Wöör vörweg - Quickborn. Vereinigung für niederdeutsche Sprache ...

Rezensionen
HÖRSPILL
Ünnerwägens in Vörpommern
In’n Juli weer bi NDR 90,3 wedder de
plattdüütsche Krimi-Rehg ”Schnappschuss”
an’n Törn. Kunstfotograf Lüder
Andersen (Wilfried Dziallas) feuhrt in
”Graww in de Dannen” op’n Darß na
Vörpommern. He will Fotos för en Bildband
”Bizarre Bäume” scheten. Bizarr
is an’n Anfang bloots sien Ex-Fro Marianne
(Uta Stammer), de egaalweg op
Lüder sien Handy anropen deit. Lüder
lannt in en Kroog, wo jüst en Jagdsellschop
in versammelt is. Nüms weet,
worüm Hugo Knieper vun’n Vörstand
nich kamen is. Lüder kennt Hugo Knieper,
se weern in Hamborg Schoolfrünnen
wän, vör de na de Wenn mit sien
Fro Doris na Vörpommern güng. Wo ik
mi jüst in düt Flag rümdrieven do, kann
ik je de beiden beseuken, dinkt sik Lüder.
He geiht ok hen, man bloots Doris
(Anke Korf-Neumann) is bihuus. Ehr
Hugo is op Reis gahn, wo lang, weet se
nich. Un se sülven hett keen Tied, op’t
best schull Lüder wedder verswinnen.
Lüder feuhlt, dat Doris em wat verswiggt.
As he för sien Knipseree in’n
Woold feuhrt, drüppt he dree Mannslü.
He verstääkt sik, kann aver jümehr
Stimmen hören. Se hebbt enen doodschaten,
un annern Morgen wüllt se em
in‘n Woold inkuhlen. Lüder meent, dat
kann bloots Hugo wään, un markt sik
de Stä. Man ok de Polizei hett wat snuppert
un dükert bi Doris op. Se fraagt,
wat se Lüder kennen deit un wat de
beiden maal wat mitenanner hatt harrn.
Doris mutt togäven, dat se em kennt,
un so kummt bi de Udels de Verdacht
op, dat Lüder de Mörder is.
78
Lüder un Marianne, de em intwüschen
na Vörpommern achterherfeuhrt is,
wüllt nu sülven de inkuhlt Liek utbuddeln.
Wat se dor finnt, is aver nich
Hugo, sünnern de dode Hund Hektor.
Oplest warrt se künnig, dat Hugo, de
nienich wat anbrennen lett, wat mit en
smucke Fro hett, de köttens na hier trocken
is. Ganz säker hoolt sik de beiden
in de Jagdhütt op, de Hugo faken maal
opsöcht. Se feuhrt tohoop mit en poor
Jägers hen. Ton Vörschien kummt Doris,
dat Gewehr höllt se in ehr Hand.
Woso se ehrn Mann doodschaten hett?
Dat seggt se nich. ”Ji sünd je Keerls, dat
verstaht ji doch nich.”
Dat Enn hett mi nich överrascht. Al an’n
Anfang, as Doris ton eersten Maal ehrn
Mund opmaakt, ahnt wi, dat mit ehr
wat fuul is. Liekers is dat Hörspill kommodig
antohören, ok wägen de goden
Platt-Spräkers Wilfried Dziallas un Uta
Stammer. Good finn ik ok, dat all Rullen
vun de Lü ut Vörpommern mit
Mäkelborger Plattsnackers besett sünd.
Thema sünd ok Ossis un Wessis, un
hier kummt dat een oder anner Klischee
vörtüüg: De ”Bonzen”, de op
Staatsjagden dat Wild afknallen dään,
de Stasi-Mann, de na de Wenn sien
Bahntje quiet wörr, un de dösige Ossi,
de bi Hamborg Arbeid bi ”Fürst Bismarck”
fünn un dach, he kummt wohraftig
na en Förstenhoff un nich na en
Fabrik, wo Mineralwater in Buddels
affüllt ward.
Dat Hörspill hett mi nich jüst vör Spannung
in’t Radio krepen laten, man all
in all hett mi dat doch gefullen.
Manfred Brümmer: Dat Graww in de
Dannen. Schnappschuss-Krimi. Radio
Bremen und NDR 2002. Regie: Hans
Quickborn3-09-Druck 78
07.09.2009, 10:50 Uhr