HISTORI TE REJA TE MIQVE TE VJETER

Rexhep Mejdani
Si president i Shqipërisë, Rexhep Mejdani e vizitoi Kinën në vitin 1999, me qëllim që
“t’i shërbeja krijimit të një raporti të ri, një dimensioni të ri në marrëdhëniet midis dy
vendeve tona, pas disa dekadash ftohjeje e ngrirjeje”. Gjatë takimit me presidentin e
atëhershëm të Kinës Jiang Zemin, ai ritheksoi parimin e “Një Kine”.
Gjatë një interviste për Radion e Jashtme e Kinës, z. Mejdani shpjegoi këmbënguljen
e tij në parimin e “Një Kine”: “Gjatë presidencës sime do të thosha se e vlerësoja
pozicionin e Kinës në marrëdhëniet me shtetet e tjera, dhe njëkohësisht nuk e
pëlqeva atë lëvizje të gabuar të Maqedonisë në atë periudhë, ku një delegacion i këtij
vendi jo vetëm që shkoi në Tajvan, por pretendoi për njohjen e Tajvanit. Aty unë kuptova
se si duhej vlerësuar situata në marrëdhënien me një nga shtetet mike, siç është Kina,
por njëkohësisht një shtet që është anëtar i përhershëm i Këshillit të Sigurimit të OKB-së.
Kështu është vlerësimi im personal miqësor dhe i perspektivës së RP të Kinës.”
Presidenti Mejdani shprehu edhe urimet e tij më të bukura për bashkimin e Kinës:
“Unë personalisht jam i bindur që me tezën e rëndësishme të ‘Një Kine’ - fillimisht ‘Një
Kinë, dy sisteme’, por sot me procesin e reformimit ekonomik në Kinë mund të flasim
thjesht për një Kinë. Sepse është po ajo popullsi, janë po ato ndjenja, janë po ato dëshira
e aspirata dhe unë uroj me gjithë zemër një bashkim të tillë sa më të shpejtë.”
Presidenti Mejdani është pozitiv dhe aktiv lidhur me pjesëmarrjen e Shqipërisë në
nismën kineze “Një brez, një rrugë” dhe mekanizmin e bashkëpunimit “16+1” midis
Kinës dhe vendeve të Evropës Qendrore e Lindore:
“Një iniciativë e rëndësishme është shpallur nga qeveria kineze prej disa vitesh,
‘16+1’, dhe këtu bën pjesë dhe Shqipëria. Unë mendoj se iniciativa ‘16+1’ duhet të
përshpejtohet dhe të shikohet më me interes nga Shqipëria. Po e njëjta gjë është dhe
me iniciativën e dytë të qeverisë kineze, ‘Një brez, një rrugë’, që lidh të gjithë zonën
rreth Kinës dhe kujton ‘Rrugën e Mëndafshit’ të dikurshme, pasi rrit bashkëveprimin.
Ky është një projekt më i madh sesa ‘16+1’. I sugjerova qeverisë shqiptare të jetë pjesë
e kësaj iniciative.”
Duke folur për miqësinë tradicionale Shqipëri-Kinë, z. Rexhep Mejdani u shpreh për
Radion e Jashtme të Kinës: “Marrëdhëniet mes shqiptarëve dhe kinezëve nuk kanë pasur
asnjë problem, por mundet politika të ketë shërbyer jo pozitivisht. Në këtë drejtim
të gjitha kontaktet kulturore, shkencore, politike apo ekonomike duhet t’i shërbejnë
kësaj miqësie dhe Shqipëria duhet ta kuptojë që, duke zhvilluar më tej këto lidhje të
gjithanshme me Kinën, natyrisht që garanton dhe mbështetjen e një shteti të fuqishëm
siç është Kina, jo thjesht një vend anëtar i përhershëm i Këshillit të Sigurimit të OKB-së,
por si një nga shtetet më të fuqishme ekonomike në botë.”
5