bereket №9

ГИДКУАЗЬЫН
№39 (25951)
2022-тӥ ар 6-тӥ коньывуон 17
Аспӧртэм выжы
Арбыт пузась ӵӧж
Вотка ёросысь Первомайской
черкогуртысь
Вячеслав Иванов ог
30 арзэ ни мускусной
ӵӧжъёсты вордэ.
Аспӧртэм ӵӧжъёс Вячеслав
Семёновичлэн азбараз
Ростов улосысь вуизы: эшез
кузьымлы шуыса, мумы но
айы тылобурдоосты вуттӥз.
В. Ивановлэн, пудо эмъясь ке
но, горд син котырен лоп-лоп
ӵӧжъёсты адӟылэмез вылымтэ
на.
— Тылобурдо вордо шуыса,
ӧй малпалля, — вера
Вячеслав Иванов. — Черкогуртысьтымы
1 сюрс пала
улӥсьёс пӧлысь 20 процентэз
гинэ на курег вордо, ӟазег,
ӵӧж сярысь веранэз ик ӧвӧл.
Пудо бордаз бине угось:
сюдыны, утялтыны кулэ.
Нош магазинысь дась сӥль
басьтӥд, пӧзьтӥд но — ужез
быриз.
Но кунянэз сярысь,
ӵӧжъёсты будэтыны капчигес.
Сӥль кулэ луиз — вандӥд,
возён интылы уд ёрмиськы.
Мон 1993-тӥ арысен семьяме
ӵӧжен сюдӥсько — пыжыса
но, лымын пӧзьтыса но туж
ческыт.
Мускусной мумы ӵӧжъёс
курег быдӟаесь гинэ: 1-1,2
килограммозь будо, айыосыз
3 килограммозь вуо.
Сӥльзы горд, ческыт. Кылсярысь,
пекинской ӵӧжлэн
чиньы зӧкта кӧйыз люкаське,
ветлыны ик курадӟе, нош
таизлэн кӧйыз ӧвӧл. Мукет
тылобурдоос пумтэм сисько,
нош мускусной ӵӧж будытозяз
гинэ зол сиське, отӥяз,
аслыз кулэ луымон сектала
люкамез бере, диетае пуксем
кадь, тыпак сиськемысь
дугдэ. Пичиен-пичиен гинэ
на кокчаське. Ачим но талы
нырысь пайми вал. Эше
ӵӧжъёссэ вайиз но, кар лэсьтытозям
шуыса, атай доры
утялтыны нуи. Кӧня ке нунал
ортчиз но, жингыртэ:
ӵӧжъёстэ кут, кулыса бырозы
ни, номыр но уг сиё. Табере
та сямзэс тодӥськомы ни.
Вячеслав Семёновичлэн
уллёяз ог 100 йыр ӵӧж. Нырысь-валысь
секытгес вал
вордыны. Ваньмыз вордэмъя,
дышемъя пӧрме угось.
— Нырысетӥ араз ӵӧжпиос
туж лябесь вордскизы, уноез
пузаз ик ӝоказ, — шуэ пудо
эмъясь. — Маке умойтэм та,
рос-прос утялтэм вылысь
озьы луыны кулэ ӧвӧл. Эшелы
жингыртӥсько: тон одӥг
уллёысь мумы но айы ӵож ӧд
кузьма-а? Одӥг айы-мумылэсь,
пе. Сыӵе дыръя котькызьы
курадӟы но, тылобурдоос
ӧлексы кадь вордскозы — выжызы
матын. Палэнысь айы
Мускусной ӵӧжъёс трос уг сисько.
ӵӧж басьтӥ но, соку ик таза
ӵӧжпиос ӵогиськизы.
В. Иванов мускусной
ӵӧжъ ёссэ курегъёсын артэ
возе — уг жугисько. Ӵӧжъёслэн
куара-лангазы ик ӧвӧл
— сямзыя лякытэсь, шыпытэсь.
