38 от 29 сентября 2022 (25950)

udmdunne.ru
+7 951 195 37 65
ЛЫДӞИСЬКОН СИГ
№38 (25950)
2022-тӥ ар 29-тӥ куарусён 27
Коковяк Борис но пинал
дыръяз ӵем пыралляз.
Та виысь Итёк Вужгуртлы
гужем азелы возьмаськисе
медъяськылэ, кут но отопки,
песьтэр но мар кутаса пукылэ,
дырын-дырын скрипкаез
котыре вутскылэ. Кузь толъёсын
солы мукет уж утчаса ветлоно
луэ — огезлы кутсаськыны
мынэ, мукетызлы пу кора,
кор ворттэ. Огарын быдэс тол
ӵоже ужамез понна солы кузёез
сыномем пыӵал сётэм,
пыӵалэныз Итёк трослы уг
люкиськылы ни. Великтэм
нунал азьын но бадӟым сюрес
урдсытӥ пыӵалэн ик вамышъя
вал. Отысен Коковяк
Борисэн пумиськиз.
— Митрофан Кондратьич!
Здравствуй!
— Умой, Кузьмич! — пальпотыса
вазиське Итёк. Ай со
шоры, величать карыса, улытозяз
вазьылӥсь ӧй на вал. —
Кемалась ни адскем.
Вераськыны канава дуре
пуксизы.
— Кыӵе-мар улӥськод? —
Борис кылпум поттэ.
— Улӥсько ай каллен...
— Улэмед ушъямон ӧвӧл,
удгес валаськы тон, — ӝотрес
вера Борис. Тани ми со улонэз
воштыны турттӥськом.
Начальство виноват, урод закон
поттэ. Ми сыӵе законлы
пумит.
Кылзы тупаз кадь, нош Борислэсь
троссэ верамзэ Итёк
уг вала, — йыр берытске, пороме,
оло, дунне но йырин уллань
луиз.
— Я, адскеммы пумысь
нокинлы эн поттылы, —
кизэ сётэ Борис, канава дурысь
султыса.— Мултэссэ но
шедьтӥ, лэся, вераны.
— Уг, уг зульы... Итёк зулись
ӧвӧл.
— Адӟыса но адӟылымтэ
мед луоз.
— Инмар понна, кылме но
уг поттылы.
— Оскисько тыныд, Митрофан
Кондратьич.
Люкиськизы. Коковяк Борис
Вужгурт пала вамыштӥз,
Итёк кема сылӥз на интыяз
ик: бадӟым малпаськон пыриз
солэн йыраз.
Тӥни собере Борис вуылӥз
ини бубиз доры.
Сьӧд нюлэскын
Коковяк Борислэсь Вужгуртысь
уйин кошкемзэ тодӥськом
ини. Нуназе ёросын
великтэм нуналэ со сюрес
кузя Ойыл нюлэскы пьгре.
Отын ик аслыз ӵогӟон шедьтэ.
Кудӥз лекос суровой критикъёс
авторез янгыше уськытыны
выро: малы, пе, революционной
героез озьы,
соин тодматэм бере ик, быдтыны
кулэ, сое, пе, романлэн
кутсконысеныз пумозяз
пырак героен, вормисен возьматоно,
солэн ӟеч ужъёсызлы
синмаськытоно. Авторлы но
революционеръёс быро ке,
туж жаль потэ, сюлэмез сыӵе
ивор кур-кур сюпсе. Нош
ма карод, — революция ужпумын
кудӥз бырыны шеде
бере. Куддыръя чик малпантэм
шорысь, нодтэм учыре
сюрыса, быро. Тани большевикъёс
пӧлын Камо 1 быдӟым
революционной герой вал, —
кыӵе гинэ вожъяськымон
ужъёсты со ӧз лэсьтылы, кыӵе
гинэ шуг-лекысь ӧз потылы!
А вот олокызьы шораз автомобиль
кемдӥз но лёгаз. Камо
— сӥё-дано большевик вал, со
сярысь гожтэмъёс вань ини,
азьпалан но трос гожтозы на.
