Rapport da gestiun e quen 2011

Ambient
Serenera e canalisaziun
Igl onn vargau ei la sanaziun dalla serenera ida vinavon
tenor il program. Igl ei vegniu remplazzau bia cundrezs
tecnics, pumpas ed indrezs da mesiraziun e pilotaziun.
Las lavurs da sanaziun han buca saviu vegnir terminadas
sco previu. Las lavurs vegnan denton finidas igl onn
2012 aschia che la serenera communala a Prau Cumin
ei actualmein sin in fetg bien stan e corrispunda allas
pretensiuns dil cantun.
Tier la canalisaziun communala eis ei vegniu megliurau
igl onn vargau differentas lingias existentas. A Rueras ei
la lingia d’aua schubra naven dalla Via Pazzola entochen
giu ella Via Milar vegnida construida da niev. La
lingia d’aua tschuffa dado il baghetg agricol da Daniel
Monn ha stui vegnir disloccada pervia dall’engrondaziun
dil baghetg. A Sedrun ei la lingia dalla canalisaziun
dadens la mazlaria Curschellas siadora vegnida remplazzada
diltuttafatg. En connex cun quella sanaziun ein
las auas vegnidas spartidas.
Canalisaziun dadens la mazlaria Curschellas
Protecziun dalla natira
Dismessa da rumien
Il stabiliment ed il menaschi dalla rimnada da rumien ei
staus pli u meins sco tochen da cheu. Ei vegn vinavon
rimnau mo rumians blocconts da persunas privatas.
Rumians da baghetgs ni da firmas ston vegnir dai giu
ella deponia regiunala a Rueun. Rumians da casa ston
vegnir deponi ellas tegias da rumians existentas, las
qualas vegnan svidadas entras la Regiun Surselva. Da
niev vegnan tuts rumians pesai en nies stabiliment da
rimnada. Cun ina gronda stadera (40 to), sin la quala ins
sa carrar cugl auto, eis ei pusseivel dad eruir la peisa
exacta. Sin fundament da quella peisa ei la taxa da diever
da pagar.
12
Per vegnir suenter als basegns e giavischs da nos convischins
havein nus aviert la deponia per la rimnada dils
rumians verds daniev era la mesjamna. Sper il venderdis
e la sonda dein nus aschia la pusseivladad da nezegiar
ils survetschs era duront l’jamna. La purschida dalla
deponia Prau Cumin vegn nezegiada fetg savens. In
bien survetsch duei garantir in bien uorden en vischnaunca.
Stadera deponia Prau Cumin
Malauras
Ils onns vargai essan nus stai protegi da pli gronds
donns da malaura. Igl onn 2011 han grondas draccas
caschunau differents donns vid vias d’uaul, vias tier las
alps, vid punts e rempars. Tut ils donns ein vegni mess
en uorden cuort suenter. En tut ha la vischnaunca impundiu
rodund 60’000.00 francs.
Drun suenter las malauras
In project che fatschenta nus il proxim onn ei il rempar
dil Drun, il qual duei vegnir prolunghius sut la punt dalla
via cantunala entochen giu las Tgaglias. Cun ina prolungaziun
eis ei garantiu che la zona da mistregn sa vegnir
nezegiada senza impediments. Las zonas da prighel
vegnan reducidas marcantamein.