03 от 28 января 2021 (25864)

udmdunne.ru
+7 951 195 37 65
ЛЫДӞИСЬКОН СИГ
№3 (25864)
2021-тӥ ар 28-тӥ толшор 27
пичиесь ненег бугоръёс ватскемын.
Кыӵе мусо ӝутъясько
но лэзьясько соос... Изь на,
изь, мусое, гань-гань изь…
Дорысьёс валэн бертэмелы
паймизы.
— Бон тон вал возьманы
ветлӥд шат? — юаз анай. — Ми
ке тонэ ыштӥм...
Мон пальышак потӥ но,
ведраысь ву омыртыса, номыр
вазьылонтэм вылысь,
ымме кобыен пытсай…
Чай юыса-мараса, кисыям
тетрадь чуртнай, карандаш
понӥ: шонер вера Васса,
кылбуръёсме гожъяно. Собере
кӧчырыса 1 Вассалы аслыз но
кузьмано. Ужын но — шутэтскыку
— сыӵе луонлык кемдылоз,
дыр.
Гурт пумысь силос гу
доры мон котькинлэсь вазь
вуи. Соку ик карандашме,
тетрадьме поттӥ. Но гожъяськыны
трос ик ӧй вуы —
Васса тодам усьыса, сюлмы
чидатэк, соослэн корказы
пала сётски. Кырсиос вадьсы
вуи гинэ — соос дорысь Васса
потэ. Сое адӟи но — дуннее
кыкетӥ шунды ӝужаз кадь. Ас
югытэзлэсь мальдэм музэн,
со синзэ ӧжытак кыньыртӥз
но муспотон пальпотӥз!..
Вукырем вамен тэтчыкуз,
чагыр сяськаё вож дэремез
улысь возьдаськыса кадь
ӝужась пичиесь вырйылъ ёсыз
ӧжытак сэзъялскизы но кӧня
ке ас кожазы выризы на. Нылмурт
али айшеттэк, мылазьыз
номырин кутэмын ӧвӧл, соин
ик ватэм бугор-выр йылъёсыз
вамыштэмезлы быдэ зуркак
луыло. Мынам соос бордысь
синме басьтэме уг лу, отысь
майбыр тулкымъёс сюлэмме
ик мамыкало. «Эх, пичильтык
ке но йӧтскы вылэм со ненег
бугоръёс борды, ӝамдэлы ке
но вуылы вылэм кудаз ке со
вырйылъёсы!..» — лулӟи мон
ас поннам. Собере ачим ик кепырай
та малпанэлэсь. Озьы
ке но йырме поромытӥсь малпанме
озьы гинэ улляме ӧз лу.
Соин ик туж тыршыны кутски:
со кыӵе ке мукет малпанлы
мед берытскоз. Но...
...Гурт пумын валъёс весь
ӧжыт ай, турнасьёс но кыккуинь
гинэ, тырисьёс но.
Уробоям пуксьыса, мон вань
кылбуръёсме радызъя гожтӥ
ни. Эшшо мар ке сярысь выль
кылбур йӧндырыны медӥсько
вал но, юри малпаса, номыр
уг пӧрмы вылэм. Вылаз ик,
Эльзалэн арамаын гольтрес
серекъямез люкетэ. Эльза — со
Палай кенаклэн Сирей нимо
предэнымы войналэсь азьло
шедьтэм нылыз. Сирей солэсь
картсэ обозэ лэзе вылэм но,
чик ватӥськытэк, нуназе куазен
дораз пыре вылэм. Анайзы
ке доразы, кензэ, китӥз
кыскыса, мунчоязы поттэ.
Озьы вордӥськем Эльза. Атайзы
войнае бырем. Пӧртэм
уполномоченнойёс, налог,
заём, сӥль, ыж гон, курегпуз,
картофка, вӧй но мукет тыриськонъёсыз
октӥсь агентъёс
весь Палай кенак дорын
улылӥллям. Нылыз пичи ай,
номыре уг вала шуыса, Эльза
азьын ик визьтэм ужъёсын
вырылӥллям. Табере тани
ачиз Эльза мар дауртэмзэ уг
вала ни, пересьёс шуэмзэ,
йырпыдэс но йырпыдэс...
