Melion and Biclarel - University of Liverpool

Two Old French Werwolf Lays
136 Et il s’en fuit, le col baissié.
.I. escuier o lui avoit
Ki son bercerië portoit.
En une lande sont entré.
140 En .I. buisson a regardé;
Un molt grant cerf i voit estant.
Sa feme regarde en riant.
‘Dame’, fait il, ‘se jo voloie,
144 .I. molt grant cerf vos mosterroie:
Veés le la en cel buisson.’
‘Par foi!’ fait ele, ‘Melïon,
Sachiés se jo de cel cerf n’ai
148 Que jo jamais ne mangerai.’
Del palefroi chaï pasmee, f. 343r col. 4
Et Melïons l’a relevee.
Qant ne le pot reconforter,
152 Molt durement prist a plorer.
‘Dame’, dist il, ‘por Deu merci,
Ne plorés mais, jo vos en pri.
J’ai en ma main .I. tel anel;
156 Ves le ci en mon doit manel.
.II. pieres a ens el caston:
Onques si faites ne vit on;
L’une est blance, l’autre vermeille.
160 Oïr en poés grant merveille:
De la blance me toucerés
Et sor mon chief le meterés
Qant jo serai despoilliés nus,
164 Leus devenrai, grans et corsus.
Por vostre amor le cerf prendrai
Et del lart vos aporterai.
Por Deu vos pri, ci m’atendés
168 Et ma despoille me gardés.
Je vos lais ma vie et ma mort:
Il n’i auroit nul reconfort
Se de l’autre touciés n’estoie;
172 Jamais nul jor hom ne seroie.’
Il apela son escuier,
Si le commande a deschaucier.
Cil vint avant, sel descaucha,
176 Et Melïon el bois entra.
Ses dras osta, nus est remez,
De son mantel s’est afublez.
Cele l’a de l’anel touchié
180 Qant le vit nu et despoillié.
58