katikati ya hiyo Cerebrium.
Akili yenyewe ikiwa ni matenda kazi ya hiyo Cerebrium kama
vile uhai ni matenda kazi ya nyanja muhimu za uhai (Protoplasm).
Linapoulizwa suala la akili na wapi katika mwili wa mtu ambapo
Mnyezi Mungu ameiweka. Wengi huona kua akili ipo kichwani, lakini
Mwendawazimu pia anacho. Hakuna
vii.

Mwendawazimu ambae hana kichwa lakini matendo yake siyo ya mtu
mwenye akili.
Akili bila shaka ni lazima tuijue amma sivyo haitokuwa rahisi
kudai kua nayo. Kutokana na kujiingikiwa nayo wengi katika ndugu
zangu tumeona kuwepo umuhimu mkubwa kuandika fatwa kwa njia ya
kipetopeto.
Hakuna shaka kabisa kua baada ya kupata hakika yake itakua
tumepiga hatua kubwa kiasi ilobaki ni wewe kutafuta njia za kuiongeza.
Njia zipo basi mwenye akili hataziacha bali atazitafuta kwa udi na
uvumba, na usiku na mchana.
Tunamuomba Mnyezi Mungu atunufaishe kwa kijitabu hiki na
kutufungulia kila lenye kuhitajika katika kutujenga kua watu wenye Akili
kweli.
Nahisi siwezi kukwepa kuwashukuru wote ambao walioandaa
darasa la kila Juma tano pale Ilala kwa Akh Fuad Batarfy, Sharif Karama,
Ba Ally Bin Mkhashshe, Seyyid Hussein
El Bayti, Sheybob, Akh Said Okash, Moh’d Batarfy, Saleh Hariz, Ababili
Abdallah na wengineo ambao si rahisi kuwaorodhesha majina yao hapa.
Bidii yao katika kuzishughulikia nuskha hizi kuzichapisha katika
Computer na kadhalika ni moja inayoonyesha wazi kua ni wenye kupenda
ilmu. Na haidhaniwi kua mwenye raghba ya ilmu si mwenye akili.
Mnyezi Mungu atawajaza ziada ya vile ilivyoelezwa kua ni bora kuliko
wenye kupigana vita vya jihadi, na Mahujaji na wafanzao Umra.
Huwatakia maghfira ( hao wapendao ilmu) Mbingu na Ardhi na
bahari miti na wanyama, pia mawe, na kila chenye kuchomozewa jua juu
yake, na huko akhera malipo yao anayajua Mnyezi Mungu Sub hana
wa Taala.
“Ishi hapa duniani ukiwa Alim au
Mutaallimi (mwenye kujifunza), au
Mustamian (mwenye kusikiliza ilmu)
usiwe mtu wa nne utahiliki.”
viii.

Hii ni kawli yake Alayhi Afdhalus Swalatu Was Salaam, Bwana Mtume
Muhammed (. S. A.W).
Al Faqeer Ahmad sheikh,
Majaalis El Ulaa,
El Qadiriyya, Sinza
Dar es salaam,
Tanzania
Swafar – 21
9 may 2000.
ix.

Nafsi na Sifa zake:
Al hamdullilah, waswalaatu lilahi taala wa salaamuha ala rasulillah.
(S.A.W).
Amma baad, Suala la Nafsi hii ambayo tunayo ndani ya miili yetu
ni kubwa na pia zito, kwa hiyo basi haitakuwa jambo la akili kulipita hivi
hivi tu minighayri ya kujishughulisha na kulijua kwake.
Bwana Mtume (S.A.W) amelisemea hivi:-
“Man arafa nafsahu
faqad arafa Rabbahu”
“Mwenye kuijua nafsi yake bila
shaka ameishamjua Mola wake”
Sababu ya kusema hivi kumjua Mnyezi Mungu ni wajibu wake
mtu wa kwanza katika uhai, na njia nyepesi ya kumjua mola ni katika mtu
kuijua Nafsi yake.
Kuijua Nafsi ni kujua makamu za Nafsi. Hii ina maana ya kujua
manzili zake saba kwa swifa na matendo yake.
Ya kwanza:
Nafsi Ammaara.
Ambayo Mnyezi Mungu Sub-haana wa Taalah ameisema ndani
ya Qur an kama:- S:12:53
1.

“Mimi sijitakasi nafsi yangu, kwa hakika (kila)
nafsi ni yenye kuamrisha sana maovu, isipokuwa
ile ambayo Mola wangu ameirehemu. Hakika Mola
wangu ni mwingi wa kusamehe (na) mwingi
wa kurehemu”
Hii ndiyo nafsi ovu na khabbithi kupita zote, kwa mujibu wa kauli yake
Alayhis-swalaatu Llahi Taala waa-lihi.! “Nafsi hii ni khabbithi zaidi
kuliko mashetwani sabini”
Inakutosha kuangalia zile sifa zake, ili kuthibitisha kauli yake
bwana Mtume S.A.W wewe mwenyewe uelewe ya kwamba kila
unapojishughulisha na kuifuatilia kwa karibu zaidi ndiyo jihadi kubwa
kwako na kukuingizia thawabu nyingi ndani yake.
Sifa za Nafsi Ammaarah
Kupenda kula sana
Ubakhili
Kuhangaika
Kua na tamaa
Kuwa na kiburi (Wall yadh Billah)
Matamanio
Hasada na
Ghafla
Sifa zote hizi ni zenye kumpeleka mtu kwenye kuhiliki kwa adilla
na ushahidi madhubuti toka kwa Bwana Mtume Alayhi
swala waatul-Lahi wa salaamuhu.
Ya pili: Nafsi Lawwaama.
Hii ni Nafsi inayojilaumu laumu, Seyyid Umar Bin Abdallah Bin
Al-ba-shaikh Abiibakar Bin Salum ( Mwinyi- Baraka) akisema :- “Haina
njia nyingine, ni kujilaumu”
Lakini Mnyezi Mungu ameisemea vizuri. Ameiapia:- 75:1-2
2.

“Naapa kwa siku ya kiyama tena naapa kwa nafsi
inayojilaumu. (Kuwa imefufuliwa na mtalipwa)”
Sifa za Nafsi Lawwaama:
Kujilaumu laumu.
Fikra.
Kujizuia (Qabdh).
Ujubi
Lalamika lalamika
Asili ya kuwa na sifa hizo ni kwamba ni kutaka kujiondosha
kabisa katika Nafsi Ammaara kwa vitendo vyake vyenye kwenda
kinyume na maamrisho ya Mnyezi Mungu.
Nafsi Mul-hama.
Ya tatu:
Nafsi zote takribani zimetajwa hakika zake mwenye Qur an. Hii
imetajwa ndani ya:- Suratish-shams. 91:7-8-9-10.
“Na kwa nafsi (roho na aliyeitengeneza kisha
akaifahamisha uovu wake na wema wake. Bila
shaka amefaulu aliyeitakasa ( Nafsi yake) na
bila shaka amejihasiri alieiviza (Nafsi yake)”.
3.

