Að glæða sálargáfurnar og auka þekkinguna

AÐ GLÆÐA SÁLARGÁFURNAR OG AUKA ÞEKKINGUNA | INNGANGUR
5
Fimmtudaginn 31. maí 2017 var opnuð við hátíðlega athöfn sýningin „Að glæða sálargáfurnar og auka
þekkinguna“ í forsal Pakkhúss Byggðasafns Hafnarfjarðar en sýningin fjallaði um upphaf almenningsfræðslu
í Hafnarfirði.
Rætur almenningsfræðslu í bænum má rekja allt aftur til ársins 1877 og voru því liðin 140 ár frá þeim
viðburði þegar sýningin var sett upp. Árið 1877 skrifuðu prófastshjónin á Görðum á Álftanesi undir
gjafabréf til stofnunar alþýðuskóla í Hafnarfirði til minningar um son þeirra, Böðvar Þórarinsson, sem
látist hafði langt um aldur fram. Böðvar var þá nemandi í Lærða skólanum í Reykjavík og þótti foreldrum
hans, Þórarni Böðvarssyni og Þórunni Jónsdóttur, við hæfi að minnast hans með stofnun skóla í
Flensborg. Segja má að saga alþýðufræðslu og skólamála í Hafnarfirði hafi haldist óslitin allt frá þeim
tíma til samtímans og var gjöfin merki um bæði framsýni og stórhug þeirra hjóna. Saga skólans og þróun
hans er merkileg fyrir margra hluta sakir og hafði hún einnig mikil áhrif á þróun og sögu bæjarins. Þessari
sögu voru gerð skil á umræddri sýningu með sagnfræðilegum textum, fjölda ljósmynda og áhugaverðra
muna sem vörpuðu ljósi á hana á bæði fræðandi og áhugaverðan hátt.
Í þessu smáriti er leitast við að varðveita þá rannsóknarvinnu sem unnin var við gerð sýningarinnar í þeim
tilgangi að miðla henni áfram nú eftir að sýningin hefur verið tekin niður. Að sýningunni vann starfsfólk
Byggðasafns Hafnarfjarðar en sérstaklega ber að þakka fyrir þá aðstoð og velvilja sem bæði Þjóðminja-safn
Íslands og Flensborgarskólinn í Hafnarfirði sýndu safninu við gerð sýningarinnar.
Björn Pétursson
Bæjarminjavörður Hafnarfjarðar