Озьы угось, сьӧраз ортчем
критикъёслэн малпамзыя
вольытэн гинэ улон уг ортчы,
улонлэн туж уно пӧртэм
шекъёсыз пумиськыло.
Тае но одӥг кутскемен вераломы
на: Коковяк Борис
большевик ӧй вал, со террорист.
Революция ужпумын
шонер ужаны валамтэенызы,
соос уката трос бырылӥзы.
Вань выремзы, сюлмаськемзы
соослэн буржуазной революция
пумысь вал, удмурт
гуртъёсын но соослэн уж бервылзы
шӧдскылӥз.
Табере Коковяк Борислэн
сьӧд нюлэскын быремез сярысь
гожто.
Извыл гуртысь Ларивон
пиос, Микворен Пролэн, Банигуртэ
куное потӥллям.
Быдэс гуртазы ик та узыр
крестьянъёс дасяз улонэз яратэменызы
тодмо вылэм. Котькытын
уж подряд куто, собере
бускель калыксэс медъяса
ужато, асьсэлы бадӟым пӧл
усе. Али но соос Банигуртысь
кузёен вераськыны мыно,
праздник вылтӥ юон сямен
выль подряд уж кутыны малпало.
Нюлэсэтӥ нӧд сюрес
кузя мынон сяменызы соос
Коковяк Борисэз суто:
— Нуэ монэ валэныды
Чупчи станциозь, — Борис
ассэ нуыны ӵектэ.
— Валъёслы секыт луоз,
сюрес урод.
— Туннэ ортчись поездэ
мон дыртӥсько. Валэн мынытэк,
пыдын уг вуы, дыр.
— Ӟеч ке сётӥд дунзэ, нуомы,
иське.
— Кӧня ке куриды, сомында
тыро.
— Али ик кык манеттэ сёт.
Коковяк Борис коньдонзэ
поттыны ӧдъяз вал но, бумага
уксёез тросэн-тросэн бинемын.
Одӥг бинетсэ кисыысьтыз
поттытэк амалыз ӧз луы.
Пролэн Микворен ваче пумит
учкизы, кыл поттытэк, огзылы
огзы малпамзэс синмынызы
возьматӥзы. Борис кык
манет сётӥз но уробое пуксиз.
Короблы кузяна выдыса,
мынон куспын со нырулыны
кутскиз. Миквор уробоын
пукыны уг чида, уробо урдсын
вамышъя. Короб берысь
тӥрез каллен пертчиз, собере,
кема ӝегатскытэк, Коковяк
Борислэн йыраз ӵогиз. Борис
уробоысь тэтчиз на вал, Прол
со вылэ гозы кыӵ куштӥз. Выронзы
трос ӧз луы ни: вир вияса
кошкись бадӟым мугорез
Миквор тӥреныз кора, юдэ.
Озьы, Борисэз быдтэмен,
Коковяк Кузьмалэн арен-арен
шыръяса люкам коньдонэз,
киысь кие вошъяськыса, Ларивон
Микворлэн кисыяз
ӝимиз. Вием муртсылэсь
шӧйзэ Ларивон пиос лулпу
пӧлы пыртӥзы, лысъёсын шобыръязы.
Йыружзэс вераськытэк быдэстӥзы.
Борислэн пистолетэз
пумысь гинэ ымзэс усьтӥзы.
— Ма карод соин, — Микворез
пыке Прол. — Эн басьты
кивалтоссэ.
— Кивалтос котьку яралоз,
— пистолетэз короб пыдсы
куро улэ донгиз Миквор.
— Токма сюрод соиныд, —
куалекъяны кутске Прол.
— Асьмелэсь утчаны уз но
малпалэ, — шуэ Миквор. —
Быдэс уездысь калык асьмеды
тодэ.
— Бен почётэд ке возьмаз...
— Возьмалоз.