Sifa za Nafsi Mul-hama.
Ilmu.
Tawaadhui.
Tawba.
Subrah.
Tahaamul - kuvumilia adha.
Kiakili tu ukizilinganisha swifa hizo na zile za nafsi ya kwanza
utaona ipo tofauti kubwa mno ndani yake. Ndani ya nafsi hizi unaona
wazi kuwepo Uislamu ndani yake, kama unavyoweza kuona kuwepo
ukafiri ndani ya nafsi ya kwanza. Hiyo ni hatua
kubwa katika kujijua. Ni hatua kunjufu katika jihad ya nafsi
ambayo Bwana Mtume (S.A.W) ameihimizia.
Nafsi Mutmainna.
Ya nne:
Hii ndiyo Nafsi pekee ya kwanza iliyotulizana kabbisa, haina vituko
ndani yake, na, “Iliyosemezwa na Mnyezi Mungu Khasa”. Qur an
89:27.
“Ewe Nafsi yenye kutua.”
Huko ni kunadiwa na Mnyezi Mungu mwenyewe lakini bila shaka
ukiweka mazingatio ya kweli utaona kuwa ni miujiza mikubwa imo
mwenye mnada huu kwa wenye akili.
4.

Sifa za Nafsi Mutmainna:
Ukarimu.
Tawakkul.
Hikam.
Ibaada
Shukar na Ridhaa.
Hizo ni miongoni mwa sifa nzuri mno ambapo mtu anakua nazo
ndani ya Uhai wake hapa duniani. Mawalii wote bila shaka ni wakarimu
kwa hiyo kila anaye tamassak na sifa hii basi ametammasak na sifa ya
Mnyezi Mungu. Nasi tumeusiwa na Bwana Mtume S.A.W. tujitabiishe na
sifa nzuri nzuri za Mnyezi Mungu. Amma katika kushukuru kuna Uislam
mzima ndani yake.
Nafsi Radhiya.
Ya tano:
Nafsi hii imetajwa mara tu baada ya Mutmainna ndani ya Suratil Fajar
katika juzuu ya “Amma.” Nafsi iliyo ridhiya.
Sifa za Nafsi Radhiya:
Zuhdi (Kuipa nyongo dunia).
Ikhlas.
Wara`a.
Kuacha yasomuhusu mtu.
Wafaa`i – Kutekeleza.
Miungoni mwa sifa njema ambazo zimeibeba Nafsi hii hamna kama
Ikhlas ambayo Shaytwani anaikhofu mno. Qur an imesema hivyo siyo
mwandishi. Pia katika msururu wa utajo wa Nafsi tatu hizo, hii ndiyo
yenye kukamilisha yaani:-
5.

Nafsi Mardhiyya.
ya sita:
Nafsi hii imetajwa mara tu baada ya Nafsi Radhiya yaani ilo ridhiwa
na Mola Sub-hana wa Taalah. Amma mtu akisha ridhiwa na Mnyezi
Mungu basi hua hana haja ya kuogopa chochote tena.
Sifa zake:
Husnul khuluq – Tabia njema
Lutf kwa viumbe.
Taqarrab ila Llah – Kuacha yote yasiokuwa ya Mnyezi Mungu.
Tafakkur - Katika utukufu na ukubwa wake Mola.
Kuridhika na alokugawia Mnyezi Mungu Sub-hana wataala.
Nafsi hiyo inatakiwa kurudi kwa Mola wake Radhiyya.
Hali ya kuwa Mardhiyya hivyo basi, inatakiwa iingie katika kundi la waja
wake Mnyezi Mungu.
Waja wote ni wa Mnyezi Mungu lakini wapo ambao ni speshel.
Amma katika walioukubali uja hakuna kama Bwana Mtume Alayhi
Afdhalu Swalaat Was-salaam.
Mtume Muhammad S.A.W Ni mja wake na mjumbe wake. Mitume
wengine wote wanamfwatia Nabii Muhammad .S. A W. kama Sayyidna
Issa AS. ametajwa pia kama Abduhu warasuluhu lakini wamepitana
kwa daraja na fadhila. Na pamoja na hayo yote pia Mtume SAW anasema
ya kuwa…..“Hajifakharishi- Katika kuwa kwake Bwana wa watoto
wote wa (Nabii Adam A.S.W).”
Nafsi Kaamila.
Ya saba:
Pengine huitwa Nafsi Swafiyya, yaani iliyokuwa safi
6.

kabisa. Kwa nini? Kwa kuwa sifa nzuri nzuri zote zimo ndani yake.
Sifa zake:
Sifa zote njema zilizotajwa katika Nafsi tano ukiacha Nafsi ya
kwanza ambayo ni Ammara.
Bwana Mtume S.A.W amesema:- “Kupigana na Nafsi ndiyo jihadi
kubwa”
Hakuna juu yake Jihadi nyingine yaani ile Jihadi ya Panga ambayo
humfanya anayekufa ndani yake kuhisabiwa kuwa “yuko hai” haifui dafu
kabisa hapa.
Nafsi na makamu zake:
Mpaka kufikia hapa bila shaka umeishaipatapata kiasi ambacho
hakukupi shaka ndani ya moyo wako. Nini wamesema Maulamaa
wakubwa wakubwa katika Uislam?.
Wachache tu mfano wa akina Ghazzal, Busri na labda Habibi
Ahmed Bin Abubakkar Bin Sumeit aliyekuwa Zanzibar katika karne ya
kumi na nane mwishoni na kumi na tisa.
Imam Ghazzal ameelezea vizuri sana mas-ala ya Nafsi, Roho na
akili ndani ya vitabu vyake vya “Ihyaa ulumud deen”.
Imam Busri ameelezea vizuri ndani ya “Burda” kitabu mashuhuri
ambacho Waislamu wengi wanakijua na kukifanzia kazi katika matukio
kadhaa wa kadhaa ndani ya uhai wa kila leo, katika Tawassul za kila
siku. Yeye amesema kuwa:-
“Nafsi ni kama mtoto mchanga ukimwacha
atapondekea kunyonya na ukimzuia ataacha”.
Nafsi haina cha ujana haina cha uzee, ikimshika mtu hua hasikii
kitu katika waadhi wala nasaha. Tazama katika kuiachia kula sana kama
Punda inavokutia uvivu na kadhalika.
7.

Amma Habib Ahmed ndani ya Kitabu chake. “ kawkabur zaahir”,
anasema.:- “ Nafsi ni kama smaku”. Chunguza smaku utaona inayo
pande mbili. Upande wa kuvutia, upande wa kufukuzia. Ule wa kwanza
ndiyo wenye kukufanza ukamili katika maovu na ule wakuzuia ndiyo
unaokukataza kufanya maovu.
Qur an 79.40-41
“ Na amma yule anechelea kusimamishwa mbele ya
Mola wake akaizuia nafsi yake na matamanio
basi pepo ndio mashukio yake”
Suala la kujizuia ni muhimu mno na ni Jihadi ya kila mmoja, kwa
hiyo siyo mambo ya Sheytwani bali “Wewe binafsi yako”.
Na kila unapoanza amali njema inakuwa inatakata sehemu kwa sehemu
mpaka inang’aa kama Nuru, na hapo ndipo unapohesabika kua mtu
kamili. Amma sivyo, basi wewe ni kama wanyama wengine wowote
(mammals).
Mnyezi Mungu atuwafikishe katika kheri.
8.

