Rapport da gestiun e quen 2011

Rapport da gestiun e quen 2011
Preziadas convischinas
Preziai convischins
La colligiaziun dils territoris da skis Andermatt – Sedrun
ha fatschentau fermamein la suprastonza communala
duront igl onn 2011. Dapi igl onn 2005 ei enconu-schent,
ch’igl investur egipzian, Samih Sawiris, vegn a realisar
ad Andermatt in resort da turissem. El fratemp ein gia
plirs tschien milliuns francs vegni investai ella cumplexa
planisaziun e realisaziun dils emprems edifecis e baghetgs.
En quei connex ei adina era vegniu discurriu da
vuler modernisar ed augmentar la valur dils territoris da
skis Gemsstock, Nätschen e Sedrun Alpsu. A caschun
d’ina seduta dils 16 da mars 2006 ei l’emprema gada
vegniu informau e discurriu da vuler sviluppar e formar
ils territoris da skis denter Andermatt e Sedrun. A quella
seduta denter ils representants d’omisduas vischnauncas
e societads da pendicularas ei vegniu decidiu
d’introducir il proceder dalla planisaziun directiva per
ina futura colligiaziun dils dus territoris da skis Andermatt
e Sedrun. En in emprem pass ei lu vegniu elaborau
in schinumnau masterplan sur igl entir intschess.
Suenter in intensiv ed extendiu proceder, el qual ils representants
dalla Sedrun Pendicularas SA (SPSA) e dalla
vischnaunca Tujetsch ein stai involvai fetg stretg, han
las duas regenzas dils cantuns Uri e Grischun approbau
ils 5 da fenadur 2011 las adattaziuns dil plan directiv
infrastructura da skis Val Ursera/Alpsu. Cun quella
decisiun positiva ein ils pertuccai stai en possess
dallas cundiziuns necessarias dalla planisaziun dil territori
per saver introducir la necessaria procedura da
concessiun ed approbaziun dils plans. Quella damonda
ei vegnida inoltrada silsuenter entras Andermatt Swiss
Alps (ASA) agl uffeci federal da traffic (BAV) a Berna, en
substituziun dallas duas societads da pendicularas da
Sedrun ed Andermatt. Cun il plan directiv e la procedura
da concessiun ed approbaziun dils plans cun in volumen
d’investiziuns da sur 200 milliuns francs, vegn la
segirtad da planisaziun a liunga vesta per la cuntinuaziun
dil process dada. Ils partenaris cumpigliai (ASA,
SPSA, AGS, cantuns Uri e Grischun) ein secunvegni, da
realisar en in’emprema etappa in volumen d’investiziuns
da rodund 130 milliuns francs e quei prioritar ella colligiaziun
Nätschen-Gütsch sil pass Alpsu sco era investiziuns
absolut necessarias al Gemsstock. Las proximas
investiziuns dueien succeder en etappas ed en rama
dils mieds finanzials recaltgai entras la nova societad.
Parallel tier quei fetg pretensius proceder dalla planisaziun
dil territori, han las duas societads da pendicularas
SPSA ed AGS, ensemen cun l’ASA, elaborau il plan
d’investiziun ed il plan da business. Plinavon han ins era
discussiunau e reglau las damondas pertuccont la
structura, organisaziun e finanziaziun dil project arena
da skis Andermatt-Sedrun. Sut il tgamun dil directur
dall’economia publica e cusseglier guvernativ dil cantun
4
Uri, Isidor Baumann, han giu liug ils davos meins intensivas
contractivas denter ils partenaris. En quellas gruppas
da lavur ein differents models da structura vegni
elaborai, analisai e discussiunai. La finfinala ei la proposta
resp. il model da nies president dil cussegl
d’administraziun, dr. Peter Furger, vegnius valetaus sco
varianta la pli praticabla e che anfla plitost in consens
da tuts pertuccai. Suenter contractivas intensivas, miniziusas
denton correctas - era denter Peter Furger e
Samih Sawiris persunalmein - han ins la finfinala anflau
ina cunvegnientscha. Quei impurtont e decisiv pass ha
possibilitau a Samih Sawiris d’inoltrar ils 12 resp. ils 26
da mars 2012 allas pendicularas da Sedrun ed Andermatt
ina ligionta offerta per surprender las aczias dallas
duas societads. La decisiun da desister sin la maioritad
dallas aczias cumpeta ella vischnaunca Tujetsch alla
votaziun all’urna. Quella ei previda igl 1. da fenadur
2012. Entochen lu han aunc differentas occurrenzas
d’informaziun per la populaziun liug.
En connex cun la colligiaziun dils territoris da skis Andermatt
– Sedrun ei era vegniu instradau ina revisiun
parziala dalla planisaziun locala concernent il pass Alpsu.
Quei ei succediu en coordinaziun cun la vischnaunca
Andermatt. La finamira ei da crear ina zona per indrezs
turistics. Cun la creaziun da quella nova zona
creschan era las schanzas da saver mantener la tuor da
signals. Tala stuess numnadamein vegnir demontada
entochen igl atun 2012. La numnada midada da zona
sto vegnir sancziunada entras ina votaziun all’urna.
Ils 15 da matg 2011 ha il pievel tuatschin approbau la
revisiun parziala dalla planisaziun locala e dalla lescha
da baghegiar en connex cun il Resort Dieni. Ils 29 da
november 2011 ha la Regenza grischuna approbau la
fatschenta. Las organisaziuns digl ambient han denton
inoltrau protesta encunter la decisiun dalla Regenza tier
la dertgira administrativa, aschia che la revisiun ei aunc
buca en vigur. Dapresent prepara la vischnaunca sia
posiziun permauns dalla dertgira.
Ils 23 da settember 2011 ha la quarta conferenza dalla
Regiun San Gottardo giu liug a Sedrun. La colligiaziun
dils territoris da skis Andermatt – Sedrun ei stada el
center dallas discussiuns. Cun la fin digl onn 2011 ei
l’emprema fasa dil project San Gottardo ida a fin. La
cuntinuaziun succeda en rama dil program San Gottardo
2020. Quei program promova en rama dalla nova
politica regiunala projects che creeschan valur. Muort la
Regiun San Gottardo sa il project dalla colligiaziun dils
territoris da skis profitar da contribuziuns davart dil
maun public.