Il Cinghiale Corazzato - Comunità Antagonista Padana

EL 5 SETTEMBER
In tra i tant moment che gh’ann segnaa
la Stòria della nostra Insubria, bei
ò grammi, el pussee important le debon
quell che se festeggia in del 5 de
settember: quand che’n del 1395 el
Gian Galeazz Viscont l’è diventaa officialment
Duca de Milan, Princip del
Sacro Roman Imper, Vicar Imperial e,
in del 1397, Duca de Lombardia.
Ma pròppi per podè serbà la memòria
de quest grand dì, l’è mej vedè come
Milan l’è passada da vess on important
monicipi a on docaa imperial.
Per comincià gh’emm de dì che, in
principi, la dinastia dei Viscont l’era
minga l’uniga destinada a regnà su
Milan, gh’eren anca i Della Torr. I
primm i eren Ghibellin, i segond Guelfi.
Semm in del 1262 quand che’l Papa
Urbano IV decid de fà diventà Ottone
Viscont arcivescovv de Milan, e allora
la reazion dei Della Torr la sarà dura
debon. Come mai, l’Ottone Viscont,
de famiglia ghibellina e minga nunch
che semm guelfi? In di ann che i vegnen
i òmen di questi scior, i se pichen
e i se mazzen per be, fin quand, in del
1277, il vescovv Ottone sgavezza ona
vòlta per tucc i sò nemiss a Des, anca
se l’ultima vera battaja l’è quella de
Castelsevar (1287).
Allora’l vescovv Ottone voeur perd
minga temp e, pròppi in del 1287, fa
diventà Capitan del Pòpol el so neoo
Mattee, tri ann dòpo el vescovv se
ritira de la politiga.
El finirà i sò dì a 88 ann, in quell de Ciaravall.
El Mattee, dopo avè sistemaa
alter problemi con’t i Della Torr, el diventa
primm Signor de Milan con’t el
titol di rettor vitalizzi e vicar imperial,
titoi conservai dai so successor.
Con’t el Mattee comincia el proggett de
unificà la Lombardia.
Dòpo la soa mòrt, sto mestè chi l’è passaa
in di man del sò neoo Azzon Viscont.
Nel 1332 se forma ona sòrta de trionviraa
con’t i du fioeu de Mattee, che de
Azzone i eren i zii: Luchin e l’arcivescovv
Gioan.
El Gioan l’è staa quell che ha vengiuu
contra i Scaliger de Verona e che s’è
majaa Genoa e Bològna; a Luchin va
reconossuu el merit de avè trasformaa
Milan in’d ona dominazion territorial ròbusta
e, come vedaremm, destinada a
on gran destin.