ROHO/NAFSI
Qur an: 17:85.
“Na wanakuuliza habari ya roho. Sema, roho ni jambo
lililohusika na Mola wangu (Mnyezi Mungu) nanyi
hamkupewa katika ilmu (Ujuzi) ila kidogo kabisa”.
Ushahidi wa aya hii ni wenye kuonyesha wazi wazi kua upo ujuzi
wa Roho. Na pamoja na kua kidogo au kiduchu tu. Ndiyo makadirio
ambayo Mnyezi Mungu ameonelea kua ni yenye kutosha kabisa kwa hapa
duniani.
Katika misemo yetu ya Kiswahili ni ule msemo:- “Maji ya kifuu ni
Bahari ya chungu” (yaani yule mdudu mdogo na mwepesi sana – mdudu
wa sukari pengine mdudu chungu).
Huo ni mfano mmoja tosha kwa mtu mwenye akili ya kujisaidia nayo
angalau kidogo tu; ni wazi kuwa hatahitaji maelezo marefu ya aina
yoyote.
Tukiangalia kwa mazingatio kauli ya Bw. Mtume S.A.W juu ya
Rehma za Mnyezi Mungu tunaelewa fika kua ni “moja kwa mia moja”
kwa jumla tangu dunia ianze mpaka kufikia kiyama. Bila shaka moja kwa
mia ni sehemu ndogo mno, na hapo mpaka leo hii karne ya Ishirini na
moja mwaka huu wa Elfu mbili watu bado wangali wanarehemeana bado.
Na hasa ukiongezeka usemi wake kua:
“Warehemuni walioko ardhini atakurehemuni
aliyeko mbinguni”.
9.

Basi kidogo hiyo ni yenye kutosha kabisa. Pengine ingekuwa ni
Rehma mbili katika zile mia ndo ziloshushwa ungesema watu
wangeshindwa kufanza mambo mengine yoyote bali wangekuwa
wanarehemeana tu. Wapo watu wengine wanafikia kuikanusha kisirisiri
au kipumbavu kiuchache wa ilmu. Aya hiyo: 17:85 wao wakidai kua
hamna anaejua mambo ya roho illa Mnyezi Mungu .
Mnyezi Mungu anaijua mno hiyo Roho; anasema kua ametupa ujuzi
nayo lakini ni kuduchu. Si busara kuchukua kidogo ya Mnyezi Mungu
ukaifanza kua ndo hiyo hiyo kwako wewe Mwanadamu, na huku ukidai
kuamini kua: –
“Hana anayefanana naye hata mmoja”.
Kuna hatari ya kufikia kujichukua wewe kama Alim-Sameeun
(Unaesikia ) Basweerun (Unaeona) na kadhalika, kua ndo hiyo hiyo ya
Mnyezi Mungu (Mnyezi Mungu apishilie mbali fikra kama hizo kwetu).
Mnyezi Mungu anamuona na kumsikia sisimizi michang’ato yake
chini ya ardhi ndani ya giza la usiku, Je Shekhe, wewe wasikia hivo hivo?
Mnyezi Mungu anayajua ya siri na yalofichika ndani ya siri katika vifua
vya watu. Jee na wewe Sheikh ni hivo hivo? Basi Staghfiru kwa Mola
wako na ukithirishe Kalima ya Tawheedi usije ukahiliki kwa kujifanya
kichwa Mchungu. Uislamu unataka unyenyekevu (Sub-Mission).
Na isisahaulike kua Bwana Mtume SAW amekataza malumbano na
kwamba mwenye kuacha kulumbana (kubishana na hali ya kua yeye ndio
mwenye haki basi (malipo yake) siku ya kiama Mnyezi Mungu
atamjengea Nyumba ya Dhahabu). Na ikiwa kwa waliopewa Chuo (Ahlil-
Kitab) Basi malumbano yawe “Bil-lati Hiya Ahsan” kwa njia ya wema
sana. Kwa nini?; kwa sababu ni mara chache tunakumbuka kua mtu
anapopinga jambo hua na maana ya kufru. Kwa hiyo basi huenda mtu
akawa na Sijda yake usoni lakini ni Kafiri.
10.

Lau kabla ya kubishia jambo ambalo amelisema ambae hana ushuhura
katika Jamii, tungezingatia katika kawli aizungumziayo kua ni yake au ya
Mnyezi Mungu ingekuwa rahisi kuyahukumu mambo kwa njia ya Amani
na busara ya hali ya juu ambayo haingemgandamiza mtu. Ilmu iwe ya
manufaa siyo ya fadhuli.
Al Habib Seyyid Umar akisema:- “Suala la Nafsi / Roho si la
kusemea kidogo tu kisha ukaliacha, utapoteza watu”. Yeye
mwenyewe ilimchukua masaa matatu kuelezea juu ya Nafsi alipotoka
Makerere University Uganda ambako alikua na kina Nyerere, Obote,
Yusufu Lule na wengine kadhaa aliowataja ambao baadae walishika
nyadhifa kubwa kubwa katika Serikali za Afrika Mashariki.
Sheikh Abdul-Qa dir Jeylani (Q.A.S.A) alichukua miaka kumi na
tano maporini akifanza majaribio ya kuishinda Nafsi na hatimae
akaishinda na kuitawala barabara. Na miungoni mwa natija ni ile ya
kufunguliwa mambo mengi makubwa makubwa yalojaa karama, yote
hayo hayajaja kwa upendeleo bali Mujaahada.
Na katika mda wote huo alikua akifunga kila siku - labda siku moja
tu alifungua kwa sababu ya maskini mmoja alietaka kumuombea mtu Dua
lakini kwa sharti ale nae pamoja, Basi alifungulia kwa ajili hiyo -
Chambulecho Al Habib:-
“Nini Swaumu ya miaka kumi na
tano kwa Dua ya masikini huyu”.
Nafsil Ammaara haina inapopata taabu kama katika Swaumu. Basi
kwa apendae kupata Sa’ada ya Nafsi yake na aanze na tabiya hii ya
kufunga funga.
Swaumu za Twaa (Tatwa-w-u’e) kama vile Jumatatu na Al-Khamisi
na siku za mwezi kumi na tatu kumi na nne na kumi na tano za kila
mwezi. Huenda ukahisabiwa kama aliyefunga Dahar nzima. Kumbuka
kauli ya Al - Mustwafa S.A.W:-……
“Mwenye kufunga Ramadhani akafatanisha na Sittatish-
Shawwaal (Siku sita za Shawwal) hua kama aliyefunga Dahar….”
Sababu ni Basweet kwa kuchukua malipo ya kila jambo jema
11.

Thawabu 10; Jumla ya siku thelathini na sita kwa Thawabu kumi
inafanza siku za mwaka mzima (Dahar) yaani siku mia tatu na sitini, na
hali kadhalika funga ya Ayyamul-Beydh 13, 14 na 15 ya kila mwezi kwa
miezi kumi na mbili ya mwaka mzima inafanza siku 36 zenye Thawabu
kila moja inakuja ile ile mia tatu na Sitini ambazo ndo Dahar. (Tazama
Hikma ilivyo ajabu kiasi gani ndani yake).
Amma katika Khatwir (mapenzi ya jambo lenye kuvutia moyoni)
yake Bw. Mtume SAW Alivutiwa mno na Swaumu ya Nabii Daudi
Babake Nabiy-Allah Suleiman A.S - ambae alikuwa akifunga siku moja
na kula siku moja.
Majaribio hayo yote hassa si vingine Illa ni yenye makusudio ya
kumtengeneza mtu ili awe mwema na mwenye Swifa za kuwa
Mtawala alokusudiwa na Mola Subhana wa Taala hapa Duniani (The
divine’s viceregent).
Njia nyepesi mno katika kushinda Nafsi hii ilokwisha
kukudhihirikia ukhabith wake mda mrefu sasa tangu ubaleghe hadi hii leo
hakuna kama kwenda kinyume ya swifa zake ambazo tayari
umeishazifahamu .
Maswahaba zake Bwana Mtume SAW, Radhya-Allah Anhum
wakifanza majaribio katika kila jambo lililohitaji muamalla zama za
kuteremshwa wahyi toka kwa Mola wa ulimwengu zote.
Tukumbuke la maana angalau moja katika natija na faida nzuri katika
majaribio (Experimantations) nalo ni kuongezeka akili.
Sasa hebu na tuangalie katika ya kuhitaji kuyafanzia kazi leo kabla kesho
kuhusu hii Nafsi khabith.
12.