Соос, курегъёс сямен
ик, арбыт пузало. Пузъёссы
курегпузлэсь бадӟымесьгес.
ческытэсьгес, но пӧзьтыса
кӧня ке кӧсгес луо.
Мумы ӵӧжлэсь ӟеч анай
пӧрме: пиосыз понна йырзэ
но быдтоз. Ог 20 пуз вылын
35 нунал пуке. В. Иванов
ӵогиськем ӵӧжпиосты 1-2
нуналлы лампа улэ понэ, юнмамзы
бере ни мумызы борды
берен лэзе — анайзы мурт
уг кары. Нырысетӥ нуналысен
тари кеньырен сюдыны
ӧдъя.
— Ӵӧжъёс туж ярато турынэз,
— вера Вячеслав Семёнович.
— Соин ик толалтэлы
одно ик турын дасясько,
азьысьтызы но пыд улысьтызы
ноку медаз бырылы
шуыса. Асьсэлы кулэ луись
микроэлементъёсты отысь
шедьто. Озьы ик куалялюльыосты
пыргытыса сётъясько
— мугоразы кальций
уг тырмы ке, сьӧдун (рахит)
кылё, артрит, артроз кутске.
Чабей но азьысьтызы
уг бырылы. Комбикормен
но сюдыны яра, озьы ӝоггес
будозы, но комбикорме оломае
но кулэтэмзэ тыро бере,
соин сюдэм уг поты. Аслад
лэсьтэм сиёнэд ик оскымон,
сӥль но ческытгес луэ.
Ӵӧжъёс кезьытэз но мускытэз
уг ярато — черлало.
Соин ик котьку чаклано, улзы
кӧс но шуныт мед луоз шуыса.
Огпол пиосмуртлэн уллёез
трос люкаськиз, гидын
интыез ёркытгес, улзы котгес
луиз, ӟырт кезьытэн пыдъёссы
кынмизы. Кынмемъёссэ
вандоно луиз.
Мускусной ӵӧжъёсты будэтонлэн
капчиез — соослы
ву трос кулэ ӧвӧл. Юыны,
кӧня ке жомбылляськыны
ӝыны метр кузьда тусь
тырме. Мукетъёсыз ӵӧжъёс
ӵыпеттэк висьыны кутско,
пыдъёссы быро. Нош таосыз
пыласькытэк но улыны
быгато. Зэм, лобаны ярато.
Вячеслав Иванов верамъя,
мумы ӵӧжъёс сиськемысь
дугдо ке, со луэ ог 4 толэзьсказы,
бурдъёссэс эскерыны
кутсконо ни. Капчиесь
бере, капка, липет йылтӥ но
лобӟыса кошко. Айыосыз секытэсь,
ӝутӥськыны уг вормо.
Куд-ог кузёос бурдъёссэс
вандыло ик, нош Вячеслав
Семёнович жаля — берен
бертозы, котькинлы дорез
мусо, шуэ.
— Туала вакытэ ӟичыос
кышкыт луэмын, — лулӟе
Вячеслав Семёнович. — Берло
дыре соосын воксё нерад
луиськиз ни. Сыӵе умой
кенераськи кадь, нош ӟичы
олокызьы виссэ шедьтэм, огкутскемаз
кӧня ке ӵӧжелэсь
йырзэ сииз. Соин ик ӵӧж
вордӥсьёслы сак кариськоно,
оло, котыразы пуны но
думоно.
Сӥзьылзэ воргорон ӵӧжъёссэ
теплицае интыяз. Татын
тылобурдоослы майбыр: тӧл
уг йӧты, шуныт. Нош толалтэлы
кар дася ни. Табере
ӵӧжъёстэк улонме син шорам
уг пуктӥськы ни, шуэ. Тылобурдоен
азбар ик шулдыр.
