5.Gemeinde Aktuell - Marktgemeinde St.Martin

46
am nächsten Tog haums mit de Händt –
d´Gowe, de haums a vawendt –
´s Fuada ausanaundagstraht,
und vorher haums schau fünf Stund gmaht.
Hots net gscheit gheigt und nix geht weida
haums Kleehifön und Schwednraida
zan händisch aufhenga hergnumma.
Woa daun auf d´Nocht die Oawat uma
daunn san nu d´Sensn dengöt wordn –
und nächstn Tog geht´s au va vorn.
Mah und umkehrn, umkehrn, mah,
jo, und ´s Eifi ahrn kummt daun a.
Hats guat gheigt, woa ´s Weda gscheit,
daun woas noch zwoa, drei Tog soweit:
Zeuln san gmocht wordn nochanaund,
am Loatawogn haums d´Roß ei´gspaunt,
und daun haums aufglegt, händisch, kloa,
und de, de aufn Wogn obm woa,
hat d´Fuahr gfoßt und fest niedertaucht –
und daun haums nu an Wischbam braucht,
damit des Gaunze howat wird
und dass ma jo koa Hei valiert.
Im Stodl haums de gaunze Fuah
aufi am Heibodn – händisch nua!
Mah und umkehrn, d´Soch aufl odn,
und alle Tag soll ´s Weda grotn.
Vom Morgngraun bis spot in d´Nocht
haum´s d´Heioawat va domois gmocht.
Drei, vier Wocha Heigarei –
am Pederstag solls umi sei!
Za unsara Zeit jetzt, Jessas na,
wauns do nu so wia friaha wa,
des dapockatn vü net laung,
olle wurtn sterbnskraung.
Oba redn ma nimma weida –
i glaub, d´Heioawat va heit is gscheida!