Jinsi ya kuitibu Nafsi khabbith.
Kupenda kula sana: Basi dhidi yake ni kufunga – Swawmu. Bw.
Mtume SAW alisema:-
“Sisi ni wale ambao hawali mpaka wawe na
njaa na pindi tulapo basi hatushibi huondosha
mkono hali ya kuwa hatukushiba na hatuna njaa”.
Mfalme mmoja aliita matabibu ili wampe dawa ya kuondosha maradhi
yote. Wakamwendea mabingwa katika fani ya Twiba toka Arabuni , India
na Afrika (Sudan) Mwarabu alimwambia kuwa ni Habba Soda. Muhindi
alimwambia kua ni maji ya moto Asubuhi kabla ya Stiftahi na usiku
wakati wa kulala. Pakapita kimya kiasi ambacho kilimpelekea amuulize
Twabib Mwafrika vipi mbona uko kimya au umeshindwa? Bwana
Mwafrika akasema:- “Bwana Mfalme, ni kweli Habba Soda imesemewa
na Bwana Mtume SAW kua inatibu maradhi yote ila mauti, na lau na
mauti yangekuwa na dawa, basi Mnyezi Mungu angeweka mwenye
Habba Soda. Amma kwa maji ya moto tumbo hulainika na mafuta
mwilini huyeyuka hivo basi, mtu upunguza unene. Lakini dawa ya
maradhi yote hakuna kama kula wakati mtu una njaa, na kuondosha
mkono kabla hujashiba (na kuvimbiwa), njia hii huwa ni kinga kabla
kujitibu.”
(Preventetion is Better than Cure).
Mfalme akasema kuaTwabib Mwafrika ameswibu na kuhibu yaani
ndiye aliyepata.
Ubakhili: Kinyume chake ni ukarimu – Sukhaa.
Bakhili ni Aduwwal-Llah hata kama ni mchaji mtaabbadi
Mkubwa, na karimu ni kipenzi cha Mnyezi Mungu hata kama
ni faasik.
Kuhangaika: Dhidi yake ni utulivu ambao unaandamana na Nafsi
Mutmainna.
13.

Kua na tamaa: Zingatia ule usemi “Tamaa mbele mauti nyuma”.
Kinyume chake ni kinaa na kule kukinai ni utajiri mkubwa, anasema
Mtume wa Mnyezi Mungu.
Kuwa na kiburi: (Mola atuepushe nacho) Dhiddi ni kujitupa chini
kua Mnyenyekevu.
Hata ikibidi kufanza aina ya shughuli ambazo lau atakuona yeyote
yule basi hatakosa kupata hisia kama za kudharauliwa. Hiyo ina kheyri
zaidi kuliko kutukuzwa ukapata kiburi.
Matamanio: Lau huanguka kwa kufunga Swawmu tu. Lakini ziada
ni katika kuyakumbuka mno Mauti. Bwana Mtume SAW alieleza
kua katika kuyakumbuka mauti imma itamfanza mtu apungunze
maasi au atazidisha Ibada.
Mfano utabiri wa Pope mwaka 1959 kua 1960 ingekua mwisho
wa Dunia, wa Moshi Kilimanjaro walibakia Makanisani kuanzia Krismas
mpaka January, ni wenye kutosha kuthibitisha ukweli wa kuyakumbuka
mauti ni waadhi kamili, na ambae hawaidhiki kwa mauti, basi huyo hana
waadhi.
Hasad: Amma kuhusu Hasad ambayo Bw. Mtume SAW amesema:
“Ni ugonjwa usio na Dawa”. Illa kuacha tu kule kuhusudu, mtu wa
akili anatakiwa kuyazingatia sana maanani huenda akanusurika.
Maisha ya hapa Duniani yamejaa majaribu, kwa hiyo mtu mwenye
akili nae anatakiwa afanze majaribio kwa kila jema alolijua. Akili haina
njia ya kuzidi kama katika mtu kua na ungi wa Tajiriba (Frequent
Experimentation Culculation and So on and so Forth) katika
majaribu makubwa tulonayo hasa katika zama zetu hizi hakuna kama
“Wanawake”. Bwana Mtume SAW akisema :-
14.

“Sijakuachieni baada yangu fitna ashaddu
kuliko wanawake”
Tuondoshe au tupunguze habari za: “Aa!! Sikataka mwenyewe!” Al-
Habib (Mwinyi Baraka) akisema :- “Itafaa wapi si kataka
mwenyewe“. Ni nzuri mtu kua mwema hasa anapokua kijana aliyejaa
Ghururi ambazo daima humzunguka kweli kweli. Wakati wa ujana ndo
aghlabu huvutiwa na mambo ya ajabu ajabu ya maisha ya ghururi.
“Haingii peponi ambae ndani ya moyo
wake ana punje ndogo ya kiburi.
Kadhalika Ubakhili umuaduisha (humfanza awe adui wa Mnyezi
Mungu ) Na pia adui wa Nafsi yake yeye mwenyewe. Na vipi mtu huyo
kua rafiki ya mwingine? Amma ni kweli kua:
“Sakhii alie Faasik ni Mahbub mbele za Mnyezi
Mungu, kuliko Bakhili mchaji Mungu”.
Juwa ewe mtafuta matukufu kwa Mnyezi Mungu Mtukufu ya kua
Mnyezi Mungu anapotaka kufanza mmoja ya waja wake kua Walii
(Rafiki) Basi, humpamba kwa sifa hiyo ya ukarimu na tabiya njema.
Tumeishaona jumla ya sifa njema katika Nafsi sita, sifa ambazo ni
zenye kumtosha mtu kujipamba nazo ili afanikishe katika kua mja wa
Mnyezi Mungu wa kweli kweli.
Na mtu anapofikia kua kipenzi cha Mnyezi Mungu basi hua hana
hofu juu yake na kila siku hua ni mtu wa mafanikio mazuri. Kila
analolitaka Mnyezi Mungu atampa thamma atampa. Hivyo ndivyo
asemavyo yeye mwenyewe Sub-Hana wa Taala katika hadithi takatifu
(Hadithil- Qudsi)
Kila unaemsikia kua ni walii basi kafikia Daraja hiyo kwa
maagizo hayo yaliyomo mwenye Hadithil-Quds, na kwa kumpenda mno
Bw. Mtume Muhammad Alayhi Swalawatullah Wa Salamuhu. Nasi
Inshaallahu Taala tupate Tawfiqi ya kweli ndani ya kupigana jihadi
kubwa hii dhiddi ya Nafsi vile alivyotuusia Bwana wa Mabwana, Bwana
wa Watoto wote wa Sayyidna
15.