Соизлы но паймоно кадь:
вань гурт калык адӟе, мар дауртэ
предмы (бен, бен, милям
таиз но бере уг кыльы; армиын
со офицер вылэм, отысь
кыӵе ке визьтэм палась висён
вайыса бертэм, табере гуртысь
ваньмыз сямен пал нылкышноос
гужембыт ӵоже Вылынгуртын
йӧнатӥсько, соин
сэрен арась но, турнась но уг
окмы...), мар туртто районысь
ыстэм бадӟым адямиос, нош
югдурез воштыны нокин уг
быгаты. Ма, со сярысь шара
вераськыны ик уг лу. Колхоз
собраниын но, школаын но.
Нош кин ке кылпум поттэ ке,
солы улон уг сёто ни, со, пе,
совето властез, колхоз улонэз,
кивалтӥсьёсты мыскыл каре.
Эльза соосты огзэс но уг
мыльыты. Озьы ик кышнояськем
пиосты но, музысен
мусдораз мырдэм сузись пичи
пиосты но. Ваньзэс либатэ,
ваньзэс дышетэ...
Тани витетӥ классэ выжем
Петя арамаысь бызьыса потӥз.
Ымнырыз — быдэс гирвонка
вӧй лушкам коӵышлэн кадь
мыня...
Ма, дышетӥсьёсмылы но
паймытэк паймод. Пичиослы
шай шоры я вӧсяськон пала
чиньыенызы возьматыны лэзьымтэ
музэн ик, соосты но
яратон сярысь пал кыл но поттылыны
уг лэзё-а, мар-а. Урокын
но, кытын но со сярысь
номыр уг верасько. Маке юаськод
ке, синъёссы ик былькмо,
кылзэс ик куртчо. Оло нош,
понназы озьы малпало: яратон
сярысь ӧз ке поттылэ, нылпиос
кылчин кадь чылкытэсь будозы...
Нош ньылетӥе-витетӥе
потэм пиоссы Эльза кадьёс
котыртӥ маялляськыса ветло
шуыса тодысалзы ке, отчыязы
ик кулыса усьысалзы, дыр...
Яке, ваньзэ тодыса вылысь, тодымтэ
улэ карисько-а?..
Тани гуртысьтымы Нюра
нимо нылмы куать классэз
быдтӥз но бызиз. Зэм, солы
дас куать арес ни. Али нылпи
нонтэ. Нош ӧй ке бызьысал,
сизьыметӥ классэ ветлысал,
солы «вазь на» луысал яратон
сярысь вераськыны... Только
улонзы сокем вольыт ӧвӧл...
Кин тодэ, школаын чылкыт,
зэмос, мур яратон сярысь верасалзы
ке, кызьы солы дасяськоно,
кызьы сое кышкатоно
ӧвӧл, кызьы утёно, соку,
оло, Нюралэн но улон-вылонэз
мукет сямен радъяськысал,
Петя кадьёс но нылъёс шоры
кӧё-вӧё синмын гинэ ӧй учкысалзы,
валасалзы: ныл
доры, дун ошмес доры кадь,
чылк-чылк малпанъёсын мыноно.
Соку, оло, Эльза кадьёс
но тодысалзы: нылмурт ассэ
чылк ошмеслэсь но чылкыт
возьыны кулэ. Ошмесэз адямилы
ке сузяно луэ, нылмурт
— ассэ ачиз чылкытатыса
возись чылкыт ошмес медло.
Мынам Васса ӵапак сыӵе.
Солэн визьмась анаез ӧвӧл
ке но ини, визьмо ӵужапаез
вань. Озьы ик мынам атае
ӧвӧл, но визьмо кыл вераны
анае но Митрей ӵужмуртэ
вань. Ӵужмуртэ мыным ӵем
гинэ ӟеч визь-кенешъёс сётъя:
«Яратон дырыд вуэмлэсь азьло
олокыӵе но дунтэм нылъёс
котыртӥ эн гожеръя, экок, собере,
яратон дырыд вуиз ке,
уд быгаты ни чебер ныллы
но адями сяин синмаськыны.
Нылъёслэсь ватылоно интыоссэс
туж адӟемед ке но потӥз,
яратон нылдэ пумитатэк, кинлэсь
вуэм солэсь адӟыны эн
дырты: дуннеедлэсь чеберзэ
ыштод...»