________
Елена САРАМАТОВА
Вячеслав Ивановлэн архивысьтыз
Така кадь кролик
Вотка ёросысь Вылӥ Талица гуртысь Валентина
Смольниковалэн азбараз така (баран) выжыысь ог 100
йыр кроликъёсыз.
Валентина Михайловна животъёс котыре пичиысен
кыстӥське ни. Пӧйшурась атаез сьӧрысь ноку ӧз кыльылы.
Азбар буш шуыса, арлыд люкамъяз сюлэмыз шуг луылӥз.
Соин но 2016-тӥ арын кролик вордыны ӧдъяз. Ошиськем кузь
пелё, такалэн кадь паньгам но паськыт ымныро животъёслы
синмаськиз. Чагыралэс-пурысь буёлоесь, мусоесь...
— Така выжыысь кроликъёслэн мугорзы бадӟым, — шуэ
нылкышно. — Вордскемзы бере 5 толэзь ортчыса, сиыны дась
луо ни. Нош кыӵе мылкыд сёто соос! Нылпиосы котырысьтызы
уг кошкыло. Кроликъёс но ӟеч мылкыдын лыктэмез шӧдо.
Шуисько: пичиоссэ йӧтылыны уг яра, анайзы куштоз. Интыысьтызы
но вошъяськомы, кутылӥськомы но — нокин нокинэ
ӝож уг кары. Гидысь ӧсэз усьтӥськод гинэ, асьсэос ӧс доры
тэтчаса лыкто, вешатэмзы потэ.
Уноез кролик вордӥсьёс 1 толэзьем кроликъёссылы пӧртэм
висёнъёслэсь вакцинаос пуктыло. Кылсярысь, геморрагической
лихорадка туж кышкыт луэ — огез черлаз ке, быдэс уллё
быроз. Но одӥг пол пуктӥд ке, сое весь пуктылоно ни. Зэм,
ёросын та ласянь югдур кышкыт ӧвӧл, вакцинатэк но будэтыны
луэ. Валентина Михайловна ачиз пудо эмъясь-биолог луэ
бере, пелёоссэ сак эскере. Шуэ:
— Воксё эмъюмъёстэк нокызьы но уг луы. Кроликъёслы
одно ик кӧлъёслэсь но кокцидиоз висёнлэсь эмъюм сётъяно.
Сотэк лябӟозы но бырозы. Умой сюдоно. Бакча сиён, ю тысь
сяна, одно ик нуналлы быдэ турын сётъяно. Вож-вож турынэз
каразы пыртыны уг яра — кӧтсы сӧриськоз. Шунды шорын
куасьтэм бере гинэ сётыны яра. Нош толалтэлы пипу вайёсты
веник лэсьтыса дасясько, син куспын йырйыса быдто: микроэлементъёс
шедьто, ӝушсэс юнмато, пиньзэс шеро. Кин ке
бадьпу ньӧр но дася, но тазэ сокем уг ярато.
Валентина Смольникова пусъемъя, кроликъёсты огазьын
но, клеткаосын арлыдзыя висъяса но возьыны луэ. Ваньзы
ӵош уло ке, айыоссэ одно улошоятоно. Адямиос ӟеч выжыысь
кроликъёс басьтыны туртто, но сыӵеосыз котьку ляб луо, угось
матысь ӵыжы-выжыоссылэсь поттэмын. Нош сураськем виро
животъёс юнгес, лякытгес сямо луо.
— Висьыны кутскемзэ катьяны туж секыт, — пусъе Валентина
Михайловна. — Черламез соку ик сиськемысь дугдэ, сэргы
ӝиптӥське, гонэз пуштырске. Сыӵе кроликъёсты соку ик
висъяно. Яратэмез туж шӧдо: вордыны-утялтыны мылкыдыд
ӧз луы ке, одӥгтэм бырозы.
________
Така выжыысь кролик бадӟым будэ.
Елена ФЁДОРОВА
Валентина Смольниковалэн архивысьтыз