Adam . ASW. Bwana Mtume S.A.W. amesema:
“Lau ningechaguzwa juu ya Utume ninataka kitu
gani nisingechangua isio kua tabiya njema kwani
kila cha ziada (Fadhila) ni chenye kuondoka na
kwisha, isipokuwa sifa njema; Kwani hizo hubaki
na wewe (milele)”.
Ni nani baada ya Mnyezi Mungu na Mtume wake mkweli wa
mambo kuhusu yote yamuhusuyo mtu hapa Duniani? Swifa nzuri na tabia
njema ndo zimfanzazo mtu kuonekanwa mtu amma sivyo, mtu hua ni
mnyama tu (Mammals-Biologists wanasema).
Na pengine mtu huzidiwa na Wanyama kibaadhi ya sifa. Matendo
yote ayafanzayo mtu pia Mnyama huyafanza pamoja na kutokuwa na
akili. Lakini wakati asiyekuwa na akili anamsabihi Mola muumba na
kuswali swala ambayo Mnyezi Mungu na huyo Mnyama anaijua, basi
mwenye akili mtu hua chini ya Mnyama. Na hivyo ndivyo ilivyosimuliwa
mwenye:
Qur- An- 7:179.
“ Na bila shaka tumewaumbia Moto wa Jahan-nam
Wengi katika Majini na wanadamu (kwa sababu
hii) Nyoyo wanazo lakini hawafahamu kwazo
(hawataki kufahamu kwazo) na macho wanayo
lakini hawaoni kwayo na masikio wanayo, lakini
hawasikii kwayo. Hao ni kama Wanyama, bali wao
ni wapotofu ( Wapotevu) zaidi – hao ndio
walioghafilika”.
16.

Suala la pepo na Moto si suala la mtu kujipangia, amma sivyo hangeingia
yeyote Motoni. Lakini suala la kufananishwa mtu ambaye Mnyezi Mungu
amemtukuza kupita viumbe vyote hapa Duniani aje kufananishwa na
Mnyama asiye na akili na papo awe mpotevu zaidi, hilo ni tusi zito sana.
Mambo ya kweli kama haya inataka mtu aweze kuyazingatia na
kuazimia azma ya kweli kujibadilisha kwa kadri ya uwezo wake pamoja
na kumuomba Mnyezi Mungu amuongoze kwa Rehma zake.
Mnyezi Mungu anajua sana jinsi uzito wa Mitihani yake ulivyo kwa
mtu katika mapambano yake na Nafsi yake, Matamanio, Dunia na
Sheytwani, Basi, hakuna haja ya kukata tamaa na Rehma zake Sub-Hana
Wataala.
Tazama vile Mnyezi Mungu atuambiavyo katika: Qur an 39:53
“Sema, “Enyi waja wangu mliojidhulumu Nafsi
zenu, msikate tamaa na Rehema ya Mwenyezi
Mungu bila shaka Mwenyezi Mungu husamehe
Dhambi zote. Hakika yeye ni mwingi wa kusamehe
(na) mwingi wa kurehemu”.
Al –Habib (Mwinyi Baraka), Akisema: “Hakuna dhambi
inayomshinda kuisamehe ila Shirk”. Kawli hii ukiitia maanani
unapata matumaini ya moyo kua Mnyezi Mungu ni mzuri mwenye
huruma mno kuliko Mama kwa kichanga chake.
Tusisahau pia vile alivyotuusia Bwana Mtume S.A.W. katika
maneno yaliyojaa hikma ndani yake kua:
“Mtu ni hadithi (Mazungumzo tu) baada yake,
basi (Tu) jitengenezee hadith nzuri kwa
watakaokuja kusimulia (Baadae)”
17.

Tena na tena na tumuombe Mnyezi Mungu atupe Tawfiqi na mioyo yenye
nguvu katika kuishinda mitihani yake kwa wingi wa Subra na shukurani
kwa Jaha ya Bwana Mtume Muhammad Swallallahu Taala Alayhi wa
Alihit-wahiraati-Ummahaatil Muslimiina. DUNIANI. (Amin).
18.

AKILI:
Ni Nuru ya kung’aza, Mnyezi Mungu ameiweka ndani ya Moyo
wa mtu na daima hunga’ara kwenye ubongo ambao uko kichwani katika
mtu.
Mfano wa karibu kabisa ambao mtu wa kawaida anaweza
akaipata-pata kirahisi ni ule wa Projector na Screen katika kufanza
kazi pamoja, bila ya ushirikiano si rahisi. Ndo kusema tumuonapo mtu
kaharibikiwa basi huwa hiyo Johari ya akili ndo iliyoathirika kwa hiyo
huo ubongo wenye Awnsi kumi na sita hua haufanzi kazi kabisa.
Bw.Mtume SAW amesema:-
“Usimlilie aliyekufa mlilie ambae amepungukiwa
na akili yake”.
Chombo pekee kilo Azizi kwa mtu hakuna kama Akili, na hiyo
ndiyo yenye kutafautisha baina ya mtu na Mnyama.
Ukifungua Qur an utaona sehemu nyingi imetajwa Akili. Na ni
kutokana na matendo gani hasa ndo mazingatio ya dhati
yanapochukuliwa. Aya ifwatayo ina mengi ya kuzingatia
Qur an 2:164:-
19.

“Hakika katika kuumbwa kwa mbingu na ardhi,
na katika kuandamizana usiku na mchana na katika
(mwendo wa) vyombo ambavyo hupita katika bahari
kwa (kuchukua vitu) vifaavyo watu, na (katika
kumiminika ) maji aliyoyateremsha Mwenyezi Mungu
kutoka Mawinguni na kwa (Maji) hayo akaihuisha ardhi
baada ya kufa kwake Na akaeneza humo (Ulimwenguni
kwa ajili ya maji hayo) kila aina ya Wanyama, na katika
mabadiliko ya upepo na mawingu yanayoamrishwa
kupita baina ya mbingu na ardhi, Bila ya shaka
(Katika haya) zimo Ishara kwa watu wenye akili
(kuwa yuko Mwenyezi Mungu na ni mmoja).
Na kweli ikiwa tofauti ya pekee kubwa kati ya mtu na Mnyama ni
akili ni wazi kua Mnyama hawezi kua na habari yeyote ya vyombo
vinavyotembea baharini, kinachobadilisha usiku na mchana na kadhalika,
basi mtu ambae hana habari ya hayo yote bila shaka hataachana futi moja
na Mnyama mwenyewe. Hilo ni tusi kubwa ambalo ukimweleza mtu basi
mtapigana sana pengine akwambie: “… ngoja leo ndo utauona huo
unyama wangu…”
Akili imesemwa kua inazidi na kupungua. Kuzidi kwake ni
kutokana na wingi wa majaribio katika mambo mbali mbali ambayo
umeanza kuyajua hivi sasa. Na humo humo Mnyezi Mungu
anakufundisha yeye mwenyewe ambayo hukua unayajua.
Ni ajabu kubwa kwa mwenye akili, lakini kwa asiyekuwa na akili hataona
chochote cha maana ndani yake.
Amma kupungua kwake akili ni zama za kufanza makosa akili
huondoka, na ndo maana ya kauli yake Bw. Mtume SAW kua:-
“Hawi muumini anaiba, zama zile za kuiba (kwake)
kua ni muumin, au anazini zama zile za kuzini kua ni
muumin, au anauwa zama zile akiuwa kua ni muumin”.
20.