Ваньмызлэн нылъёслэн но
пиослэн сыӵе визьмо
анай ёссы, ӵужмуртъёссы,
ӵужапайёссы ке луысал, туж
умой вылэм, но... Озьы бере,
дышетӥсьёс но ымазы ву
ӟузем кадь улон дыръя, кытысь
соос визьмо кыл кылозы?
Мукетсэ но вератэк ӧвӧл.
Ужантӥын шутэтскыны пуксиськом
ке, кутско ук эшъёсы
ушъяськыны! Кин кинэ
посӥз, кин кинлэн кытчыяз
вутскылӥз... Мыным ке номырин
ушъяськыны. Соин сэрен
монэ ӵемысь сереме уськытъязы,
исаськизы. Тазьы учкыса,
ваньмыз та понна соослы асьсэлы
возьыт луыны кулэ кадь,
но, сыӵе макеосты тодымтэбыгатымтэысьтым,
кытӥяз
мыным возьыт луылӥз. Соин
ик кызьы ке огпол, укыргес
гольтрес исам-мактаськемзы
бере, мон дась вал ини Эльза
сьӧры калъяськыны. Чылкыт
сюлэмме саптасько, чебер
малпанъёсме пыд улам лёгасько
шуыса валасько ке но,
асме тазьы шонере поттыны
выри: «Мон ведь огпол гинэ,
серекъямысь мед дугдозы шуыса
гинэ... Отӥяз мон асме выльысь
чылкыт возё...»
Но собере тазьы луиз. Ӝыт
шудыны потон азьын, юри
тупатэм кадь, ӵужмуртэ вуиз.
Вуиз но соку ик шӧдӥз позырес
мылкыдме. Юалляськыны
кутскиз. Мон посӥськи ик,
посӥськи ик но кызьызэ-марзэ
верано кариськи.
— Ӧвӧл, экок, — шуиз
ӵужмуртэ, — огпол саптаськид
ке, озьы гинэ сузяськыны уд
быгаты: сыӵе дауртэмдэ вунэтэмед
уз лу.
Со ӝытэ мон шудонэ ик
ӧй пот ни. Зэм, кӧня ке улыса,
Гербер нуналэ, монэ ачиз
Эльза алдаз. Оло нош, паляка
пиосмы. Котьма ке но, шудон
пӧлын арганэн шудыкум, дорам
Петя лыктӥз но пелям
шыпыртӥз, Эльзаез, пе, кинъёс
ке жугиллям но арамае
куштыса кельтӥллям, со, пе,
тонэ ӧте. Мон арганме кузёезлы
сётӥ но, номыр со-та
малпатэк, арамае пыри. Петя
ачиз ик сюрес возьматӥз: собере,
«отӥяз ачид шедьтод
ни» шуыса, берен берытскиз.
Эльза кулэм кадь кылле
вал. Ӝыны мугорыз гольык.
Возьдаськеменым мон, синме
кыньыртыса, дораз мынӥ
но ӝутскем дэремзэ гольык
азяз кыски. Со виын Эльза
шуак ӝутскиз но чыртыям
ӟыгырскиз.
— Лыктӥд, иське, Патӥ,
мон чидатэк вити, кемалась
тонэныд потэ ни вал... — пӧсь
шокаса, со монэ чупаны кутскиз.
Мазэ-созэ валаса, мынам
воже потӥз — усьтыртабыр
мозмытски, поннам
сялски но дыбыр пегӟи.
Тӥни озьы луиз соку. Нош
али, турнасьёсты но эшме
витьыса пуконъям, ӵапак со
Петя ик, кескич мыняса, выльысь
шуиз, табере, пе, Эльза
тонэ ӧтиз.
— Тодэмед ке потэ, мынам
яратоно нылы вань, — шуи
мон, нош ик мылкыды пильмаськыса.
— Соин ик тон почтальон
кариськыса эн ветлы
ни.
Эх, шакшыос!.. Таӵеос
ноку чагыр инме, кизилиос
доры, уз ӝутске, дыр, ноку
соос пӧлтӥ уз лобалэ. Озьы ик
ортчытозы улонзэс — зэмос
улонлэсь шӧмзэ но валатэк...
Жаль пото мыным сыӵе адямиос...
Кызьы меда юрттоно
соослы одӥг пол ке но кизилиё
инме ӝутъяськыны?
