Rapport da gestiun e quen 2011

Pastgas
Exposiziun »Nossa scola»
Per igl onn 2012 stat la scola da nossa vischnaunca el
center dil museum. Ils 17 da december 2011 ha la vernissascha
da quella exposiziun speciala giu liug. La sala
dil museum fuorma dapresent ina stanza da scola e la
stiva egl emprem plaunterren ei ussa ina scoletta. Cun
cudischs, carnets, utensils da scola, plinavon cun bia
fotografias da classas vulein nus dar veta e viventar la
scola d’antruras sco quella dad oz. Ina gronda schelta
da films muossa activitads dalla scola dils davos onns.
Prendei la caschun d’admirar la scola veglia e nova, da
seregurdar digl agen temps da scola cun visitar uonn il
museum La Truaisch.
Stanza da scola veglia
Museum en banca a Mustér
L’uniun dils museums grischuns ha festivau igl onn 2011
il giubileum da 30 onns. En connex cun quei giubileum
ha l’uniun l’antschau in exposiziun ambulonta egl entir
cantun Grischun tier las Bancas Raiffeisen. Era nies
museum ha priu part da quell’exposiziun ambulonta ed
ei sepresentaus tier la Banca Raiffeisen Cadi a Mustér
en la vitrina numnada museum da banca cun in exponat
dalla sparta da cultura da glin.
18
Occurenzas culturalas e sportivas
Stalla Libra
Ils iniziants Arthur Loretz, Fabio ed Angela Hendry, han
giu l’idea da dar nova veta ad in baghetg d’agricultura
cun utilisar il baghetg per tut in auter intent. In clavau
amiez il vitg da Sedrun ei vegnius structuraus aschia
ch’el survescha oz per exposiziuns d’art modern. Ils 6
d’uost 2011 ha la vernissascha dall’emprema ediziun
giu liug en la Stalla Libra. Als iniziants eis ei reussiu da
realisar en quei baghetg in spazi da cultura cun ina atmosfera
e tempra tut speciala. Il baghetg survescha era
a serradas da lectorats e da concerts. Cun la Stalla Libra
han ils iniziants augmentau la purschida culturala e turistica
en nossa vischnaunca e quei engaschi ed idealissem
mereta in grond laud e renconuschientscha.
Forum cultural Tujetsch / Nums locals da Tujetsch
Cun il Forum cultural Tujetsch posseda la vischnaunca
da Tujetsch in’uniun zun impurtonta ed activa che promova
e tgira cun grond engaschi ils beins culturals da
nossa vischnaunca. Il settember 2011 ha il Forum cultural
Tujetsch presentau alla populaziun il project dils
nums locals da Tujetsch. Cun Google Earth han ils
nums locals tuatschins anflau ina plattafuorma moderna
da sepresentar alla populaziun ed a tuts interessai.
Cun quei project ha il Forum cultural Tujetsch dau nova
veta als nums locals ed aschia possibilitau il manteniment
da quella cultura indispensabla dils tschentaners
vargai. Il Forum cultural Tujetsch astga esser loschs da
quella grondiusa lavur e nus engraziein grondamein als
responsabels dil forum per lur grondas stentas en favur
da nossa cultura locala.
Surselva Marathon
Ils 28 e 29 da schaner 2012 ha il Surselva Marathon giu
liug gia per la 23avla ga. La sonda sera ei la staffetta da
plausch vegnida organisada e la dumengia ein las curridras
ed ils curriders semiserai a caschun dil maraton.
L’occurrenza ei sco mintg’onn stada organisada fetg
bein. Il grond diember da participonts e las reacziuns
da tals confirmeschan quei. Il Surselva Marathon gauda
in bien num ed ei in’impurtonta occurrenza per nossa
val. Sco in dils sponsurs principals engrazia la vischnaunca
al comité d’organisaziun ed a tut ils gidonters
per il grond engaschi e la buna lavur.
Uniuns
Nossas numeruas uniuns culturalas e sportivas ein era
stadas duront igl onn 2011 fetg activas ed han prestau
gronda e buna lavur pil beinstar general da nossa vischnaunca.
Quellas activitads merettan menziun e nossa
renconuschientscha. A tut las persunas cumpigliadas
admettein nus in cordial engraziament per lur engaschi.
Il trend dils davos onns muossa deplorablamein
ch’igl ei fetg grev d’anflar persunas ch’ein promtas da
metter a disposiziun lur temps liber per engaschis. Lein
sperar ch’ei reusseschi allas uniuns da semantener e
vinavon prestar lur impurtonta lavur.