Na wale ambao zama Sheytwani anapowashika hukumbuka basi
saa hiyo hiyo huwa wanaona (Mno) akili ndo huwa macho,
ikamkumbuka na kumtaja Mnyezi Mungu.
Na azingatie mtu juu ya vitu ambavo tunadai tunavijua mno na
kutokana na kuvijua huko na mazoeya tunahisi ati havitupi taabu hata
kidogo: Radio, Tepu, Tv, Magari, Kamera, Taa za Stimu, Kompyuta,
Mobitel, Inter-net na kadhalika: jee viliteremka moja kwa moja toka
Mbinguni kama mvua?.
Hili ni suala tosha kukuwezesha kuichemsha Akili yako ambayo
labda unatumia sehemu yake moja tu ya – kumi na sita (1/16). Daima
usipoichemsha, itabaki hivyo hivyo mpaka kiyama ambapo itaonekana
kua ulipewa Akili lakini hukuitumia!!.
Sifa za mwenye Akili:
Mnyezi Mungu aliyetukuka amejaalia kila kitu kua na swifa zake
kwa makusudio maalumu ili kipate kujulikana kwa wepesi na
kutambuliwa kwa njia iso na shaka hata kidogo. Halikadhalika Akili nayo
imepewa swifa zake maalumu ambazo zinakujulisha wazi kua mwenyewe
ni mtu mwenye Akili.
Hizi ndo swifa za Akili kutokana na mafunzo alofundisha Bw.
Mtume SAW, katika hadithi iliyopokelewa kutokana na Bi. Aisha (R.A)
hakika amesema:-
Akili inayo Swifa kumi (10) kati yake zimegawika ndani ya mafungu
mawili:- Dhwahiri na Batwin.
Dhwahiri Ni zile zilizo wazi wazi kabisa mtu akiziangalia anaziona,
nazo ni :-
1. Swamt: yaani ukimya, Bw. Mtume SAW katika Swifa hii
pia amesema kua: “ Mwenye kuzidisha maneno yake
basi huzidi kuanguka kwake” (Speech is Silver,
Silence is Gold) (Kusema sema ni fedha na
kunyamaa ni dhahabu – kinaong`arisha.)
21.

2. Hilm: Upole.
3. Tawadhu’i : Yaani ule Unyenyekevu ikiwa ni ile hali ya kujitupa
chini na hata kama Mnyezi Mungu amekufanza kuwa
Mfalme mbele za watu kwani hapo hasa ndo pahala
pake. Amesema Bw. Mtume SAW “Mwenye kujiweka
chini, Basi Mnyezi Mungu humrufaisha ( Humnyanyua
humpandisha juu)”.
4. Kuamrisha mema.
5. Kukataza mabaya: Daima hutakia wenzake mambo ya
kheri kila anapokueko baina ya watu.
Al- Habib Sayyid Umar akiwa katika safari za Ulaya kwenye
meli, safari hiyo alijiwa na kijana wa kizungu akawa anamtolea nasaha
na kumueleza juu ya Mnyezi Mungu na kumsomea Al-Hamdu na
Qul-Huwallahu kwa taabu. Al-Habib alimuuliza ni mda gani tangu
amekua Mwislam? akamwambia miezi sita. Lakini aliahidi kwa Mnyezi
Mungu kua akikutana na mtu yoyote atamwelezea juu ya Mola Sub-hana
Wataala, na hali kadhalika katika kukataza Mabaya ambayo watu
huyafanza, uzuri zaidi ni kuwahi kabla ili mtu aweze kujiandaa na
kuyakwepa.
Sifa za batwin:
6. Tafakkur: Yaani hali ya kufikirifikiri hasa katika dalil nyingi
zilizojaa na kutapakaa katika maumbile, kuanzia mbingu
na viliomo juu na ndani yake. Ardhi na viliomo ndani
yake, mfano wa milima, wanyama, majani, maji na
madini mbali mbali. Kwa mtu wa Tafakkur bila shaka
ndani ya Machache hayo angeweza kuandika vitabu vya
Ilimu fani mbali mbali tele na nyingi ni zenye umuhimu
kweli kweli ndani ya maisha ya hapa duniani.
22.

Bwana Mtume SAW amesema:
“kutafakkur katika maumbile ya Mnyezi Mungu
saa moja ni bora kuliko Ibada (ya sunna) ya
mwaka mzima”.
7. Ibra: Katika maajabu mazito ya akili, swifa hii imetiya
fora kwani katika maisha yake huenda mwenye
akili ndogo akamwelewa vibaya na kumtabiri
ambavyo sivyo alivyo – pengine aseme ni
mchawi.
8. Khofu: Kumkhofu, kumuogopa Mnyezi Mungu peke yake. Amma
kwa yule asie mkhofu Mnyezi Mungu. Basi itafaa kumkhofu
zaidi, kwani haachi kutomuogopa Mnyezi Mungu illa moto
mdogo au mwendawazimu peke yao hao. Inatosha kuonyesha
kua mtu anamkhofu Mnyezi
Mungu kwa kutekeleza kwa kadiri ya uwezo wake yale yote
aloamrishwa ayafanze na kuacha yale yote alokatazwa nayo.
Haiwezi kua ni khofu “eti mbona havui nguo
akatembea uchi au kuhujumu watu.” Wazimu upo
aina saba akichunguza lazima atapata ncha
ilonasibiana nae, na anaemjua mwendawazimu
kisha usimkhofu basi ipo hatari ya kua yeye ni zaidi.
9. Kuyaadhimisha madhambi:
Yaani ayaone mazito hata, yawe madogo vipi kwani hawezi
akajua ni dhambi ipi aifanzayo ambayo itamfanza Mola wake
achukie na kumfuta katika waja wake warehemewa. Zingatia
juu ya moto mkubwa ambao mwanzo wake ni cheche ndogo
ndogo kabisa
10 Kudhalilisha nafsi:
23.

Abadan.
Nafsi kila siku inataka makuu na kutambuliwa na wewe
kua inayo haki kwako, ni kama vitimbi vya mtoto mdogo
nyumbani kwao na hasa wanapokuwepo wageni. Na kama
ilivyo maalumu nafsi ukiitukuza ni lazima mwisho wake
itakuliza, kwani daima haikutizamii maslahi kwako
Nafsi ilokusudiwa hapa si ingine bali ile Al ammara.
Mnyezi Mungu ameelezea kua daima ni yenye kuamrisha
maovu tu haibadiliki hata siku
moja. Kwa kifupi mwenye Akili lazima awe na mifano
iliyotajwa kwenye swifa kumi hizo. Na si rahisi kwa
asiekuwa nazo kudai kua na Akili.
Tunamuomba Mnyezi Mungu mjuzi wa kila jambo atufungulie
Tafhuma katika kuielewa na kuitumia vyema Akili jambo ambalo Mola
Sub-hanalaah amelisema kua ni azizi. Kwani hakuna baada Nuru ya
Bwana Mtume SAW, jambo azizi kuliko
A K I L I.
24.

Moyo.
Kwa Kiarabu Moyo ni Qalb; yaani kitu cha kubadilika badilika,
leo hivi kesho vile. Na kutokana na maana hiyo Mapinduzi ni Inqilaab.
Pia ni yenye kukokotezwa kumuomba Mnyezi Mungu mwenye
kuzipindua nyoyo kila siku baina ya vidole vyake viwili – azithibitishe
nyoyo zetu ndani ya Twa`a yake.
Moyo umefananishwa au nasibishwa na Arshi yake Mnyezi
Mungu; kwani mambo yote huanzia hapo. Kadhalika ndani ya Moyo
ndipo panapoanza mambo yetu yote, na mengi tunashangalia sana hivi
leo. Tunayaona ya ajabu, na hiyo peke yake ni Ajabu. Mnyezi Mungu
hajaumba sanaa ya ajabu kuliko Mtu, na papo mtu huyo huyo anaona vitu
vingine alivyovitengeneza yeye mwenyewe kua ni Ajabu. Bwana Mtume
SAW amesema katika hadithi ambayo ni mashuhuri sana kua:-
“Ndani ya mwili lipo pande la nyama Jeusi; likitengemaa
basi hutengemaa mwili mzima, na likifisidika basi
hufisidika mwili wote; (Basi haliwi pande hilo la nyama ila
kua ni Moyo)”
Pia amesema SAW:-
“Hakika amali zote ni zenye kutegemea nia yake mtu; na
nia pahala pake ni moyoni”.
Na Mnyezi Mungu haangalii sura za watu wala watoto wao na
mali zao, lakini Mnyezi Mungu anaangalia nyoyo za watu na matendo
yao. Fikra zote za maana ambazo mtu huzihangaikia, huanza Moyoni.
Mambo yote aliyoyakusanya mtu ni kutokana na Moyo. Mambo mfano
wa Ilimu au Ujuzi wowote kila alichohifadhi, kila chenye kuhitaji
kumbukumbu na kadhalika.
25.