Быдӟым праздник нуналэ
та нюлэскытӥ ветлӥсь адями
уг пумиськылы. Сьӧд нюлэс
чал-чал сылэ. Кытысь ке кыдёкысь
кырныж куара гинэ
чузъяське, со сяна, одӥг-ог
мӧйы пипу ӟукыръя. Со но
Микворен Пролэз шуэктытэ.
Ларивон Микворлэн выросэз
котькытын одӥг кадь:
кышкыт, шимес. Берланесэз
солэн семьяезлы но ӵем
йӧтылэ: кышнозэ тышкаменыз
жуммытӥз, кулэм кышнозэ
мукетыныз кышномуртэн
воштӥз. Туж уг яраты со
Испира нимо сюрпизэ, нош
соиз курегез но вандыны
кышка, мумизлэн кадь ик небыт
сямыз. Уроболэсь виресь
луэмзэ адӟыса, Испира чылкак
паймиз. «Сӥль ӧз ворттэ кадь
тарантасын, — малпаське со,
— нош малы та вирен наштамын».
Собере кӧлан кеносысь
син шораз пистолет йӧтӥз, кудыос
пулсы донгемын вылэм.
Оград Микворен Проллэсь
уксё люкемзэс адӟыны кемдӥз
на. Прол ӵыж ӵыжектэм, киосыз
куалекъяло.
— Коньдонэз яратӥськод
бере, вирлэсь эн кышка, —
зуркак вера Миквор.
— Медаз тодэ вал, — каллен
вазе Прол. — Адями вир
кӧбератэ.
Тае кылыса, Испиралэн
мугорыз ик йӧӟектӥз. Нуналъёс
ортчемъя малпаськон
уката пыдло пыре:
«Та сюрбубы вылэ чагиськоно
оло шай, вань ик, лэся,
курбонзы».
Пистолетэз азьло интыысьтыз
учкыны кенсы пырем вал
но Микворен пумиськиз.
— Ма тыныд кулэ? — кеськиз
шораз Миквор. — Кытчы
нырдэ месӥськод — кулэтэм
азе?
Испиралы кенсысь ӝогак
потоно луиз.
«Та, мурт пи — пи уз луы
ни, сюрес вылысь утялтоно»,
— таӵе малпанэз Микворлэн.
Йыраз мерскем малпанзэ
со уж вылын быдэстэ.
— Ойдо, Испира, туннэ сетен
чорыганы мыном, — ӧте
сюрпизэ.
Соиз шурк-шарк гинэ сеть
но мар бинялтӥз но песьтэре
нянь понӥз на.
— Няньдэ кельты, кулэ уз
луы, — вера Миквор.
Испира абдраса учке Миквор
шоры.
— Бен шур вылэ мынон
кыдёкын ук.
— Я, иське, басьтод ке,
басьты.
Испира, сетьсэ пельпумаз
ӝутыса, ульча ӟезьы пала мыныны
кутскем вал.
— Бакчаетӥ потомы, —
дугдытӥз сое Миквор. — Ма
токма калык мынэммы шоры
жальмалоз.
Лоза шур дуре вуэм беразы
ик Миквор Испираез мур
коже донгиз. Вуысь уяса потэменыз
йыр тышказ но, суйёсаз
но зырын шуккылыса
зымытӥз.
Сюрпиез ышем сярысь
Ларивон Миквор ачиз ик бускеляз
ялӥз. Утчазы-маразы
но, Испиралэн шӧйыз ву вылэ
лӧптэм бере сое шедьтӥзы.
— Ох, тӧрнам ук та!
Такем шурдыт уж бервыл
Микворез нокӧня но ӧз
кушектыты. Солань-талань
супыльтон кылпум бускель
куспын потаз ке но, Микворлэсь
ужзэ урядник кысӥз:
узыр Миквор кулэ дыръяз
кузьмаськыны быгатылэ вал.
Испиралэсь йыр пыктэмзэ
шӧдэм вылысь но шӧйзэ ӧз но
шырылэ, маин быремзэ ӧз но
утчалэ. Миквор сюрпизэ ачиз
ик шайвылэ ватӥз.
