Rapport da gestiun e quen 2011

Quei che dat a nus forza en nossa lavur e fa plascher,
ein la segirtad e la cuntentientscha ch’ils cussadents
sentan, vivan ed expriman era adina puspei a caschun
da discuors. Buca d’emblidar ein era ils lauds ch’ils
parents dils cussadents fan adina puspei enviers nossa
casa da tgira. Per quei motiv meretan tut ils collaboraturs
in grond engraziament.
Lavur da giuventetgna Cadi
Las vischnauncas dalla Cadi han dapi igl onn 2010 ina
cunvegna da prestaziun cun Giuventetgna Cadi che
regla la lavur aviarta da giuventetgna.
La lavur aviarta da giuventetgna Cadi sustegn ils giuvenils
en l’organisaziun da differentas activitads en lur
temps liber. Ina purschida impurtonta ein ils locals da
giuventetgna. A Sedrun ei quei La Talina ch’ei mintgamai
aviarta dus venderdis el meins duront il temps da
scola. Plinavon sustegn Giuventetgna Cadi differents
projects per ils giuvenils ella Cadi. Igl onn 2011 ei quei
per exempel stau in film dalla giuvna Lara Spescha ed
ina concurrenza da graffitis eav.
Graffiti a Sedrun
La promotura dalla lavur da giuventegna ei Gabriela Cabalzar.
Ella tgamuna ils locals da giuventegna ed organisescha
las activitads da Giuventegna Cadi. Igl onn
2011 ha ella serrau giu la scolaziun da promotura da
giuventetgna cun success.
Segirtad
Pumpiers
Igl onn 2011 ha ei deplorablamein dau in barschament
a Sedrun. Gievgia, ils 22 da settember 2011 daventa la
Casa Spinatscha, in albiert per giuvenils cun ina part
casa da habitar a Sedrun, unfrenda dallas flommas.
Persunas vegnan buc blessadas. L’entira basa da pumpiers
da Sursassiala ei stada en acziun. Rodund 80 persunas
han cumbattiu il fiug ni han procurau per
l’infrastructura sil plaz.
24
Mo grazia ad ina tschaghegna, bia lavur da maun e cun
agid digl autoscala eis ei stau pusseivel da dar damogn
e finalmein stizzar il fiug.
Barschament Casa Spinatscha
Agricultura
Concept da colligiaziun per surfatschas ecologicas
Dapi igl 1. da matg ei l’ordinaziun davart la promoziun
regiunala dalla qualitad e dalla colligiaziun da surfatschas
ecologicas da cumpensaziun ell’agricultura en
vigur. Cun questa ordinaziun promova la confederaziun
la qualitad e la colligiaziun da surfatschas ecologicas da
cumpensaziun. Tenor l’ordinaziun conceda la confederaziun
contribuziuns supplementaras per surfatschas
cun ina qualitad ecologica speciala.
L’entschatta digl onn ha la cuminonza da lavur biro Camenisch
& Zahner e LBBZ Plantahof presentau il concept
per nossa vischnaunca. El decuors digl atun han
las contractivas cun ils purs giu liug. La finamira ei stau
da saver prender bia surfatschas sut contract. Aschia
eis ei pusseivel da mantener quellas surfatschas dad
aulta qualitad era pigl avegnir. Sper palius vegnan era
surfatschas schetgas cun in grond diember da jarvas
schurmegiadas. La finamira ei era da colligiar quellas
differentas surfatschas e scaffir aschia territoris pli
gronds cun aulta qualitad ecologica.
La promtadad dils purs ei stada gronda da metter entuorn
quei concept. Considerablas surfatschas ein vegnidas
pridas sut contract. En in proxim pass vegn mirau
sche quellas mesiras portan era il success giavischau.
Suenter treis onns eis ei previu dad analisar il success
dallas mesiras pridas ed adattar quellas per megliurar il
success.
Sedrun, avrel 2012
Pancrazi Berther, president communal
Lucas Collenberg, menader center communal