Bwana Mtume SAW amesema:-
“Hufa Mtu Kwa Yale Aloishi Nayo, na
hufufuliwa Mtu Kwa Yale Alokufa nayo”.
Katika hoja hii wametokea walomili upande wa hakika ya
Talqini (ile asomewayo maiti baada kwisha fukiwa) kua haina umuhimu
kwake kwa sababu kama aliishi akiwa anamjua Mnyezi Mungu na Mtume
wake, anaijua Dini aloridhiya Mola wake, Kibla chake, Imamu wake
(yaani muongozo wake kwa maana ya (Qur an) na ndugu zake, basi
hatahitaji kukumbushwa chochote.
Na hali kadhalika ameishi hayajui hayo mpaka amekufa, basi hatoweza
kujifunza chochote kutokana na Talqini. Anayeweza kujifunza ni yule
aliye hai. Kwa upeo wa Taammul za kweli hutakosa kuona jinsi gani
Moyo ulivo muhimu.
Hebu na atizame na kutaammal mtu, ya vijana wadogo tu
waliohifadhi Qur an yenye aya zisizopungua alfu sita mia sita na sitini na
sita (6666) ndani ya nyoyo zao bila kukosea kitu!.
Kwa msaada wa Moyo ndiyo tunajifunza na kuzihifadhi Ilimu na maarifa
kadhaa wa kadhaa; jee hiyo si ajabu ilo kweya mipaka?.
Suala linakuja, “Jee Moyo huo wenye maajabu makubwa kama
hayo, ambao unamwezesha mtu kuyajibu masuala ya Munkar na
Nakiir baada ya kufa – ukitokea kubakizwa Hospitali kwa
uchunguzi wa sababu za kufa kwa marehemu vipi atakabil
masuali ya Malaika hao. Yote aloyahifadhi moyoni mwake ndo
yamebakia kwenye maabara za Hospitali vipi itakua hukmu ya
maiti wake?”
Hapo ndo maulamaa mfano wa kina Imam Ghazzali walipoenda
kite zaidi na zaidi hadi kufikia kuona kua moyo ulokusudiwa hapo ni ule
wa Nuru ambao pengine ndo mtu mwenyewe, na ambao ndani yake
ndo Mnyezi Mungu ameiweka Akili. Sio Moyo ambao wengi wetu ndo
kwa mazowea tunaojua, ukiwa na kazi ya kuendesha damu ukisaidiwa na
mapafu!.
26.

Amma ilaaka kati yake na Moyo uloachwa Hospitalini ni yenye
kujulikana na Mnyezi Mungu peke yake, kwani Moyo wa
Hospitali unaweza ukaoza kwa vile asili yake ni udongo uliodhihiri
kama nyama. Lakini moyo wa Nuru ni wa swifa za juu ambao
umekusudiwa maisha ya milele na si wenye Kufa hata siku moja.
Ajabu kubwa jinsi unavyoshirikiana na Akili na Ubongo katika matenda
kazi zake ndani ya maisha yetu ya kila siku!!.
Mambo kama haya ndo anotakiwa mtu, na hasa vijana
wajishughulishe nayo ili kujiandaa kupokea matukufu toka kwa Mnyezi
Mungu, alotukuka.
Vijana ndo wenye nafasi nzuri ya kukaribishwa chini ya kivuli cha
Mnyezi Mungu siku ambayo hapatakuwepo kivuli illa hicho ikiwa
watapondokea katika kumtii Mnyezi Mungu tu peke yake wakaacha balaa
na ghasia chungu nzima zilizowazingira maishani mwao.
Inshallah baada ya kujua moyo huo wenye asrari zisoidadi,
huenda mambo yetu yakawa na mwelekeo wa mabadiliko mazuri.
Wafaqanal Lahu lima yuhibbu wa yardha.
27.

Makamu za Nafsi.
No
Nafsi Sifa Nyuradi
1.
2.
3.
4.
5.
6.
7.
Al Ammara.
Lawwama.
Mul hama.
Mutmainna.
Radhiyya.
Mardhiyya.
Kamila.
Kupenda kula sana, Ubakhili,
Kuhangaika,
Kua na tamaa, Kuwa na
kiburi (Wall yadh Billah).
Matamanio, Hasada na
Ghafla.
Lalamikalamika, Kujilaumu
laumu, Fikra, Kujizuia
(Qabdh), Ujubi.
Ilmu,Tawaadhui, Tawba.
Subrah,Taamul - kuvumilia
adha.
Ukarimu,Tawakkul, Hikam,
Ibaada, Shukar na Ridhaa.
Zuhdi (Kuipa nyongo dunia),
Ikhlas, War-l, Kuacha
yasomuhusu mtu, Wafaai.
Husnul khuluq – Tabia
njema, Lutf kwa viumbe,
Taqarrab illa Llah – Kuacha
yote yasiokuwa ya
M/Mungu, Tafakkur- Katika
utukufu na ukubwa wake
Mola.
Kuridhika na alokugawia
M/Mungu Sub-hana wataala.
Sifa zote njema zilizotajwa
katika nafsi tano, Ukiacha
nafsi ya kwanza ambayo ni
Ammara.
La ilaha illa
Llah.
Allah.
Huwa.
(Ismuh Dhwamir).
Hayyu.
Ahad
A`ziz
Wadud.
28.

Namna au mambo muhimu katika
zoezi la kuachana na mwili.
Muhadhiri: Al Faqeer Ahmad Sheikh.
Katika suala zima la kujigawa kuna mambo makubwa ya kuzingatia
mawili: Transmission and Receiving.
What we require to consider, in which way did we receive
that message and then we are going to deal with it. If the
transmission was spiritual: then we must act accordingly.
Otherwise the message will be VOID. No spiritual message
shall ever be valid in another way. Look; take this example of
material in which a Human-being was created – SOIL. But we
taking bath every now and then! And yet we are not dissolving -
Why? – Ask your mind.
Katika mambo haya saba ndio msingi wa kuachana na
mwili – Separation:
1. Lazima kudumu na udhu kwa masaa 24.
2. Kuwa na tumbo jepesi – Mtu na aepukane na mambo ya kula
kupita kiasi. Na hapa ni budi kutumia hadithi ya Bwana Mtume
S.A.W pale aliposema: “Sisi hatuna haja ya Twabibu, kwa
sababu hatuli mpaka tusikie njaa. Na pale tukila hatuli
tukashiba”.
29.