Соин валче нош ик син
азям пуксиз ӵыдонтэм муспотонэ
— Васса. Мылкыды
яратон тылӝуэн выльысь гомаськыса,
мон солы гожтэт
гожтыны кутски. Гожъян сяменым
со мыным вож-тӧдь
веськрес кызьпу тусбуё адскиз
но, мон соку ик кылбуре
выжи...
Ӧйтӧд, кӧня озьы гожъяськыса
пуки — учкисько но,
калык ӝукыр люкаське вылэм
ини... Турнасьёс но тырисьёс,
ог-огенызы тупаса, асьсэлы
нуллӥсь бырйыса, арама валлин
бӧрсьысь бӧрсе кошкизы.
Мон чидатэк возьмасько,
ку вуоз Васса. Гожтэтме но
берло кылбурме, тетрадьысьтым
кесьыса, куасалляй но,
солы сётыны шуыса, мукет
кисыям донги. Со Галяен ӵош
вуиз. Галялэн Тимурез Вылынгуртэ
кошкем. Соин ик со
Вассаен ӵош мон борды кариськиз.
Микальлэн уробояз
Катя вӧзы Эльза куриськиз.
Мон малпасько вал, Микаль
сое уллялоз. Ӧз но малпа. Солэсь
ортчыт, шумпотӥз кадь.
Васса Эльзалы котыръяса
вераз, Катялы, пе, мукет эш
шедьтом. Но Микаль шуиз,
ачид ке милемын кариськид,
мон соглаш, мукет — ӧвӧл...
Катялэн сотэк но секыт мылкыдыз
уката шуг луиз... Ма,
аслам но мылкыды куашказ:
мар вераськем со луоз, уромед
азьын ик уромедлэсь
нылзэ ас палад карыны турттон?
Мурт адями ке луысал —
номыре тодӥсьтэм яке номыре
шӧдӥсьтэм-валасьтэм...
Вассаен но Галяен куиньнамы
вераськыса, ми асьмелы
тырись ӧм басьтэ — соослэсь
турнамзэс мон ачим
тыро.
Озьы кенешыса, милям
но «экипажмы» арама пала
вырӟиз. Галя — уроммы ке но,
Вассаен ми артэ пуксьыны
ӧмгес дӥсьтэ — вискамы сое,
Галяез, пуктӥм. Васса эшсэ
кускытӥз ӟыгыртӥз, солэн
киыз дырын-дырын йӧтылэ
мынам гырпумам. Ныркогопоосын
уробоысь медам
усьы шуыса, Васса бур киыныз
мышлань пыкиськыса
мынэ. Чукин азьтӥ мон юри
мултэссэгес сьӧрлань кариськи
но солэсь пыкиськем кизэ
кырми. Соку ик пӧсь луиз
киыз. Мон сое ӧжытак ӝутӥ
но, кикураз гожтэтме поныса,
кырмытӥ.
Пичигес кыре вуыса, валмес
дугдытӥм. Нылъёс кусозэс
шуккыны кутскизы.
Котырак жин-шулдыр куара
шуккиськиз. Мукет турнасьёслэн
жингетэменызы огазеяськыса,
арамаетӥ номырин
ӵошатонтэм, аспӧртэмлыко
крезьгур тулкымаз.
Турнало но соос туж чебер.
Соку ик Кольцовлэн кылбурез
тодэ лыктэ. Только солэн
кылбураз пиосмурт турнась
возьматэмын. «Турнась
нылъёсыз но возьматӥсь
кылбур гожтоно вылэм», —
малпай мон. Но сыӵе кылбур
пӧрмытыса ӧй вутты — ваньмыз
сураськиз, быриз...
Мон тазьы ик шӧдӥсько:
гожтэтэ Вассалэсь кисы вадьсысьтыз
мугорзэ тылын
ӵушка ни кадь. Сыӵе потэ
ини гожтэтме, кылбурме
лыдӟемез! Кызьы ке юрттоно
вал солы. Кызьы нош? Амал
шедиз: кӧня ке турнамзы
бере шуисько, вай, пӧй, мон
но турнаса адӟо.
Турнаны кутски гинэ —
Васса, «эмезь ӧвӧл-а меда»
шуыса, арамае пыриз... Сюлмы
шугъяськыны ӧдъяз: мар
шуоз ини, кызьы учкоз гожтэме
шоры?
Кӧчырыны 1 — выльысь
чылкыт гожъяны.
________
Азьланьтонэз вуоно номерын.