Бугыръяськон
Японь, пе, асьме вылэ войнаен
лыктэ, — сыӵе шимес
ивор вӧлдӥськиз гуртъёсы.
Аранзэ калык аналтӥз: запасной
солдатъёсты армие
келяно. Ульчае потэм пересь
Зымыр Степан но калык пушкын
вераське:
— Да, ветлӥськиз войнае.
Турокъёс вылэ нуллӥзы. Пукиськом
Дунай дурын. Гып!
усиз пыд вискам снаряд.
Мон сое сэрытак ӝутӥ но вуэ
куштӥ. Вуэз-а бадӟым ӧвӧл!
Ӵапак Чёрной море! Сомында
вуэз снаряд пазьгиз ук!
Пуштӥз ке пуштӥз! Монэ но,
эшъёсме но гылтыса шуре нуэ
ини. Нош ик выльыз снаряд
усиз. Пуштӥз но, музъемез
бугыртыса, гурезь ӝутскиз...
— Кутскиз, лэся, нош
лӧптылыны та лёго бам, —
шуо ортчись муртъёс. — Соин
йырин-а та виысь.
Бамаз потэм лёгзэ но Зымыр
Степан турецкой войнаын
шедьтэмен вера вал,
туроклэн пуляез, пе, отчы
мертчыса азӥз. Таизлы коть
нокин оскись ӧз луылы: витькуать
ар талэсь азьло гинэ со
лёгтэк ветлӥз на, собере маке
потос пӧрмиз.
Вужгуртысь Лука Иванэн
Кедра Осьыпен запасной солдатъёс
арлыдзыя войнае мыныны
тупало. Соослэн коркаосазы
ӵаш потто: кырӟало,
бӧрдо, кылбурало.
— Э, шедьтӥллям куректон!
— буйгатыны вырисько
каре пересь Степан. — Турокъёс
ма быдӟаесь, и то ӧм
сётске. Японецъёс пичиесь
гинэ, шуо. Мынысал ке, ваньзэс
ӵыжаса пешкытъясал.
Войнае ӧтён повесткаос
быдэс волостьын сётъямын
ни. Келяно калыкез гурт пуме
поттыса, отын бӧксӥсь попъёс
молебен ортчыто. Вӧсяськись
калыклэн урдсаз, пиналъёссэ
ӟыгыръяса, вешаса, пиосмурт
пуке, алигес гинэ солэн
кышноез кулӥз, аслыз
тани гуртысь потоно усиз.
Кин утялтоз на пиналъёссэ?
Сьӧрлось лыктэмын со татчы,
казна тэль возьмасьын улӥз,
родняез татын ӧвӧл, матысь
калык со шоры йыркурен учкылэ
вал — троссэ казна тэль
корамен кутылӥз. Уг бӧрды
со, юэм шӧмыз но уг шӧдскы,
ымнырыз туж юн сюлмаськонэн
пумемын.
— Государь понна, православной
вера понна быремъёс
святое потозы, — вуэн пызйылыса,
валэктэ Микола поп. —
Эн куректэ, ми татын тӥ понна
Инмарлы вӧсяськемысь ум
дугдылэ.
Мобилизовать каремъёс
пыдесъяськыса-пыдесъяськыса
вӧсясько, мудорез, киросэз
чупало, маке чудо луонлы
оскыса кадь, поплэсь но киоссэ
нялтас нюлыса ортчо.
— Калыкез нуо ке, нуо
ини, я, — киоссэ вӧлъяса ветлэ
Извылысь Исак. — Монэ
нош ма понна басьто? Одӥг
валэ но, скалэ но ӧвӧл, юртэ
но ӧвӧл. Кинлэсь мае мон
возьмалом? Ай бен вылаз
ик висисько ук мон.
Тани татын сюлмы висе, —
возьматэ со мӧля шораз, каллен
кӧс кызйылыса. — Тыэмусэ
но сисьмыса быре ини.
Камо 1 — революционербольшевиклэн
С. А. Тер-Петросянлэн
кушем нимыз.
Азьланьтонэз вуоно номерын.