Self-Studiegids vir Taalonderwysers - Thutong

Aan die onderwyser
3
1. INLEIDING
Hierdie self-studiegids poog om onderwysers en leerders deeglik oor die skryf van kreatiewe, langer
transaksionele en korter transaksionele / naslaan / informatiewe tekste vir Afrikaans Huistaal, Eerste en Tweede
Addisionele Tale en die assessering daarvan in te lig. Dit is ook ’n poging om standaardisering te bewerkstellig
en om verwarring wat mag bestaan, uit die weg te ruim.
In Afdeling 2 word die onderwyser aktiwiteite gegee om self vertroud te raak met die definisies van tekste wat
geproduseer moet word, skryf as ‘n proses, die beplanning vir skryfwerk en die assessering daarvan.
Definisies, formate en wenke vir langer transaksionele tekste en korter transaksionele / naslaan / informatiewe
tekste word in Afdeling 3 onder Aanhangsels as ‘n hulpbron verskaf. Die Afdeling sluit ook die
assesseringsrubrieke in. Dit is verkry in die Riglyne vir die opstel van Graad 12 Eksamenvraestelle vir Tale 2009,
Departement van Onderwys. Die Afdeling fokus ook op voorbeeldvrae en wenke om onderwysers se werklas
t.o.v. skryfwerk te vergemaklik
Die seleksie van tekste wat deur leerders in Graad 10-12 geproduseer moet word en waarop gefokus gaan word,
is in die Graad 10-12 Nasionale Kurrikulum Vakverklarings vir Huistaal, Eerste Addisionele en Tweede
Addisionele Tale en die Januarie 2008 Assesseringsriglyne vir Tale verkry. Dit is die taak van die onderwyser om
die voorbeelde by die vlak wat hy/sy onderrig, aan te pas.
Enige ander formate van tekste wat geproduseer moet word kan ook korrek wees. Hierdie formate moet egter in
’n handboek wat op die voorgeskrewe katalogus van die Nasionale Departement van Onderwys voorkom, wees.
Die Hoof-Nasiener of Interne Nasien Moderator moet seker maak dat hulle die alternatiewe formaat tydens die
nasionale memorandum besprekings onder die aandag van die panele bring sodat dit by die memorandum
gevoeg kan word.
Self-Studiegids vir Taalonderwysers: Skryf van tekste, Julie 2010