Jambo lingine la kuzingatia, ni aina ya chakula. Ni vyema
kuepukana na vyakula vyote vyenye kutia nyege. (Ashki ya
kufanya tendo la ndoa) na ikiwezekana ni bora mtu ajiepushe na
vyakula vinavyotokana na Roho.
3. Tuondoe woga kwa viumbe: Mtu na ajaribu kutoka usiku mpevu
nje ya mji na alale popote bila ya kuogopa kuwa linaweza
kutokea jambo dhidi yake.
4. Mtu na aendelee kumtaja Mnyezi Mungu mara kwa mara. Na
amkimbize Sheytwani Ibilisi kwa kutamka Kalimat Tawheed.
Na pale anapoitamka Kalimat hiyo ni budi itoke ndani ya Roho.
Kwa hakika ya mambo ya Kiroho hupatikana kwa kuyafanya
Kiroho hayo mambo yenyewe.
5. Mtu na aangalie Wakati. Hasa kati ya majira ya saa kumi na saa
kumi na moja za Al fajir. Basi, atakuta kuna Wakati umesimama
hauendi kama nyakati nyingine. Si vingine juu ya hakika ya
jambo hilo, isipokuwa Mnyezi Mungu SWT anadhihiri katika
wingu na Dunia akinadi : Je! Nani mwenye haja zake ili
nimkidhie?, Nani mwenye haja ya kufutiwa Dhambi zake
Nimfutie? Nani mwenye kutaka Pepo yangu Nimpatie?”.
Wengi ya watu wanakuwa wamelala katika wakati huo. Basi
kama wewe umefanikiwa juu ya jambo hilo ukawa hadhiri, basi
nyanyuka na utarakai – Rakaa mbili za wakati huo ni bora
kuliko Dunia na vilivyomo.
6. Jitahidi kujiweka katika hali ya kati ya kuwa macho na kua
katika Usingizi. Na ni katika hali hiyo ambapo unaweza
kufungukiwa na mambo mengi – kwani ukifanikiwa jambo hilo
utakuwa ukimiliki Coscious Mind na Sub–Conscious Mind. Na
moja kati ya mambo yaliyo muhimu kabisa katika ku-develop ili
uweze kujigawa.
7. Shart lingine kubwa kabisa ni kumwogopa Mnyezi Mungu
Kikweli kweli. Ndipo ambapo yeye Mnyezi Mungu atakiogopesha
kila kiumbe dhidi yako. Na ndio maana ikapendelewa mtu afanye
Haluwa zake nje ya mji.
30.

Mahali ambapo ataweza kuziepuka sauti za watu. Jambo hili
litampelekea mtu kuweza kuidhibiti barabara Nafsi yake. Na ile
akili yenye nguvu Sub Conscious Mind inaingia kazini katika
zile sehemu za hatari hatari. Hivyo ili kuizowesha kutumika akili
hiyo budi kutingishwa tingishwa. Wengi katika watu hutumia
kiasi cha 1/16. cha akili alopewa na ndio maana Bwana Mtume
SAW akasema: “Watu wamelala”. Kwani sehemu kubwa ya
akili zetu hatuzitumii. Hivyo na ajitahidi kila mmoja wetu
kujipandisha Daraja kwa kuyafanzia kazi yale anayojua, ili angaa
tuweze kutumia japo 3/16. ya akili zetu. Na papo ukifikia kutumia
kiasi hicho, wengi katika watu watakupanga wewe katika kundi la
wenda wazimu. Ama watakuona umechanganyikiwa (Ndio maana
unasema au unatenda yasiyowezekana). Kwa kuwa maono yako
yatakuwa mbali na maono ya watu wengine, na ni kweli utakuwa
ukiviona vitu kwa asili yake, siyo kwa mfano ambao wengi wetu
tumezoea kuona. Utakuwa unaishi katika ulimwengu wa Hakika
na muda mrefu utakuwa katika jitihada za kumridhisha Mnyezi
Mungu, na hapo ndipo penye kufuzu.
“Hakika yetu sisi Hatukuwaumba Majini na Watu ila
kwa kuniabudu Mimi. (Kunitambua mimi)”.
31.

Mtungaji:
(Al marhum)
AL- FAQEER AL - HABIB AHMAD SHEIKH
32.

Vitabu vilivyokwishatoka ni:
*1. Maana halisi ya Imaan. (i) (1 st , 2nd & 3rd addition).
*2. Njia nyepesi ya kuijua nafsi yako.
*3. Njia nyepesi ya kujua kitu juu ya uongofu.
*4. Knowledge vision & ecstacy.
*5. Mwinyi Baraka katika ulimwengu wa kiislamu (i) .
*6. Waislamu na Sayansi - Ulu-m.
*7. Kuhifadhi Burda.
*8. Maana halisi ya Imaan (ii).
*9. Muhammad SAW katika ulimwengu wa ghayb.
*10. Siri ya Balaa.
*11. El makhlouq (Viumbe)
*12. Njia nyepesi ya kujua kitu juu ya uongofu. (2nd addition)
*13. Manaqib ya Al habbib Sayyeid Al Ma`aruf.
*14. Some aspects of concepts of facility in medevial Islamic
Philosophy by Mwinyibaraka.
*15. Njia nyepesi ya kuijua Nafsi yako. (2nd addition).
Vitabu ambavyo tunategemea kuvitoa muda si mrefu
(Insha Allah) ni:
*1. Waislamu na Sayansi - Ulu-m. (2nd addition)
*2. Mwinyi Baraka katika ulimwengu wa kiislamu (ii).
*3. Muhammad SAW katika ulimwengu wa Ghayb.
Kwa maulizo kuhusu vitabu wasiliana nasi:
Majaalis El Ulaa - El Qadiriyya Sinza,
33.
P.o. Box 15170,
Tel: 0747 483553
Tel: 0748 595958.
Tel: 0744 023703.
Tel: 0741 235091.
Tel: 0744 299597.
Dar es salaam.

Al habib Al Faqeer Ahmed Sheikh Mohamed Sheikh Msiha, amezaliwa
Singida mkoa wa Dodoma, mwaka 1938. Amepata elimu ya sekula Unguja na
amebahatika kupata elimu ya juu katika chuo maarufu Afrika ya Mashariki
Makerere Uganda.
Elimu yake ya Dini ameipata hapo hapo Unguja toka kwa Masheikh mbali mbali,
baadhi yao ni:
Sheikh Sleiman Alwi (Muhib Rasul) (Al Marhum).
Sheikh Seyyid Mansab.
Maalim Himid (Al marhum).
Maalim Hemed Muhamed El Buhry.
Sheikh Seyyid Qamus.
Sheikh Muawwiya Ibn Abdul Rahman.
Sheikh Ally Muhamed Comorian.
Sheikh Ibrahim Mzee Ahd.
Sheikh Haj Mzee Ahmad Msiha.
Amma Elimu ya Nafsi na Roho Amepata Ijaza yake toka kwa A`limu mkubwa
Duniani Al Habib Sayyid Omar Bin Abdallah (Mwinyi Baraka).
Sheikh Ahmad amewahi kufanya kazi katika jeshi la Polisi Tanzania Bara
katika mikoa mbali mbali mpaka alipostahafu.
Katika umri wake wote Sheikh Ahmad alijahid katika kuendeleza Uislamu
kwa kusomesha na kuandika vitabu vya mada na maudhui mbali mbali katika
Uislamu. Pia alianzisha Majaalis Sehemu mbali ambazo ziko mpaka leo, Mtaa wa
Pemba, Sinza, Bungoni, kijito nyama, Sadani (Ilala) na Kibaha (Misugusugu)
ambapo ndipo ilipo Dhwarihi yake (alipozikwa).
Sheikh Ahmad ametwawafu 27. 8. 2001. ( Mwezi 7 jumadda thany 1421
H.R.). Akiwa na umri wa miaka 63, vile vile alivyokuwa akiomba aishi umri ule
ule alioshi kipenzi chake Bwana Mtume Muhammad SAW.
Insha Allah Mnyezi Mungu amjaze kheri na alitie Nuru kaburi lake (Amin).
Khalifa: Sheikh Issa Othman,
Majaalis El Ulaa El Qadiriyya, Sinza Dar es Salam.